Bokamoso ba Bokreste Ke Bofe?

NA LEFATŠE le tla sokolohela Bokresteng, kapa Bokreste bo tla fela? Na Bokreste bo ile ba lula bo hloekile joaloka lebone le khanyang lefatšeng le lefifi, kapa bo ile ba silafatsoa? Tsena ke lipotso tse ntseng li re khathatsa ho tla fihlela kajeno.

Ka papiso e bonolo, Jesu o ile a bontša hore hang ka mor’a hore a jale peō ea Bokreste, sera, e leng Satane, se ne se tla kena-kenana le mosebetsi oo. (Matheu 13:24, 25) Kahoo, hase feela liphetoho tse bileng teng sechabeng tse entseng hore Bokreste bo fetohe lilemong tse makholo a seng makae a pele ka mor’a tšebeletso ea Jesu. Ke mesebetsi ea sera, e leng mese- betsi ea Satane. Kajeno likereke tsa Bokreste-’mōtoana li ntšetsa pele liphoso tse entsoeng nakong e fetileng, ka lebaka leo li kotula litho- loana tsa seo.—2 Bakorinthe 11:14, 15; Jakobo 4:4.

Bokreste bo Hlaseloa ka Sekhukhu

Jesu o ile a bolela esale pele hore lithuto tsa hae li ne li tla silafatsoa. O ile a re: “’Muso oa maholimo o joaloka motho ea ileng a jala peō e ntle tšimong ea hae. Ha batho ba ntse ba robetse, sera sa hae sa tla ’me sa jalella mofoka har’a koro, ’me sa tloha.” Se makatsang ke hore ha bahlanka ba hlokomelisa monna enoa ka ketso ena e khopo ’me ba kōpa hore a ba lumelle hore ba bokelle mofoka, monna enoa o ile a re: “Che; esere ha le ntse le bokella mofoka, la tšoha le o fotholella le koro. Li tloheleng li hōle hammoho ho fihlela ha ho kotuloa; ’me ka nako ea kotulo ke tla bolella bakotuli, Pele bokellang mofoka ’me le o tlame mangata hore o chesoe, joale le e’o bokellela koro ka tlung ea ka ea polokelo.”—Matheu 13:24-30.

Joalokaha Jesu ka seqo a hlalositse, papisong ena ea hae monna ea jetseng koro tšimong o emela Jesu, ’me peō eo a e jetseng e emela Bakreste ba ’nete. Sera se jetseng mofoka har’a koro se emela “Diabolose.” Mofoka o emela bakoenehi ba hlokang molao bao ka bohata ba ipolelang hore ke bahlanka ba Molimo. (Matheu 13:36-42) Moapostola Pauluse o ile a qaqisa se neng se tla etsahala. O ile a re: “Kea tseba hore ka mor’a hore ke tlohe liphiri tse hatellang li tla kena har’a lōna ’me li ke ke tsa tšoara mohlape ka mosa, ’me har’a lōna ho tla hlaha batho ’me ba bue lintho tse sothehileng hore ba ikhulele barutuoa ka mor’a bona.”—Liketso 20:29, 30.

Bokreste Boa Silafatsoa

Na papiso ea Jesu le seo Pauluse a se boletseng esale pele li ile tsa phethahala? Ho fela ho le joalo. Banna ba iphahamisang ba ile ba qala ho laola phutheho eo Jesu a neng a e thehile ’me ba e sebelisa molemong oa bona. Jesu o ne a ile a re ho balateli ba hae: “Ha le karolo ea lefatše.” (Johanne 15:19) Leha ho le joalo, banna ba nyoretsoeng matla ba ile ba theha selekane le babusi ’me ba theha likereke tsa Naha tse ileng tsa ipokellela matla a mangata le leruo. Likereke tsena li ne li ruta “lintho tse sothehileng.” Ho tea mohlala, li rutile batho ho rapela Naha le ho etsa bophelo ba bona sehlabelo molemong oa naha ka ho kenella ntoeng. Ka lebaka leo, bana ba ipitsang Bakreste ba bile le seabo Lintoeng Tsa Bolumeli ’me ba bolaea batho ba bangata bao ba neng ba nka hore hase balumeli. Ba boetse ba ea ntoeng ’me ba bolaea “barab’abo bona” ba bolumeli ba habo bona. Ho hlakile hore ba ne ba sa bontše ho se nke lehlakore ha Bokreste ba bile ba sa rate baahelani.—Matheu 22:37-39; Johanne 15:19; 2 Bakorinthe 10:3-5; 1 Johanne 4:8, 11.

Ho totobetse hore likereke tseo ka lilemo tse makholo li neng li ipitsa tsa Bokreste, li mpa li kene lekokong la Bokreste feela. Sena se bontša hore na ke hobane’ng ha likereke li ntse li tsoela pele ho arohana e e-ba maquloana, li kenella lipolotiking li bile li sa natse melao ea Molimo, joalokaha re bone lihloohong tse fetileng. Litholoana tse mpe joalo ha li hlahisoe ke Bokreste ba ’nete, ho e-na le hoo, li hlahisoa ke Bokreste ba bohata, bo jetsoeng ke Diabolose. Bolumeli boo ba bohata bo lebile hokae? Joalokaha Jesu a bontšitse papisong ea hae, bo ke ke ba felisoa feela ke ho hloka batšehetsi. Bo tla ahloloa ’me bo timetsoe.

Bakreste ba ’Nete ba Khanya Lefifing

Leha ho le joalo, pele “mofoka” oa Bokreste ba bohata o bokelloa o bile o timetsoa, papiso ea Jesu e hlalosa ntho e ’ngoe hape e lokelang ho etsahala. Ka lilemo tse makholo “mofoka” oa Bokreste ba bohata o ile oa hōla haholo hoo “koro” ea Bokreste ba ’nete e ileng ea pupetsoa. Empa Jesu o boletse hore koro e tla aroloa ho mofoka nakong ea “kotulo” eo a itseng e emela “qetello ea tsamaiso ea lintho.” O ile a boela a re: “Ka nako eo ba lokileng ba tla khanya ka ho phatsimang joaloka letsatsi.” (Matheu 13:39-43) Bopaki bo bontša hore haesale re phela nakong ea qetello ea tsamaiso ea lintho ho tloha Ntoeng ea I ea Lefatše, e loannoeng lilemong tse ka holimo ho 90 tse fetileng. (Matheu 24:3, 7-12) Na karolo ee ea papiso ea Jesu eo e neng e le boprofeta le eona e phethahetse?

Bakreste ba ’nete ba arotsoe ho “mofoka” oa Bokreste-’mōtoana. Lipaki Tsa Jehova li “khanya ka ho phatsimang joaloka letsatsi,” li thusa ba bang hore ba tsebe Molimo oa ’nete, Jehova. Lipaki ha li khelle melao ea hae fatše. Ho e-na le hoo, hangata ha batho ba fetoha Lipaki ba tlameha ho etsa liphetoho tse khōlō tseleng eo ba phelang ka eona e le hore ba mamele melao-motheo ea Bokreste e fumanoang ka Bibeleng.

Lipaki Tsa Jehova ha li fane ka boithabiso libokeng tsa tsona, empa li fana ka thuto ea Bibele e sa lefelloeng. Li boetse li bontšana lerato le mofuthu le botsoalle, e leng makhabane ao li ithutang ’ona ha li ntse li ithuta Mangolo. Li lumela hore Molimo o tla fetola lefatše paradeise ’me a e fe batho ba bonolo ba lefatše hore ba lule ho eona, joalokaha a ne a rerile ho tloha qalong. Empa pele seo se etsahala, ho lokela ho tlosoe tšusumetso e mpe ea bolumeli ba bohata lefatšeng, boo ka Bibeleng bo bitsoang Babylona e Moholo. Ho latela boprofeta ba Bibele, haufinyane Jehova o tla tlisa phetoho eo e khōlō.—Matheu 5:5; Tšenolo 18:9-10, 21.

Hang ha moloko oa batho o mamelang o lokolotsoe mekhoeng e thetsang ea bolumeli ba bohata, borapeli ba ’nete ba Bokreste bo tla kopanya batho bohle ba phelang lefatšeng. Bokamoso ba Bokreste ba ’nete boo Jesu a bo jetseng e tla ba bo babatsehang hakaakang! Paradeise e neng e le teng Edene e tla boela e be teng lefatšeng la khotso, moo bolumeli bo bakang likarohano bo ke keng ba hlola bo baka likhohlano hape!

[Setšoantšo se leqepheng la 7]

“Sera sa hae sa tla ’me sa jalella mofoka.”—Matheu 13:25

[Litšoantšo tse leqepheng la 8, 9]

U mengoa ka mofuthu hore u tle Holong efe kapa efe ea ’Muso ea Lipaki Tsa Jehova, moo ho fanoang ka thupelo ea Bibele e sa lefelloeng

[Setšoantšo se leqepheng la 9]

“Joale le e’o bokellela koro ka tlung ea ka ea polokelo.”—Matheu 13:30