“Ba Tlala Moea o Halalelang”

 1. Hlalosa hore na ho ne ho e-ba joang Moketeng oa Pentekonta.

KE THABO feela literateng tsa Jerusalema.a Mosi o lopalla o tloha aletareng ea tempele ha Balevi ba bina Hallel (Pesaleme ea 113 ho ea ho 118); ho ka etsahala hore motho a le mong oa e phokola ebe ba bang baa e lumela. Baeti baa phethesela literateng. Ba tsoa libakeng tse hole tse kang Elame, Mesopotamia, Kapadosia, Pontase, Egepeta le Roma.b Ho etsahala’ng? Ke Pentekonta, eo hape ho thoeng ke “letsatsi la ho tlisa lihlahisoa tsa pele tse butsoitseng.” (Num. 28:26) Mokete ona oa selemo le selemo o ba qetellong ea kotulo ea harese le qalong ea kotulo ea koro. Ke letsatsi la thabo.

 2. Ho etsahala lintho life tse hlollang ka Pentekonta ea 33 C.E.?

² Hoo e ka bang ka hora ea borobong hoseng hona ho pholileng hamonate nakong ea selemo ka 33 C.E., ho etsahala ntho e ’ngoe e tla lula e tsotoa ka lilemo tse makholo. Ka tšohanyetso, leholimong ho hlaha “lerata . . . le joaloka la moea o fokang ka sekhahla,” kapa “molumo . . . o kang oa moea o fokang ka sefefo.” (Lik. 2:2; Bibele ea Sesotho) Lerata lena le tlala ntlo eo barutuoa ba Jesu ba ka bang 120 ba bokaneng ho eona. Ka mor’a moo, ho etsahala ntho e hlollang. Ba bona maleme a kang a mollo ’me ka leng la ’ona le lula holim’a e mong le e mong oa bona.c Joale, ba “tlala moea o halalelang” ’me ba qala ho bua lipuo tse sa tšoaneng! Ha barutuoa ba tloha moo, baeti ba kopanang le bona literateng tsa Jerusalema baa makala, hobane barutuoa ba khona ho buisana le bona! Ka sebele, e mong le e mong o utloa ba ‘bua puo ea hae.’—Lik. 2:1-6.

 3. (a) Ke hobane’ng ha ho ka thoe se etsahetseng ka Pentekonta ea 33 C.E. ke sa bohlokoa historing ea borapeli ba ’nete? (b) Puo ea Petrose e ne e amana joang le ho sebelisoa ha “linotlolo tsa ’Muso”?

³ Tlaleho ena e thahasellisang e hlalosa ketsahalo ea bohlokoa borapeling ba ’nete—e leng ea ho thehoa ha sechaba sa Iseraele ea moea, phutheho ea Bakreste ba tlotsitsoeng. (Bagal. 6:16) Empa ha ho felle moo. Ha Petrose a bua le letšoele letsatsing leo, o ile a sebelisa senotlolo sa pele sa “linotlolo tsa ’Muso” tse tharo, tse neng li tla bulela lihlopha tse sa tšoaneng monyetla oa ho fumana litlhohonolofatso tse khethehileng. (Mat. 16:18, 19) Senotlolo sena sa pele se ile sa thusa Bajuda le basokolohi ba Bajuda hore ba amohele litaba tse monate ’me ba tlotsoe ka moea o halalelang oa Molimo.d Ka tsela eo e ne e tla ba karolo ea Iseraele ea moea, ’me ba be le tšepo ea ho busa e le marena le baprista ’Musong oa Mesia. (Tšen. 5:9, 10) Hamorao, monyetla oo o ne o tla fuoa Basamaria le Balichaba. Bakreste ba kajeno ba ka ithuta’ng liketsahalong tsa bohlokoa tsa Pentekonta ea 33 C.E.?

 4. Ke joang phutheho ea Bakreste ea kajeno e ntšetsang pele se qaliloeng ke phutheho e thehiloeng ka 33 C.E.?

⁴ Phutheho ea Bakreste e thehiloe ka barutuoa ba ka bang 120 bao ‘kaofela ba neng ba le hammoho sebakeng se le seng,’ kamoreng e ka holimo, ’me ba tlotsoa ka moea o halalelang. (Lik. 2:1) Qetellong ea letsatsi leo, phutheho eo e ne e se e e-na le litho tse kolobelitsoeng tse likete. Eo e ne e le qalo feela ea kholo ea mokhatlo o hlophisitsoeng o ntseng o hola le kajeno! Ruri Molimo o sebelisa banna le basali ba mo tšabang—e leng phutheho ea Bakreste ea kajeno—hore ‘litaba tse monate tsa ’Muso li boleloe lefatšeng lohle hore batho ba lichaba tsohle ba li utloe’ pele lefatše le fela.—Mat. 24:14.

 5. Ho kopanela le phutheho ea Bakreste ho ne ho tla ba le molemo ofe lekholong la pele la lilemo le kajeno?

⁵ Hape phutheho ea Bakreste e ne e tla matlafatsa batlotsuoa moeeng, ’me hamorao e matlafatse “linku tse ling.” (Joh. 10:16) Pauluse o ile a bontša kamoo a ananelang hore ebe litho tsa phutheho lia tšehetsana ha a ngolla Bakreste ba Roma a re: “Ke labalabela ho le bona e le hore ke le fe mpho e tsoang ho Molimo hore le tle le matlafale kapa e le hore ’na le lona re ka khothatsana ka tumelo ea rona.”—Bar. 1:11, 12.

6, 7. Kajeno phutheho ea Bakreste e phetha taelo ea Jesu ea ho ruta batho ba lichaba tsohle joang?

⁶ Kajeno, phutheho ea Bakreste e na le sepheo se tšoanang le seo e neng e e-na le sona lekholong la pele la lilemo. Jesu o ile a fa barutuoa ba hae mosebetsi o thabisang le hoja ba ne ba tla tobana le litšitiso. O ile a re ho bona: “Le etse batho ba lichaba tsohle barutuoa, le ba kolobetse ka lebitso la Ntate le la Mora le la moea o halalelang, le ba rute ho mamela lintho tsohle tseo ke le laetseng tsona.”—Mat. 28:19, 20.

⁷ Jehova o sebelisa phutheho ea Bakreste ea Lipaki Tsa Jehova ho etsa mosebetsi oo kajeno. Ke ’nete hore ha ho bonolo ho ruta batho ba buang lipuo tse sa tšoaneng. Ho sa tsotellehe seo, Lipaki Tsa Jehova li hatisitse lingoliloeng tse thehiloeng Bibeleng ka lipuo tse fetang 1 000. Haeba u ba teng kamehla libokeng tsa phutheho ea Bakreste ’me u etsa mosebetsi oa ho bolela ka ’Muso le oa ho etsa barutuoa, u na le lebaka la ho thaba. U e mong oa ba seng bakae lefatšeng kajeno ba nang le tlotla ea ho paka ka ho phethahetseng ka lebitso la Jehova!

 8. Re fumana molemo ofe ha re le libokeng?

⁸ Jehova Molimo o fane ka barab’abo rona lefatšeng ka bophara ho u thusa ho mamella bophelo bo thata u ntse u thabile. Pauluse o ile a ngolla Bakreste ba Baheberu a re: “A re tsotellaneng e le hore re ka susumeletsana ho ba lerato le ho etsa lintho tse ntle. Re se ke ra tlohela ho bokana ’moho joalokaha ba bang ba tloaetse empa re khothatsane. Re etse lintho tsena le ho feta hobane rea bona hore letsatsi le ntse le atamela.” (Baheb. 10:24, 25) Phutheho ea Bakreste ke mpho e tsoang ho Jehova bakeng sa hore u khothatse ba bang le bona ba u khothatse. Atamelana le bara le barali beno ba Bakreste. Le ka mohla u se ke ua tlohela ho ea libokeng tsa Bakreste!

9, 10. Ba bang ba entse’ng hore ba khone ho pakela batho ba buang lipuo tsa linaha tse ling?

⁹ Ak’u inahanele hore letšoele le kopakaneng la Bajuda le basokolohi le ile la thaba hakaakang ka Pentekonta ea 33 C.E.! Mohlomong boholo ba ba neng ba le teng bo ne bo bua Segerike kapa Seheberu. Empa “barutuoa ba bua lipuo tsa bona.” (Lik. 2:6) Ka sebele e tlameha ebe batho bao ba ile ba ameha lipelo ha ba utloa litaba tse monate ka lipuo tsa bona. Ke ’nete hore Bakreste kajeno ha ba na lineo tsa mohlolo tsa ho bua lipuo tsa linaha tse ling. Leha ho le joalo, ba bangata ba ithaopela ho bolella batho ba lichaba tsohle molaetsa oa ’Muso. Ka tsela efe? Ba bang ba ithutile puo e ncha e le hore ba ka sebeletsa liphuthehong tse haufi le moo ba lulang teng tsa lipuo tsa linaha tse ling kapa esita le ho fallela linaheng tse ling. Hangata ba hlokometse hore batho ba khahloa haholo ke boiteko ba bona.

¹⁰ Nka ka mohlala, Christine, ea ileng a ithuta Segujarati hammoho le Lipaki tse ling tse supileng. Ha a kopana le mosali ea sebetsang le eena ea buang Segujarati, o ile a mo lumelisa ka puo ea hae. Mosali enoa o ile a thaba a ba a batla ho tseba hore na ke hobane’ng ha Christine a leka ka matla ho ithuta puo e thata hakana ea Segujarati. Christine o ile a mo pakela. Mosali enoa o ile a re ho Christine: “E tlameha ebe molaetsa oa lona ke oa bohlokoa e le kannete.”

11. Re ka itokisetsa ho pakela batho ba buang lipuo tse ling joang?

¹¹ Ke ’nete hore hase bohle ba ka ithutang puo e ’ngoe. Leha ho le joalo, re ka lula re le malala-a-laotsoe ho bolella batho ba lipuo tse ling molaetsa oa ’Muso. Joang? Ka ho sebelisa JW Language^® app ho ithuta ho lumelisa ka e ’ngoe ea lipuo tse buuoang moo u lulang. U ka boela oa ithuta lipolelo tse seng kae tse ka etsang hore motho a batle ho bua le uena. Ba bontše jw.org. Mohlomong u ka ba bontša livideo le lingoliloeng tse fumanehang ka lipuo tsa bona. Ha re sebelisa lithulusi tsena tšimong, re tla thaba joaloka Bakreste ba mehleng ea pele. Batho ba neng ba tsoa linaheng tse ling ba ile ba makala ha ba utloa litaba tse monate ka “lipuo tsa bona.”

12. (a) Moprofeta Joele o ile a re’ng ha a bolela mohlolo o neng o tla etsahala ka Pentekonta ea 33 C.E.? (b) Ke hobane’ng ha ho ne ho lebeletsoe hore boprofeta ba Joele bo tla phethahala lekholong la pele la lilemo?

¹² “Petrose a ema” e le hore a bue le letšoele la lichaba tse sa tšoaneng. (Lik. 2:14) O ile a hlalosetsa bohle hore ke Molimo ea neng a fane ka matla a mohlolo a ho bua lipuo tse sa tšoaneng e le ho phethahatsa boprofeta ba Joele bo reng: “Ke tla fa motho e mong le e mong moea o halalelang.” (Joele 2:28) Pele Jesu a nyolohela leholimong, o ile a re ho barutuoa ba hae: “Ke tla kopa Ntate ’me eena o tla le fa mothusi,” ’me a re mothusi eo ke “moea.”—Joh. 14:16, 17.

13, 14. Petrose o ile a leka joang ho finyella lipelo tsa batho bao a buisanang le bona, ’me re ka mo etsisa joang?

¹³ Petrose o ile a lihela likhala ka mantsoe a matla, a re ho letšoele: “Baiseraele bohle ba ke ba tsebe hore kannete Jesu enoa eo le mo khokhothetseng palong, Molimo o mo khethile hore e be Morena hape e be Kreste.” (Lik. 2:36) Bonneteng, boholo ba batho ba neng ba mametse Petrose bo ne bo le sieo ha Jesu a bolaeloa palong. Empa, kaha e ne e le karolo ea sechaba sa Bajuda, ba ne ba ikarabella bakeng sa ketso ena. Leha ho le joalo, hlokomela hore Petrose o ile a buisana le Bajuda ba habo ka tlhompho ’me a ba finyella lipelo. Sepheo sa Petrose e ne e le ho susumetsa bamameli ba hae hore ba bake, eseng ho ba nyatsa. Na mantsoe a Petrose a ile a ba khopisa? Le hanyenyane. Ho e-na le hoo, ba ile “ba utloa bohloko bo tebileng.” Ba botsa ba re: “Re etse joang?” Mohlomong tlhompho eo Petrose a neng a bua ka eona e ile ea etsa hore a finyelle lipelo tsa ba bangata, hoo ba ileng ba susumelletseha hore ba bake.—Lik. 2:37.

¹⁴ Re ka etsisa Petrose ka ho finyella batho lipelo. Ha re pakela ba bang, ha ho hlokahale hore re tsotelle ntho e ’ngoe le e ’ngoe eo mong’a ntlo a e buang e sa lumellaneng le mangolo. Ho e-na le hoo, re lokela ho bua ka lintlha tseo re lumellanang ka tsona le mong’a ntlo. Ka mor’a moo ka bohlale re ka behelana mabaka le eena ka Lentsoe la Molimo. Hangata ha linnete tsa Bibele li boleloa ka tsela e molemo joalo, ho bonolo hore batho ba lipelo li ntle ba li amohele.

15. (a) Petrose o ile a re’ng, ’me batho ba etsa joang? (b) Ke hobane’ng ha ba likete ba ileng ba utloa litaba tse monate ka Pentekonta ba ne ba tšoaneleha hore ba kolobetsoe letsatsing lona leo?

¹⁵ Ka letsatsi le thahasellisang la Pentekonta ea 33 C.E., Petrose o ile a re ho Bajuda le basokolohi ba amohetseng molaetsa oa hae: “Bakang le be le kolobetsoe.” (Lik. 2:38) Ka mor’a moo, ba ka bang 3 000 ba ile ba kolobetsoa, mohlomong ba kolobeletsoa matamong a Jerusalema kapa a pel’a eona.e Na ba entse see ka lebaka la ho nkeha maikutlo? Na tlaleho ee ke mohlala ho liithuti tsa Bibele le ho bana bao batsoali ba bona e leng Bakreste hore ba kolobetsoe ka lepotlapotla? Le hanyenyane. Hopola hore Bajuda le batho ba sokolohetseng Bojudeng ba ileng ba kolobetsoa letsatsing leo la Pentekonta ea 33 C.E. ba ne ba khothaletse ho ithuta Lentsoe la Molimo, ’me e le karolo ea sechaba se inehetseng ho Jehova. Ho feta moo, ba ne ba se ba ntse ba bontša hore baa cheseha—ba bang ba tsamaea sebaka se selelele e le hore ba be teng moketeng ona oa selemo le selemo. Ka mor’a hore ba amohele linnete tse mabapi le seo Jesu Kreste a se etsang ho phethahatsa morero oa Molimo, ba ne ba itokiselitse ho tsoela pele ho sebeletsa Molimo—empa joale e se e le balateli ba Kreste ba kolobelitsoeng.

16. Bakreste ba lekholong la pele la lilemo ba ile ba bontša moea oa boitelo joang?

¹⁶ Ka sebele Jehova o ile a hlohonolofatsa sehlopha seo. Bibele e re: “Barutuoa bohle ba bacha ba ne ba bokana ebile ba arolelana lintho tsohle. Ba ne ba rekisa lintho tsa bona ebe ba arolela bohle chelete ho ea kamoo e mong le e mong a hlokang kateng.”f (Lik. 2:44, 45) Ruri Bakreste bohle ba ’nete ba lokela ho etsisa moea oo oa lerato le boitelo.

17. Ho hlokahala hore motho a nke mehato efe e le hore a tšoanelehele ho kolobetsoa?

¹⁷ Ho hlokahala mehato e mengata ea Mangolo e le hore Mokreste a ka inehela a ba a kolobetsoa. Motho o lokela ho rua tsebo ea Lentsoe la Molimo. (Joh. 17:3) Ho hlokahala hore a bontše tumelo ’me a bakele mekhoa ea hae ea pele, a bontše hore o e soabetse e le kannete. (Lik. 3:19) Joale o tlameha ho sokoloha, kapa ho fetoha, ’me a qale ho etsa mesebetsi e metle e lumellanang le thato ea Molimo. (Bar. 12:2; Baef. 4:23, 24) Ka mor’a hore a nke mehato ena, o inehela ho Molimo ka thapelo ebe oa kolobetsoa.—Mat. 16:24; 1 Pet. 3:21.

18. Barutuoa ba kolobelitsoeng ba Kreste ba na le tlotla efe?

¹⁸ Na u morutuoa oa Jesu Kreste ea inehetseng le ho kolobetsoa? Haeba ho joalo, ananela tlotla ena. Joaloka barutuoa ba lekholong la pele la lilemo ba neng ba tletse moea o halalelang, u ka sebelisoa haholo hore u fane ka bopaki bo hlakileng ’me u etse thato ea Jehova!