Ho Tla ha Kreste—Seo ho Tla se Finyella

“SÃO PAULO E APARELOA KE TŠABO.” Ke kamoo makasine ea Veja e ileng ea hlalosa boemo bo ileng ba etsahala ka matsatsi a mane ka May 2006, ha motse o moholo le o ruileng ka ho fetisisa oa Brazil o ne o tlatlapuoa habohloko ke linokoane. Nakong eo ea ‘lihora tse fetang 100, ha motse o ne o aparetsoe ke tšabo,’ ho ile ha bolaoa batho ba ka bang 150 ba neng ba kopanyelletsa mapolesa, linokoane le baahi feela ba bang.

Hoo e ka bang lefatšeng lohle, ntho eo ho buuoang haholo ka eona litabeng ke pefo. Ho bonahala baeta-pele ba batho ba sitoa ho e emisa. Lefatše la rōna e ntse e e-ba sebaka seo ho leng kotsi haholo ho phela ho sona. Kaha hohle moo u shebang teng ho tletse litaba tse bohloko, mohlomong u ikutloa u khathetse matla. Leha ho le joalo, nako e atametse ea hore lintho li fetohe.

Jesu o ile a ruta balateli ba hae ho rapella hore ’Muso oa Molimo o tle le hore thato ea Molimo e etsahale “lefatšeng, joalokaha e etsahala leholimong.” (Matheu 6:9, 10) ’Muso ona ke puso eo ho eona Jesu Kreste, Morena oa eona, a khethiloeng ke Molimo. O tla rarolla mathata ’ohle a moloko oa batho. Leha ho le joalo, e le hore ’Muso oa Molimo o ka tlisa liphetoho lefatšeng, ho tlameha ho be le phetoho ea hore puso e tlohe matsohong a babusi ba batho ’me e ee ho Kreste. Ehlile sena ke sona seo ho tla ha Kreste ho tla se finyella.

Na Phetoho eo e Tla Etsahala ka Khotso?

Na lichaba li tla ikokobeletsa puso ea Kreste ka khotso? Moapostola Johanne o ile a fuoa pono e arabang potso eo. Johanne o re: “Ka bona sebata [tsamaiso ea lefatše ea lipolotiki] le marena a lefatše le mabotho a ’ona a bokane ho loantša [Jesu] ea palameng pere le lebotho la hae.” (Tšenolo 19:19) Ho tla etsahala’ng ka marena a lefatše ntoeng ee? Bibele e bolela hore Morena ea tlotsitsoeng oa Jehova o tla a “thumakanya ka lere la borena la tšepe, [o] tla li pshatla joalokaha eka ke sejana sa sebōpi.” (Pesaleme ea 2:9) Tsamaiso ea lipolotiki e tla tlosoa tseleng ka ho feletseng. ’Muso oa Molimo “o tla silakanya o felise mebuso ena [ea batho] kaofela, ’me o tla ema ho isa linakong tse sa lekanyetsoang.”—Daniele 2:44.

Ho tla etsahala’ng ka batho ba hanyetsang ’Muso oa Molimo? ‘Ha Morena Jesu a senoloa ho tsoa leholimong le mangeloi a hae a matla,’ ho boleloa hore Jesu o tla “tlisa phetetso holim’a ba sa tsebeng Molimo le ba sa mameleng litaba tse molemo.” (2 Bathesalonika 1:7, 8) Liproverbia 2:22 e re: “Ha e le ba khopo, ba tla felisoa lefatšeng; ha e le ba bolotsana, ba tla tlosoa ho lona.”

Ha Bibele e bua ka ho tla ha Kreste, e re: “Bonang! O tla ka maru, ’me leihlo le leng le le leng le tla mo bona.” (Tšenolo 1:7) Batho ba ke ke ba mo bona ka tsela ea sebele. Esale Jesu a nyolohela leholimong, ke motho oa moea “ea lulang leseling le sa atameleheng, eo ho seng le ea mong oa batho ea mo boneng kapa ea ka mo bonang.”—1 Timothea 6:16.

E le hore baahi ba lefatše ba ‘bone’ Jesu, ha ho hlokahale hore a bonahale mahlong a batho joalokaha Jehova a sa ka a bonahala mahlong a batho ha a ne a tlisetsa Baegepeta Likotlo Tse Leshome mehleng ea Moshe. Batho ba mehleng eo ba ne ba se na pelaelo ea hore e ne e le Jehova ea bakileng likotlo tseo, ’me ba ile ba qobelloa hore ba elelloe matla a hae. (Exoda 12:31) Ka ho tšoanang, ha Kreste a nka khato e le Mophethahatsi oa Kahlolo ea Molimo, ba khopo ba tla qobelloa hore ba ‘bone,’ kapa ba lemohe hore Jesu o sebelisoa ke Molimo hore a ba ahlole. Ba tla tseba sena hobane moloko oa batho o tla be o lemositsoe esale pele. Ka sebele, ‘leihlo le leng le le leng le tla bona Jesu, le ba mo hlabileng; ’me meloko eohle ea lefatše e tla ikotla ka ho sareloa ka lebaka la hae.’—Tšenolo 1:7.

Ho hlokahala hore ba khopo ba timetsoe le puso e khopo e tlosoe e le hore khotso ea ’nete le katleho li tsosolosoe lefatšeng. Kreste ke eena ea tla etsa sena, ’me ka mor’a moo, o tla laola litaba tsa lefatše ka botlalo, ebe ho latela liphetoho tsa bohlokoa.

Tsosoloso e Tlisang Melemo

Moapostola Petrose o ile a bua ka “tsosoloso ea lintho tsohle tseo Molimo a ileng a bua ka tsona ka melomo ea baprofeta ba hae ba halalelang ba nakong ea khale.” (Liketso 3:21) Tsosoloso ena e kopanyelletsa phetoho e tla etsahala lefatšeng nakong ea puso ea Kreste. E mong oa baprofeta bao Molimo a ileng a ba sebelisa ha a bua ka “tsosoloso ea lintho tsohle” lefatšeng, ke moprofeta Esaia, ea phetseng lekholong la borobeli la lilemo B.C.E. O ile a bolela esale pele hore Jesu Kreste, “Khosana ea Khotso,” o ne a tla tsosolosa khotso lefatšeng. Ha boprofeta ba Esaia bo bua ka puso ea Kreste, bo re: “Ho ke ke ha e-ba le bofelo bongateng ba puso ea bohosana le khotso.” (Esaia 9:6, 7) Jesu o tla ruta lichaba tsa lefatše litsela tsa khotso. Ba lulang lefatšeng, “ka sebele ba tla fumana thabo e phethehileng khotsong e ngata.”—Pesaleme ea 37:11.

Ho tla etsahala’ng ka bofuma le tlala Pusong ea Kreste? Esaia o ile a re: “Ka sebele Jehova oa mabotho o tla etsetsa lichaba tsohle, thabeng ena, mokete oa lijo tse nang le oli e ngata, mokete oa veine e nang le litšifa, oa lijo tse nang le oli e ngata tse tletseng moko, oa veine e nang le litšifa, e tlhotliloeng.” (Esaia 25:6) Mopesaleme o ile a bina a re: “Ho tla ba le lijo-thollo tse ngata lefatšeng; ho tla ba le nala holim’a litlhōrō tsa lithaba.” (Pesaleme ea 72:16) Ho phaella moo, mabapi le baahi ba lefatše rea bala: “Ka sebele ba tla haha matlo ’me ba lule ho ’ona; ka sebele ba tla lema lirapa tsa morara ’me ba je litholoana tsa tsona. Ba ke ke ba haha ’me e mong a lule teng; ba ke ke ba lema ’me e mong a je. Etsoe matsatsi a sechaba sa ka a tla ba joaloka matsatsi a sefate; ’me bakhethoa ba ka ba tla sebelisa mosebetsi oa matsoho a bona ka botlalo.”—Esaia 65:21, 22.

Hape Esaia o ile a bolela esale pele hore ho kula le lefu li tla fela. Molimo o ile a bua ka Esaia a re: “Ka nako eo mahlo a lifofu a tla tutuboloha, ’me litsebe tsa ba sa utloeng litsebeng li tla buleha. Ka nako eo ea holofetseng o tla tlōla joalokaha khama e tona e tlōla, ’me leleme la ea sa khoneng ho bua le tla hooa ka nyakallo.” (Esaia 35:5, 6) Joale “ha ho moahi ea tla re: ‘Kea kula.’” (Esaia 33:24) Molimo “o tla metsa lefu ka ho sa feleng, ’me ka sebele ’Musi Morena Jehova o tla hlakola meokho lifahlehong tsohle.”—Esaia 25:8.

Ho tla etsahala’ng ka bafu bohle ba “mabitleng a khopotso”? (Johanne 5:28, 29) Esaia o ile a profeta tjena: “Bafu ba hao ba tla phela. . . . [Ba] tla tsoha.” (Esaia 26:19) Ka sebele, ba ithobaletseng lefung ba tla phela hape!

“Molimo ke Terone ea Hao ka ho sa Feleng”

Ho tla ha Kreste ho tla etsa hore Lefatše le tsosolosoe ka ho feletseng. Lefatše le tla fetoloa paradeise e khanyang, ’me moloko oa batho o tla kopana borapeling ba Molimo oa ’nete. Na re ka kholiseha hore Jesu Kreste o tla atleha ho felisa bokhopo lefatšeng le hore a tlise maemo a ho loka?

Nahana hore na ke mang ea fileng Jesu matla le bolaoli. Ha Bibele e bua ka Mora e re: “Molimo ke terone ea hao ka ho sa feleng le kamehla, ’me lere la borena la ’muso oa hao ke lere la borena la ho loka. U ratile ho loka, ’me u hloile tlōlo ea molao.” (Baheberu 1:8, 9) Terone ea Jesu, ke hore bolaoli ba hae, e tsoa ho Jehova. Molimo ke Moqapi oa terone ena ebile ke eena Mofani oa eona. Ha ho na mathata ao Jesu a tla sitoa ho a rarolla.

Ka mor’a hore Jesu a tsosoe bafung, o ile a re ho barutuoa ba hae: “Ke filoe matla ’ohle leholimong le lefatšeng.” (Matheu 28:18) Petrose oa Pele 3:22 e re: “Mangeloi le balaoli le ba matla ba ile ba behoa tlas’a hae.” Ha ho matla kapa bolaoli bo ka atlehang ho hanyetsa Jesu. Ha ho letho le ka mo sitisang ho tlisetsa moloko oa batho molemo oa ka ho sa feleng.

Kamoo ho Tla ha Kreste ho Amang Batho Kateng

Lengolong la hae le eang ho Bathesalonika, moapostola Pauluse o ile a ngola a re: “Re hopola re sa phetse mosebetsi oa lōna o tšepahalang le mosebetsi oa lōna o lerato le mamello ea lōna ka lebaka la tšepo ea lōna ho Morena oa rōna Jesu Kreste ka pel’a Molimo le Ntate oa rōna.” (1 Bathesalonika 1:3) Pauluse o ile a bolela hore mosebetsi o behang litholoana le mamello li ne li tla ba teng ka lebaka la ho ba le tšepo ho Jesu Kreste. Tšepo eo e kopanyelletsa ho ba le tumelo ho tleng ha Kreste le tsosolosong e betleloang tsela ke ho tla hoo. Tšepo e joalo e ka tšehetsa Bakreste ba ’nete, kapa ea ba thusa hore ba mamelle, leha ba thulana le maemo a boima haholo.

Ka mohlala, nahana ka Carlos, ea lulang São Paulo, Brazil. Ka August 2003, Carlos o ile a tseba hore o na le lefu la kankere. Ho tloha ka nako eo, o se a entsoe oporeishene ka makhetlo a robeli ’me liphello tse ling tsa teng e bile tse mo utloisang bohloko le tse mo fokolisang. Leha ho le joalo, o ’nile a tsoela pele ho khothatsa ba bang. Ka mohlala, ha a ntse a bolela evangeli seterateng ka pel’a sepetlele se seholo, o ile a teana le Paki e ’ngoe ea Jehova, eo monna oa eona a neng a ntse a phekoloa ka lik’hemik’hale. Kaha Carlos ka boeena o ne a utloile liphello tse bohloko tsa kankere, o ile a khona ho khothatsa le ho tšelisa monna eo le mosali oa hae. Ka mor’a moo ba ile ba bolela kamoo moqoqo oo o ileng oa ba tsosa molota kateng. Kahoo Carlos o ile a utloa bonnete ba mantsoe ana a Pauluse: “[Molimo] ea re tšelisang matšoenyehong ’ohle a rōna, e le hore re ka khona ho tšelisa ba matšoenyehong a mofuta leha e le ofe ka matšeliso ao re ntseng re tšelisoa ka ’ona ke Molimo.”—2 Bakorinthe 1:4.

Ke eng e thusang Carlos ho ba le matla a hore a ’ne a tšelise ba bang ho sa tsotellehe ho kula ha hae? Tšepo eo a nang le eona ka ho tla ha Kreste le ka sohle seo ho tlang ho se finyella e susumelletsa Carlos hore a ’ne a ‘etse se setle.’—Bagalata 6:9.

Hape, nahana ka Samuel, eo moen’ae a ileng a bolaoa ka sehlōhō limithara tse 50 feela ho tloha habo bona. O ne a thuntsoe ka likulo tse leshome. Setopo sa hae se ile sa lula se le tseleng ka lihora tse robeli ha mapolesa a ntse a etsa lipatlisiso ka tlōlo eo ea molao. Samuel o sitoa ho lebala se ileng sa etsahala letsatsing leo. Leha ho le joalo o matlafatsoa ke tšepo eo a nang le eona ea hore Kreste o tla tlosa bokhopo bohle lefatšeng le hore puso e lokileng e tlang ho latela ka mor’a moo, e tla tlisetsa moloko oa batho litlhohonolofatso. Hangata Samuel o ipona a se a kopa moen’ae ea tsositsoeng bafung Paradeiseng lefatšeng.—Liketso 24:15.

U Lokela ho Etsa’ng?

U tla tšelisoa haholo ke ho ba le tšepo ka ho tla ha Kreste le seo ho tla se finyella. Ruri Jesu Kreste o tla rarolla lintho tsohle tse bakelang batho mathata esita le tse bakang bokhopo bo re sithabetsang.

U lokela ho etsa’ng hore u tle u thabele litlhohonolofatso tseo puso ea Kreste e tlang ho li tlisetsa batho? Ithute ka hloko Lentsoe la Molimo, e leng Bibele. Ha Jesu a rapela Ntate oa hae, o ile a re: “Sena se bolela bophelo bo sa feleng, ho tsoela pele ba rua tsebo ka uena, Molimo a le mong feela oa ’nete, le ka eo u mo romileng, Jesu Kreste.” (Johanne 17:3) Iketsetse pakane ea ho hlahloba seo Bibele e se rutang. Lipaki Tsa Jehova tsa haeno li tla thabela ho u thusa ntlheng ena. Re u mema ka mofuthu hore u iteanye le tsona kapa u ngolle bahatisi ba makasine ona.

[Litšoantšo tse leqepheng la 7]

Ho tla ha Kreste ho tla tsosolosa lefatše ka ho feletseng

[Tlhaloso ea Moo Setšoantšo se Nkiloeng Teng]

Inset, background only: Rhino and Lion Park, Gauteng, South Africa