Jesu Bophelo le Tšebeletso tsa Hae

Ka Pel’a Sanhedrin, Joale ka Pel’a Pilato

BOSIU bo haufi le ho sa. Petrose o latotse Jesu ka lekhetlo la boraro, ’me litho tsa Sanhedrin li qetile nyeoe ea tsona e somang ebile li qhalane. Leha ho le joalo, li kopana hape Labohlano hoseng hang-hang ha bosiu bo e sa, lekhetlong lena li kopana Holong ea tsona ea Sanhedrin. Mohlomong morero oa tsona ke ho fana ka ponahalo e itseng ea hore nyeoe eo ea bosiu e lumelletsoe ka molao. Ha Jesu a tlisoa ka pel’a tsona, li bua joalokaha li ile tsa bua har’a bosiu, li re: “Ha u le Kreste, u re bolelle.”

Jesu oa arabela, “Leha nka le bolella, le ke ke la lumela; ’me leha nka le botsa, le ke ke la nkaraba le hona.” Leha ho le joalo, ka sebete Jesu o boetse oa itsebahatsa, o re: “Ho qala joale, Mor’a motho o tla be a lule letsohong le letona la matla a Molimo.”

Kaofela ha tsona li batla ho tseba, “Na ke ho re, u Mor’a Molimo na?”

Jesu oa arabela, “Lea bolela; ke eena.”

Karabelo ena e lekane ho banna bana ba ikemiselitseng polao. Ba e nka e le nyefolo. Baa botsa, “Lipaki re sa li batlela’ng, ha e le moo re ikutloetse molomong oa hae?” Kahoo ba tlama Jesu, baa mo khanna, ’me ba mo nehela ho ’musisi oa Moroma Ponse Pilato.

Judase, moeki oa Jesu, o ne a ntse a shebelletse liketsahalo tseo. Ha a bona hore Jesu o ahlotsoe, oa ikoahlaea. Ka baka leo o ea ho baprista ba baholo le baholo ho khutlisa likoto tse 30 tsa silevera, oa hlalosa: “Ke sitiloe ha ke ekile mali a se nang molato.”

Ba araba ba sa mo utloele bohloko, “E ka ba eng ho rōna? Ho iponele uena teng.” Kahoo Judase o lahlela likoto tsa silevera ka tempeleng ’me oa tsamaea ebile o leka ho iphanyeha. Leha ho le joalo, ho bonahala hore lekala leo Judase a tlamileng thapo ho lona lea robeha, ’me ’mele oa hae o tsubella majoeng a tlaase, moo o phatlohang ka lehare teng.

Baprista ba baholo ha baa kholiseha hore na ba etse eng ka likoto tseo tsa silevera. Ba fihlela qeto ea hore, “Ha hoa tšoanela hore li kenngoe polokelong ea tempele, hobane ke theko ea mali.” Kahoo, ka mor’a ho rerisana, ba reka tšimo ea ’mōpi oa lipitsa ka chelete eo ho pata basele ho eona. Kahoo tšimo eo e bitsoa “Tšimo ea mali.”

E sa ntsane e le ka meso ha Jesu a isoa khotla ha ’musisi. Empa Bajode ba tsamaeang le eena ba hana ho kena hobane ba lumela hore katamelano e joalo le Balichaba e tla ba silafatsa. Pilato o tsoela ka ntle ho ba amohela. Oa botsa, “Na le nģosa motho eo ka life?”

Baa araba, “Hoja enoa hase sesenyi, re ka be re sa ka ra u neela eena.”

A lakatsa ho qoba ho ikenya tšotso linaleng, Pilato oa araba: “Mo nkeng e le lōna, le mo ahlole ka molao oa lōna.”

Ha ba senola boikemisetso ba bona ba polao, Bajode baa bolela: “Ha rea lumelloa ho bolaea motho.” Ha e le hantle, haeba ba ka bolaea Jesu nakong ea Mokete oa Paseka, mohlomong ho ka baka mofere-fere sechabeng, kaha ba bangata ba hlompha Jesu. Empa haeba ba ka etsa hore Maroma a ’molaee ka qoso e amanang le lipolotiki, hona ho tla ba hlohlolla molato oa ho ikarabella ho batho.

Ka hona baeta-pele ba bolumeli, ba sa bolele nyeoe ea bona ea pejana eo ba nyatsitseng Jesu ka baka la nyefolo ho eona, joale ba etsa liqoso tse fapaneng. Ba etsa qoso e likarolo li tharo: “Re bone motho enoa [1] a khelosa sechaba, [2] o hana ha ho ntšetsoa Sesare lekhetho; [3] hape o ipitsa Kreste, morena.”

Qoso e tšoenyang Pilato ke ea hore Jesu o ipolela hore ke morena. Kahoo o kena ka khotla hape, o bitsetsa Jesu ho eena, ’me oa botsa: “A u morena oa ba-Juda na?” Ka mantsoe a mang, na u tlōtse molao ka ho ipitsa morena khahlanong le Cesare?

Jesu o batla ho tseba hore na Pilato o se a utloetse hakae ka eena, kahoo oa botsa: “Hleka u iqalla taba eo u ’notši, kapa na ba bang ba u boleletse eona holim’a ka na?”

Pilato o bolela hore ha a tsebe letho ka eena ’me o lakatsa ho ithuta linnete. Oa arabela, “Na ke mo-Juda, na? Sechaba sa heno le baprista ba baholo ba u neetse ’na; u entse’ng?”

Jesu ha a leke ho qoba tseko eo ho hang, e leng ea borena. Ntle ho pelaelo karabo eo Jesu joale a fanang ka eona e makatsa Pilato. Luka 22:66–23:3; Mattheu 27:1-11; Mareka 15:1; Johanne 18:28-35; Liketso 1:16-20.

◆ Ke ka morero ofe Sanhedrin e kopanang hape hoseng?

◆ Judase o shoa joang, hona ho etsoa’ng ka likoto tse 30 tsa silevera?

◆ Ke hobane’ng ha Bajode ba batla hore Maroma a bolaee Jesu, ho fapana le hore ba ’molaee ka bobona joalokaha ba lekile ho etsa joalo liketsahalong tsa pejana?

◆ Ke liqoso life tseo Bajode ba nģosang Jesu ka tsona?