‘O Ile a re Phehella Hore re Tle’

HO AMOHELA baeti ke ntho e tloaelehileng haholo linaheng tsa Bochabela. Ka mohlala, India, lelapa le ka mpa la bolaoa ke tlala e le hore le fepe moeti ea neng a sa lebelloa. Iran teng, ’mè feela ea tloaelehileng o boloka lijo tse ngata ka sehatsetsing e le hore a ka phomosetsa baeti ba ka ’nang ba fihla ba sa lebelloa.

Batho ba bangata ba boletsoeng ka Bibeleng ba ne ba e-na le moea o joalo oa ho fana ka seatla se bulehileng. Mohlala o mong o hlaheletseng ke oa Lydia, eo mohlomong e neng e le mosokolohi oa Mojuda ea neng a lula Filipi, e leng motse o ka sehloohong oa setereke sa Macedonia. Ka letsatsi le leng, e le sabatha, moapostola Pauluse le bo-mphato ba hae ba neng ba tsamaea le eena ba ile ba fumana Lydia le basali ba bang ba bokane ka thōko ho nōka ka ntle ho Filipi. Jehova o ile a bula pelo ea hae ha Pauluse a ntse a bua moo. Ka lebaka leo, eena le ba lelapa la hae ba ile ba kolobetsoa. Eaba joale o kōpa baeti bana ka tieo o re: “Haeba le nahana hore kea tšepahala ho Jehova, kenang ka tlung ea ka.” Mphato oa Pauluse, e leng Luka, o re: “A re phehella hore re tle.”—Liketso 16:11-15.

Joaloka Lydia, kajeno Bakreste ba amohela balumeli-’moho le bona ka mofuthu, ba kang balebeli ba tsamaeang le basali ba bona. Batho ba ba amohelang ba ‘ba phehella hore ba tle.’ Ba amohelang baeti, le bona ba hlohonolofatsoa ka ho ba le moqoqo o hahang le botsoalle ba moea. Le hoja boholo ba Lipaki Tsa Jehova e le batho ba sa ruang, bo ‘latela mokhoa oa ho amohela baeti.’ (Baroma 12:13; Baheberu 13:2) Moea oa tsona oa ho fana oa li thabisa. Ka sebele Jesu o ne a nepile ha a ne a re: “Ho fana ho tlisa thabo e khōlō ho feta ho amohela.”—Liketso 20:35.