Khaolo ea 17

Tsela ea ho Thaba

AKERE kaofela ha rōna re rata ho thaba?— Empa batho ba bangata ha baa thaba. Na u tseba lebaka la seo?— Ke hobane ha ba tsebe lekunutu la thabo. Ba nahana hore ho ba le lintho tse ngata ke hona ho tlisang thabo. Empa ha ba fumana lintho tsena, thabo ea bona ha e tšoarelle.

Lekunutu la bohlokoa ke lena. Mosuoe e Moholo o ile a re: “Ho fana ho tlisa thabo e khōlō ho feta ho amohela.” (Liketso 20:35) Kahoo, tsela ea ho thaba ke efe?— E, ke ea ho fana le ho etsetsa ba bang lintho. Na u ne u tseba seo?—

A re ke re nahane ka taba ena haholoanyane. Na Jesu o ile a re motho ea fuoang mpho ha a na ho thaba?— Che, ha aa ka a cho joalo. Akere u rata ho fuoa limpho?— Motho e mong le e mong o rata ho fuoa limpho. Rea thaba ha re fuoa lintho tse ntle.

Empa Jesu o ile a re ho na le thabo e khōlō le ho feta ha re fana. U ne u ka re ke mang ea faneng ka lintho tse ngata ho feta motho leha e le ofe e mong?— E, ke Jehova Molimo.

Bibele e re Molimo “o fa batho bohle bophelo le phefumoloho le lintho tsohle.” O re fa pula e theohang leholimong le letsatsi, e le hore limela li hōle ’me re be le lijo tseo re li jang. (Liketso 14:17; 17:25) Ke kahoo Bibele e reng Jehova ke “Molimo ea thabileng”! (1 Timothea 1:11) E ’ngoe ea lintho tse etsang hore Molimo e be ea thabileng ke hore oa fana. Le rōna ha re fana, re ka ba ba thabileng.

Joale, re ka fa batho ba bang eng? Uena u ne u ka re’ng?— Ka linako tse ling mpho e hloka chelete. Haeba u reka mpho e itseng lebenkeleng, u tla lokela ho e lefella. Kahoo haeba u batla ho fa motho mpho e joalo, ho ka ’na ha hlokahala hore u behe chelete e itseng ho fihlela u ba le e lekaneng hore u reke mpho eo.

Empa hase limpho tsohle tse tlamehang ho rekoa. Ka mohlala, ha ho chesa haholo, e ka ba ho khathollang ho noa metsi a pholileng. Kahoo ha u fa motho ea nyoriloeng mpho eo ea metsi a batang, u ka thabisoa ke ho fana hoo.

Mohlomong ka letsatsi le leng u ka ’na ua baka likuku le ’mè oa hao. Ho ka ba monate ho etsa seo. Empa ke’ng eo u ka e etsang ka likuku tse ling e tla u thabisa ho feta ho itjella tsona kaofela u le mong?— E, u ka ’na ua fa metsoalle ea hao tse ling. Na u ka rata ho etsa seo ka letsatsi le leng?—

Mosuoe e Moholo le baapostola ba hae ba ne ba tseba thabo ea ho fana. Na ua tseba hore na ba ile ba fa batho ba bang eng?— Ba ile ba ba fa ntho ea bohlokoa ka ho fetisisa lefatšeng! Ba ne ba tseba ’nete ea Molimo, ’me ba ile ba bolella ba bang litaba tse molemo ka thabo. Ba ile ba etsa sena ho se ea ba fang chelete bakeng sa seo ba fanang ka sona.

Ka letsatsi le leng moapostola Pauluse le motsoalle e mong oa hae, e leng morutuoa Luka, ba ile ba kopana le mosali e mong eo le eena a neng a batla ho fumana thabo ea ho fana. Ba ile ba kopana le eena haufi le nōka. Pauluse le Luka ba ile ba ea moo hobane ba ne ba utloile hore ke sebaka sa thapelo. Eitse ha ba fihla, ba fela ba fumana basali ba bang moo ba ntse ba rapela.

Pauluse o ile a qala ho bolella basali bana litaba tse molemo tse mabapi le Jehova Molimo le ’Muso oa hae. E mong oa basali bana o ne a bitsoa Lydia, ’me o ile a mamela ka hloko. Ka mor’a moo, Lydia o ile a batla ho etsa ho hong ho bontša hore o fela a thabetse litaba tse molemo tseo a li utloileng. Kahoo o ile a phehella Pauluse le Luka a re: “Haeba le nahana hore kea tšepahala ho Jehova, kenang ka tlung ea ka ’me le lule.” ’Me a ba kōpa ho fihlela ba e-ea le eena ha hae.—Liketso 16:13-15.

Lydia o ile a thabela ho eteloa ke bahlanka bana ba Molimo. O ne a ba rata hobane ba ile ba mo thusa ho ithuta ka Jehova le Jesu le kamoo batho ba ka phelang ka ho sa feleng kateng. O ile a thabisoa ke hore o ile a fa Pauluse le Luka lijo le sebaka seo ba ka phomolang ho sona. Kahoo ho fana ha Lydia ho ile ha mo thabisa hobane o ne a hlile a batla ho fana. Re lokela ho hopola seo. Motho e mong a ka ’na a re re tlameha ho fana ka mpho e itseng. Empa haeba re hlile re sa batle ho fana ka eona, ho fana hoo ha ho na ho re thabisa.

Ka mohlala, ho thoe’ng haeba u e-na le pompong eo u batlang ho e ja? Ha ke ne nka re u qhetsolele ngoana e mong pompong eo, na u ne u tla thabela ho mo qhetsolela eona?— Empa ho thoe’ng haeba u ne u ka kopana le motsoalle eo u mo ratang haholo? Na u ne u sa tl’o thaba haeba e le uena ea nahanneng ho e qhetsolela motsoalle oa hao?—

Ka linako tse ling re rata motho hoo re batlang ho mo fa ntho e ’ngoe le e ’ngoe empa rōna re sa itšiele letho. Ke eona tsela eo re lokelang ho ikutloa ka eona ha re ntse re hōla leratong la rōna ho Molimo.

Mosuoe e Moholo o ne a tseba mosali e mong ea futsanehileng ea neng a ikutloa ka tsela eo. O ile a mo bona tempeleng, Jerusalema. O ne a e-na le lichelete tse peli tse nyenyane tsa tšepe; e le sohle seo a nang le sona. Empa o ile a li akhela ka bobeli ka lebokoseng e le monehelo, kapa mpho, bakeng sa tempele. Ho ne ho se motho ea mo qobeletseng ho etsa seo. Batho ba bangata moo ba ne ba bile ba sa hlokomele seo a se entseng. O ile a se etsa hobane a ne a batla, a bile a rata Jehova. O ile a thabisoa ke hore o fane ka ho itseng.—Luka 21:1-4.

Ho na le litsela tse ngata tseo re ka fanang ka tsona. Na u ka nahana ka tse ling tsa litsela tseo?— Haeba re fana hobane re hlile re batla ho fana, re tla thaba. Ke kahoo Mosuoe e Moholo a reng ho rōna: “Itloaetseng ho fana.” (Luka 6:38) Haeba re etsa joalo, re tla thabisa batho ba bang. ’Me re tla thaba ka ho fetisisa!

A re bale ka ho eketsehileng mabapi le kamoo ho fana ho tlisang thabo kateng, ho Matheu 6:1-4; Luka 14:12-14; le 2 Bakorinthe 9:7.

[Setšoantšo se leqepheng la 92]

Ke hobane’ng ha Jehova e le “Molimo ea thabileng”?

[Setšoantšo se leqepheng la 93]

Ke’ng e ka u thabisang ho feta ho itjella likuku kaofela u le mong?

[Setšoantšo se leqepheng la 94]

Lydia o re’ng ho Pauluse le Luka?

[Setšoantšo se leqepheng la 94]

Ke hobane’ng ha Lydia a thabisoa ke ho lokisetsa Pauluse le Luka lintho tse itseng?

[Setšoantšo se leqepheng la 96]

Ke hobane’ng ha mosali enoa ea futsanehileng a ile a thabisoa ke ho fana ka sohle seo a nang le sona?