‘Molimo ha a Lule Litempeleng Tse Entsoeng ka Matsoho’
HA HO pelaelo hore Moapostola Pauluse o ne a tseba litempele tsa Athena, hobane li ne li le teng metseng e mengata eo a neng a e etela maetong a hae a boromuoa. Ho latela The Encyclopædia Britannica, Athena o ne a sa tuma feela ka hore ke molimotsana oa ntoa le oa bohlale, empa o ne a tumme hape ka “mesebetsi ea matsoho le mesebetsi ka kakaretso e neng e etsoa ka tsebo nakong ea khotso.”
Tempele e neng e tumme ka ho fetisisa ea Athena ke Parthenon, e neng e hahiloe Athena, motse o rehelletsoeng ka molimotsana ona. Ho nkoa hore Parthenon ke e ’ngoe ea litempele tse khōlō ka ho fetisisa tsa boholo-holo, e ne e e-na le seemahale se limithara tse 12 sa Athena se entsoeng ka khauta le lenaka la tlou. Ha Pauluse a ne a etetse Athena, tempele ena ea ’mabole o mosoeu e ne e bile seemahale se hlahelletseng ka ho fetisisa motseng ona ka lilemo tse 500.
Parthenon e ne e le pooaneng ha Pauluse a ntse a bolella sehlopha sa batho ba Athena ka ‘Molimo ea sa luleng litempeleng tse entsoeng ka matsoho.’ (Liketso 17:23, 24) Mohlomong botle bo hlollang ba litempele tsa Athena kapa bokhabane ba litšoantšo tsa hae bo ne bo khahla ba bang ba bamameli ba Pauluse ho feta Molimo ea sa bonahaleng eo ba neng ba sa mo tsebe. Leha ho le joalo, joalokaha Pauluse a ile a bolela, ha rea lokela ho nahana hore ’Mōpi oa batho o “joaloka khauta kapa silevera kapa lejoe, joaloka ntho e betliloeng . . . [ke] motho.”—Liketso 17:29.
Melimo le melimotsana e kang Athena—eo khanya ea eona e neng e bonoa ka litempele le liemahale tsa eona—e ne e le teng ’me ha e sa le eo. Seemahale sa Athena se ile sa nyamela Parthenon lekholong la bohlano la lilemo C.E., ’me hona joale ho setse lithako tse seng kae feela tsa litempele tsa hae. Ekaba ke mang kajeno ea sa ntsaneng a batla bohlale le tataiso ho Athena?
Ha e le Jehova, “Molimo ea sa feleng,” eo ho seng motho ea kileng a mo bona, batho ba sa ntsane ba batla bohlale le tataiso ho eena. (Baroma 16:26; 1 Johanne 4:12) Bara ba Kore ba ile ba ngola ba re: “Molimo enoa ke Molimo oa rōna ho isa nakong e sa lekanyetsoang, esita le ka ho sa feleng. O tla re tataisa.” (Pesaleme ea 48:14) Tsela e ’ngoe ea hore re thabele tataiso ea Jehova Molimo ke hore re ithute Lentsoe la hae, Bibele, ’me re sebelise keletso ea lona bophelong ba rōna.