“Lefu le Metsitsoe ka ho sa Feleng”

AK’U nahane u bala koranta e nang le sehlooho sena se ka holimo ho fapana le ho bala ka ngoananyana ea ipolaileng. Ke ’nete hore ha ho e-s’o be le koranta e ileng ea ngola polelo e joalo. Empa mantsoe ana a ka holimo a hlaha bukeng e bileng teng ka likete tsa lilemo—e leng Bibele.

Lefu le hlalosoa ka ho hlaka ka Mangolong. Ho feta moo, hase feela hore Bibele e hlalosa hore na ke hobane’ng ha re e-shoa empa e boetse e hlalosa boemo ba bafu ebile e re bolella hore na ho na le tšepo efe ka baratuoa ba rōna ba shoeleng. Qetellong, e bua ka nako ea bohlokoa haholo ea ha ho tla khoneha hore ho ngoloe tlaleho e reng: “Lefu le metsitsoe ka ho sa feleng.”—1 Bakorinthe 15:54.

Bibele e hlalosa lefu ka tsela e tloaelehileng eseng ka mantsoe a thata. Ka mohlala, khafetsa e tšoantša ho shoa le ho “robala,” ’me e hlalosa batho ba shoeleng ka hore ‘ba robetse lefung.’ (Pesaleme ea 13:3; 1 Bathesalonika 4:13; Johanne 11:11-14) Ho boetse ho buuoa ka lefu e le “sera.” (1 Bakorinthe 15:26) Ntlha ea bohlokoa le ho feta ke hore Bibele e re thusa ho utloisisa hore na ke hobane’ng ha lefu le tšoana le boroko, ke hobane’ng ha le hlorisa moloko oa batho le hore na qetellong sera sena se tla hlōloa joang.

Ke Hobane’ng ha re E-shoa?

Buka ea pele ea Bibele e re bolella kamoo Molimo a ileng a etsa motho oa pele Adama kateng le ho mo beha lehaeng la paradeise. (Genese 2:7, 15) Qalong ea bophelo ba hae, Adama o ile a fuoa mesebetsi hammoho le thibelo e le ’ngoe e neng e sa fetohe. Molimo o ile a re ho eena mabapi le sefate se seng se neng se le serapeng sa Edene: “U se ke ua ja tsa sona, etsoe ka letsatsi leo ka lona u jang tsa sona ka sebele u tla shoa.”a (Genese 2:17) Kahoo, Adama o ne a utloisisa hore lefu le ne le ka qojoa. Lefu le ne le tla ba teng hafeela a ne a ka tlōla molao oa Molimo.

Ho utloisang bohloko ke hore Adama le mosali oa hae, Eva, ha baa ka ba mamela. Ba ile ba khetha ho se natse thato ea ’Mōpi oa bona eaba baa kotula. Ha Molimo a ba bolella liphello tsa sebe sa bona o ile a re: “U lerōle ’me u tla khutlela lerōleng.” (Genese 3:19) Ba ile ba e-ba le sekoli se seholo—e leng ho se phethahale. Ba ne ba tla bolaoa ke ho se phethahale ha bona, kapa boemo ba bona ba boetsalibe.

Sekoli sena—e leng sebe—se ile sa boela sa fetisetsoa ho bana ba Adama le Eva, e leng moloko oohle oa batho. Ka tsela e itseng, se ne se tšoana le lefu le futsitsoeng. Hase feela hore Adama o ile a lahleheloa ke monyetla oa ho phela bophelo bo se nang mathata a lefu empa o ile a ba a fetisetsa ho se phethahale baneng ba hae. Sebe se ile sa hapa moloko oa batho. Bibele e re: “Ke ka lebaka leo, feela joalokaha sebe se ile sa kena lefatšeng ka motho a le mong le lefu la kena ka sebe, ’me kahoo lefu la namela ho batho bohle hobane kaofela ba ne ba entse sebe.”—Baroma 5:12.

“Sebe se Ile sa Kena Lefatšeng”

Bofokoli bona bo futsitsoeng, kapa sebe ha se bonahale ka har’a mechine e hōlisang lintho tse nyenyane. “Sebe” ke ho fokola boitšoarong le moeeng hoo re ho futsitseng ho batsoali ba rōna ba pele, ’me se ama ’mele ea rōna. Leha ho le joalo, Bibele e senola hore Molimo o fane ka pheko. Moapostola Pauluse oa hlalosa: “Moputso oo sebe se o lefang ke lefu, empa mpho eo Molimo a fanang ka eona ke bophelo bo sa feleng ka Kreste Jesu Morena oa rōna.” (Baroma 6:23) Lengolong la hae la pele le eang ho Bakorinthe, Pauluse o ile a boela a ba kholisa ka ntho e ’ngoe eo a neng a e nka e le ea bohlokoa haholo: “Feela joalokaha ka Adama bohle ba shoa, kahoo hape bohle ba tla phelisoa ka Kreste.”—1 Bakorinthe 15:22.

Ho hlakile hore Jesu Kreste o khatha tema e khōlō e le hore sebe le lefu li ka felisoa. O ile a re o tlile lefatšeng ho tla “fana ka moea oa hae hore e be thekollo e le phapanyetsano bakeng sa ba bangata.” (Matheu 20:28) Boemo bona bo tšoana le ho koeteloa ha motho, moo e leng feela ka mor’a hore ho lefshoe chelete e itseng motho ea koetetsoeng a ka lokolloang. Mona, thekollo e ka re lokollang sebeng le lefung ke bophelo ba motho ea phethahetseng e leng Jesu.b—Liketso 10:39-43.

E le hore Molimo a lefe thekollo eo, o ile a romela Jesu lefatšeng hore a etse sehlabelo ka bophelo ba hae. “Molimo o ratile lefatše haholo hoo a ileng a fana ka Mora oa hae ea tsoetsoeng a ’notši, e le hore e mong le e mong ea bontšang tumelo ho eena . . . a be le bophelo bo sa feleng.” (Johanne 3:16) Pele Kreste a e-shoa lefu la sehlabelo, o ile a ‘pakela ’nete.’ (Johanne 18:37) ’Me nakong ea tšebeletso ea hae ea phatlalatsa, o ile a sebelisa menyetla eo a neng a e fumana liketsahalong tse itseng e le hore a senole ’nete mabapi le lefu.

“Ngoananyana . . . o Robetse”

Ha Jesu a ne a le lefatšeng, o ne a tseba hore na lefu ke eng. O ile a utloa bohloko ha a bona batho ba e-shoa, ’me o ne a tseba hantle hore eena ka boeena o ne a tla shoa ka mor’a nako e khutšoanyane. (Matheu 17:22, 23) Kamoo ho bonahalang kateng, likhoeli li se kae pele Jesu a bolaoa, motsoalle oa hae e moholo Lazaro o ile a shoa. Ketsahalo eo e re thusa ho bona hore na Jesu o ne a talima lefu joang.

Nakoana ka mor’a ho fumana pehi ea lefu la Lazaro, Jesu o ile a re: “Motsoalle oa rōna Lazaro o phomotse, empa ke ea moo ho mo tsosa borokong.” Barutuoa ba ne ba nka hore haeba Lazaro a ne a phomotse feela, o ne a tla khatholoha. Kahoo Jesu o ile a beha taba ka ho hlakileng tjena: “Lazaro o shoele.” (Johanne 11:11-14) Ho hlakile hore Jesu o ne a nka lefu le tšoana le boroko. Le hoja ho ka ’na ha e-ba thata ho utloisisa lefu, boroko bona rea bo utloisisa. Ha re khalehile hantle bosiu, ha re bone hore nako ea tsamaea le hore na moo re leng teng ho etsahala’ng kaha re boemong boo ka nakoana re sa utloeng letho. Sena ke sona seo Bibele e se hlalosang ka boemo ba ba shoeleng. Moeklesia 9:5 e re: “Ha e le ba shoeleng, ho hang ha ba tsebe letho.”

Jesu o ile a boela a bapisa lefu le boroko, hobane batho ba ka tsosoa bafung ka matla a Molimo. Ketsahalong e ’ngoe, Jesu o ile a etela lelapeng le neng le ferekane ka lebaka la ho hlokahalloa ke ngoananyana. Jesu o ile a re: “Ngoananyana ha aa shoa, empa o robetse.” Eaba o atamela ngoanana eo ea neng a shoele, o mo tšoara ka letsoho eaba oa ngoanana eo oa “ema.” Ka mantsoe a mang, o ile a tsoha bafung.—Matheu 9:24, 25.

Ka tsela e tšoanang Jesu o ile a tsosa Lazaro e leng motsoalle oa hae ea neng a shoele. Empa pele a etsa mohlolo oo, o ile a tšelisa khaitseli ea Lazaro e bitsoang Maretha tjena: “Khaitseli ea hao e tla tsoha.” Maretha o ile a araba tjena ka tsela e bontšang hore o na le tšepo: “Kea tseba hore o tla tsoha tsohong ka letsatsi la ho qetela.” (Johanne 11:23, 24) Ho bonahala a ne a lebeletse hore neng-neng ka moso bahlanka bohle ba Molimo ba tla tsosoa.

Hantle-ntle lentsoe tsoho le etsa hore motho a nahane ka eng? Lentsoe la Segerike le bolelang “tsoho” (a·naʹsta·sis) ka ho toba le bolela “ho ema.” Le hlalosa hore motho o tsoha bafung. Batho ba bang ba ka ’na ba nka taba ena e le e makatsang, empa ha Jesu a qeta ho re ba shoeleng ba tla utloa lentsoe la hae, o ile a re: “Le se ke la hlolloa ke sena.” (Johanne 5:28) Ntlha ea hore Jesu ka boeena o ile a tsosa bafu ha a le lefatšeng e re tiisetsa hore tšepiso ea Bibele ea hore bafu ba khopolong ea Molimo ba tla tsoha “borokong” ba bona ba nako e telele, e tla phethahala. Tšenolo 20:13 ea profeta: “Leoatle la nehelana ka bafu ba ho lona, ’me lefu le Hadese [lebitla le tloaelehileng la moloko oa batho] tsa nehelana ka bafu ba ho tsona.”

Na bafu baa ba tla tsosetsoa bophelong e le hore feela ba tl’o tsofala le ho shoa hape joaloka Lazaro? Oo hase oona morero oa Molimo. Bibele e re tšepisa hore nako ea tla ’me nakong eo “lefu ha le sa tla hlola le e-ba teng,” kahoo ha ho le ea mong ea tla tsofala le ho shoa.—Tšenolo 21:4.

Lefu ke sera. Moloko oa batho o na le lira tse ngata tse ling tse tsebahalang, tse kang ho kula le botsofali, ’me le tsona li baka mahlomola a mangata. Molimo o tšepisa ho felisa lintho tsena kaofela, a qetelle ka ho ahlola sera se seholo sa moloko oa batho. “E le sera sa ho qetela, lefu le tla etsoa lefeela.”—1 Bakorinthe 15:26.

Ha tšepiso eo e phethahetse, batho ba tla thabela ho phela ba phethahetse, ba sa sulafaletsoe bophelo ke sebe le lefu. Khabareng, re ka tšelisoa ke ho tseba hore baratuoa ba rōna ba shoeleng ba phomotse, ’me haeba Molimo a ba hopotse, ba tla tsosoa ka nako ea hae e loketseng.

Ho Utloisisa Lefu ho re Thusa ho Nka Bophelo e le ba Bohlokoa

Ho utloisisa lefu ka ho hlakileng le tšepo bakeng sa bafu ho ka fetola tsela eo re talimang bophelo ka eona. Ha Ian eo ho buuoeng ka eena sehloohong se tlang pele ho sena a le lilemong tsa bo-20, o ile a ithuta hore na Bibele e hlalosa lefu joang. O re: “Ka linako tsohle ke ne ke sa hlakeloe hore na Ntate o hokae. Kahoo, ha ke ithuta hore o mpa a robetse lefung, qalong ke ile ka ikutloa ke nyahame.” Leha ho le joalo, ha Ian a bala hore Molimo o tšepisa ho tsosa bafu, o ile a ikutloa a thabile haholo ka lebaka la ho tseba hore a ka boela a bona ntat’ae. O re: “Ke ne ke qala ho ikutloa ke e-na le khotso bophelong ba ka.” Ho utloisisa lefu hantle ho entse hore a ikutloe a e-na le khotso e ileng ea mo thoba pelo.

Clive le Brenda le bona ba ile ba hlokahalloa ke mora ea bitsoang Steven ea lilemo li 21 kotsing eane e boletsoeng sehloohong se fetileng, moo batho ba ileng ba shoa. Le hoja ba ne ba tseba hore na Bibele e re’ng ka lefu, ba ne ba ntse ba sithabelitsoe ke ho hlokahalloa ke mor’a bona ka tšohanyetso. Bonneteng, lefu ke sera ’me motsu oa lona o hlaba habohloko. Butle-butle tsebo ea bona ea Mangolo e mabapi le boemo ba bafu e ile ea ba thoba pelo. Brenda o re: “Ho utloisisa lefu ho re thusitse hore re boele re tsoele pele le bophelo re ikutloa re e-na le khotso. Bonneteng, letsatsi ha le ke le feta re e-s’o nahane ka nako eo ka eona Steven a tla tsoha borokong boo bo tebileng.”

“Lefu, Motsu oa Hao o Hokae?”

Ho hlakile hore ho utloisisa boemo ba bafu ho ka re thusa hore re talime bophelo ka tsela e sa feteletseng litaba. Lefu ha ea lokela ho ba pharela. Re ka thabela bophelo re sa tšoha lifotle, re sa tšoha sera sena se nanarang. Hape ho lemoha hore lefu ha le felise bophelo ba rōna ka ho sa feleng, ho re tiisa matla e le hore re ka felisa lerato leha e le lefe la ho phelela menyaka le bakoang ke ho lumela hore “bophelo bo bokhutšoanyane haholo.” Ho tseba hore baratuoa ba rōna ba shoeleng ba mohopolong oa Molimo ba robetse lefung hape ba letetse tsoho, ho ka re tšelisa le ho etsa hore re lakatse ho tsoela pele ka bophelo.

Ka sebele re ka lebella nakong e tlang ka sebete, ha Jehova Molimo, e leng Mofani oa bophelo a tla felisa lefu ka ho sa feleng. E tla ba ho nyakallisang hakaakang ha re e-ba le tokelo ea ho botsa: “Lefu, tlhōlo ea hao e hokae? Lefu, motsu oa hao o hokae?”—1 Bakorinthe 15:55.

[Mongolo o botlaaseng ba leqephe]

[Setšoantšo se leqepheng la 5]

Ho se mamele ha Adama le Eva ho feletse ka lefu

[Setšoantšo se leqepheng la 6]

Jesu o ile a tšoara letsoho la ngoanana ea neng a shoele, eaba oa ema

[Setšoantšo se leqepheng la 7]

Ba bangata ba letetse nako ea ha baratuoa ba shoeleng ba tla tsoha borokong, joaloka Lazaro