Ho Sireletsa Boitsebahatso ba Rōna ba Bokreste

“‘Le lipaki tsa ka,’ ho bolela Jehova.”—ESAIA 43:10.

 1. Jehova o hulela batho ba mofuta ofe ho eena?

HA U le Holong ea ’Muso, shebisisa ba u potolohileng. U bona bo-mang sebakeng see sa borapeli? U ka ’na ua bona bacha ba nkang lintho ka botebo ba le tsebe-lethoethoe ho ithuta bohlale ba Mangolo. (Pesaleme ea 148:12, 13) Ho ka etsahala hore u tla boela u hlokomele lihlooho tsa malapa tse ikitlaelletsang ho thabisa Molimo ha li ntse li phela lefatšeng le senyang bophelo ba lelapa. Mohlomong u tla bona batho ba ratehang ba hōlileng, ba phelela boinehelo ba bona ho Jehova ka ho tiea ho sa tsotellehe maloetse a tlisoang ke ho hōla. (Liproverbia 16:31) Kaofela ba rata Jehova ka ho tebileng. ’Me o ile a nka ho loketse ho ba hula e le hore ba tl’o ba le kamano le eena. Mora oa Molimo o ile a tiisa sena ha a re: “Ha ho motho ea ka tlang ho ’na ntle leha a huloa ke Ntate ea nthomileng.”—Johanne 6:37, 44, 65.

 2, 3. Ke hobane’ng ha ho ka ba thata ho lula re e-na le kutloisiso e nepahetseng ka boitsebahatso ba rōna ba Bokreste?

² Na ha re thabele ho ba karolo ea batho bao Jehova a ba amohelang le ho ba hlohonolofatsa? Leha ho le joalo, ho thata ho lula re e-na le kutloisiso e nepahetseng ka boitsebahatso ba rōna ba Bokreste ‘linakong tsena tse mahlonoko tseo ho leng thata ho sebetsana le tsona.’ (2 Timothea 3:1) Sena ke ’nete ka ho khetheha ka bacha ba hōlisetsoang malapeng a Bokreste. Mocha e mong ea joalo o ile a re: “Le hoja ke ne ke e-ea libokeng tsa Bokreste, ke ne ke se na lipakane tsa moea, ’me ho bua ’nete, ke ne ke se na takatso e tiileng ea ho sebeletsa Jehova.”

³ Le hoja ba bang bonneteng ba lakatsa ho sebeletsa Jehova, ba ka ’na ba sitisoa ke khatello e matla ea lithaka, tšusumetso ea lefatše le tšekamelo ea boetsalibe. Haeba re hateletsoe, butle-butle re ka ’na ra lahleheloa ke boitsebahatso ba rōna ba Bokreste. Ka mohlala, batho ba bangata lefatšeng la kajeno ba nka litekanyetso tsa Bibele li siiloe ke nako kapa li sa sebetse bophelong ba kajeno. (1 Petrose 4:4) Ba bang ba nka hore hase habohlokoa ho rapela Molimo ka tsela eo a batlang ka eona. (Johanne 4:24) Lengolong la hae le eang ho Baefese, Pauluse o bua ka lefatše le nang le “moea” kapa boikutlo bo atileng. (Baefese 2:2) Moea oo o hatella batho hore ba etsise monahano oa batho ba sa tsebeng Jehova.

 4. Jesu o ile a hatisa joang bohlokoa ba hore re sireletse boitsebahatso ba rōna bo hlakileng ba Bokreste?

⁴ Leha ho le joalo, joaloka bahlanka ba inehetseng ba Jehova, rea lemoha hore ho ne ho tla ba kotsi haeba mang kapa mang oa rōna—e moholo kapa e monyenyane—a ne a ka lahleheloa ke boitsebahatso ba hae ba Bokreste. Pono e loketseng ka boitsebahatso ba Bokreste e ka thehoa feela litekanyetsong tsa Jehova le linthong tseo a li lebeletseng ho rōna. Sena sea utloahala hobane re bōpiloe ka setšoantšo sa hae. (Genese 1:26; Mikea 6:8) Bibele e bapisa boitsebahatso ba rōna bo hlakileng ba Bokreste le seaparo sa ka ntle, se apareloang hore bohle ba se bone. Mabapi le mehla ea rōna, Jesu o ile a lemosa, a re: “Bonang! Ke tla joaloka lesholu. Ho thaba ea lulang a falimehile ’me a boloka liaparo tsa hae tsa ka ntle, e le hore a se ke a tsamaea a hlobotse ’me batho ba talima lihlong tsa hae.”a (Tšenolo 16:15) Ha re batle ho iphumana re se na litšobotsi le litekanyetso tsa rōna tsa boitšoaro tsa Bokreste ebe re lumella lefatše la Satane hore le re susumetse. Haeba seo se ne se ka etsahala, re ne re tla lahleheloa ke ‘liaparo tsa rōna tsa ka ntle.’ Boemo boo e ne e ka ba bo nyahamisang le bo soabisang.

 5, 6. Ke hobane’ng ha ho tsitsa moeeng e le habohlokoa?

⁵ Ho ba le pono e nepahetseng ka boitsebahatso ba rōna ba Bokreste ho ama haholo tsela eo motho a phelang ka eona. Joang? Haeba morapeli oa Jehova a ne a ka lahleheloa ke pono e hlakileng ka boitsebahatso ea hae, o ne a ka ’na a iphumana a khelositsoe, ’me litsela tsa hae li le matsoeli-ntsoeke, kapa a se na lipakane. Khafetsa Bibele e re lemosa hore re se ke ra ba boemong bo joalo ba ho hlōleha ho etsa qeto. Morutuoa Jakobo o ile a re hlokomelisa tjena: “Ea belaelang o joaloka leqhubu la leoatle le khannoang ke moea le le fefoleloang koana le koana. Ha e le hantle, motho eo a se ke a nahana hore o tla amohela letho ho Jehova; ke motho ea hlōlehang ho etsa qeto, ea sa tsitsang litseleng tsohle tsa hae.”—Jakobo 1:6-8; Baefese 4:14; Baheberu 13:9.

⁶ Re ka sireletsa boitsebahatso ba rōna ba Bokreste joang? Ke eng e ka re thusang hore re ntlafatse tsela eo ka eona re talimang tlotla ea rōna e khōlō ea ho ba barapeli ba Ea Phahameng ka ho Fetisisa? Re kōpa hore u hlahlobe litsela tse latelang.

Matlafatsa Boitsebahatso ba Hao ba Bokreste

 7. Ke hobane’ng ha ho le molemo hore re kōpe Jehova hore a re hlahlobe?

⁷ Nchafatsa kamano ea hao le Jehova kamehla. Ntho ea bohlokoa ka ho fetisisa eo Mokreste a nang le eona ke kamano ea hae le Molimo. (Pesaleme ea 25:14; Liproverbia 3:32) Haeba re qala ho ba le lipelaelo ka boitsebahatso ba rōna ba Bokreste, ke nako ea hore re hlahlobisise hore na kamano ea rōna ke ea bohlokoa hakae le hore na e tebile hakae. Ka nepo mopesaleme o ile a kōpa ka tieo: “Ntlhahlobe, Jehova, ’me u nteke; hloekisa liphio tsa ka le pelo ea ka.” (Pesaleme ea 26:2) Ke hobane’ng ha tlhahlobo e joalo e le ea bohlokoa? Hobane rōna ka borōna re ke ke ra ba baahloli ba tšepahalang ba hore na hantle-ntle sepheo sa rōna le litšekamelo tsa rōna ke life. Ke Jehova feela ea ka utloisisang motho eo re leng eena ka hare—sepheo sa rōna, menahano le maikutlo a rōna.—Jeremia 17:9, 10.

 8. (a) Ho lekoa ke Jehova ho ka re tsoela molemo joang? (b) U thusitsoe joang hore u hatele pele joaloka Mokreste?

⁸ Ha re kōpa Jehova hore a re hlahlobe, re mo memela hore a re nonye. A ka ’na a lumella maemo a senolang hore na kannete-nete sepheo sa rōna ke sefe le hore na lipelo tsa rōna li joang. (Baheberu 4:12, 13; Jakobo 1:22-25) Re lokela ho amohela liteko tse joalo hobane li re fa monyetla oa ho bontša hore na botšepehi ba rōna ho Jehova bo tebile hakae. Li ka bontša haeba re le “ba feletseng le ba phethahetseng ka litsela tsohle, [re] sa haelloe ke letho.” (Jakobo 1:2-4) Hape ha re ntse re lekoa, re ka hōla moeeng.—Baefese 4:22-24.

 9. Na ho ipakela ’nete ea Bibele e le rōna ke taba ea boikhethelo? Hlalosa.

⁹ Ipakele ’nete ea Bibele e le uena. Pono ea rōna ka boitsebahatso ba rōna ba ho ba bahlanka ba Jehova, e ka fokola haeba e sa thehoa ka ho feletseng tsebong ea Mangolo. (Bafilipi 1:9, 10) Mokreste e mong le e mong—e monyenyane kapa e moholo—o lokela ho ipakela ho fihlela a khotsofetse hore seo a se lumelang efela e le ’nete e fumanoang ka Bibeleng. Pauluse o ile a khothalletsa balumeli-’moho le eena sena: “Nepisisang lintho tsohle; le tšoarelle ka tieo ho se setle.” (1 Bathesalonika 5:21) Bakreste ba bacha ba hōletseng malapeng a tšabang Molimo ba lokela ho elelloa hore e ke ke ea e-ba Bakreste ba ’nete feela ka lebaka la tumelo ea batsoali ba bona. Ntat’a Solomone ka boeena, Davida, o ile a mo fa keletso ena: “Tseba Molimo oa ntat’ao ’me u mo sebeletse ka pelo e feletseng.” (1 Likronike 28:9) Ho ne ho ke ke ha lekana hore Solomone e mocha a shebe kamoo ntat’ae a ileng a matlafatsa tumelo ho Jehova kateng. Ho ne ho hlokahala hore eena ka boeena a tsebe Jehova, ’me o ile a etsa joalo. O ile a kōpa Molimo ka tieo: “Joale mphe bohlale le tsebo e le hore nka tsoa ka pel’a sechaba sena le hore nka kena.”—2 Likronike 1:10.

10. Ke hobane’ng ha ho se letho le phoso ka ho botsa lipotso tse tsoang botebong ba pelo, tse botsoang ka sepheo se setle?

¹⁰ Tumelo e matla e thehoa tsebong. Pauluse o ile a re: “Tumelo e latela ntho e utloiloeng.” (Baroma 10:17) O ne a bolela’ng ka seo? O ne a bolela hore ka ho iphepa Lentsoe la Molimo, re matlafatsa tumelo ea rōna le tšepo ea rōna ho Jehova, litšepisong tsa hae le mokhatlong oa hae o hlophisitsoeng. Ho botsa lipotso tsa Bibele tse tsoang botebong ba pelo ho ka etsa hore re fumane likarabo tse kholisang. Ho feta moo, ho Baroma 12:2, re fumana keletso ea Pauluse e reng: ‘Le ipakele e le lōna thato ea Molimo e molemo le e amohelehang le e phethahetseng.’ Hantle-ntle see re ka se finyella joang? Ka ho fumana “tsebo e nepahetseng ea ’nete.” (Tite 1:1) Moea oa Jehova o ka re thusa ho utloisisa esita le litaba tse thata. (1 Bakorinthe 2:11, 12) Re lokela ho rapella thuso ea Molimo ha re e-na le bothata ba ho utloisisa ntho e itseng. (Pesaleme ea 119:10, 11, 27) Jehova o batla hore re utloisise Lentsoe la hae, re le lumele re be re le mamele. O thabela lipotso tse tsoang botebong ba pelo, tse botsoang ka sepheo se setle.

Ikemisetse ho Thabisa Molimo

11. (a) Ke takatso efe ea tlhaho e ka re tšoasang? (b) Re ka beta pelo joang hore re hanyetse khatello ea lithaka?

¹¹ Batla ho thabisa Molimo, eseng motho. E mpa feela e le ntho ea tlhaho hore ka tsela e itseng re batle ho tsebahala re e-na le sehlopha seo re oelang ho sona. E mong le e mong o batla metsoalle, ’me ho amoheloa ke batho ho etsa hore re ikutloe re thabile re bile re sireletsehile. Nakong ea bocha—esita le hamorao bophelong—khatello ea lithaka e ka ba matla, ea etsa hore motho a be le takatso e matla ea ho etsisa ba bang kapa ho ba khahlisa. Empa hase kamehla bao e leng metsoalle le lithaka tsa rōna ba hlileng ba amehileng ka se tla re tsoela molemo. Ka linako tse ling ba mpa ba ipatlela ea ba tlatsang ha ba etsa ntho e fosahetseng. (Liproverbia 1:11-19) Ha Mokreste a inehela khatellong e mpe ea lithaka, hangata o leka ho pata boitsebahatso ba hae. (Pesaleme ea 26:4) Moapostola Pauluse o ile a re lemosa: “Le se ke la itšoantša le boitšoaro ba lefatše le le potolohileng.” (Baroma 12:2, The Jerusalem Bible) Jehova o re fa matla a ka hare ao re a hlokang e le hore re ka loantša khatello leha e le efe e hlahang ka ntle e ka etsang hore re inehele.—Baheberu 13:6.

12. Ke molao-motheo ofe le mohlala ofe o ka re matlafalletsang ho ema re tiile tumelong ha tšepo ea rōna ho Molimo e ameha?

¹² Ha khatello e hlahang ka ntle e batla ho senya pono ea rōna ka boitsebahatso ba rōna ba Bokreste, re lokela ho hopola hore botšepehi ba rōna ho Molimo ke ba bohlokoa haholo ho feta maikutlo a batho kapa tloaelo e atileng ea ba bangata. Mantsoe a Exoda 23:2 ke molao-motheo o re sireletsang: “U se ke ua latela bongata bakeng sa sepheo se sebe.” Ha boholo ba Baiseraele-’moho le Kalebe bo belaella bokhoni ba Jehova ba ho phethahatsa litšepiso tsa Hae, Kalebe o ile a lomahanya meno ha a hana ho latela bongata. O ne a kholisehile hore litšepiso tsa Molimo lia tšepahala, ’me o ile a putsoa haholo ka lebaka la ho ema a tiile. (Numere 13:30; Joshua 14:6-11) Na le uena u ikemiselitse ho loantša khatello ea boikutlo bo atileng e le hore u sireletse kamano ea hao le Molimo?

13. Ke hobane’ng ha ho le bohlale ho etsa hore ba bang ba tsebe boitsebahatso ba rōna ba Bokreste?

¹³ Etsa hore batho ba tsebe boitsebahatso ba hao ba Bokreste. Maele a reng, tlhapi folofela leraha, metsi a pshele u a bona ke ’nete ha re sireletsa boitsebahatso ba rōna ba Bokreste. Ha Baiseraele ba tšepahalang ba ne ba tobane le khanyetso ha ba leka ho etsa thato ea Jehova matsatsing a Esdrase, ba ile ba re: “Re bahlanka ba Molimo oa maholimo le lefatše.” (Esdrase 5:11) Haeba re angoa ke boitšoaro le khanyetso ea batho ba mabifi, re ka iphumana re tšohile hoo re sa tsebeng hore na re etse’ng. Ho batla ho thabisa e mong le e mong ho tla re sitisa ho atleha. Kahoo u se ke ua tšosoa. Ka linako tsohle ho molemo hore u tsebise batho ba bang ka ho hlaka hore u e mong oa Lipaki Tsa Jehova. U ka hlalosetsa ba bang litekanyetso tsa hao, litumelo tsa hao le boemo ba hao ba hore u Mokreste, empa u etse joalo ka tlhompho le ka tieo. Tsebisa batho ba bang hore u ikemiselitse ho boloka melao-motheo e phahameng ea Jehova litabeng tsa boitšoaro. Ba hlakisetse hore u ke ke ua hlanohela botšepehi ba hao ba Bokreste tlas’a maemo leha e le afe. Bontša hore u motlotlo ka melao-motheo ea hao ea boitšoaro. (Pesaleme ea 64:10) Ho hlahella u le Mokreste ea tiileng ho ka u matlafatsa, ha u sireletsa esita le ho susumetsa ba bang hore ba batle ho tseba ka Jehova le ka batho ba hae.

14. Na ho songoa kapa ho hanyetsoa ho lokela ho re nyahamisa? Hlalosa.

¹⁴ Ke ’nete hore ba bang ba ka ’na ba u soma kapa ba u hanyetsa. (Juda 18) Haeba batho ba bang ba sa arabele hantle ha u etsa boiteko ba ho ba hlalosetsa litekanyetso tsa hao, u se nyahame. (Ezekiele 3:7, 8) Ho sa tsotellehe hore na u ikemiselitse hakae, le ka mohla u ke ke ua kholisa motho ea sa batleng ho kholisoa. Hopola Faro. Ha ho kotlo kapa mohlolo—esita le ho shoelloa ke letsibolo—o ileng oa khona ho kholisa Faro hore Moshe o ne a bua lebitsong la Jehova. Kahoo, u se lumelle ho tšaba batho hore ho u tšose hoo u sa tsebeng hore na u etse’ng. Ho tšepa Molimo le ho lumela ho eena ho ka u thusa ho hlōla tšabo.—Liproverbia 3:5, 6; 29:25.

Ithute Liketsahalong Tse Fetileng, Haha Bokamoso

15, 16. (a) Lefa la rōna la moea ke eng? (b) Re ka rua molemo joang ka ho nahanisisa ka lefa la rōna la moea re itšetlehile ka Lentsoe la Molimo?

¹⁵ Nka lefa la hao la moea e le la bohlokoa. Ka ho sebelisa Lentsoe la Molimo, Bakreste ba tla rua molemo ka ho nahanisisa ka lefa la bona le leholo la moea. Lefa lena le akarelletsa ’nete ea Lentsoe la Jehova, tšepo ea bophelo bo sa feleng le tlotla ea ho emela Molimo re le baboleli ba litaba tse molemo. Na ua bona hore na u phetha karolo efe har’a Lipaki tsa hae, har’a sehlopha sa batho ba tlotliloeng ka ho fuoa mosebetsi oa ho bolela ka ’Muso o pholosang bophelo? Hopola hore ha ho e mong haese Jehova feela ea fanang ka tiiso e reng: “Le lipaki tsa ka.”—Esaia 43:10.

¹⁶ U ka ipotsa lipotso tse kang: ‘Lefa lee la moea ke la bohlokoa hakae ho ’na? Na ke le nka e le la bohlokoa hoo ho etsa thato ea Molimo e leng ntho e tlang pele bophelong ba ka? Na kananelo ea ka ka lona e matla ka ho lekaneng hore e ’matlafaletse ho loantša teko leha e le efe e ka ’nang ea qetella ka hore le ntahlehele?’ Lefa la rōna la moea le ka boela la re kenya boikutlo bo matla ba ho sireletseha moeeng, bo teng feela ka mokhatlong oa Jehova o hlophisitsoeng. (Pesaleme ea 91:1, 2) Ho hlahloba liketsahalo tse hlaheletseng tsa histori ea kajeno ea mokhatlo oa Jehova o hlophisitsoeng ho ka re tiisetsa hore ha ho motho kapa ntho e ka felisang batho ba Jehova lefatšeng.—Esaia 54:17; Jeremia 1:19.

17. Ho hlokahala eng hape ho feta feela ho itšetleha ka lefa la rōna la moea?

¹⁷ Ke ’nete hore re ke ke ra itšetleha ka ho feletseng ka lefa la rōna la moea. E mong le e mong oa rōna o lokela ho hlaolela kamano e haufi le Molimo. Ka mor’a hore Pauluse a sebetse ka thata a matlafatsa tumelo ea Bakreste ba Filipi, o ile a ba ngolla mantsoe a reng: “Ka lebaka leo, baratuoa ba ka, ka tsela eo le ’nileng la mamela ka eona kamehla, eseng nakong ea ho ba teng ha ka feela, empa joale ka ho ithatela ho eketsehileng nakong ea ho ba sieo ha ka, le ’ne le sebeletse poloko ea lōna ka tšabo le thothomelo.” (Bafilipi 2:12) Re ke ke ra itšetleha ka motho e mong hore re pholohe.

18. Ke joang mesebetsi ea Bokreste e ka matlafatsang pono ea rōna ka boitsebahatso ba rōna ba Bokreste?

¹⁸ Ikakhele ka setotsoana mesebetsing ea Bokreste. Ho ’nile ha boleloa hore “motho o tsejoa ka mesebetsi ea hae.” Kajeno Bakreste ba filoe mosebetsi oa bohlokoa oa ho bolela litaba tse molemo tsa ’Muso oa Molimo o hlomiloeng. Pauluse o ile a re: “Hobane joalokaha ’na, ha e le hantle, ke le moapostola ho lichaba, ke tlotlisa bosebeletsi ba ka.” (Baroma 11:13) Mosebetsi oa rōna oa boboleli o re khetholla lefatšeng, ’me ho ba le seabo ho oona ho matlafatsa boitsebahatso ba rōna ba Bokreste. Ho ikakhela ka setotsoana mesebetsing e meng ea puso ea Molimo, e kang liboka tsa Bokreste, mananeo a kaho ea libaka tsa borapeli, boiteko ba ho thusa ba hlokang le e meng e joaloka eo, ho ka matlafatsa pono ea rōna ka boitsebahatso ba rōna ba Bokreste.—Bagalata 6:9, 10; Baheberu 10:23, 24.

Boitsebahatso bo Hlakileng bo Tlisa Litlhohonolofatso Tsa Sebele

19, 20. (a) Ke melemo efe eo u bileng le eona ka ho ba Mokreste? (b) Motheo oa boitsebahatso ba rōna ba sebele ke eng?

¹⁹ Ka nakoana ak’u nahane ka melemo le menyetla eo re e fumanang hobane re le Bakreste ba ’nete. Re na le tokelo ea ho tsejoa ke Jehova re le batho ka bomong. Moprofeta Malakia o ile a re: “Ba tšabang Jehova ba buisana, e mong le e mong le motsoalle oa hae, ’me Jehova a ’na a ela hloko le ho mamela. Buka ea khopotso ea qala ho ngoloa ka pel’a hae bakeng sa ba tšabang Jehova le bakeng sa ba nahanang ka lebitso la hae.” (Malakia 3:16) Molimo a ka re talima re le metsoalle ea hae. (Jakobo 2:23) Bophelo ba rōna bo matlafatsoa ke ho ba le sepheo se hlakileng, morero o tebileng le lipakane tse molemo le tse hlahisang litholoana. Hape re tšepisitsoe bokamoso bo sa feleng.—Pesaleme ea 37:9.

²⁰ Hopola hore boitsebahatso ba hao ba sebele le boleng ba hao bo lekanyetsoa ka tsela ea Molimo ea hore na u ua bohlokoa hakae, eseng ho latela seo batho ba bang ba ka ’nang ba se nahana ka uena. Batho ba bang ba ka re kala ka mahlo ho latela litekanyetso tsa motho tse haelloang. Empa hore ebe Molimo oa re rata ebile o re thahasella re le batho ka bomong ke motheo oa sebele oa hore na re ba bohlokoa hakae—re ba hae. (Matheu 10:29-31) Ka lehlakoreng le leng, lerato la rōna ho Molimo le ka etsa hore re be le pono e nepahetseng ka ho fetisisa ka boitsebahatso ba rōna la ba la re bontša tsela e hlakileng ka ho fetisisa bophelong. “Haeba leha e le mang a rata Molimo, enoa o tsejoa ke eena.”—1 Bakorinthe 8:3.

[Mongolo o botlaaseng ba leqephe]

Na U sa Hopola?

• Ke hobane’ng ha e le habohlokoa hore Bakreste ba sireletse boitsebahatso ba bona ba moea?

• Re ka matlafatsa boitsebahatso ba rōna ba Bokreste joang?

• Ha re talimane le potso ea hore na re thabisa mang, ke maemo afe a ka re thusang ho etsa qeto e nepahetseng?

• Kutloisiso e nepahetseng ka boitsebahatso ba rōna e ka ama bokamoso ba rōna joang re le Bakreste?

[Litšoantšo tse leqepheng la 21]

Ho ikakhela ka setotsoana mesebetsing ea Bokreste ho ka matlafatsa boitsebahatso ba rōna ba Bokreste