Ho Haha Tumelo ho Suthisa Lithaba

“KE NA le tumelo; oho, nthuse hore ke be le e eketsehileng!” Ana e ne e le mantsoe a ntate ea ferekaneng oa moshemane ea shoang sethoathoa ea boletsoeng sehloohong se ka pele. (Mareka 9:24, The Living Bible) E ka ’na eaba polelo ena le eona e na le maikutlo a hao. Haeba ho joalo, kholiseha hore ha u mong. Maemo a lefatše kajeno a sekametse ho fokolisa tumelo ho Molimo le Lentsoeng la oona. Filosofi ea ba sa lumeleng hore Molimo o teng, lintho tse bonahalang, mefere-fere likerekeng, le keketseho e tšosang ea pefo kaofela li tsoa tumelo ea ’nete tlaase. Joale, potso ea Jesu Kreste e ne e loketse haholo, “Etlare ha Mor’a motho a e-tla, na o tla fumana tumelo e le teng lefatšeng na?”—Luka 18:8.

Ketsahalong e ’ngoe, le baapostola ba Jesu ba ile ba kōpa, “Re ekeletse tumelo.” Leha ho le joalo, ho e-na le ho ba ekeletsa tumelo ka mohlolo, a re: “Hojane le na le tumelo e kaalo ka tlhaku ea mosetareta, le ne le ka re ho sefate sena sa monōkōtšoai: ‘Iphōthōle, u itlhome leoatleng,’ ’me se ne se ka le mamela.” (Luka 17:5, 6, TLP) Joale re ka fumana tumelo e eketsehileng joang?

Ho Haha Tumelo

Moapostola Pauluse o ngotse: “Ba tla lumela joang ho eo ba sa kang ba utloa litaba tsa hae? ’Me ba tla utloa joang, ha ’moleli a le sieo? . . . Tumelo e fela e tla ka ho utloa, ’me kutlo e tla ka polelo ea Molimo.” (Ba-Roma 10:14-17) Joale, ho latelang ke hore haeba re batla tumelo e eketsehileng, re tlameha ho utloa le ho tseba Mangolo. Seo ke se entsoeng ke motho eloa ea holofetseng litho ea boletsoeng pele. Lipaki tsa Jehova li ile tsa ithuta Bibele le eena, a ba le tumelo, eaba joale o sebelisa seo a ithutileng sona bophelong ba hae ba letsatsi le letsatsi. Kahoo o fumane tumelo e le hore a ka tlosa tšitiso e kang thaba bophelong ba hae.

Ho nka nako ho fumana bopaki bo kholisang e le motheo bakeng sa tumelo. (Ba-Heberu 11:1) Hape ho hloka boiteko. Na u utloisisa ho senya nako le ho etsa boiteko kamehla e le hore u ka bokella bopaki bo hlokahalang ho haha tumelo?

“Litene” tsa ho Haha Tumelo

Letoto la mehato ea ho haha tumelo le ka tšoantšoa le ho phahamisa mohaho. Esita le mehaho e meholohali e hahoa ka litene ka bonngoe. Setene se seng le se seng se beoa sebakeng sa sona le litene tse ling tse makholo-kholo hore li fe mohaho botsitso bo hlokahalang bakeng sa ho mamella lifefo tse matla hammoho le linako tsa tšenyo. Tumelo le eona e theiloe holim’a “litene” ka bonngoe tsa bopaki tse beiloeng ka hloko hore li lumellane le tse ling. “Setene” se seng le se seng se tla eketsa bopaki ba hore Molimo o teng, hore ke ’Mōpi oa lintho tsohle le hore o na le morero mabapi le Pōpo ea hae e motho. Feela “litene” tsee tse hahang ke eng?

Tabeng ea pele, sheba ’mele oa hao. Na ha u bone bopaki bo kholisang ba ’Mōpi, ka mohlala, bokong ba hau bo babatsehang—setho seo thuto ea mahlale e sa loreng feela le ho se etsisa? Na u ka bua joaloka mopesaleme, “U mpōpile ka mokhoa o makatsang”? (Pesaleme ea 139:14, TLP) Haeba u ka khona, joale u na le “setene” se le seng seo u ka hahang tumelo ea hau ka sona.

Na u fumana bopaki bo tsoelang pele ba ’Mōpi ea lerato ka ho se tšoane le botle tse sa feleng tsa lifate, limela le lipalesa? Na u ka bona bopaki bo joalo liphoofolong, linonyaneng le libōpuoeng tsa metsing tse itšetlehileng e ’ngoe ka e ’ngoe hammoho le bohlokoa ba tsona ho motho? Haeba re utloisisa ho mamela, kaofela ha tsona re ka li “utloa” li re, ‘Molimo o teng!’—Ba-Roma 1:20.

Leha ho le joalo, ho lumela hore ’Mōpi o teng ha hoa lekana. Hore re arabele lipotso tse botsang ka eena le merero ea hae, re hloka tšenolo e tsoang ho Molimo ona o sa bonahaleng le o nang le bohlale bohle. ’Me re na le eona! Hokae? Ka Bibeleng. Empa ba bangata ha ba nke mohloli ona oa boitsebiso e le o tšepahalang joaloka Pōpo e bonahalang e re potolohileng.

Leha ho le joalo, ho na le bopaki bo bongata, bopaki bo kholisang, ba hore Bibele ke buka e bululetsoeng ke Molimo. Ka mohlala, ho lumellana ho teng har’a bangoli ba eona—ba ka bang 40 kaofela, ba ngola nakong ea lilemo tse makholo a 16—ke bopaki ba Moqapi a le mong, Jehova Molimo. Nako le nako, lintho tse fumanoang ke thuto ea ’nete ea mahlale le thuto ea lintho tse epolotsoeng tsa khale li pakile Bibele e le ea ’nete e bile e tšepahala. Ka mohlala, setsebi sa linaleli Robert Jastrow o ngotse: “Liqaqiso lia fapana, empa lintho tsa bohlokoa litlalehong tsa botsebi ba linaleli le tsa Bibele tsa Genese lia tšoana: letoto la liketsahalo tse isang ho motho le qalile ka tšohanyetso ’me hang ka motsotso o tobileng ka nako, ka ho phatsima ha leseli, le matla.”

Hlahloba mohlala o le mong oa kamoo thuto ea lintho tse epolotsoeng e tiisitseng tlaleho ea Bibele kateng. Ho 2 Marena 18:13-15, rea bala: “Ka selemo sa leshome le metso e mene sa ho busa ha Ezekiase, Sankeribe, morena oa Assyria, a futuhela metse eohle ea Juda e marako, ’me a e kena.” Ka nako eo “Morena oa Assyria a lefisa Ezekiase, morena oa Juda, litalenta tse makholo a mararo tsa silevera, le talenta tse mashome a mararo tsa gauda.” E le tiiso, lekholong la bo19 la lilemo setsebi sa lintho tse epolotsoeng, A. H. Layard, se ile sa sibolla ho bitsoang Lejoe le Likhutlo li Tharo la Morena Sankeribe. Mongolo oa lona oa litšoantšo o baleha tjena: “Ha e le Ezekiase Mojode, ea sa kang a ikokobeletsa joko ea ka, e 46 ea metse ea hae e tiileng le e marako, . . . ke e kopetse hare ’me ke e nkile. . . . Ke phaelletse lekhethong la pele, ’me ke beile holim’a hae e le seo a tlang ho se lefa selemo le selemo, lekhetho . . . litalenta tse 30 tsa gauda le litalenta tse 800 tsa silevera.” Ke tiiso e tsotehang hakaakang ea tlaleho ea Bibele, e fapanang feela ka chelete ea lekhetho la silevera!

“Litene” tse Ling Bakeng sa ho Haha Tumelo

“Litene” tse ntle ka ho fetisisa tse hahang ke tse fanoang ke ho phethahala ha boprofeta ba Bibele. Boprofeta ke ho bolela ketsahalo e ’ngoe eo e leng hona e tlang. Ha ketsahalo eo e etsahala, e tiisa hore se boletsoeng pele ho nako ke ’nete. Boprofeta bo joalo bo phahametse matla a motho, ’me Bibele ka nepo e re: “Boprofeta ha boa ka ba tlisoa ke ho rata ha motho, empa ke ka tšusumetso ea Moea o Halalelang batho ba halalelang ba Molimo ba buileng.” (2 Petrose 1:21) Ho sheba bo fokolang ba boprofeta bo joalo ba Bibele ka sebele ho matlafatsa tumelo.

Hoo e ka bang ka 732 B.C.E., Esaia o ile a profeta ho oela ha Babylona matsohong a Bamede le ba Bapersia, a bile a fana ka lebitso la mohapi, Cyruse. Ka ho tsotehang, boprofeta bona bo ile ba fanoa lilemo tse ka bang 200 pele Cyruse a hapa Babylona! Ka karolo, boprofeta boo bo bua ka Jehova e le ea “reng ho boliba: Psha, ’me ke tla pshesa linōka tsa hao.” Ho ile ha profetoa hore Molimo o ne o tla ‘bulela Cyruse menyako, hore menyako e se ke ea koaloa.’ Jehova o itse, “Ke tla . . . pshatla menyako ea koporo, le ho roba mekoallo ea tšepe. Ke tla u nea maruo a bolokiloeng nģalong tse ntšo.” (Esaia 44:24–45:3) Boprofeta boo bo ile ba phethahatsoa joang?

Bo ile ba phethahala bosiung ba mokete o lerata bakeng sa Babylona le mahosana a eona. Le sa hlokomelehe e bile e le bosiu, lebotho la Cyruse la sebetsa ka thata ho khelosa metsi a Nōka ea Eufrate, e neng e feta bohareng ba motse. Hona ho ile ha lumella masole hore a kene Babylona a tsamaea fatše ka nōkeng. Menyako ea nōka e ne siiloe e butsoe ka bohlasoa nakong ea mokete. Kahoo, Bamede le Bapersia ha ba ka ba thatafalloa ke ho nka Babylona le matlotlo ’ohle a eona. Boprofeta ba Esaia bo ne bo phethahetse ka boitsebiso ba bona kaofela.

Jehova Molimo o boetse o bone ho loketse hore a etse hore Jesu Kreste e be eena ea shebiloeng eo boprofeta bo bongata bo bolelang liketsahalo tseo e leng hona li tlang tsa ho tsoaloa ha hae, bophelo ba hae, tšebeletso ea hae le lefu la hae, bo bong ba bona bo ngotsoe makholo a lilemo pele. Ka mohlala, ho ile ha profetoa hore o ne a tla tsoaloa lelokong la Juda la lelapa la Davida (Genese 49:10; Esaia 11:1, 2) le motseng oa Bethlehema. (Mikea 5:2) Motsoalle e mong ea haufi-ufi o ne a tla hloka botšepehi ’me o ne a tla mo eka ka likotoana tse 30 tsa silevera. (Pesaleme ea 41:9; Zakaria 11:12) Kobo ea hae e ne e tla laoloa ka lotho. (Pesaleme ea 22:18) O ne a tla hlajoa, empa ho ne ho se lesapo la hae le neng le tla rojoa. (Zakaria 12:10; Pesaleme ea 34:20) Daniele 9:24-27 e profetile ho tla ha Jesu e le Messia, kapa Kreste, kamor’a libeke tse 69 tsa lilemo, nako ea lilemo tse 483 ho tloha ka 445 B.C.E. ho fihlela Jesu a kolobetsoa ka 29 C.E. Halofo ea “veke” (lilemo tse 3 1/2) hamorao, ka 33 C.E., Jesu o ile a “tlosoa” ka lefu joalokaha ho profetiloe. Boitsebiso bo bong ba boprofeta bona bo boetse ba phethahatsoa.

Tsena empa e le “litene” tse fokolang feela tse ka sebelisoang ho haha tumelo e ka suthisang lithaba. Ho li bokella kaofela hammoho le ho li bea libakeng tsa tsona ho hloka nako, boiteko le mamello. Empa ho ’nile ha etsoa. John, ea phelang Santos, Brazil, a ka paka hore ho ka etsoa. Lilemong tse fetileng, o ne a sa batle bolumeli, a sa lumele Bibele, le hoja a ne a lumela hore Molimo o teng. John a lumela ho eteloa ke e mong oa Lipaki tsa Jehova. Lipuisano tsa beke le beke tsa qetelletse li kholisitse John hore Bibele hase buka e tloaelehileng, ’me a qetella a “le amohetse e seng joale ka hoja e le lentsoe la batho, empa [a] kholoa hore ke lentsoe la Molimo, joale ka ha e le lona ka sebele.” (1 Ba-Thessalonika 2:13) Ho ile ha hloka nako, empa lithuto tsa Bibele tse tsoelang pele li ile tsa thusa John ho utloisisa morero oa Molimo ka batho. Qetellong, ka 1970 o ile a kolobetsoa e le e mong oa Lipaki tsa Jehova. Hona joale, e le moholo ea khethiloeng oa phutheho, o thusa ba bang ho haha le ho boloka tumelo ea bona.

Na u batla ho thusoa ho haha tumelo ea hao? Haeba ho joalo, hopola hore “tumelo e fela e tla ka ho utloa, ’me kutlo e tla ka polelo ea Molimo.” (Ba-Roma 10:17) Lipaki tsa Jehova tse fetang 3 000 000 ka matla li jala ‘lentsoe le buang ka Kreste’ (NW) le ’Muso oa Molimo linaheng tse fetang 200. Li tla thabela ho u thusa ho ithuta ka ho eketsehileng ka Lentsoe la Molimo ka lipuisano tse sa lefelloeng tsa Bibele.

Lula u kholisehile hore nako eo u e qetang u mametse ‘tse utloiloeng’ e tla be e le nako e sebelisitsoeng hantle. E ka u thusa ho haha tumelo e suthisang lithaba. Hona le hona, ho ka isa bophelong bo sa feleng, “hobane Molimo o ratile lefatše hakalo, o bile oa le nea Mora oa oona ea tsoetsoeng a ’notši; hore e mong le e mong ea lumelang ho eena, a se ke a timela, a mpe a be le bophelo bo sa feleng.”—Johanne 3:16.

[Lebokose le leqepheng la 7]

“LITENE” bakeng sa Ho Haha Tumelo

Ananela lintho tseo Jehova a li entseng

Amohela Bibele e le Lentsoe la Molimo

Hlokomela kamoo thuto ea lintho tse epolotsoeng tsa khale le histori li tiisang tlaleho ea Bibele

Hlahloba phethahatso ea boprofeta ba Bibele