“Tšebeletso e Halalelang ka Matla a Lōna a ho Nahana”

“Le nehele ’mele ea lōna e le sehlabelo se phelang, se halalelang, se amohelehang ho Molimo, tšebeletso e halalelang ka matla a lōna a ho nahana.”—BA-ROMA 12:1, NW.

 1, 2. Ho ithuta ho sebelisa melao-motheo ea Bibele ho tšoana joang le ho tseba puo e ncha hantle?

NA U se u kile ua leka ho ithuta puo e ncha? Haeba ho joalo, ntle ho pelaelo u tla lumela hore ke mosebetsi o thata. Ha e le hantle, ho akarelletsoa se eketsehileng ho feta feela ho ithuta mantsoe a macha. Tšebeliso ea puo eo e bontšang tsebo e boetse e hloka ho tseba sebōpeho-puo sa eona hantle. U tlameha ho utloisisa kamoo mantsoe a amanang kateng le kamoo a kopanang ho bōpa mehopolo e feletseng.

² Hoa tšoana le tabeng ea ho ba le tsebo ea Lentsoe la Molimo. Ho akarelletsa ho eketsehileng ho feta feela ho ithuta litemana tse itseng tsa Mangolo. Hape ka puo ea tšoantšetso, re tlameha ho ithuta sebōpeho-puo sa Bibele. Ho hlokahala hore re utloisise kamoo litemana li amanang kateng le kamoo li sebeletsang e le melao-motheo e ka sebelisoang bophelong ba letsatsi le letsatsi. Ka tsela eo re ka ‘phetheha, ’me ra rutehela ruri mesebetsing eohle e molemo.’—2 Timothea 3:17.

 3. Ho bile le phetoho efe mabapi le tšebeletso ea Molimo ka 33 C.E.?

³ Tlas’a tokisetso ea Molao oa Moshe, botšepehi bo ne bo ka bontšoa ka ho khomarela ka tieo melao e hlalositsoeng hantle. Leha ho le joalo, ka 33 C.E., Jehova o ile a felisa Molao, ha e le hantle a o “khokhothela thupeng ea tlhokofatso” eo Mora oa hae a ileng a bolaeloa ho eona. (Ba-Kolosse 2:13, 14, NW) Ka mor’a moo, batho ba Molimo ha baa ka ba fuoa lethathamo le lelelele la mahlabelo ao ba lokelang ho a nehela le melao eo ba lokelang ho e latela. Ho e-na le hoo, ba ile ba bolelloa: “Le nehele ’mele ea lōna e le sehlabelo se phelang, se halalelang, se amohelehang ho Molimo, tšebeletso e halalelang ka matla a lōna a ho nahana.” (Ba-Roma 12:1, NW) E, Bakreste ba ne ba lokela ho ikitlaetsa, ka lipelo, lisoule, khopolo le matla a bona ’ohle tšebeletsong ea Molimo. (Mareka 12:30; bapisa le Pesaleme ea 110:3.) Empa ho nehela “tšebeletso e halalelang ka matla a lōna a ho nahana” ho bolela’ng?

 4, 5. Ho akarelletsoa eng ho sebeletseng Jehova ka matla a rōna a ho nahana?

⁴ Poleloana “matla . . . a ho nahana” e fetoletsoe ho tloha lentsoeng la Segerike lo·gi·kosʹ, le bolelang “kahlolo e molemo” kapa “bohlale.” Bahlanka ba Molimo ba biletsoa ho sebelisa letsoalo le koetlisitsoeng ka Bibele. Ho e-na le ho theha liqeto tsa bona melaong e mengata e behiloeng esale pele, Bakreste ba lokela ho hlahlobisisa melao-motheo ea Bibele ka hloko. Ho hlokahala hore ba utloisise “sebōpeho-puo” sa Bibele, kapa kamoo melao-motheo ea eona e fapaneng, e amanang kateng. Kahoo, ba ka etsa liqeto tse bohlale ka matla a bona a ho nahana.

⁵ Na see se bolela hore Bakreste ha ba na molao? Ha ho joalo ho hang. Mangolo a Segerike a Bokreste ka ho totobetseng a hanela borapeli ba litšoantšo, boitšoaro bo bobe ba botona le botšehali, ho bolaea, leshano, ho sebelisana le meea, tšebeliso e mpe ea mali, le libe tse ling tse sa tšoaneng. (Liketso 15:28, 29; 1 Ba-Korinthe 6:9, 10; Tšenolo 21:8) Leha ho le joalo, re tlameha ho sebelisa matla a rōna a ho nahana e le hore re ka ithuta le ho sebelisa melao-motheo ea Bibele ka tekanyo e khōloanyane ho feta kamoo ho neng ho hlokahala hore Baiseraele ba etse kateng. Ho tšoana le ho utloisisa puo e ncha, sena se hloka nako le boiteko. Matla a rōna a ho nahana a ka hōlisoa joang?

Ho Hōlisa Matla a Hao a ho Nahana

 6. Ho ithuta Bibele ho akarelletsa eng?

⁶ Tsela ea pele, re tlameha ho ba liithuti tse mafolo-folo tsa Bibele. Lentsoe la Molimo le bululetsoeng le “na le molemo oa ho ruta, oa ho kholisa, oa ho laea, le oa ho hōlisa ka khōlo ea ho loka.” (2 Timothea 3:16) Ha rea lokela hore kamehla re lebelle hore tharollo ea bothata bo itseng e fumanehe temaneng e le ’ngoe ea Bibele. Ho e-na le hoo, re ka ’na ra tlameha ho nahana ka litemana tse ngata tse khantšang leseli boemong kapa bothateng bo itseng. Ho tla hlokahala hore ka mafolo-folo re batlisise mohopolo oa Molimo tabeng. (Liproverbia 2:3-5) Hape ho hlokahala hore re utloisise, hobane “motho ea nang le kutloisiso ke eena ea fumanang tataiso e nang le tsebo.” (Liproverbia 1:5, NW) Motho ea utloisisang a ka arola litšobotsi tse sa tšoaneng tsa taba ebe o lemoha kamano ea tsona.

 7. Batsoali ba ka hlahloba joang melao-motheo ea Bibele e mabapi le taeo?

⁷ Ka mohlala, nka taba ea botsoali. Liproverbia 13:24 e re ntate ea ratang mora oa hae ‘oa mo laea.’ Haeba re tšohla lengolo lena le le leng feela, le ka ’na la sebelisoa hampe ho lokafatsa kotlo e sehlōhō e sa khaotseng. Empa, Ba-Kolosse 3:21 e fana ka keletso e leka-lekaneng: “Bo-ntat’a bana, se halefiseng bana ba lōna, ba tle ba se ke ba nyahama lipelo.” Batsoali ba sebelisang matla a bona a ho nahana ’me ba etsa hore melao-motheo ena e lumellane ba ke ke ba sebelisa taeo eo ho neng ho ka boleloa hore ke “e hlekefetsang.” Ba tla tšoara bana ba bona ka mofuthu, kutloisiso le seriti. (Ba-Efese 6:4) Kahoo, tabeng ea botsoali kapa leha e le efe e ’ngoe e amanang le melao-motheo ea Bibele, re ka hōlisa matla a rōna a ho nahana ka ho hlahloba lintlha tsohle tse amehang. Ka tsela ena, re ka utloisisa “sebōpeho-puo” sa melao-motheo ea Bibele, seo Molimo a neng a se rerile le kamoo re ka se finyellang kateng.

 8. Re ka qoba joang ho ba le pono e sa tenyetseheng, e tsitlellang maikutlong a itseng ha ho tluoa boithabisong?

⁸ Tsela ea bobeli eo ka eona re ka hlaolelang matla a rōna a ho nahana ke ea ho qoba ho ba le pono e sa tenyetseheng, e tsitlellang maikutlong a itseng. Pono e sa feto-fetoheng le maemo e sitisa khōlo ea matla a rōna a ho nahana. Nahana ka taba ea boithabiso. Bibele e re: “Lefatše lohle le rapaletse ka tlase ho e mobe.” (1 Johanne 5:19) Na see se bolela hore buka e ’ngoe le e ’ngoe, baesekopo, kapa lenaneo la thelevishene tse entsoeng lefatšeng li mpe ebile li na le tšusumetso ea bosatane? Pono e joalo e ne e ke ke ea e-ba e utloahalang. Ka sebele, ba bang ba ka ’na ba khetha ho se shebelle thelevishine, libaesekopo, kapa ho se bale libuka tsa lefatše ho hang. Eo ke tokelo ea bona, ’me ha baa lokela ho tšoauoa phoso bakeng sa eona. Empa le bona ha baa lokela ho leka ho hatella ba bang hore ba ipehele lithibelo tse tšoanang le tseo. Mokhatlo o hatisitse lihlooho tse bontšang melao-motheo ea Bibele e lokelang ho re nolofaletsa ho khetha boikhathollo kapa boithabiso ba rōna ka bohlale. Hase bohlale ho fetela ka ’nģane ho litataiso tsena le ho ipepesetsa mehopolo ea boitšoaro bo bobe, pefo e feteletseng, kapa ho sebelisana le meea ho leng teng karolong e khōlō ea boithabiso ba lefatše lena. Ruri, khetho e bohlale ea boithabiso e hloka hore re sebelise matla a rōna a ho nahana bakeng sa ho phela tumellanong le melao-motheo ea Bibele e le hore re ka ba le letsoalo le hloekileng ka pel’a Molimo le batho.—1 Ba-Korinthe 10:31-33.

 9. Ho boleloa’ng ka “temoho e feletseng”?

⁹ Boithabiso bo bongata ba kajeno ho totobetse hore ha boa lokela Bakreste.a Ka hona, re tlameha ho koetlisa lipelo tsa rōna hore li ‘hloee bobe’ e le hore re se ke ra tšoana le ba bang lekholong la pele la lilemo ba neng ba ‘feletsoe ke kutlo eohle ea boitšoaro.’ (Pesaleme ea 97:10; Ba-Efese 4:17-19, NW) E le hore re ka nahana ka litaba tse joalo, re hloka “tsebo e nepahetseng le temoho e feletseng.” (Ba-Filippi 1:9, NW) Lentsoe la Segerike le fetoletsoeng e le “temoho” le bolela “kutloisiso ea boitšoaro e hlokolosi.” Lentsoe lena le supa lithong tsa sebele tsa motho tsa kutlo, tse kang pono. Ha ho tluoa boithabisong kapa tabeng leha e le efe e ’ngoe e hlokang qeto ea botho, kutlo ea rōna ea boitšoaro e lokela ho tsitsa e le hore re se utloisise feela lintho tseo ho hlakileng hore na li mpe kapa li ntle empa hape le tse sa hlakang. Ka nako e tšoanang, re lokela ho qoba ho sebelisa melao-motheo ea Bibele ka tsela eo ka ho feteletseng e sa bontšeng ho ba le kahlolo e molemo le ho tsitlella hore baena ba rōna kaofela ba etse se tšoanang.—Ba-Filippi 4:5.

10. Re ka utloisisa botho ba Jehova joang joalokaha ho bontšitsoe Pesalemeng ea 15?

¹⁰ Tsela ea boraro ea ho hlaolela matla a rōna a ho nahana ke ho ela hloko monahano oa Jehova ’me re o kenye ka ho teba lipelong tsa rōna. Lentsoeng la hae, Jehova o senola botho ba hae le litekanyetso. Ka mohlala, Pesalemeng ea 15, re bala ka mofuta oa motho eo Jehova a mo memelang hore e be moeti tenteng ea hae. Motho ea joalo o sebetsa ka ho loka, o bua ’nete e leng pelong ea hae, o tšepahalla litšepiso tsa hae, ’me ha aa ameha ka lithahasello tsa hae feela. Ha u bala pesaleme ena, ipotse, ‘Na litšoaneleho tsee li hlalosa ’na? Na Jehova o ne a tla ’mema hore ke be moeti tenteng ea hae?’ Matla a rōna a temoho aa matlafala ha re ntse re lumellana le litsela tsa Jehova le monahano oa hae.—Liproverbia 3:5, 6; Ba-Heberu 5:14.

11. Bafarisi ba ile ba “feta ho loka le lerato la Molimo” joang?

¹¹ Ke tabeng eona ena moo Bafarisi ba ileng ba hlōleha ka ho soabisang. Bafarisi ba ne ba tseba makolopetso a motheo oa Molao empa ba ne ba sitoa ho utloisisa “sebōpeho-puo” sa oona. Ba ne ba ka pheta makolopetso a Molao a mangata haholo ka hlooho, empa ba hlōleha ho utloisisa Botho ba moqapi oa oona. Jesu o ile a ba bolella: “Le ntša karolo ea leshome ea koena, le ea serue, le ea meroho eohle, ’me le feta ho loka le lerato la Molimo!” (Luka 11:42) Ka likelello tsa bona tse sa tenyetseheng le lipelo tse thata, Bafarisi ba ile ba hlōleha ho sebelisa matla a bona a ho nahana. Tsela e sa tsitsang eo ba neng ba beha mabaka ka eona e ile ea totobala ha ba ne ba tšoaea barutuoa ba Jesu phoso bakeng sa ho kha lijo-thollo le ho ja lefi ka Sabbatha; empa, hamorao ka lona letsatsi leo, matsoalo a bona ha aa ka a ba tšoenya le hanyenyane ha ba ne ba rera ho bolaea Jesu!—Mattheu 12:1, 2, 14.

12. Re ka lumellana haholoanyane le Jehova joang joaloka Motho?

¹² Re batla ho fapana le Bafarisi. Tsebo ea rōna ea Lentsoe la Molimo e tlameha ho re thusa ho lumellana haholoanyane le Jehova joaloka Motho. Re ka etsa see joang? Ka mor’a ho bala karolo e itseng ea Bibele kapa sengoliloeng se thehiloeng Bibeleng, ba bang ba thusitsoe ke ho thuisa lipotso tse kang tsena, ‘Boitsebiso boo bo nthuta eng ka Jehova le litšoaneleho tsa hae? Nka bontša litšoaneleho tsa Jehova joang litšebelisanong tsa ka le ba bang?’ Ho thuisa ka lipotso tse joalo ho hōlisa matla a rōna a ho nahana ’me ho re nolofaletsa ho ba “baetsisi ba Molimo.”—Ba-Efese 5:1.

Makhoba a Molimo le Kreste, Eseng a Batho

13. Bafarisi ba ile ba itšoara joaloka baetsi ba melao ea boitšoaro joang?

¹³ Baholo ba tlameha ho lumella ba ka tlas’a tlhokomelo ea bona ho sebelisa matla a bona a ho nahana. Litho tsa phutheho hase makhoba a batho. Pauluse o ile a ngola: “Hoja ebe ke sa rata ho khahlisa batho, nka be ke se mohlanka oa Kreste.” (Ba-Galata 1:10; Ba-Kolosse 3:23, 24) Ka ho fapaneng, Bafarisi ba ne ba batla hore batho ba lumele hore ho amoheleha ho batho ke habohlokoa ho feta ho amoheleha ho Molimo. (Mattheu 23:2-7; Johanne 12:42, 43) Bafarisi ba ne ba ikentse baetsi ba melao ea boitšoaro ba neng ba etsa melao ea bona ebe joale ba ahlola ba bang ho latela hore na ba tšoaneleha hakae. Ba neng ba latela Bafarisi ba ne ba fokola tšebelisong ea bona ea letsoalo le koetlisitsoeng ka Bibele, ha e le hantle ba fetoha makhoba a batho.

14, 15. (a) Baholo ba ka iponahatsa e le basebetsi-’moho le mohlape joang? (b) Baholo ba lokela ho sebetsana le litaba tsa letsoalo joang?

¹⁴ Baholo ba Bakreste kajeno baa tseba hore mohlape ha o ikarabelle ho bona ka ho feletseng. Mokreste ka mong o tlameha ho jara moroalo oa hae. (Ba-Roma 14:4; 2 Ba-Korinthe 1:24; Ba-Galata 6:5) Sena se loketse. Ruri, haeba litho tsa mohlape li ne li tlameha ho ba makhoba a batho, li mpa li ba utloa feela ka lebaka la ho lebeloa, li ne li tla etsa’ng ha batho bao ba le sieo? Pauluse o ne a e-na le lebaka la ho thabela Bafilippi: “Joalo ka ha le bile le kutlo ka mehla, le fele le sebetse polokeho ea lōna ka tšabo le ka thothomelo, e seng feela ha ke le ho lōna, empa haholo-holo leha ke le sieo.” Ruri e ne e le makhoba a Kreste, eseng a Pauluse.—Ba-Filippi 2:12.

¹⁵ Ka hona, litabeng tsa letsoalo, baholo ha ba etsetse ba leng tlhokomelong ea bona liqeto. Ba hlalosa melao-motheo ea Bibele e amehang tabeng e itseng ebe ba lumella ba amehang hore ba sebelise matla a bona a ho nahana e le hore ba ka etsa qeto. Bona ke boikarabelo bo tebileng, empa ke boo motho ka mong a tlamehang ho bo jara.

16. Ho ne ho e-na le tokisetso efe ea ho sebetsana le mathata Iseraeleng?

¹⁶ Nahana ka nako ea ha Jehova a ne a sebelisa baahloli ho tataisa Iseraele. Bibele ea re bolella: “Mohlang oo, ho no ho se morena Iseraeleng; e mong le e mong o na a etsa kamoo a ratang kateng.” (Baahloli 21:25) Empa Jehova o ile a fana ka mokhoa oa hore batho ba hae ba fumane tataiso. Motse ka mong o ne o e-na le banna ba hōlileng ba neng ba ka fana ka thuso e bontšang ho hōla moeeng litabeng tse itseng le mathateng a itseng. Ho phaella moo, baprista ba Balevi ba ne ba sebeletsa e le tšusumetso e molemo ka ho ruta sechaba melao ea Molimo. Ha ho ne ho hlaha litaba tse thata ka ho khethehileng, moprista e moholo o ne a kōpa keletso ho Molimo ka Urime le Thummime. Insight on the Scriptures e re: “Motho ea ikentseng ea fumanehang bakeng sa litokisetso tsena, ea fumaneng tsebo ea molao oa Molimo a ba a phela tumellanong le eona, o ne a e-na le tataiso e molemo bakeng sa letsoalo la hae. Ho etsa ha hae ‘kamoo a ratang kateng’ tabeng e joalo ho ne ho sa tl’o fella ka bobe. Jehova o ile a lumella sechaba ho bontša maikutlo le tsela ea ho rata kapa ho se rate.”—Moqolo oa 2, maqepheng a 162-3.b

17. Baholo ba ka bontša joang hore ba fana ka keletso ho latela litekanyetso tsa Molimo eseng tsa bona?

¹⁷ Joaloka baahloli le baprista ba Baiseraele, baholo ba phutheho ba fana ka thuso e bontšang ho hōla moeeng mathateng ’me ba fana ka keletso ea bohlokoa. Ka linako tse ling, ba bile baa ‘laea, baa khalemela, baa khothatsa ka mamello eohle le ka ho ruta.’ (2 Timothea 4:2) Ba etsa sena ho latela litekanyetso tsa Molimo, eseng tsa bona. Sena se atleha hakaakang ha baholo ba beha mohlala ’me ba leka ka matla ho finyella lipelo!

18. Ke hobane’ng ha ho finyella ha baholo lipelo e le ho atlehang ka ho khethehileng?

¹⁸ Pelo ke “enjine” ea mosebetsi oa rōna oa Bokreste. Ka hona Bibele e re: “Ke eona mehloli ea bophelo.” (Liproverbia 4:23) Baholo ba susumetsang lipelo ba tla fumana hore ka ho etsa joalo, ba ka phuthehong ba susumelletsoa ho etsa sohle seo ba ka se khonang tšebeletsong ea Molimo. Ba tla ikhanna, ba sa hloke hore ba khannoe ke ba bang ka linako tsohle. Jehova ha a batle kutlo e qobelloang. O batla kutlo e tsoang pelong e tletseng lerato. Baholo ba ka khothalletsa tšebeletso e joalo e tsoang pelong ka ho thusa litho tsa mohlape ho hōlisa matla a tsona a ho nahana.

Ho Hōlisa “Khopolo ea Kreste”

19, 20. Ke hobane’ng ha e le habohlokoa hore re hlaolele khopolo ea Kreste?

¹⁹ Joalokaha ho hlokometsoe, ho tseba melao ea Molimo feela ha hoa lekana. Mopesaleme o ile a rapela ka tieo: “Mphe kutloisiso, ke tle ke boloke molao oa hao, ke etse ka oona ka pelo ea ka eohle.” (Pesaleme ea 119:34) Jehova o senotse “khopolo ea Kreste” Lentsoeng la hae. (1 Ba-Korinthe 2:16) Jesu joaloka ea ileng a sebeletsa Jehova ka matla a hae a ho nahana, o re sietse mohlala o phethahetseng. O ne a utloisisa melao le melao-motheo ea Molimo, ’me o ile a e sebelisa a sa etse phoso. Ka ho ithuta mohlala oa hae, re tla ba ba “utloisisang . . . bophara ba lona, le bolelele ba lona, le botebo ba lona, le ho phahama ha lona; ’me [re] tsebe lerato la Kreste, le fetisang tsebo eohle.” (Ba-Efese 3:17-19) E, seo re ithutang sona Bibeleng ka Jesu se fetela ka ’nģane ho tsebo ea sekolo ea ka hloohong; se re fa setšoantšo se hlakileng sa seo Jehova ka boeena a leng sona.—Johanne 14:9, 10.

²⁰ Kahoo, ha re ntse re ithuta Lentsoe la Molimo, re ka lemoha monahano oa Jehova litabeng tse itseng ’me ra fihlela liqeto tse tsitsitseng. Sena se tla hloka boiteko. Re tlameha ho ba liithuti tse mafolo-folo tsa Lentsoe la Molimo, re iketse ba elang hloko botho ba Jehova le litekanyetso tsa hae. Ka puo ea tšoantšetso, re ithuta sebōpeho-puo se secha. Joale, ba etsang joalo ba tla be ba latela keletso ea Pauluse ea ho ‘nehela ’mele ea bona e le sehlabelo se phelang, se halalelang, se amohelehang ho Molimo, tšebeletso e halalelang ka matla a bona a ho nahana.’—Ba-Roma 12:1.

[Mongolo o botlaaseng ba leqephe]

U Ithutile Eng?

◻ Ho bile le phetoho efe mabapi le tšebeletso ea Molimo ka 33 C.E.?

◻ Re ka hōlisa matla a rōna a ho nahana joang?

◻ Baholo ba ka thusa litho tsa mohlape joang ho ba makhoba a Molimo le Kreste?

◻ Ke hobane’ng ha re lokela ho hōlisa “khopolo ea Kreste”?

[Setšoantšo se leqepheng la 23]

Baholo ba thusa ba bang ho sebelisa matla a bona a ho nahana