Na U Latela “Tsela e Fetisisang” ea Lerato?

“MOLIMO ke lerato.” Mantsoe ana a moapostola Johanne a qolla tšobotsi ea Molimo e ka sehloohong. (1 Joh. 4:8) Lerato leo Molimo a ratang batho ka lona le etsa hore re atamele ho eena ’me re be le kamano le eena. Lerato la Molimo le boetse le re ama ka tsela efe? Ho ’nile ha thoe: “Botho ba rōna bo laoloa ke lintho tseo re li ratang.” Seo ke ’nete. Leha ho le joalo, e boetse ke ’nete hore botho ba rōna bo laoloa ke hore na re rata batho ba mofuta ofe le hore na re ratoa ke batho ba mofuta ofe. Kaha re bōpiloe ka setšoantšo sa Molimo, re tseba ho etsisa lerato la Molimo bophelong ba rōna. (Gen. 1:27) Ka hona, moapostola Johanne o ile a ngola hore re rata Molimo “hobane o ile a re rata pele.”—1 Joh. 4:19.

Mantsoe a Mane a Hlalosang Lerato

Moapostola Pauluse o ile a re lerato ke “tsela e fetisisang.” (1 Bakor. 12:31) Ke hobane’ng ha a ile a hlalosa lerato ka tsela ee? Pauluse o ne a bua ka lerato la mofuta ofe? E le hore re fumane karabo, a re ke re hlahlobisiseng lentsoe “lerato.”

Bagerike ba boholo-holo ba ne ba e-na le mantsoe a mane a ka sehloohong, a sebelisoang ka litsela tse sa tšoaneng, ho hlalosa lerato: e leng stor·geʹ, eʹros, phi·liʹa le a·gaʹpe. Mantsoeng ana, a·gaʹpe ke lona lentsoe le sebelisetsoang ho hlalosa Molimo eo e leng “lerato.”a Mabapi le lerato lena, Moprofesa William Barclay bukeng ea hae ea New Testament Words, o re: “Agapē e amana le kelello: hase maikutlo a itlhahisang feela ka lipelong tsa rōna ntle ho lebaka; ke molao-motheo oo re ikhethelang hore o re tataise bophelong ba rōna. Agapē e amana haholo-holo le thato.” Tabeng e tšohloang mona, a·gaʹpe ke lerato le laoloang ke molao-motheo, empa hangata le tsamaea le maikutlo a matla. Kaha ho na le melao-motheo e lokileng le e sa lokang, ho hlakile hore Bakreste ba lokela ho tataisoa ke melao-motheo e lokileng, eo Jehova Molimo ka boeena a e behileng ka Bibeleng. Ha re bapisa litsela tseo Bibele e hlalosang a·gaʹpe ka tsona, le mantsoe a mang a sebelisitsoeng ka Bibeleng ho hlalosa lerato, re tla utloisisa hantle hore na re lokela ho bontša lerato la mofuta ofe.

Lerato le Bang Teng ka Lapeng

Ho thabisa hakaakang ho ba karolo ea lelapa le nang le lerato le le momahaneng! Stor·geʹ e ne e le lentsoe la Segerike le neng le atisa ho sebelisoa ha ho buuoa ka lerato la tlhaho leo litho tsa lelapa li ratanang ka lona. Bakreste ba leka ka matla ho rata litho tsa malapa a bona. Pauluse o ile a profeta hore matsatsing a ho qetela, boholo ba batho e ne e tla ba “ba se nang lerato la tlhaho.”b—2 Tim. 3:1, 3.

Ka masoabi, lerato la tlhaho le lokelang ho ba teng har’a litho tsa lelapa ha le eo lefatšeng la kajeno. Ke hobane’ng ha baimana ba bangata hakaale ba ntša limpa? Ke hobane’ng ha malapa a mangata hakaale a sa tsotelle batsoali ba hōlileng? Ke hobane’ng ha tlhalo e ntse e e-hloa mekoalaba? Ha e le hantle karabo ke hore, Lerato la tlhaho ha le eo.

Ho feta moo, Bibele e re ruta hore “pelo e bolotsana ho feta ntho leha e le efe ’me e tsitlella seo e se batlang.” (Jer. 17:9) Ho rata litho tsa lelapa ho tsamaisana le pelo le maikutlo. Leha ho le joalo, hoa thahasellisa hore ebe Pauluse o ile a sebelisa a·gaʹpe ha a hlalosa lerato leo monna a lokelang ho rata mosali oa hae ka lona. Pauluse o ile a bapisa lerato leo le lerato leo Kreste a ratang phutheho ka lona. (Baef. 5:28, 29) Lerato lena le laoloa ke melao-motheo e behiloeng ke Jehova, Mothehi oa lelapa.

Ha re rata litho tsa lelapa e le kannete, sena se re susumelletsa hore re tsotelle batsoali ba rōna ba hōlileng kapa re phethe boikarabelo ba ho hlokomela bana ba rōna. Ho boetse ho susumelletsa batsoali hore ba khalemele bana ba bona ka lerato ha ho hlokahala ’me ho etsa hore ba se ke ba laoloa ke maikutlo, e leng seo hangata se etsang hore ba lumelle bana ba bona ho iketsetsa borata.—Baef. 6:1-4.

Melao-motheo ea Bibele e Re’ng ka Lerato la Batho ba Bong bo Fapaneng?

Ruri lerato le pakeng tsa monna le mosali ba nyalaneng ke mpho e tsoang ho Molimo. (Liprov. 5:15-17) Leha ho le joalo, bangoli ba Bibele ba bululetsoeng ha ba sebelise lentsoe eʹros, le bolelang lerato le pakeng tsa batho ba bong bo fapaneng. Hobane’ng? Lilemong tse ’maloa tse fetileng, Molula-Qhooa o ile oa re: “Kajeno lefatše lohle le bonahala le etsa phoso e tšoanang le e entsoeng ke ba-Gerike ba boholo-holo. Ba ne ba rapela Eros joaloka molimo, ba khumama aletareng ea hae le ho nehela lihlabelo ho eena. . . . Empa pale e bontša hore borapeli bo joalo ba botona le botšehali bo tlisitse feela nyenyefatso, tšenyeho le bolokolohi. Mohlomong ke ka baka leo bangoli ba Bibele ba sa kang ba sebelisa lentsoe leo.” E le hore re ka qoba ho ratana le motho hobane feela re khahloa ke ponahalo ea hae, maikutlo a rōna a lerato a lokela ho laoloa ke melao-motheo ea Bibele. Kahoo, ipotse, ‘Na maikutlo a ka a lerato a susumetsoa ke lerato la ’nete leo ke ratang mohlankana kapa kharebe ea ka ka lona?’

Nakong ea “palesa ea bocha” ha litakatso tsa ho kopanela liphate li atisa ho ba matla haholo, bacha ba latelang melao-motheo ea Bibele ba tla lula ba hloekile boitšoarong. (1 Bakor. 7:36; Bakol. 3:5) Re nka lenyalo e le mpho e halalelang e tsoang ho Jehova. Ha a bua ka banyalani, Jesu o ile a re: “Seo Molimo a se kopantseng hammoho jokong ho se ke ha e-ba le motho ea se arolang.” (Mat. 19:6) Ho e-na le hore re lule hammoho hobane feela e mong a ntse a khahloa ke e mong, re nka lenyalo e le boitlamo bo tebileng. Ha ho hlaha mathata lenyalong, ha re batle litsela tsa ho monyola ka hlooho empa re leka ka matla ho bonahatsa litšobotsi tse khahlisang Molimo e le ho etsa hore bophelo ba rōna ba lelapa e be bo thabisang. Boiteko bo joalo bo tla etsa hore re lule re thabile.—Baef. 5:33; Baheb. 13:4.

Lerato le Bang Teng Har’a Metsoalle

Bophelo bo ne bo tla ba bosula ha re ne re se na metsoalle! Maele a Bibele a re: “Ho na le motsoalle ea khomarelang haufi ho feta mor’abo motho.” (Liprov. 18:24) Jehova o batla hore re be le metsoalle ea ’nete. Setsoalle sa hlooho sa khomo se neng se le teng pakeng tsa Davida le Jonathane se tsebahala haholo. (1 Sam. 18:1) Bibele e re Jesu ‘o ne a rata’ moapostola Johanne. (Joh. 20:2) Lentsoe la Segerike le bolelang “ho rata” kapa “setsoalle” ke phi·liʹa. Ha ho na phoso haeba motho a e-na le motsoalle oa hlooho ea khomo ka phuthehong. Leha ho le joalo, ho 2 Petrose 1:7, re khothalletsoa hore re eketse lerato (a·gaʹpe) ‘boikutlong ba rōna bo mofuthu ba bara ba motho’ (phi·la·del·phiʹa, e leng lentsoe le bōpiloeng ka mantsoe a mabeli a Segerike, phiʹlos, e bolelang “motsoalle,” le a·del·phosʹ, e bolelang “mor’abo motho”). E le hore re be le setsoalle se tšoarellang, re lokela ho mamela keletso ena. Re lokela ho ipotsa, ‘Na maikutlo a ka ka setsoalle a tsamaisana le melao-motheo ea Bibele?’

Lentsoe la Molimo le re thusa hore re se ke ra ba leeme. Ha re tšoare batho ka litsela tse sa tšoaneng ka hore re bebofaletse metsoalle ea rōna lintho, ebe re imetsa bao e seng metsoalle ea rōna ka melao e thata-thata. Ho feta moo, ha re etse setsoalle ka ho rorisa batho ho tlōla tekano. Habohlokoa ka ho fetisisa, ha re sebelisa melao-motheo ea Bibele re lemoha hore na ho hlokahala eng ha re khetha metsoalle le hore na ho hlokahala eng e le hore re qobe ‘litloaelano tse mpe tse senyang mekhoa e metle.’—1 Bakor. 15:33.

Lerato ke Ntho e Ikhethang e Tlamahanyang Bakreste!

Ka sebele Bakreste ba tlamahanngoa ke ntho e ikhethang! Moapostola Pauluse o ile a ngola a re: “Lerato la lōna e ke e be le se nang boikaketsi. . . . Ka lerato la bara ba motho le bontšane lerato le mofuthu.” (Bar. 12:9, 10) Ka sebele, Bakreste ba na le ‘lerato (a·gaʹpe) le se nang boikaketsi.’ Lerato lena hase feela maikutlo a hlahang ka sekhahla ka lipelong tsa rōna. Ho e-na le hoo, le metse ka metso melao-motheong ea Bibele. Leha ho le joalo, Pauluse le eena o bua ka “lerato la bara ba motho” (phi·la·del·phiʹa) le “lerato le mofuthu” (phi·loʹstor·gos, e leng lentsoe le bōpiloeng ka mantsoe a mabeli phiʹlos le stor·geʹ). Ho ea ka setsebi se seng, “lerato la bara ba motho” ke “lerato le bontšang kameho e mofuthu, mosa, qenehelo le le ithaopelang ho thusa.” Ha le kopane le a·gaʹpe, le etsa hore ho be le setsoalle se matla har’a barapeli ba Jehova. (1 Bathes. 4:9, 10) Poleloana e ’ngoe e fetoleloang e le “lerato le mofuthu,” e hlaha hanngoe feela ka Bibeleng ’me e bolela katamelano e mofuthu e tšoanang le e bang teng ka lapeng.c

Bakreste ba tlamahanngoa ke lerato la lelapa, lerato le mofuthu leo ba ratang metsoalle ea ’nete ka lona ’me likamano tsena kaofela, li laoloa ke lerato le tsamaisoang ke melao-motheo ea Bibele. Phutheho ea Bokreste hase mokhatlo oa boithabiso kapa oa lefatše, empa ke lelapa le rapelang Jehova Molimo le momahane. Re bitsa balumeli-’moho le rōna bara le barali babo rōna ’me re ba nka joalo. Ke litho tsa lelapa labo rōna la moea, re ba rata joaloka metsoalle ’me kamehla re ba tšoara ka tsela e lumellanang le melao-motheo ea Bibele. E se eka kaofela ha rōna re ka kenya letsoho ho ntšetsa pele lerato le re tlamahanyang le le khethollang phutheho ea ’nete ea Bokreste.—Joh. 13:35.

[Mongolo o botlaaseng ba leqephe]

[Ntlha e Qolotsoeng e leqepheng la 12]

U kenya letsoho joang hore u ntšetse pele lerato le re tlamahanyang?