Na U Etella Pele ho Bontšeng Tlhompho?

“Etellang pele ho bontšaneng tlhompho.”​—BAR. 12:10.

 1. Ke eng e seng e sa tloaeleha likarolong tse ngata tsa lefatše?

LIKAROLONG tse ling tsa lefatše ho tloaelehile hore bana ba hlomphe batho ba baholo ka hore ba khumame ka tlhompho ha ba e-na le bona. Ha ba etsa joalo, ba ke ke ba shebahala ba le ba telele ho feta batho ba baholo. Lichabeng tsena, ho boetse ho nkoa e le ho hloka tlhompho hore ngoana a furalle motho e moholo. Le hoja tlhompho e bontšoa ka litsela tse sa tšoaneng bathong ba litso tse fapa-fapaneng, ho bontšoa ha tlhompho ka tsela eo ho re hopotsa Molao oa Moshe. Molao ona o ne o akarelletsa taelo e reng: “U eme pel’a moriri o moputsoa [ka tlhompho], ’me u nahanele motho ea tsofetseng.” (Lev. 19:32) Ka masoabi, libakeng tse ngata ha ho sa tloaelehile ho bontša tlhompho ho batho ba bang. Ha e le hantle, ho hloka tlhompho ke hona ho atileng.

 2. Lentsoe la Molimo le re bolella hore re hlomphe bo-mang?

² Lentsoe la Molimo le tlōtla taba ea ho bontša tlhompho. Le re bolella hore re hlomphe Jehova le Jesu. (Joh. 5:23) Re boetse re laeloa hore re bontše tlhompho ho litho tsa malapa le ho balumeli-’moho le rōna hammoho le ho batho ba bang ba ka ntle ho phutheho. (Bar. 12:10; Baef. 6:1, 2; 1 Pet. 2:17) Litsela tse ling tseo re bontšang ka tsona hore re hlompha Jehova ke life? Re bontša tlhompho, kapa tlōtlo e khōlō ho bara le ho baralib’abo rōna ba Bakreste joang? A re ke re tšohleng lipotso tsena le tse ling tse amanang le tsona.

Hlompha Jehova le Lebitso la Hae

 3. Tsela e ’ngoe ea bohlokoa ea ho hlompha Jehova ke efe?

³ Tsela e ’ngoe ea bohlokoa ea ho hlompha Jehova ke ho bontša tlhompho e tšoanelang lebitso la hae. Ha e le hantle, re “batho bakeng sa lebitso la hae.” (Lik. 15:14) Ka sebele ke tlotla ho bitsoa ka lebitso la Molimo ea matla ’ohle, Jehova. Moprofeta Mikea o ile a re: “Lichaba tsohle li tla tsamaea se seng le se seng ka lebitso la molimo oa sona; empa re tla tsamaea ka lebitso la Jehova Molimo oa rōna ho isa nakong e sa lekanyetsoang, esita le ka ho sa feleng.” (Mik. 4:5) Re “tsamaea ka lebitso la Jehova” ha re loanela hore letsatsi le letsatsi re phele ka tsela e etsang hore lebitso leo re bitsoang ka lona le hlahe hantle. Joalokaha Pauluse a ile a hopotsa Bakreste ba Roma, haeba re sa phelele litaba tse molemo tseo re li bolelang, lebitso la Molimo lea “nyefoloa” ebile lea senngoa.​—Bar. 2:21-24.

 4. U nka tlotla ea ho paka ka Jehova joang?

⁴ Re boetse re hlompha Jehova ka mosebetsi oa rōna oa ho paka. Nakong e fetileng, Jehova o ile a mema sechaba sa Iseraele hore e be lipaki tsa hae, empa se ile sa hlōleha ho phetha mosebetsi oo. (Esa. 43:1-12) Khafetsa se ne se furalla Jehova ’me se “utloisa Mohalaleli oa Iseraele bohloko.” (Pes. 78:40, 41) Qetellong, Jehova o ile a furalla sechaba seo ka ho feletseng. Leha ho le joalo, kajeno, rōna re motlotlo ka hore ebe re filoe tlotla ea ho paka ka Jehova le ho tsebahatsa lebitso la hae. Re etsa joalo hobane rea mo rata ebile re labalabela hore lebitso la hae le halaletsoe. Ho tseba ’nete ka Ntate oa rōna ea leholimong le ka merero ea hae ho etsa hore re batle ho bolela. Re ikutloa joaloka moapostola Pauluse ha a ne a re: “Etsoe ke tlamehile ho ho etsa. Ka sebele, ho malimabe ’na haeba ke sa ka ka bolela litaba tse molemo!”​—1 Bakor. 9:16.

 5. Ho lumela ho Jehova ho amana joang le ho mo hlompha?

⁵ Mopesaleme Davida o ile a re: “Ba tsebang lebitso la hao ba tla u tšepa, etsoe ka sebele u ke ke ua tlohela ba u batlang, Jehova.” (Pes. 9:10) Haeba ka sebele re tseba Jehova re bile re hlompha lebitso la hae le seo le se emelang, re tla mo tšepa joalokaha bahlanka ba hae ba tšepahalang ba boholo-holo ba ile ba mo tšepa. Ho tšepa Jehova ka tsela ena le ho lumela ho eena ka tsela ena, ke tsela e ’ngoe eo re bontšang ka eona hore rea mo hlompha. Hlokomela kamoo Lentsoe la Molimo le amahanyang ho tšepa Jehova le ho mo hlompha kateng. Nakong eo Baiseraele ba boholo-holo ba neng ba hlōleha ho Mo tšepa, Jehova o ile a botsa Moshe: “Sechaba see se tla ntlhompholla halelele hakae, ’me se ke ke sa beha tumelo ho ’na bakeng sa lipontšo tsohle tseo ke li entseng har’a sona halelele hakae?” (Num. 14:11) Se latelang le sona ke ’nete. Ka ho tšepa hore Jehova o tla re sireletsa le hore o tla re thusa leha re thulana le liteko, re bontša hore rea mo hlompha.

 6. Ke eng e re susumetsang hore re bontše hore re hlompha Jehova e le kannete?

⁶ Jesu o ile a bontša hore ho hlompha Jehova ho lokela ho tsoa pelong. Ha Jesu a ne a bua le batho ba neng ba sa sebeletse Molimo ka botšepehi, o ile a qotsa mantsoe ana a Jehova: “Sechaba sena se ntlhompha ka melomo, empa leha ho le joalo lipelo tsa sona li suthetse hōle le ’na.” (Mat. 15:8) Ho rata Jehova ho tsoa botebong ba pelo ke hona ho etsang hore motho a mo hlomphe e le kannete. (1 Joh. 5:3) Re boetse re lula re hopotse tšepiso ea Jehova e reng: “Ba ntlhomphang ke tla ba hlompha.”​—1 Sam. 2:30.

Ba Etellang Pele ba Bontša Hore ba Hlompha ba Bang

 7. (a) Ke hobane’ng ha barab’abo rōna ba ikarabellang ba lokela ho bontša hore ba hlompha ba boliseng ba bona? (b) Pauluse o ile a bontša joang hore o hlompha balumeli-’moho le eena?

⁷ Moapostola Pauluse o ile a eletsa balumeli-’moho le eena a re: “Etellang pele ho bontšaneng tlhompho.” (Bar. 12:10) Barab’abo rōna ba ikarabellang ka phuthehong ba lokela ho beha mohlala​—ba ‘etelle pele’—​ho bontša hore ba hlompha ba boliseng ba bona. Tabeng ena, ba nang le boikarabelo bo boholo ba lokela ho latela mohlala o ileng oa behoa ke Pauluse. (Bala 1 Bathesalonika 2:7, 8.) Barab’abo rōna ba neng ba le liphuthehong tseo Pauluse a neng a li etela ba ne ba tseba hore o ne a ke ke a ba kōpa hore ba etse lintho tseo eena a neng a ke ke a li etsa. Pauluse o ile a bontša hore o hlompha balumeli-’moho le eena, ’me seo se ile sa etsa hore ba mo hlomphe. Ha Pauluse a ne a re: “Ka hona, ke le kōpa ka tieo, e-bang baetsisi ba ka,” re ka kholiseha hore ba bangata ba ile ba etsisa Pauluse ka boithatelo ka lebaka la mohlala oa hae o motle.​—1 Bakor. 4:16.

 8. (a) Tsela e ’ngoe ea bohlokoa eo Jesu a bontšitseng hore o hlompha barutuoa ba hae ka eona ke efe? (b) Kajeno balebeli ba ka latela mohlala oa Jesu joang?

⁸ Tsela e ’ngoe eo ka eona mor’abo rōna ea ikarabellang a bontšang hore o hlompha ba boliseng ba hae ke ka ho ba bolella hore na ke hobane’ng ha a kōpa ntho e itseng kapa a ba fa litaelo tse itseng. Ha a etsa joalo, o etsisa Jesu. Ka mohlala, ha Jesu a ne a bolella barutuoa ba hae hore ba rapelle hore ho romeloe basebetsi ba bangata kotulong, o ile a ba bolella lebaka la seo. O ile a re: “Kotulo e khōlō, empa basebetsi ha ba bakae. Ka hona, le kōpe Mong’a kotulo hore a romele basebetsi kotulong ea hae.” (Mat. 9:37, 38) Ka ho tšoanang, ha a ne a re ho barutuoa ba hae “le lule le lebetse,” o ile a ba fa lebaka. O ile a re: “Hobane ha le tsebe hore na Morena oa lōna o tla ka letsatsi lefe.” (Mat. 24:42) Hangata, Jesu o ne a sa bolelle barutuoa ba hae seo ba lokelang ho se etsa feela empa o ne a boetse a ba bolella le hore na ke hobane’ng ha ba lokela ho se etsa. Ka tsela eo, o ile a bontša hore oa ba hlompha ebile o ba siela seriti. Ke mohlala o motle hakaakang oo balebeli ba Bakreste ba lokelang ho o latela!

Hlompha Phutheho ea Jehova le Tataiso eo e Fanang ka Eona

 9. Ha re hlompha phutheho ea Bokreste ea lefatše lohle le baemeli ba eona, re boetse re hlompha mang? Hlalosa.

⁹ E le hore re hlomphe Jehova, re boetse re lokela ho hlompha phutheho ea Bokreste ea lefatše lohle, hammoho le baemeli ba eona. Ha re mamela keletso ea Mangolo e tsoang ho sehlopha sa lekhoba le tšepahalang, re bontša hore re hlompha tokisetso ea Jehova. Phuthehong ea Bokreste ea lekholo la pele la lilemo, moapostola Johanne o ile a bona ho hlokahala hore a nyatse ba neng ba bontša hore ha ba hlomphe ba khethiloeng. (Bala 3 Johanne 9-11.) Mantsoe a Johanne a bontša hore ba ne ba sa hlompholle feela balebeli ka bomong empa ba ne ba boetse ba hlompholla lithuto tsa bona le tataiso ea bona. Ka lehlohonolo, Bakreste ba bangata ba ne ba se joalo. Ha baapostola ba sa ntse ba phela, ho hlakile hore mokhatlo oohle oa bara ba motho o ne o bontša tlhompho e khōlō ho ba etellang pele.​—Bafil. 2:12.

10, 11. Hlalosa ka Mangolo hore na ke hobane’ng ha ho loketse hore ebe ba bang ba filoe bolaoli ka phuthehong ea Bokreste.

¹⁰ Ba bang ba ’nile ba nahana hore kaha Jesu o ile a bolella barutuoa ba hae hore “lōna bohle le bara ba motho,” ha hoa lokela hore ho be le maemo a bolaoli ka phuthehong ea Bokreste. (Mat. 23:8) Leha ho le joalo, Mangolo a Seheberu le a Segerike a na le mehlala e mengata ea banna bao Molimo a neng a ba file bolaoli. Histori ea bapatriareka, baahloli le marena a Baheberu ba boholo-holo e fana ka bopaki bo bongata ba hore Jehova o sebelisa baemeli ba batho e le hore a fane ka litaelo. Ha sechaba se ne se sa bontše batho ba khethiloeng tlhompho e loketseng, Jehova o ne a se khalemela.​—2 Mar. 1:2-17; 2:19, 23, 24.

¹¹ Ka tsela e tšoanang, Bakreste ba lekholong la pele la lilemo ba ne ba ananela bolaoli ba baapostola. (Lik. 2:42) Ka mohlala, Pauluse o ne a fa barab’abo litaelo. (1 Bakor. 16:1; 1 Bathes. 4:2) Leha ho le joalo, ka boithatelo le eena o ne a ikokobelletsa bolaoli ba ba neng ba mo okametse. (Lik. 15:22; Bagal. 2:9, 10) Ka sebele, Pauluse o ne a e-na le maikutlo a loketseng mabapi le bolaoli ka phuthehong ea Bokreste.

12. Ke lintho life tse peli tseo re ithutang tsona ka bolaoli mehlaleng ea Bibele?

¹² Re ithuta lintho tse peli thutong ena. Ea pele, Mangolo a lumella “lekhoba le tšepahalang le le masene” ka Sehlopha se Busang sa lona hore se khethe banna hore ba be le maemo a boikarabelo, ’me banna ba bang ba khetheloa hore ba be le bolaoli holim’a banna ba bang ba khethiloeng. (Mat. 24:45-47; 1 Pet. 5:1-3) Ea bobeli, kaofela ha rōna, ho akarelletsa banna ba khethiloeng, re lokela ho hlompha ba re okametseng. Joale, re ka hlompha ba maemong a bolebeli phuthehong ea Bokreste ea lefatše lohle ka litsela life tse molemo?

Ho Bontša Tlhompho ho Balebeli ba Tsamaeang

13. Re ka bontša joang hore re hlompha baemeli ba kajeno ba phutheho ea Bokreste?

¹³ Pauluse o ile a re: “Rea le kōpa, barab’eso, hore le hlomphe ba sebetsang ka thata har’a lōna le ba le okametseng Moreneng le ba le eletsang; le ba ele hloko haholo ka lerato ho feta kamoo ho tloaelehileng ka lebaka la mosebetsi oa bona. E mong a be le khotso le e mong.” (1 Bathes. 5:12, 13) Ka sebele balebeli ba tsamaeang ke ba bang ba ba “sebetsang ka thata.” Ka hona, a re ba ‘eleng hloko haholo ho feta kamoo ho tloaelehileng.’ Tsela e ’ngoe eo re ka etsang sena ka eona ke ka ho latela keletso le khothatso ea bona ka pelo eohle. Ha molebeli eo a re fa tataiso e tsoang ho sehlopha sa lekhoba le tšepahalang, “bohlale bo tsoang holimo” bo tla re susumeletsa hore re ‘itokisetse ho mamela.’​—Jak. 3:17.

14. Phutheho e bontša joang hore e hlompha balebeli ba tsamaeang ho tsoa botebong ba pelo, ’me seo se fella ka eng?

¹⁴ Ho thoe’ng haeba re laeloa hore re etse lintho ka tsela e fapaneng le eo re e tloaetseng? Ka linako tse ling ho bontša tlhompho ho ka ’na ha re hloka hore re loantše tšusumetso ea ho hana tataiso ka ho nahana lintho tse kang, “Mona ha re etse lintho joalo” kapa, “Mohlomong seo se ka ’na sa sebetsa libakeng tse ling empa se ke ke sa sebetsa phuthehong ea rōna.” Ho e-na le hoo, re loanela ho latela tataiso eo re e fuoang. Ho lula re hopola hore phutheho ke ea Jehova le hore Jesu ke Hlooho ea eona ho tla re thusa hore re etse joalo. Ha phutheho e amohela ka thabo tataiso e tsoang ho molebeli ea tsamaeang ebile e e sebelisa, seo se bontša tlhompho e tsoang botebong ba pelo. Moapostola Pauluse o ile a babatsa barab’abo rōna ba Korinthe ka hore ebe ba ile ba mamela ka tlhompho tataiso eo ba neng ba e filoe ke Tite, moholo ea neng a ba etetse. (2 Bakor. 7:13-16) Kajeno, le rōna re ka kholiseha hore haeba ka boikemisetso re sebelisa tataiso eo re e fuoang ke balebeli ba tsamaeang, sena se ka etsa hore re thabele mosebetsi oa rōna oa boboleli haholo.​—Bala 2 Bakorinthe 13:11.

“Hlomphang Batho ba Mefuta Eohle”

15. Re bontša hore re hlompha balumeli-’moho le rōna ka litsela life?

¹⁵ Pauluse o ile a ngola a re: “U se ke ua nyatsa monna e moholo ka matla. Ho fapana le hoo, u mo kōpe ka tieo joaloka ntate, banna ba bacha joaloka barab’eno, basali ba baholo joaloka bo-’mè, basali ba bacha joaloka likhaitseli tsa hao ka tlhoeko eohle. Hlompha bahlolohali bao ka sebele e leng bahlolohali.” (1 Tim. 5:1-3) Ka sebele, Lentsoe la Molimo le re eletsa hore re hlomphe motho e mong le e mong ka phuthehong ea Bokreste. Leha ho le joalo, ho thoe’ng haeba ho e-na le phapang pakeng tsa hao le mora kapa morali’eno? Na seo se tla etsa hore u se ke ua bontša Mokreste-’moho le uena eo tlhompho? Kapa na u ka lokisa maikutlo a hao ka hore u ele hloko makhabane a Bokreste ao mohlanka eo oa Molimo a nang le ’ona? Ba filoeng bolaoli ke bona bao ka ho khetheha ba lokelang ho lula ba hlompha barab’abo bona—ho se ke ha e-ba le mohla ba ‘renang ka thata holim’a mohlape.’ (1 Pet. 5:3) Ka sebele, ka phuthehong ea Bokreste, e tsejoang ka lerato la sebele leo litho tsa eona li nang le lona, re na le menyetla e mengata ea ho hlomphana.​—Bala Johanne 13:34, 35.

16, 17. (a) Ke hobane’ng ha re sa lokela ho hlompha feela batho bao re ba pakelang empa re lokela ho hlompha le bahanyetsi? (b) Re ‘hlompha batho ba mefuta eohle’ joang?

¹⁶ Ke ’nete hore ha re hlomphe feela batho bao e leng karolo ea phutheho ea Bokreste. Pauluse o ile a ngolla Bakreste ba mehleng ea hae a re: “Hafeela re sa na le nako e loketseng, a re sebetseng se molemo ho bohle.” (Bagal. 6:10) Ha ho pelaelo hore ho ka ba thata ho sebelisa molao-motheo oo haeba mosebetsi-’moho le rōna kapa eo re kenang sekolo le eena a sa re tšoare hantle. Maemong a joalo, re lokela ho hopola mantsoe a reng: “U se ke ua iponahatsa u halefile ka lebaka la baetsi ba bobe.” (Pes. 37:1) Ho sebelisa keletso eo ho tla re thusa hore re hlomphe le bahanyetsi. Ka ho tšoanang, ha re le tšebeletsong ea tšimo, ho se inkele holimo ho ka re thusa hore re arabe bohle ka “maikutlo a bonolo le tlhompho e tebileng.” (1 Pet. 3:15) Tsela eo re shebahalang ka eona le eo re aparang ka eona, le eona e ka bontša hore re hlompha batho bao re ba pakelang.

¹⁷ Ka sebele, ebang re sebelisana le balumeli-’moho le rōna kapa le batho ba ka ntle ho phutheho, re lokela ho loanela ho sebelisa keletso e latelang: “Hlomphang batho ba mefuta eohle, le be le lerato bakeng sa mokhatlo oohle oa barab’abo rōna, le tšabe Molimo, le be le tlhompho bakeng sa morena.”​—1 Pet. 2:17.

U ka Araba Joang?

U ka bontša tlhompho e loketseng joang ho:

• Jehova?

• Baholo ba phutheho le balebeli ba tsamaeang?

• Setho se seng le se seng sa phutheho?

• Bao u ba pakelang?

[Setšoantšo se leqepheng la 23]

Bakreste ba lekholong la pele la lilemo ba ne ba hlompha bolebeli ba sehlopha se busang

[Setšoantšo se leqepheng la 24]

Linaheng tsohle baholo ba hlompha balebeli ba tsamaeang, ba khethiloeng ke Sehlopha se Busang