Na u sa Hopola?
Na u nahanne ka hloko ka litokollo tsa morao-rao tsa Molula-Qhooa? Haeba ho joalo, mohlomong u tla khona ho hopola se latelang:
◻ Na Bakreste ba bang ba tlotsitsoeng ba tla pholoha “mahlomoleng a maholo” ’me ba phele lefatšeng nakoana pele ba nkeloa leholimong?—Tšenolo 7:14.
Bibele ha e hlalose sena ka ho hlaka. Ho bonahala eka litlaleho tse ling tsa Bibele li bontša hore batlotsuoa ba ka ’na ba tsoela pele ba ntse ba phela ho kena lefatšeng le lecha. Leha ho le joalo, ba limillione ba nang le tšepo ea ho phela ka ho sa feleng lefatšeng ba fumane koetliso e hlokahalang ho qalisa lefatše le lecha. Ka hona, masala a fokolang ka palo a ke ke a hlokahala bakeng sa mosebetsi ona, ’me Molimo o ka khetha ho a nkela leholimong bakeng sa “lenyalo la Konyana” ka mor’a ho ahloloa ha seotsoa sa bolumeli, “Babylona e moholo.” (Tšenolo 18:2, 10; 19:2, 7, 8)—8/15, leqephe 31.
◻ Monna o lokela ho beha pelo ea hae tabeng ea ho ba molebeli oa Mokreste ka merero efe? (1 Timothea 3:1)
Monna o lokela ho hahamalla tšebeletso ea molebeli, a etse hona ka boikokobetso hobane a batla ho sebeletsa ba bang. Ha a susumetsoa ke merero e nepahetseng joalo, khato ena ea hae e ka tlisa mahlohonolo a moea ho bohle ba amehang.—9/1, leqephe 18.
◻ Ke hobane’ng ha moapostola Pauluse a sa ka a nyahama ho sa tsotellehe tsohle tseo a ileng a lokela ho li mamella?
Pauluse oa hlalosa: “Bakeng sa lintho tsohle ke na le matla ka ho matlafatsoa ke ea mphang matla.” (Ba-Filippi 4:13, NW) Ha ho mohla Pauluse a kileng a leka ho itjarela mejaro ea hae a le mong. Ho e-na le hoo, o ile a talima ho Jehova hore a mo tšehetse. (Pesaleme ea 55:22)—9/1, leqephe 30.
◻ Ke eng se boleloang ke mantsoe a Pauluse a ho Ba-Efese 4:26: “Ekare ha le halefa, le se ke la etsa sebe”?
Mantsoe ana aa lumela hore motho a ka ’na a halefa ka lebaka le utloahalang, empa ha hona ho etsahala, motho ha aa lokela ho ‘lula a halefile ho fihlela letsatsi le phirima.’ (Ba-Efese 4:26) Hobane’ng? Hobane hona ho ne ho tla neha Diabolose sebaka sa ho nka monyetla ka motho eo, mohlomong a mo susumelletse ho etsa ntho e ’ngoe e mpe, ’me a lahleheloe ke kamohelo ea Molimo. (Pesaleme ea 37:8, 9)—9/15, leqephe 21.
◻ Ho na le phapang efe e khōlō pakeng tsa tsela eo Lipaki tsa Jehova li rutang ka eona le tsela eo baruti ba Bokreste-’mōtoana ba rutang ka eona?
Lipaki tsa Jehova li ruta ka matla a Lentsoe la Molimo, athe baruti ba Bokreste-’mōtoana ba theile thuto ea bona lineanong tsa bolumeli ba bohetene tse ’nileng tsa neheletsanoa ho tloha Babylona le Egepeta.—10/1, leqephe 25.
◻ Lebaka la bohlokoa ka ho fetisisa leo Mor’a Molimo a ileng a tla lefatšeng ka lona ke lefe?
Morero o moholo oo Jesu a ileng a tla lefatšeng ka oona e ne e le ho rarolla tseko eo Satane a e hlahisitseng mabapi le bobusi ba Jehova.—10/15, leqephe 13.
◻ Ha re bitsa balaoli ba lefatše “ba phahameng,” na re amoha Jehova khanya e mo loketseng ka tsela leha e le efe? (Ba-Roma 13:1)
Che, hobane Jehova hase ‘ea phahameng’ feela. Ke “Morena ’Musi,” “Ea Phahameng ka ho Fetisisa.” (Pesaleme ea 73:28, NW; Daniele 7:18, 22, NW) Balaoli ba lefatše ba mpa ba phahame feela ha ba bapisoa le batho ba bang esita le karolong ea bona ea mosebetsi. Ba ikarabella bakeng sa ho busa le ho sireletsa lichaba.—11/1, leqephe 12.
◻ Ke hobane’ng ha lerato e le tholoana e khōlō ka ho fetisisa litholoaneng tsa moea oa Molimo tse boletsoeng ho Ba-Galata 5:22, 23?
Litholoana tse ling tse robeli tsa moea oa Molimo ke lipontšo, kapa litšobotsi tse sa tšoaneng tsa lerato, e leng eona tholoana e boletsoeng pele. Litholoana tsena tse ling kaofela tsa moea ke litšoaneleho tse hlokahalang, empa li ke ke tsa re tsoela molemo ha re se na lerato. (1 Ba-Korinthe 13:3)—11/15, leqephe 14.
◻ Melemo ea ho rapella balumeli-’moho ke efe?
Ha re etsa hore boiketlo ba moea ba ba bang e be seo re amehileng ka sona thapelong, re atamela haufinyane le bona ka lerato la boena. Re boetse re ba utloela bohloko, re kopanela lithahasellong tsa bona le litsietsing tsa bona. Kahoo, tlhonamo leha e le efe ea fela, ’me hoo ho lumella mehopolo e hahang e etsang hore re be ba nang le lerato le ba thabileng.—11/15, maqephe 21-2.
◻ Mabaka a re tlamang ho rapela Jehova Molimo ke afe?
Re lokela ho rapela Jehova hobane ke ’Mōpi ’me litšoaneleho tsa hae li re atametsa haufinyane le eena. (Deuteronoma 32:3, 4; 1 Johanne 4:8; Tšenolo 10:6) Bibele e re: “Boinehelo ba bomolimo bo molemo bakeng sa lintho tsohle, kaha bo fana ka tšepiso ea bophelo ba hona joale le ea bo tlang ho tla.” (1 Timothea 4:8, NW) Ha ho molimo o mong ka ntle ho Jehova o ka tšepisang phello e kang ena ’me oa phethahatsa tšepiso ea oona.—12/1 maqephe 6-7.