Ho Phelela Boinehelo ba Rōna “Letsatsi le Letsatsi”
“Haeba mang le mang a batla ho ntšala morao, aa ke a itatole ’me a nke thupa ea hae ea tlhokofatso letsatsi le letsatsi ’me a ntatele ka ho tsoelang pele.”—LUKA 9:23, NW.
1. Tsela e ’ngoe ea ho lekanyetsa katleho ea rōna joaloka Bakreste ke efe?
“NA KANNETE re ne re le batho ba inehetseng?” Karabelo potsong ena, ho ea ka John F. Kennedy, Mopresidente oa bo35 oa United States, ke ntlha ea bohlokoa ho lekanyetseng katleho ea ba maemong a boikarabelo ’musong. Potso ena e ka sebeletsa e le ea bohlokoa bo tebileng haholoanyane bakeng sa ho lekanyetsa ho atleha ha rōna re le basebeletsi ba Bakreste.
2. Dikishenare e hlalosa lentsoe “boinehelo” joang?
2 Feela, hantle-ntle, boinehelo ke eng? Webster’s Ninth New Collegiate Dictionary e bo hlalosa e le “bohato kapa tšebeletso ea ho inehela ho boleng ba bomolimo kapa tšebelisong e halalelang,” “ho nehela kapa ho behella ka thōko bakeng sa morero o itseng o khethehileng,” “borapeli ba boitelo.” Ho bonahala John F. Kennedy a ne a sebelisa lentsoe leo ho bolela “borapeli ba boitelo.” Ho Mokreste, boinehelo bo bolela ho fetang hoo.
3. Boinehelo ba Bokreste ke eng?
3 Jesu Kreste o ile a bolella barutuoa ba hae: “Haeba mang le mang a batla ho ntšala morao, aa ke a itatole ’me a nke thupa ea hae ea tlhokofatso ’me ka ho tsoelang pele a ntatele.” (Mattheu 16:24, NW) Ho behelloa ka thōko bakeng sa tšebeliso ea bomolimo ha ho akarelletse feela ho etsa ketso ea borapeli ka Sontaha kapa ha u etetse sebaka se seng sa borapeli. Ho akarelletsa mokhoa oohle oa motho oa bophelo. Ho ba Mokreste ho bolela ho itatola kapa ho ikhana ha u sebeletsa Molimo eo Jesu Kreste a ileng a mo sebeletsa, Jehova. Ho phaella moo, Mokreste o nka “thupa ea hae ea tlhokofatso” ka ho mamella tlas’a mahlomola leha e le afe a ka bang teng ka lebaka la ho latela Kreste.
Mohlala o Phethahetseng
4. Kolobetso ea Jesu e ne e emela eng?
4 Ha a le lefatšeng, Jesu o ile a bontša hore na ho inehela ho Jehova ho akarelletsa eng. Maikutlo a hae e bile ana: “Ha ua ka ua rata sehlabelo, leha e le nyehelo, empa u ntokiselitse ’mele.” Eaba oa phaella: “Bona, Molimo, ke tlile ho etsa thato ea hao; joalo ka ha ho ngoliloe taba tsa ka bukeng.” (Ba-Heberu 10:5-7) E le setho sa sechaba se inehetseng, o ne a inehetse ho Jehova tsoalong. Ho ntse ho le joalo, qalong ea tšebeletso ea hae ea lefatšeng, o ile a inyehela bakeng sa kolobetso e le pontšo ea ho itlhahisa ho tla etsa thato ea Jehova, eo ho eena e neng e tla akarelletsa ho nyehela bophelo ba hae e le sehlabelo sa thekollo. Kahoo o ile a behela Bakreste mohlala oa hore ba etse eng kapa eng eo Jehova a ratang hore ba e etse.
5. Jesu o ile a bontša pono eo e leng mohlala joang ka lintho tse bonahalang?
5 Ka mor’a ho kolobetsoa ha hae Jesu o ile a latela tsela ea bophelo eo qetellong e ileng ea lebisa lefung la sehlabelo. O ne a sa thahaselle ho etsa chelete kapa ho phela bophelo ba boiketlo. Ho e-na le hoo, tšebeletso ea hae e ne e le karolo ea bohlokoahali ea bophelo ba hae. O ile a eletsa barutuoa ba hae hore ‘ba ’ne ba batle ’muso pele le ho loka ha hae,’ ’me eena ka boeena o ile a phelela mantsoe ana. (Mattheu 6:33) Hobane, ka lekhetlo le leng o kile a ba a re: “Liphokojoe li na le mesima, le [linonyana] tsa leholimo li na le matlo; empa Mor’a motho ha a na moo a ka samelang hlooho ea hae teng.” (Mattheu 8:20) A ka be a ile a etsa hore lithuto tsa hae li lokele litlhoko tsa hae e le hore a ka pepeta barutuoa ba hae chelete. E le ’metli a ka be a ile a sebelisa nako ea tšebeletso ea hae ho ea etsa thepa ea ka tlung e ntle hore a e rekise e le hore a ka ba le likotoana tse eketsehileng tsa silevera. Empa ha aa ka a sebelisa tsebo ea hae ho batla katleho ea lintho tse bonahalang. Joaloka bahlanka ba inehetseng ba Molimo, na re etsisa Jesu ka ho ba le pono e nepahetseng ka lintho tse bonahalang?—Mattheu 6:24-34.
6. Re ka etsisa Jesu joang ka ho ba bahlanka ba itelang, ba inehetseng ba Molimo?
6 Ka ho etelletsa tšebeletso ea hae ho Molimo pele, Jesu ha aa ka a ipatlela seo a se thahasellang. Bophelo ba hae nakong ea lilemo tse tharo le halofo tsa tšebeletso ea hae ea phatlalatsa e ne e le ba boitelo. Ketsahalong e ’ngoe ka mor’a hore a tšoarehe letsatsi lohle, a sa fumane le nako ea ho ja, Jesu o ne a ikemiselitse ho ruta batho ba neng ba “khathetse, ba saretsoe joalo ka linku tse se nang molisa.” (Mattheu 9:36; Mareka 6:31-34) Le hoja “a na a khathetse ke tsela,” o ile a nka bohato ba pele ba ho buisana le mosali e mong oa Mosamaria ea neng a tlile selibeng sa Jakobo se Sikare. (Johanne 4:6, 7, 13-15) Kamehla o ne a etelletsa boiketlo ba ba bang ka pele ho ba hae. (Johanne 11:5-15) Re ka etsisa Jesu ka hore ka bolokolohi re tele lithahasello tsa rōna hore re sebeletse Molimo le ba bang. (Johanne 6:38) Ka ho nahana ka kamoo re ka hlang ra thabisa Molimo kateng ho e-na le ho etsa feela se hlokahalang, re tla be re phelela boinehelo ba rōna.
7. Re ka etsisa Jesu joang ka hore kamehla re hlomphe Jehova?
7 Ho hang Jesu o ne a sa leke ho ikhapela tlhokomelo ka ho thusa batho. O ne a inehetse ho Molimo ho etsa thato ea Hae. Kahoo kamehla o ne a etsa bonnete ba hore Jehova, Ntate oa hae, o fumana tlotla eohle bakeng sa eng kapa eng e finyelletsoeng. Ha ’musi e mong a bua le eena a re ke “Moruti ea molemo,” a sebelisa lentsoe “molemo” e le tlotla, Jesu o ile a mo khalemela ka ho re: “Ha ho ea molemo, ha e se a le mong, e leng Molimo.” (Luka 18:18, 19; Johanne 5:19, 30) Na rōna, joaloka Jesu, re potlakela ho tlosa tlhompho ho rōna ho e lebisa ho Jehova?
8. (a) Joaloka motho ea inehetseng, Jesu o ile a ikarola lefatšeng joang? (b) Re lokela ho mo etsisa joang?
8 Ho pholletsa le tsela ea hae ea bophelo ba boinehelo lefatšeng, Jesu o ile a bontša hore o ne a ipeheletse ka thōko bakeng sa tšebeletso ea bomolimo. O ile a ipoloka a hloekile e le hore a ka inyehela e le “konyana e se nang letheba le sekoli” hore e be sehlabelo sa thekollo. (1 Petrose 1:19; Ba-Heberu 7:26) O ile a boloka litaelo tsohle tsa Molao oa Moshe, kahoo a phethahatsa Molao oo. (Mattheu 5:17; 2 Ba-Korinthe 1:20) O ile a phelela thuto ea hae mabapi le boitšoaro. (Mattheu 5:27, 28) Ha ho ea neng a ka mo qosa ka nepo ka maikutlo a mabe. Ka sebele, o ne a “hloile bokhopo.” (Ba-Heberu 1:9) Joaloka makhoba a Molimo, a re etsiseng Jesu ka ho boloka bophelo ba rōna esita le merero ea rōna e hloekile mahlong a Jehova.
Mehlala e Lemosang
9. Pauluse o ile a bua ka mohlala ofe o lemosang, hona ke hobane’ng ha re lokela ho hlahloba mohlala oo?
9 Ha ho bapisoa le mohlala oa Jesu, re na le mohlala o lemosang oa Baiseraele. Esita le ka mor’a ho bolela hore ba tla etsa tsohle tseo Jehova a itseng ba li etse, ba ile ba hlōleha ho etsa thato ea hae. (Daniele 9:11) Moapostola Pauluse o ile a khothalletsa Bakreste hore ba ithute ho se ileng sa hlahela Baiseraele. A re hlahlobeng tse ling tsa liketsahalo tseo Pauluse a ileng a bua ka tsona lengolong la hae la pele le eang ho Bakorinthe ’me re bone hore na ke maraba afe ao ho hlokahalang hore bahlanka ba inehetseng ba Molimo ba a qobe mehleng ea rōna.—1 Ba-Korinthe 10:1-6, 11.
10. (a) Baiseraele ba ile ba “lakatsa tse mpe” joang? (b) Ke hobane’ng ha lekhetlong la bobeli Baiseraele ba ile ba ikarabella ha ba korotla ka lijo, ’me re ka ithuta eng mohlaleng ona o lemosang?
10 La pele, Pauluse o ile a re lemosa hore re se ke “ra lakatsa tse mpe.” (1 Ba-Korinthe 10:6) Seo se ka ’na sa u hopotsa ketsahalo eo ho eona Baiseraele ba ileng ba belaela ka hore ba se ba e-ja manna feela. Jehova o ile a ba romella likoekoe. Ho ne ho etsahetse ntho e tšoanang hoo e ka batlang e e-ba selemo pejana lehoatateng la Sine, pele feela Baiseraele ba bolela boinehelo ba bona ho Jehova. (Exoda 16:1-3, 12, 13) Empa boemo bona bo ne bo sa tšoane hantle. Ha Jehova a fana ka likoekoe ka lekhetlo la pele, ha aa ka a nka Baiseraele ba ikarabella bakeng sa ho korotla ha bona. Leha ho le joalo, lekhetlong lena, lintho li ne li fapane. “Empa nama ha e sa ntse e le menong a bona, e e-so ho hlafunoe, khalefo ea Jehova ea tukela sechaba, ’me Jehova a otla sechaba ka kotsi e kholo haholo.” (Numere 11:4-6, 31-34) Ho ne ho fetohile eng? Joaloka sechaba se inehetseng, joale ba ne ba nkoa ba ikarabella. Ho haelloa ke kananelo ha bona bakeng sa litokisetso tsa Jehova ho ile ha ba lebisa ho belaeleng khahlanong le Jehova, ho sa tsotellehe hore ba ne ba ile ba tšepisa hore ba tla etsa tsohle tseo Jehova a li buileng! Ho belaela ka tafole ea Jehova kajeno hoa tšoana. Ba bang ba hlōleha ho ananela litokisetso tsa Jehova tsa moea ka “mohlanka ea khabane, ea bohlale.” (Mattheu 24:45-47) Leha ho le joalo, hopola hore boinehelo ba rōna bo re hloka hore ka teboho re hopole seo Jehova a re etselitseng sona ’me re amohele lijo tsa moea tseo Jehova a fanang ka tsona.
11. (a) Baiseraele ba ile ba silafatsa borapeli ba bona ho Jehova ka borapeli ba litšoantšo joang? (b) Mofuta o mong oa borapeli ba litšoantšo o ka re ama joang?
11 Ka mor’a moo, Pauluse o ile a lemosa: “’Me le se ke la fetoha ba rapelang litšoantšo, joalo ka ba bang har’a bona.” (1 Ba-Korinthe 10:7) Mona ho bonahala moapostola a ne a bua ka borapeli ba namane bo ileng ba etsahala hang ka mor’a hore Baiseraele ba thehe selekane le Jehova Thabeng ea Sinai. U ka ’na ua re, ‘Joaloka mohlanka ea inehetseng oa Jehova, le ka mohla nke ke ka ameha borapeling ba litšoantšo.’ Leha ho le joalo, hlokomela hore ponong ea Baiseraele, ha baa ka ba khaotsa ho rapela Jehova; empa, ba ile ba kenyelletsa tloaelo ea borapeli ba namane—e leng ntho e nyonyehang ho Molimo. Mofuta oo oa borapeli o ne o akarelletsa eng? Sechaba se ile sa etsa mahlabelo ka pel’a namane, eaba joale se “lula fatše ho ja le ho noa, sa ntoo ema sa hobela.” (Exoda 32:4-6) Kajeno, ba bang ba ka ’na ba bolela hore ba rapela Jehova. Empa bophelo ba bona e ka ’na eaba bo likoloha ho thabeleng lintho tsa lefatše lena, eseng borapeling ba Jehova, ’me ba leka ho kenyelletsa tšebeletso ea bona ho Jehova ho li likoloha. Ke ’nete, hona ha hoa fetella joaloka ho khumamela namane ea khauta, empa ha hoa fapana hakaalo ho latela molao-motheo. Ho etsa molimo ka takatso ea motho ho hōle le ho phelela boinehelo ba motho ho Jehova.—Ba-Filippi 3:19.
12. Phihlelong ea Baiseraele le Baale-Peore, re ithuta eng ka ho itatola?
12 Mofuta o mong oa boithabiso o ne o boetse o ameha mohlaleng o latelang oa temoso oo Pauluse a o boletseng. “Hape, re se ke ra etsa bootsoa, joalo ka ba bang har’a bona ba kileng ba ineela jona, ’me ka tsatsi le le leng ha oa ba likete tse mashome a mabeli a metso e meraro.” (1 Ba-Korinthe 10:8) Baiseraele, ba hokiloe ke monyaka oa boitšoaro bo bobe o neng o fanoe ke barali ba Moabe, ba ile ba huleloa ho rapeleng Baale-Peore Sittime. (Numere 25:1-3, 9) Ho itatola hore re ba rōna ka ho etsa thato ea Jehova ho akarelletsa ho amohela litekanyetso tsa hae bakeng sa se hloekileng boitšoarong. (Mattheu 5:27-30) Mehleng ena eo litekanyetso li hlephang, re hopotsoa hore hoa hlokahala ho ipoloka re hloekile mefuteng eohle ea boitšoaro bo bobe, le ho ikokobeletsa bolaoli ba Jehova bakeng sa ho khetha se setle le se sebe.—1 Ba-Korinthe 6:9-11.
13. Mohlala oa Finease o re thusa joang ho utloisisa seo boinehelo ho Jehova bo se akarelletsang?
13 Le hoja ba bangata ba ile ba oela lerabeng la bohlola Sittime, ba bang ba ile ba phelela boinehelo ba sechaba ho Jehova. Ho bona, Finease o ne a ikhetha ka ho cheseha. Ha a bona morena oa Moiseraele a tlisa mosali oa Momidiane tenteng ea hae, hang-hang Finease a nka lerumo la hae ’me a ba hlaba la ba la tsoa ka ’nģane. Jehova a bolella Moshe: “Finease . . . o khelositse bohale ba ka holim’a bana ba Iseraele, kahobane a mpouletse har’a bona; ke ka baka leo ke sa kang ka timetsa bana ba Iseraele poulelong ea ka.” (Numere 25:11) Ho se mamelle tlholisano ho hang mabapi le Jehova—ke sona seo boinehelo bo se bolelang. Re ke ke ra lumella ntho leha e le efe ho nka sebaka seo boinehelo ho Jehova bo lokelang ho se nka lipelong tsa rōna. Ho chesehela Jehova le hona ho re susumelletsa ho boloka phutheho e hloekile ka ho tlaleha boitšoaro bo bobe bo tebileng ho baholo, re sa bo mamelle.
14. (a) Baiseraele ba ile ba beha Jehova tekong joang? (b) Boinehelo bo feletseng ho Jehova bo re thusa joang hore re se ke ra “khathala”?
14 Pauluse o ile a bua ka mohlala o mong o lemosang: “Re se ke ra leka Morena, joalokaha ba bang ba bona ba ile ba mo leka, ’me ba bolaoa ke linōha.” (1 Ba-Korinthe 10:9, Bibele Phetolelo e Ncha) Mona Pauluse o ne a bua ka nako eo Baiseraele ba neng ba belaela ka Molimo ho Moshe ha ba ne ba ‘felloa ke pelo tseleng.’ (Numere 21:4) Na u se u kile ua etsa phoso eo? Ha u ne u inehela ho Jehova, na u ne u nahana hore Armageddone e haufi haholo? Na mamello ea Jehova e bile telele ho feta kamoo u neng u lebeletse kateng? Hopola, ha rea ka ra inehela ho Jehova feela bakeng sa nako e itseng kapa feela ho fihlela ka Armageddone. Boinehelo ba rōna bo tsoela pele ka ho sa feleng. Ka hona, he, “re se ke ra khathala ke ho etsa hantle, hobane re tla kotula nakong ea teng, ha re sa tepelle.”—Ba-Galata 6:9.
15. (a) Baiseraele ba ile ba korotlela mang? (b) Boinehelo ba rōna ho Jehova bo re susumelletsa joang ho hlompha taolo ea puso ea Molimo?
15 Qetellong, Pauluse o ile a lemosa ka hore re se ke ra ba ‘ba korotlelang’ bahlanka ba khethiloeng ba Jehova. (1 Ba-Korinthe 10:10) Baiseraele ba ile ba korotlela Moshe le Aarone ka matla ha lihloela tse 10 ho tse 12 tse neng li rometsoe ho ea hlahloba naha ea Kanana li tlisa tlaleho e mpe. Ba bile ba bua ka ho nkela moeta-pele oa bona Moshe sebaka ka e mong le ho khutlela Egepeta. (Numere 14:1-4) Kajeno, na re amohela boeta-pele boo re bo filoeng ka tšebetso ea moea o halalelang oa Jehova? Ka ho bona tafole e tletseng ea lijo tsa moea e lokiselitsoeng ke sehlopha sa mohlanka ea khabane le ea bohlale, ho hlakile hore na Jesu o sebelisa mang ho aba “lijo nakong ea teng.” (Mattheu 24:45) Ho inehela ka moea oohle ho Jehova ho re hloka hore re bontše tlhompho ho bahlanka ba hae ba khethiloeng. E se eka le ka mohla re ke ke ra tšoana le bakorotli ba bang ba kajeno ba retelehetseng ho moeta-pele e mocha, ka puo ea tšoantšetso, ho ba etella pele ho khutlela lefatšeng.
Na ke Sohle Seo Nka se Etsang?
16. Ke lipotso life tseo bahlanka ba inehetseng ba Molimo ba lakatsang ho ipotsa tsona?
16 Baiseraele ba ka be ba sa oela liphosong tse tebileng hakaalo haeba ba ne ba ile ba hopola hore boinehelo ba bona ho Jehova bo ne bo sa seheloa meeli. Ho fapana le Baiseraele bao ba se nang tumelo, Jesu Kreste o ile a phelela boinehelo ba hae ho fihlela qetellong. Joaloka balateli ba Kreste, re etsisa mohlala oa hae oa ho inehela ka moea oohle, re phela bophelo ba rōna ‘re sa hlole re phelela litakatso tsa botho, empa re phelela thato ea Molimo.’ (1 Petrose 4:2, BPN; bapisa le 2 Ba-Korinthe 5:15.) Thato ea Jehova kajeno ke hore “batho bohle ba bolokehe, ’me ba fihle tsebong ea ’nete.” (1 Timothea 2:4) Ho finyella seo, re tlameha ho bolela “evangeli ena ea ’muso” pele bofelo bo e-tla. (Mattheu 24:14) Re etsa boiteko bo boholo hakae tšebeletsong ee? Re ka ’na ra lakatsa ho ipotsa, ‘Na ke sohle seo nka se etsang?’ (2 Timothea 2:15, NW) Maemo aa fapana. Jehova o thabela ho sebeletsoa “ka seo [motho] a nang le sona, e seng ka seo a se hlokang.” (2 Ba-Korinthe 8:12; Luka 21:1-4) Ha ho ea lokelang ho ahlola botebo le bonnete ba boinehelo ba e mong. E mong le e mong o lokela ho lekanyetsa ka boeena hore na boinehelo ba hae ho Jehova bo tebile hakae. (Ba-Galata 6:4) Lerato la rōna ho Jehova le lokela ho re susumelletsa ho botsa, ‘Nka thabisa Jehova joang?’
17. Boinehelo le kananelo li amana joang? Bontša.
17 Boinehelo ba rōna ho Jehova bo ntse bo eketseha ha kananelo ea rōna ho eena e hōla. Moshemane ea lilemo li 14 Japane, o ile a inehela ho Jehova ’me a tšoantšetsa boinehelo bona ka kolobetso ea metsing. Hamorao, o ile a batla ho phehella thuto e phahameng ’me ea e-ba setsebi sa saense. Ha ho mohla a kileng a nahana ka tšebeletso ea nako e tletseng, empa joaloka mohlanka ea inehetseng, o ne a sa rate ho furalla Jehova le mokhatlo oa hae o hlophisitsoeng o bonahalang. Hore a finyelle pakane ea hae ea mosebetsi, o ile a ea univesithing. Ha a le moo o ile a bona ba qetileng univesithing ba qobelleha ho nehela bophelo bohle ba bona lik’hamphaning tsa bona kapa lithutong tsa bona. A ipotsa, ‘Ke batla eng moo? Na ka sebele nka phehella tsela ea bona ea bophelo ’me ka inehela mosebetsing oa boipheliso? Na ke se ntse ke sa inehela ho Jehova?’ Ka kananelo e nchafalitsoeng, e ile ea e-ba pula-maliboho oa kamehla. Kutloisiso ea hae ka boinehelo ba hae e ile ea teba ’me ea mo susumelletsa ho ikemisetsa pelong ea hae hore o tla ea kae kapa kae moo a neng a hlokahala teng. O ile a ba teng Sekolong sa Koetliso sa Bosebeletsi ’me a fuoa kabelo ea ho ea sebeletsa e le moromuoa mose ho maoatle.
18. (a) Ho ameha ho hoholo hakae boinehelong ba rōna ho Jehova? (b) Re ka kotula moputso ofe boinehelong ba rōna ho Jehova?
18 Boinehelo bo akarelletsa bophelo bohle ba rōna. Re tlameha ho itatola ’me “letsatsi le letsatsi” re latele mohlala oa Jesu o motle. (Luka 9:23, NW) Ha re se re itatotse, ha re kōpe hore Jehova a re fe tumello ea ho ba sieo mosebetsing. Bophelo ba rōna bo lumellana le melao-motheo eo Jehova a e behetseng bahlanka ba hae. Esita le libakeng tseo re ka ikhethelang, ho molemong oa rōna ho bona hore na re etsa sohle seo re ka se khonang ho phela bophelo bo nehetsoeng ho Jehova. Ha re ntse re mo sebeletsa letsatsi le letsatsi, re etsa sohle se matleng a rōna ho mo khahlisa, re tla atleha joaloka Bakreste ’me re tla hlohonolofatsoa ka ho amoheloa ka mofuthu ke Jehova, Eena ea tšoaneloang ke boinehelo ba rōna ba moea ’ohle.
Na U ka Hlalosa?
◻ Ho Jesu Kreste boinehelo bo ne bo akarelletsa eng?
◻ Ke hobane’ng ha re lokela ho qoba ho korotlela Jehova?
◻ Re ka qoba ho lumella hore borapeli ba litšoantšo bo kenelle ka bolotsana bophelong ba rōna ka tsela efe?
◻ Ke ka ho hopola eng ho tla re thusa hore re se ke ra “khathala” ke ho etsa thato ea Molimo?
[Setšoantšo se leqepheng la 17]
Bakreste ba inehetseng ‘ha ba khathale ke ho etsa hantle’