Ke Joang Re ka Ekeletsang Bokhabane Tumelong ea Rōna?
“Ekeletsang tumelong ea lōna bokhabane.”—2 PETROSE 1:5, NW.
1, 2. Ke hobane’ng ha re lokela ho lebella batho ba Jehova ho etsa se khabane?
KA LINAKO tsohle Jehova o etsa lintho ka bokhabane. O etsa se lokileng le se molemo. Ka lebaka leo, moapostola Petrose o ne a ka bua ka Molimo e le ea bitsitseng Bakreste ba tlotsitsoeng ‘ka khanya le bokhabane ba Hae.’ Tsebo e phethahetseng ea Ntate oa bona oa leholimo ea khabane e ne e ba bontšitse se neng se hlokahala ho phehella bophelo ba boinehelo ba bomolimo ba ’nete.—2 Petrose 1:2, 3.
2 Moapostola Pauluse o phehella Bakreste ho ba ‘baetsisi ba Molimo, kaha e le bana ba ratoang.’ (Ba-Efese 5:1) Joaloka Ntate oa bona oa leholimo, barapeli ba Jehova ba lokela ho etsa se khabane boemong bofe kapa bofe. Empa bokhabane ke eng?
Seo e Leng Bokhabane
3. “Bokhabane” bo hlalositsoe joang?
3 Libuka tse hlalosang mantsoe tsa mehleng ena li hlalosa “bokhabane” e le “boitšoaro bo botle; molemo.” Ke “ketso le monahano o lokileng; botle ba botho.” Motho ea khabane o lokile. Bokhabane bo boetse bo ’nile ba hlalosoa e le “ho ipapisa le tekanyetso ea se nepahetseng.” Ka ho hlakileng, ho Bakreste “tekanyetso ea se nepahetseng” e behoa ke Molimo ’me e hlakisoa ka Lentsoeng la hae le Halalelang, Bibele.
4. Ke litšoaneleho life tse boletsoeng ho 2 Petrose 1:5-7 tseo Bakreste ba tlamehang ho sebetsa ka thata ho li hōlisa?
4 Bakreste ba ’nete ba ipapisa le litekanyetso tse lokileng tsa Jehova Molimo, ’me ba arabela litšepisong tsa hae tsa bohlokoa ka ho sebelisa tumelo. Ba boetse ba mamela keletso ea Petrose: “Ka ho nehelana ha lōna ka boiteko bohle bo tiileng ha le arabela, ekeletsang tumelong ea lōna bokhabane, bokhabaneng ba lōna tsebo, tsebong ea lōna boitšoaro, boitšoarong ba lōna mamello, mamellong ea lōna boinehelo ba bomolimo, boinehelong ba lōna ba bomolimo kameho ea boena, kamehong ea lōna ea boena lerato.” (2 Petrose 1:5-7, NW) Mokreste o tlameha ho sebetsa ka thata ho hōlisa litšoaneleho tsena. Sena se ke ke sa etsoa ka matsatsi a seng makae kapa lilemo empa ho hlokahala nako ea bophelo ea boiteko bo tsoelang pele. Le hona, ho ekeletsa bokhabane tumelong ea rōna ke phephetso ka bohona!
5. Bokhabane ke eng ho tsoa ponong ea Mangolo?
5 Mongoli oa libuka tse hlalosang mantsoe M. R. Vincent o re moelelo oa pele-pele oa lentsoe la Segerike le fetoletsoeng e le “bokhabane” o fetisa khopolo ea “molemo oa mofuta ofe kapa ofe.” Petrose o ile a sebelisa boemo ba lona ba bongata ha a re Bakreste ba ne ba lokela ho bolela hōle “melemo,” kapa makhabane, a Molimo. (1 Petrose 2:9, NW) Ho tsoa ponong ea Mangolo, bokhabane ha bo hlalosoe e le ntho e bakoang ke tšusumetso e ka thōko empa e le “matla a boitšoaro, boikitlaetso ba sephefumolohi.” Ka ho bolela bokhabane, Petrose o ne a hopotse boitšoaro bo molemo le bo sebete boo bahlanka ba Molimo ba lebeletsoeng ho bo bonahatsa le ho bo boloka. Leha ho le joalo, kaha ha rea phethahala, na ka sebele re ka etsa se khabane mahlong a Molimo?
Ha Rea Phethahala Empa re Khabane
6. Le hoja re sa phethahala, ke hobane’ng ha ho ka boleloa hore re ka etsa se khabane mahlong a Molimo?
6 Re futsitse ho se phethahale le sebe, kahoo re ka ipotsa hore na ke joang re hlileng re ka bang khabane mahlong a Molimo. (Ba-Roma 5:12) Ka sebele re hloka thuso ea Jehova haeba re batla ho ba le lipelo tse hloekileng, tse ka hlahisang menahano e khabane, mantsoe, le liketso. (Bapisa le Luka 6:45.) Ka mor’a ho etsa sebe mabapi le Bathe-Sheba, mongoli oa lipesaleme Davida ea bakileng o ile a kōpa: “Bōpa ka ho ’na pelo e hloekileng, Uena Molimo, ’me u kenye ka ho ’na moea o mocha, o tiileng.” (Pesaleme ea 51:10, NW) Davida o ile a amohela tšoarelo ea Molimo le thuso eo a neng a e hloka ho phehella tsela e khabane. Kahoo, haeba re entse phoso e tebileng empa ka ho baka re amohetse thuso ea Molimo le ea baholo ba phutheho, re ka boela tseleng e khabane ’me ra lula ho eona.—Pesaleme ea 103:1-3, 10-14; Jakobo 5:13-15.
7, 8. (a) Hore re lule re le khabane, ho hlokahala eng? (b) Ke thuso efe eo Bakreste ba nang le eona ea ho ba khabane?
7 Ka lebaka la boetsalibe boo re bo futsitseng, re tlameha ho loana ntoa e ka hare e tsoelang pele ea ho etsa seo tsela ea bokhabane e ka se hlokang ho rōna. Haeba re tla lula re le khabane, ho hang re ke ke ra itumella ho ba makhoba a sebe. Ho e-na le hoo, re tlameha ho ba “bahlanka ba ho loka,” ka linako tsohle re nahana, re bua, le ho etsa lintho ka tsela e khabane. (Ba-Roma 6:16-23) Ka ho hlakileng, litakatso tsa rōna tsa nama le litšekamelo tsa ho etsa sebe li matla, ’me re talimane le ntoa pakeng tsa tsona le lintho tse khabane tseo Molimo a li hlokang ho rōna. Kahoo, ho lokela ho etsoa eng?
8 Tabeng ea pele, re lokela ho latela tataiso ea moea o halalelang oa Jehova, kapa matla a sebetsang. Ka lebaka leo re lokela ho ela hloko keletso ea Pauluse: ‘Tsamaeang ka moea, ’me le se ke la kholisa litakatso tsa nama. Hobane nama e na le litakatso tse loantšang moea, ’me le oona moea o na le litakatso tse loantšang nama; ’me ntho tseo li emellane ho loantšana, hore le tle le se ke la etsa tseo le li ratang.’ (Ba-Galata 5:16, 17) E, re na le moea oa Molimo o sebetsang e le matla a ho etsa ho lokileng, ’me Lentsoe la hae le sebetsa e le tataiso e lebisang boitšoarong bo nepahetseng. Re boetse re na le thuso e lerato ea mokhatlo o hlophisitsoeng oa Jehova le keletso ea “mohlanka ea khabane, ea bohlale.” (Mattheu 24:45-47) Kahoo, re ka loana ka katleho khahlanong le litšekamelo tsa ho etsa sebe. (Ba-Roma 7:15-25) Ka ho hlakileng, haeba khopolo e sa hloekang e ka kena likelellong tsa rōna, re tlameha ho e ntša kapele le ho rapella thuso ea Molimo ho hanela phephetso ea ho itšoara ka tsela efe kapa efe e se nang bokhabane.—Mattheu 6:13.
Bokhabane le Menahano ea Rōna
9. Boitšoaro bo khabane bo hloka monahano oa mofuta ofe?
9 Bokhabane bo qala ka tsela eo motho a nahanang ka eona. Bakeng sa ho thabela kamohelo ea bomolimo, re tlameha ho nahana ka lintho tse lokileng, tse ntle, tse khabane. Pauluse o ile a re: “Banab’eso, tsohle tsee e leng tsa ’nete, tsohle tse hlomphehang, tsohle tse lokileng, tsohle tse hloekileng, tsohle tse ratehang, tsohle tse botumo bo botle, tsohle tseo bokhabane bo bong le poko e ’ngoe e leng teng ho tsona, le ke le hopole tsona.” (Ba-Filippi 4:8) Re lokela ho tsepamisa likelello tsa rōna linthong tse lokileng, tse ratehang, ’me ntho efe kapa efe e se nang bokhabane ha ea lokela ho ipiletsa ho rōna. Pauluse o ne a ka re: “Tseo le ithutileng tsona, la li amohela, la li utloa, la li bona ho ’na, etsang tsona.” Haeba re tšoana le Pauluse—re le khabane monahanong, puong, le liketsong—re tla ba metsoalle e molemo le mehlala e lokileng ea bophelo ba Bokreste, ’me ‘Molimo oa khotso o tla ba le rōna.’—Ba-Filippi 4:9.
10. Ke joang ho sebelisa ha rōna 1 Ba-Korinthe 14:20 ho ka re thusang ho lula re le khabane?
10 Haeba re lakatsa ho lula re le khabane monahanong ’me ka hona re khahlise Ntate oa rōna oa leholimo, ho hlokahala hore re sebelise keletso ea Pauluse: “Le se ke la ba bana hlalefong, le mpe le be bana lonyeng; ’me ha e le hlalefong, le be banna.” (1 Ba-Korinthe 14:20) Sena se bolela hore joaloka Bakreste ha re batle tsebo kapa phihlelo ea bokhopo. Ho e-na le ho lumella likelello tsa rōna ho silafatsoa ka tsela ena, ka bohlale re khetha ho lula re se na phihlelo ’me re se na tsebo ea bobe joaloka bana tabeng ena. Ka nako e tšoanang, re utloisisa ka ho feletseng hore boitšoaro bo litšila le ho etsa se fosahetseng ke ho etsa sebe mahlong a Jehova. Takatso e chesehang e tsoang pelong ea ho mo khahlisa ka ho ba khabane e tla re tsoela molemo, hobane e tla re susumeletsa ho qoba mekhoa e sa hloekang ea boithabiso le litšusumetso tse ling tse silafatsang kelello tsa lefatše lena le rapaletseng matleng a Satane.—1 Johanne 5:19.
Bokhabane le Moqoqo oa Rōna
11. Ho ba khabane ho hloka moqoqo oa mofuta ofe, ’me tabeng ee, ke mehlala efe eo re nang le eona ea Jehova Molimo le Jesu Kreste?
11 Haeba menahano ea rōna e le khabane, sena se lokela ho ba le phello e molemo ho seo re se buang. Ho ba khabane ho hloka moqoqo o hloekileng, o khothatsang, oa ’nete, o hahang. (2 Ba-Korinthe 6:3, 4, 7) Jehova ke “Molimo oa ’nete.” (Pesaleme ea 31:5) Oa tšepahala litšebelisanong tsohle tsa hae, ’me litšepiso tsa hae li tiile hobane a ke ke a bua leshano. (Numere 23:19; 1 Samuele 15:29; Tite 1:2) Mor’a Molimo, Jesu Kreste, o “tletse mohau le ’nete.” Ha a le lefatšeng, ka linako tsohle o ne a bua ’nete kamoo a neng a e amohetse ho tsoa ho Ntate oa hae. (Johanne 1:14; 8:40) Ho feta moo, Jesu ‘ha aa ka a etsa sebe, ’me le thetso ha ea ka ea fumanoa molomong oa hae.’ (1 Petrose 2:22) Haeba kannete re le bahlanka ba Molimo le Kreste, re tla bua ’nete ’me boitšoaro ba rōna e tla ba bo lokileng, joalokaha eka re “itlamile matheka ka senyepa sa ’nete.”—Ba-Efese 5:9; 6:14.
12. Hore re be khabane, ke meqoqo ea mofuta ofe eo re tlamehang ho e qoba?
12 Haeba re le khabane, ho na le mefuta ea meqoqo eo re tla e qoba. Re tla tataisoa ke keletso ea Pauluse: “Tse bohloko tsohle, le bohale, le ho itšena, le komang, le ho seba, le lonya lohle, li falatsoe ho lōna.” “Ha e le bofebe, le litšila tsohle, le takatso ea moruo, ho se ke ha boleloa le mabitso a tsona har’a lōna, kamoo ho tšoanelang bahalaleli; leha e le taba e lihlong, leha e le ea booatla, leha e le ea mesoaso e mebe, e leng taba tse sa tšoanelang; ho mpe ho utloahale liteboho.” (Ba-Efese 4:31; 5:3, 4) Ba bang ba tla fumana ho khatholla ho ba le rōna hobane lipelo tsa rōna tse lokileng li re susumeletsa ho qoba meqoqo eo eseng ea Bokreste.
13. Ke hobane’ng ha Bakreste ba tlameha ho laola leleme?
13 Takatso ea ho khahlisa Molimo le ho bua lintho tse khabane e tla re thusa ho laola leleme. Ka lebaka la litšekamelo tsa ho etsa sebe, bohle re khothometseha puong ka linako tse ling. Leha ho le joalo, morutuoa Jakobo o re ‘haeba re kenya litomo ka hanong ho lipere,’ ka kutlo li ea moo re li lebisang teng. Ka lebaka leo, re lokela ho sebetsa ka thata ho kenya litomo lelemeng le ho leka ho le sebelisa ka litsela tse khabane feela. Leleme le sa laoloeng “ke naha ea bokhopo.” (Jakobo 3:1-7) Mofuta o mong le o mong oa tšobotsi e mpe ea lefatše lena le se nang tšabo ea Molimo o amahanngoa le leleme le sa thapisoang. Le ikarabella linthong tse senyang tse kang bopaki ba bohata, mahlapa, le ketselletso. (Esaia 5:20; Mattheu 15:18-20) Ha leleme le sa laoleheng le bua lipuo tse nyefolang, tse hlabang, kapa tse etselletsang, le tletse chefu e bolaeang.—Pesaleme ea 140:3; Ba-Roma 3:13; Jakobo 3:8.
14. Ke litekanyetso life tse habeli tsa ho bua tseo Bakreste ba tlamehang ho li qoba?
14 Joalokaha Jakobo a bontša, e ne e tla ba ho ikhanyetsa ho ‘boka Molimo’ ka ho bua hantle ka Molimo ebe re sebelisa leleme hampe ho ‘rohaka batho’ ka ho ba bitsetsa bobe. Ke ho etsa sebe ho hokaakang ho binela Molimo lithoriso libokeng ebe ha re e-tsoa re bua hampe ka balumeli-’moho le rōna! Metsi a monate le a babang a ke ke a kolla selibeng se tšoanang. Haeba re sebeletsa Jehova, ba bang ba na le tokelo ea ho lebella hore re bue lintho tse khabane ho e-na le ho bua mantsoe a hlohlontšang litsebe. Ka lebaka leo ha re qheleng meqoqo e mebe ’me re batle ho bua lintho tse tla tsoela metsoalle ea rōna molemo ’me li ba ahe moeeng.—Jakobo 3:9-12.
Bokhabane le Liketso tsa Rōna
15. Ke hobane’ng ha e le habohlokoa ho qoba ho sekamela litseleng tse bolotsana?
15 Kaha monahano le meqoqo ea Bakreste li lokela ho ba khabane, ho thoe’ng ka liketso tsa rōna? Ho ba khabane boitšoarong ke eona feela tsela ea ho fumana kamohelo ea Molimo. Ha ho mohlanka oa Jehova ea ka lahlang bokhabane, ’me a sekamela ho ba mano le ho qhekella, ’me ka ho loketseng a nahana hore lintho tse joalo li ka amoheloa ke Molimo. Liproverbia 3:32 e re: “Ho Jehova motho ea khopo [“mano,” NW] ke manyala, empa ea lokileng o na le lekunutu la [Hae].” Haeba re rata kamano ea rōna le Jehova Molimo, mantsoe ao a nahanisang ka thata a lokela ho re faposa ho rera ho etsa bobe kapa ho etsa ntho efe kapa efe e mano. Le hona, har’a lintho tse supileng tseo e leng manyala ho Jehova ke “pelo e rerang merero e mebe”! (Liproverbia 6:16-19) Ka lebaka leo, a re qobeng liketso tse joalo ’me re etse se khabane, bakeng sa ho tsoela batho ba bang molemo le bakeng sa ho tlotlisa Ntate oa rōna oa leholimo.
16. Ke hobane’ng ha Bakreste ba tlameha hore ba se kenelle liketsong tsa boikaketsi?
16 Ho bonahatsa bokhabane ho hloka hore re tšepahale. (Ba-Heberu 13:18) Motho ea ikaketsang, eo liketso tsa hae li sa lumellaneng le mantsoe a hae, ha a khabane. Lentsoe la Segerike le fetoletsoeng e le “moikaketsi” (hy·po·kri·tesʹ) le bolela “ea arabang” ’me le boetse le fetisa mohopolo oa sebapali sa sethala. Kaha libapali tsa sethala tsa Bagerike le Baroma li ne li roala likatiba tsa ho ikhakanya, lentsoe lena le ile la qala ho sebelisoa ka tšoantšetso bakeng sa ea ikhakanyang. Baikaketsi ke “ba sa tšepeheng.” (Bapisa Luka 12:46 le Mattheu 24:50, 51.) Boikaketsi (hy·poʹkri·sis) bo ka boela ba fetisa khopolo ea bokhopo le bolotsana. (Mattheu 22:18; Mareka 12:15; Luka 20:23) Ho soabisa hakaakang ha motho ea tšepang e mong a ekoa ka pososelo, lithoriso tse phoqang, le liketso tseo e leng boikaketsi feela! Ka lehlakoreng le leng hoa khothatsa ha re tseba hore re sebetsana le Bakreste ba tšepahalang. ’Me Molimo o re hlohonolofatsa ka lebaka la ho ba khabane le ho se be baikaketsi. Kamohelo ea hae e ho ba bonahatsang “kameho ea boena e hlokang boikaketsi” le ba nang le “tumelo e hlokang boikaketsi.”—1 Petrose 1:22, NW; 1 Timothea 1:5, NW.
Bokhabane ke Molemo o Sebetsang
17, 18. Ha re bonahatsa tholoana ea moea ea molemo, re tla sebelisana le ba bang joang?
17 Haeba re ekeletsa bokhabane tumelong ea rōna, re tla leka ho qoba ho nahana, ho bua, le ho etsa lintho tse sa amoheleheng ho Molimo. Leha ho le joalo, ho bonahatsa bokhabane ba Bokreste ho boetse ho hlokahala hore re etse lintho tse molemo. Ha e le hantle, bokhabane bo boetse bo hlalosoa e le molemo. ’Me molemo ke tholoana ea moea o halalelang oa Jehova, eseng phello ea boiteko ba motho feela. (Ba-Galata 5:22, 23) Ha re bonahatsa tholoana ea moea ea molemo, re tla susumeletsoa ho nahana hantle ka ba bang le ho ba rorisetsa litšoaneleho tsa bona tse ntle ho sa tsotellehe ho se phethahale ha bona. Na ba sebelelitse Jehova ka botšepehi ka lilemo? Kahoo re lokela ho ba hlompha le ho ba bua hantle le ho bua hantle ka tšebeletso ea bona ho Molimo. Ntate oa rōna oa leholimo o hlokomela lerato leo ba le bontšang bakeng sa lebitso la hae le mesebetsi ea bona e khabane ea tumelo, ’me le rōna re lokela ho etsa joalo.—Nehemia 13:31b; Ba-Heberu 6:10.
18 Bokhabane bo etsa hore re be le mamello, re be ba utloisisang, ba utloelang bohloko. Haeba morapeli oa Jehova ’moho le uena a e-na le matšoenyeho kapa khatello ea maikutlo, re tla bua ka tsela e khothatsang ’me re batle ho mo tšelisa, joalokaha Ntate oa rōna ea lerato oa leholimo a re tšelisa. (2 Ba-Korinthe 1:3, 4; 1 Ba-Thessalonika 5:14) Re utloela ba mahlomoleng bohloko, mohlomong ka lebaka la ho lahleheloa ke ea ratoang lefung. Haeba re ka etsa ntho efe kapa efe ho fokotsa bohloko, re tla e etsa, hobane moea o khabane o susumetsa ketso e lerato, e molemo.
19. Ho ka etsahala hore ba bang ba re tšoare joang haeba re le khabane monahanong, lipuong, le liketsong?
19 Joalokaha re boka Jehova ka ho bua hantle ka eena, ba bang ba tla re tlotlisa haeba re le khabane menahanong, lipuong, le liketsong. (Pesaleme ea 145:10) Maele a bohlale a re: “Motho ea lokileng o roetse mahlohonolo hlohong, empa lonya le aparetse melomo ea e mobe.” (Liproverbia 10:6) Motho ea khopo le ea mabifi o hloka bokhabane bo ka etsang hore a ratehe ho ba bang. O kotula seo a se jalang, hobane batho ka botšepehi ba ke ke ba mo fa tlhohonolofatso ea bona ka ho bua hantle ka eena. (Ba-Galata 6:7) Ho molemo hakaakang ho ba nahanang, ba buang, le ba itšoarang ka litsela tse khabane joaloka bahlanka ba Jehova! Ba hapa lerato, tšepo, le tlhompho ea ba bang, ba susumeletsoang ho ba tlotlisa le ho ba bua hantle. Ho feta moo, bokhabane ba bona ba bomolimo bo ba le phello ea tlhohonolofatso ea Jehova e ke keng ea lekanngoa.—Liproverbia 10:22.
20. Menahano e khabane, meqoqo, le liketso li ka ba le phello efe phuthehong ea batho ba Jehova?
20 Menahano e khabane, lipuo, le liketso ka sebele li tla tsoela phutheho ea batho ba Jehova molemo. Ha balumeli-’moho ba e-na le menahano e lerato, e nang le tlhompho e mong ho e mong, lerato la boena le ba lengata har’a bona. (Johanne 13:34, 35) Moqoqo o khabane, ho akareletsa ho babatsa ha sebele le khothatso, o hlahisa boikutlo bo mofuthu ba tšebelisano-’moho le bonngoe. (Pesaleme ea 133:1-3) ’Me liketso tse khothatsang, tse khabane li susumeletsa ba bang ho arabela ka tsela e tšoanang. Ka holimo ho tsohle, ho bonahatsa bokhabane ba Bokreste ho ka ba le phello ea kamohelo le tlhohonolofatso ea Ntate oa rōna oa leholimo ea khabane, Jehova. Ka lebaka leo e se eka re ka ho etsa sepheo sa rōna ho arabela litšepisong tsa bohlokoa tsa Molimo ka ho sebelisa tumelo. ’Me ka sebele a re etseng boiteko bo tiileng ho ekeletsa tumelo ea rōna ka bokhabane.
U ka Araba Joang?
◻ U ka hlalosa “bokhabane” joang, ’me ke hobane’ng ha batho ba sa phethahalang ba ka ba khabane?
◻ Bokhabane bo hloka menahano ea mofuta ofe?
◻ Bokhabane bo lokela ho ama meqoqo ea rōna joang?
◻ Ke phello efe eo bokhabane bo lokelang ho ba le eona liketsong tsa rōna?
◻ Melemo e meng ea ho ba khabane ke efe?
[Setšoantšo se leqepheng la 21]
Kaha metsi a monate le a babang a ke ke a kolla mohloling o tšoanang, ke ho loketseng hore ba bang ba lebelle bahlanka ba Jehova ho bua lintho tse khabane feela