Letlotlo la Rōna, Tšebeletso ea Khanya ea Kajeno

“Re na le letlotlo lena le lijaneng tsa letsopa, hore matla a fetang a tloaelehileng e ka ba a Molimo eseng a tsoang ho rōna.”—2 BA-KORINTHE 4:7, “NW.”

 1. (a) Re ka fumana letlotlo lefe le khanyang, hona hobane’ng? (b) Bibele e hlalosa ho fanoa ha Molao oa Moshe joang?

TŠEBELETSO ea ho bolela “Evangeli ena ea ’muso” nakong ea bofelo ba tsamaiso ea lintho ka sebele ke letlotlo, leruo la bohlokoa ka ho fetisisa. Ka lebaka la hore Jehova ke Molimo oa khanya, ho sebeletsa Molimo ke tšebeletso ea khanya, ka hona ke letlotlo. (Mattheu 24:14; 2 Ba-Korinthe 3:18–4:1) Mabapi le ho fanoa ho khanyang ha Molao oa Moshe, ho Exoda 34:29, 30 ho ngoliloe: “Eitse ha Moshe a theoha thabeng ea Sinai, a theoha thabeng a tšoere matlapa a mabeli a bopaki matsohong a hae, ’me o na a sa tsebe hobane letlalo la sefahleho sa hae lea khanya [“le ntša mahlaseli,” NW], kahobane a na a buile le Jehova. ’Me Aarone le bana ba Iseraele kaofela ha ba talima Moshe, ba bona letlalo la sefahleho sa hae le khanya, ’me ba tšaba ho mo atamela.”

 2. Ke eng e neng e tšoantšetsoa ke tšebeletso ea Molao oa Moshe, hona ke hobane’ng ha tšebeletso ena ea morao e le e khanyang haholoanyane?

² Litemana 32 ho ea ho 34 lia phaella: “Ka mora’ tseo, bana ba Iseraele bohle ba atamela; a ba laela taba tsohle tseo Jehova a ’moleletseng tsona thabeng ea Sinai. Eitse hobane Moshe a qetelle ho bua le bona, a ikhurumetsa sefahleho ka lesira. Enere ha Moshe a kena pel’a Jehova, ho bua le eena, o na a tlosa lesira, ho fihlela a ba a e-tsoa.” Tšebeletso ea Molao oa Moshe e ne e tšoantšetsa tšebeletso ea selekane se secha ka Mokena-lipakeng, Jesu Kreste. Kahoo, haeba tšebeletso ea pele e ne e khanya, ea morao eona e leng “tšebeletso ea Moea,” e tlameha e be e e fetisa hakaakang ka khanya! (2 Ba-Korinthe 3:7-11) E khanya haholoanyane hobane e na le khanya e sa feleng, ’me balateli ba Jesu Kreste ba kopanela ho eona.—Ba-Roma 12:11.

 3. (a) Ke eng eo e tlamehang e be ke ’nete ka tšebeletso ea Lipaki tsa Jehova, empa ke hobane’ng ha batho ba bangata ba sa bone see? (b) Ke eng e neng e paka hore Moshe o bile pel’a boleng bo khanyang ba Jehova?

³ Ka hona, hoa utloahala hore tšebeletso ea Lipaki tsa Jehova ke e khanyang. Leha ho le joalo, batho ba bangata ba foufalitsoeng ke bolumeli ba bohata ha ba bone sena. Le hoja ba bangata ba e-na le Bibele e bile e ka ’na eaba baa e bala, ha ba na ‘mahlo a bonang.’ (2 Petrose 1:5-9) Hore lesira le tlohe mahlong a bona, ba tlameha ho retelehela ho Jehova Molimo ka tumelo, hobane ha Moshe a ne a e-tla pel’a boleng ba Jehova, o ne a tlosa lesira le neng le patetse Bajode sefahleho sa hae. (2 Ba-Korinthe 3:16, NW) Baiseraele ba ne ba tšaba ho bona khanya ea Molimo sefahlehong sa mokena-lipakeng oa bona ’me ba ile ba kōpa hore se koaheloe ka lesira hore mahlo a bona a se ke a se bona. Feela joalokaha ntho e bolokang mahlaseli e ileng ea pepesetsoa khanya e phatsima hamorao lefifing, kahoo Moshe, mokena-lipakeng oa bona, o ne a bonahatsa khanya ea Jehova, a paka hore o ile a ba ka pele ho Jehova.

 4. Kajeno batho ba sa lumelang ba etsisa Bajode ba boholo-holo joang, empa balateli ba Moshe e Moholoanyane ha ba tšabe eng?

⁴ Moshe o ne a tšoantšetsa Moprofeta e moholo oa Molimo, Jesu Kreste. Joaloka ea tlileng pele ea neng a mo tšoantšetsa, Moshe enoa e Moholoanyane ha a tšabe ho talima khanya ea Jehova ka ho toba. Leha ho le joalo, ho fihlela kajeno batho ba sa lumeleng ba foufalitsoeng ke Diabolose le bolumeli ba hae ba Babylona ba etsisa Bajode bao ba boholo-holo ’me ba hana ho bona, kapa ho lemoha, khanya ea Moshe e Moholoanyane, Jesu Kreste. (2 Ba-Korinthe 3:12-15) Leha ho le joalo, balateli ba hae ba ’nete ha ba tšabe ho talima ponahatso ea khanya ea Jehova joalokaha e khantšitsoe sefahlehong sa Jesu Kreste. Ba lokolohile tšusumetsong ea Babylona, ba na le sebete sa ho bontša khanya ea Molimo. Pauluse o ngotse: “Ka baka leo, joalokaha re e-na le tšepo e joalo, re sebelisa bolokolohi bo boholo ba puo.”—2 Ba-Korinthe 3:12, NW.

Ba Bonahatsang Khanya ea Molimo

 5. Re ka bonahatsa khanya ea Molimo joang ra ba ra tšoana le Moshe ha a le ka holim’a thaba pel’a boleng ba Jehova?

⁵ Jesu Kreste o tlositse lesira ka ho re senolela le ho re bolella ka Jehova Molimo. (Johanne 1:14, 17, 18) Kahoo re tlameha ho khanya, ’me ka hona khanya ea Molimo e khanya ka “litaba tse molemo tse khanyang tse mabapi le Kreste, eo e leng setšoantšo sa Molimo,” oo re tlamehang ho phatlalatsa ka oona. Phatsimo ea tsona ke “tsebo e khanyang ea Molimo ka sefahleho sa Kreste.” Re tlameha ho bonahatsa khanya ena ka ho bua ka khanya ea Jehova le khanya ea ’Muso oa hae ka Mora oa hae. (2 Ba-Korinthe 4:4-6, NW) Joaloka Moshe ha a le ka holim’a thaba pel’a boleng ba Jehova, Lipaki tsa Hae lefatšeng ha li koahelle lipelo tsa tsona khanya ea Jehova ka lesira. Li ananela khanya ea hae e bonahatsoang sefahlehong sa Mora oa Jehova eo e bileng e leng Morena, Jesu Kreste. Ka hona, li tlameha ho khantšetsa ba bang leseli le mabapi le khanya ea Molimo.

 6. Pauluse o hlalosa tšebeletso ea rōna ea khanya e ho 2 Ba-Korinthe 3:18 (NW) joang, ka hona re ‘fetoloa’ ka litsela life?

⁶ Moapostola Pauluse o e hlalosetsa lipaki tsohle tsa habo tsa khanya ea Jehova ka mantsoe ana: “’Me kaofela ha rōna, ha ka lifahleho tse sa koaheloang ka lesira re bonahatsa khanya ea Jehova joaloka liipone, re fetoleloa setšoantšong se le seng ho tloha khanyeng ho ea khanyeng, hantle feela joalokaha ho etsoa ke Jehova eo e leng Moea.” (2 Ba-Korinthe 3:18, NW) Ha re amohela khanya e eketsehileng ea leseli lena, re tlameha ho e khantša ka ho eketsehileng, ’me ka tsela eo re fetoloa ka ho eketsehileng. Likelello lia nchafala le ho tsosolosoa, le hoja ho se liphetoho tsa ’mele kapa tsa sefahleho tse ka lemohuoang. Ke leseli la molaetsa o khanyang leo re le khantšang le hlahisang phapang ka ho rōna. Bophelo ba rōna bo fetoloa hore bo tšoane le ba Kreste, ha re ntse re itokisetsa ho phethahatsa tšebeletso eo e leng tokelo e khōlō ea ho hasa leseli lena le khanyang ka ho pharalletseng ho ba bang.—Ba-Heberu 13:15.

 7. Khanya ea ’nete e tsoa mohloling ofe, ’me re ka bonahatsa khanya e joalo joang?

⁷ Phetoho eohle e joalo e tlisoa ke moea, kapa matla a sebetsang a Molimo. Baruti ba Bokreste-’mōtoana ha ba bonahatse khanya ea Jehova Molimo empa ba tlameha ho retelehela ponahalong ea boikaketsi ho hapa tlhokomelo. Khanya eo hase khanya ea rōna, ’me ha ho hlokahale hore re ikhabise ka liaparo tse bontšang maemo ka kerekeng tse majaba-jaba tsa selika, gauda, le mabenyane a phatsimang. Khanya ea sebele e fumanoa moeeng oa Molimo ’me e bonahatsoa ka ho fana ka bopaki bo khanyang bo mabapi le Jehova eo e leng Moea.

Bohle ba Fuoeng Tokelo ea ho ba Bajari ba Leseli

8, 9. Pauluse o re fa khothatso efe ho 2 Ba-Korinthe 4:1, 2, ’me e hloka boikemisetso bofe ho rōna?

⁸ Ho 2 Ba-Korinthe 4:1, 2, rea bala: “Ka baka leo, ha re ntse re e-na le tšebeletso eo ka mohau o re hlahetseng, ha re tepelle. Empa re lahlile lintho tse patoang tse lihlong; ’me ha re tsamaee ka mano, ha re tsoakanye lentsoe la Molimo, empa ka ho hlahisa ’nete, re iketsetsa kemelo matsoalong a batho bohle pel’a Molimo.” Molimo o re tšolletse mohau ka ho re abela tšebeletso ena. Ena ke khothatso e matla e re khothalletsang ho tsoela pele ka sebete, ’me re tla fela re etse sena! Kaha re tlotliloe ka leseli le tsoang Lentsoeng la Molimo, re tlameha ho le khantšetsa ba bang.—Bapisa le Mattheu 5:14-16.

⁹ Lintho tseo batho ba hlajoang ke lihlong ka baka la tsona, tse kang bolotsana, ba li pata ka thetso le qhekello. Empa ha re na lebaka la ho hlajoa ke lihlong ka baka la hore molaetsa le mosebetsi tsa rōna hase tsa bolotsana empa li lokile e bile ke tsa ’nete. Kahoo, re ka khantša khanya e felletseng ea leseli leo. Ha re tšoare Lentsoe la Molimo ka thetso. Ho etsa joalo ho ne ho tla bolela ho le tšoara ka boithati bakeng sa phaello, khanya, le molemo tsa botho, le matla a lefatše le ho baleha khanyetso le mahloriso a hlahang lefatšeng. Ba sa tšabeng ho tla ho Jehova ka lifahleho tse sa koaheloang ka lesira le ho talima leseli le khanyang la ’nete ka ho tšoanang ha ba na ho tšaba ho talimana le boikarabelo ba bona. Ba tla etsa hore leseli le bonahale ho bona.

10. Ke hobane’ng ha e se molato oa Lipaki tsa Jehova haeba litaba tse molemo tsa ’Muso li sa koaholleloa batho ba bang?

¹⁰ Haeba bafe kapa bafe ba sa koaholleloa litaba tse molemo tsa ’Muso, hase molato oa Lipaki tsa Jehova empa ke molato oa bona. Litaba tse molemo tsa ’Muso ha lia patoa. Mosebetsi oa boboleli oa Lipaki tsa Jehova oa tsebahala lefatšeng ka bophara. Ka hona, li ka bua joaloka moapostola Pauluse: “Ha ho letho tabeng tseo le entsoeng sephiring.” Ka sebele, joalokaha a ngotse, litaba tse molemo li se li “boletsoe pōpong eohle e ka tlas’a leholimo.”—Liketso 26:26; Ba-Kolosse 1:23, NW.

11. Ke hobane’ng ha litaba tse molemo tse khanyang li sa koaholleloa batho ba bangata hakaale?

¹¹ Ba patetsoeng litaba tse molemo tsa ’Muso oa Molimo ke bahanyetsi, ba foufalitsoeng ke Diabolose. (Bapisa le Mattheu 12:30.) Ka ntle le hore ba itokolle bolumeling ba bohata le marabeng a Diabolose, ba letetsoe ke timetso. Tlas’a tšusumetso ea bademona, batho ba joalo ba ikhurumetsa ka lesira ka bobona, hobane ho 2 Ba-Korinthe 4:3-5 moapostola Pauluse o re: “Ekare ha Evangeli ea rōna e koahetsoe, e koahelletsoe ba timelang; e leng bao molimo oa lefatše lena o ba foufalitseng likelello, ke ho re, ba sa lumelang, ba tle ba se ke ba chabeloa ke leseli la Evangeli ea khanya ea Kreste, eo e leng setšoantšo sa Molimo. Hobane ha re ipolele, empa re bolela Jesu Kreste hore ke Morena; ’me ha e le rōna, re ipolela hore re bahlanka ba lōna, ka baka la Jesu.”

12. Ho fapana le ba foufetseng likelello, batho ba Jehova ba arabela joang mantsoeng a 2 Ba-Korinthe 4:6?

¹² Ba foufalitsoeng likelello ha ba batle ho lumela. Ho se lumele ha bona ho pepesetsa likelello tsa bona tlhaselo ea bademona. (1 Timothea 4:1) Ba ke ke ba bona khanya ea Jehova kapa ponahatso ea eona sefahlehong sa Jesu, Moshe e Moholoanyane. Batho ba Jehova ba bona leseli le khanyang le tsoang Bibeleng ’me ba le khantšetsa ba bang. Kahoo bahlanka bohle ba Molimo ke bajari ba leseli, ’me Molimo o laela hore leseli le khanye. Leseli le tlameha ho bonahala ho batho ba Molimo ’me le phatsimele holim’a ba bang ba lefifing le ba kotsing ea timetso. Sena se joalo feela ka ha 2 Ba-Korinthe 4:6 e se beha: “Hobane Molimo o kileng oa re: Leseli le hlahe lefifing, ke oona o bonesitseng lipelong tsa rōna, ho hlahisa leseli la tsebo ea khanya ea Molimo e bonahalang ho Jesu Kreste.” Ka baka la sena, Lipaki tsa Jehova li utloa taelo ea Molimo ’me li etsa hore leseli la tsona le khanyetse ba bang, ho tlotlisa Molimo.

Letlotlo le Khanyang Lijaneng Tse Pshatlehang Habobebe

13. Ho tšollela tšebeletso e hlohonolofalitsoeng ea ho ba bajari ba leseli holim’a libōpuoa tsa nama ho tlisa phello efe?

¹³ Tokelong ena ea tšebeletso e khōlō hoo e ke keng ea lekanngoa, ke habohlokoahali hore bajari ba leseli ba ipake ba tšoaneleha ho ba le leseli ka ho boloka botšepehi ba bona ho Molimo. Ho phetha tokelo ena e tsotehang ea tšebeletso, Molimo ha oa sebelisa mangeloi a halalelang, a lakatsang ho nyarela ka hare ho lintho tsena, empa o tšolletse tšebeletso ena e hlohonolofalitsoeng holim’a libōpuoa tsa nama. (1 Petrose 1:12) O entse sena ho tlotlisa matla a oona har’a mefokolo ea batho. Ho joalokaha 2 Ba-Korinthe 4:7 (NW) e bolela: “Leha ho le joalo, re na le letlotlo lena lijaneng tsa letsopa, hore matla a fetang a tloaelehileng e ka ba a Molimo eseng a tsoang ho rōna.”

14. (a) “Letlotlo lena le lijaneng tsa letsopa” ke eng? (b) Ke hobane’ng ha Moshe le Jesu Kreste e le mehlala e bohlale bakeng sa rōna mabapi le letlotlo?

¹⁴ Mehleng ea boholo-holo lijana li ne li atisa ho sebelisoa e le lintho tse tšelang lintho tsa bohlokoahali. Letlotlo lee le khanyang leo Lipaki tsa Jehova li nang le lona lijaneng tse pshatlehang habobebe, tsa letsopa—tsona ka botsona, joaloka libōpuoa tse fokolang tse entsoeng ka lerōle la lefatše, ke eng? Letlotlo lena hase feela leseli le chabetseng ka lipelong tsa tsona. Ke tšebeletso ea leseli leo, e leng tšebeletso e tlamehang ho phethoa ’meleng ea tsona ea lefatšeng. Tšebeletso eo ke ho romela leseli leo Molimo o le chabisitseng lipelong tsa tsona. Tšebeletso ena ke letlotlo le letle kaha ke tokelo ea bohlokoahali ea tšebeletso eo kajeno e seng masala a tlotsitsoeng a “mohlatsoana” feela a kopanelang ho eona empa hape le “bongata bo boholo” ba “linku tse ling” tsa Molisa ea Molemo, Jesu Kreste. (Luka 12:32; Johanne 10:14-16; Tšenolo 7:9) Moshe hammoho le eo a neng a mo tšoantšetsa, Jesu Kreste, ke mehlala e bohlale bakeng sa rōna, ho tsepamisa lipelo tsa rōna letlotlong lena la tšebeletso ea bomolimo, “hobane moo letlotlo la hao le leng teng, ke moo le pelo ea hao e tla ba teng.”—Mattheu 6:19-21; Ba-Heberu 11:26.

15, 16. (a) Ho bontšoa joang hore matla a fetang a tloaelehileng a tsoa ho Molimo eseng ho rōna? (b) Ke hobane’ng ha khanyetso eohle ea lefatše e tla sitoa ho thuha lijana tsa Molimo tsa letsopa?

¹⁵ Joale, matla a fetang a tloaelehileng a bontšoa joang hore a tsoa ho Molimo eseng ho rōna? Ka tsela ena: Lijana tse pshatlehang habobebe joalo, tsa letsopa tse tšoanang le rōna ba tšoereng tšebeletso le thōmo tsena tseo e leng letlotlo ha li tšoanelehe ’me le ka mohla re ne re ke ke ra jara tlotla e joalo ka borōna. Ho feta moo, rōna Lipaki tsa Jehova re hatelletsoe ke mefuta eohle ea khatello ea sera ho leka ho re pshatla le ho etsa hore re phatlohe e le ho re etsa ba sa tšoaneleheng ho jara thōmo e tsoang ho Molimo. Kahoo, e tlameha e be ke matla a Mofani oa Thōmo e Moholo a re thusang ho mamella tšoaro e mpe e khōlō ea lefatše lena le ho khomarela thōmo le ho ipaka re tšoaneleha bakeng sa ho bolokoa tšebeletsong ea hae. Ka hona, khanyetso eohle ea lefatše e tla sitoa ho thuha lijana tsa letsopa tsa Molimo le ho li amoha letlotlo la tsona la bohlokoahali, hobane ho 2 Ba-Korinthe 4:8-12 ho ngoliloe:

¹⁶ “Re hlomohile ka nģa tsohle, empa ha re tsielehe ruri; re bothateng bo boholo, empa ha re tele; rea hlorisoa, empa ha re lahloe; re liheloa fatše, empa ha re timele; re jara lefu la Morena Jesu hohle ’meleng oa rōna, hore bophelo ba Jesu le bona bo tle bo bonahale ’meleng oa rōna. Hobane rōna ba phelang, re ntse re telloa lefu ka mehla ka baka la Jesu, hore le bona bophelo ba Jesu bo tle bo bonahale nameng ea rōna e shoang. Ka hoo, lefu le sebetsa ka ho rōna, empa bophelo [ka boboleli ba litaba tse molemo tsa ’Muso] bo sebetsa ka ho lōna.”

Bongata bo Boholo ba Batho bo nka “Letlotlo Lena” e le la Bohlokoahali

17. Bongata bo boholo ba batho bo nka “letlotlo lena” la tšebeletso ea khanya joang?

¹⁷ “Lefu le sebetsa ka ho rōna, empa bophelo bo sebetsa ka ho lōna.” Polelo ena e sebetsa ho Bakreste ba tlotsitsoeng ka moea. Leha ho le joalo, e ntse e ka etsa hore re nahane ka kamano ea masala a tlotsitsoeng a Molimo le bongata bo boholo ba linku tse ling. Batlotsuoa baa tseba hore qetellong ba tlameha ho phetha tsela ea bona ea lefatšeng ka lefu joalokaha Jesu a entse, empa ba na le metsoalle e lokelang ho kopanela letlotlo le khanyang la tšebeletso le bona, ho ba thusa ka ho etsa karolo e khōlō ea mosebetsi oa boboleli ba litaba tse molemo tsa ’Muso. Joaloka masala a tlotsitsoeng, kajeno bongata bo boholo ba linku tse ling bo ananela hore letlotlo feela le tla pholoha ntoa e bohale ea Harmagedone ’me le tsoele pele le sa chesoa le ho felisoa ho kena lefatšeng le lecha ke letlotlo lena la tšebeletso e hlohonolofalitsoeng, tšebeletso ea Jehova Molimo le Morena oa hae ea khanyang, Jesu Kreste. Bongata bo boholo ba batho bo tla e khomarela, ‘bo nehelane ka tšebeletso e halalelang ho Molimo motšehare le bosiu tempeleng ea oona.’—Tšenolo 7:15, NW.

18. (a) Haufinyane ho tla etsahala joang ka khanya ea bohata ea lefatše lee? (b) Jesu o ile a hana “khanya” efe, ’me o ile a fumana khanya e phahameng haholoanyane ka ho etsa’ng?

¹⁸ Haufinyane, Molimo o tla felisa khanya ea bohata ea tsamaiso ena e teng ea lintho e khopo—“khanya” e ’nileng ea tsoela pele ho tloha ha Satane Diabolose a isa Jesu thabeng e telele ’me a ’montša mebuso eohle ea lefatše le “khanya ea eona.” (Luka 4:5, 6, NW) Jesu o ile a hana ho fuoa khanya e tsoang mohloling o kang oo ’me a tsoela pele ho phehella tsela ea boitšoaro eo Molimo o e amohelang ha a ntse a le lefatšeng. Ka baka la ho etsa joalo, o ne a tla tlotloa ka khanya e phahameng le ho feta khanya eo eena, Mora oa Molimo ea tsoetsoeng a ’notši, a neng a e thabela leholimong pele a amohela boikarabelo ba kabelo ea hae ea lefatšeng kamoo Jehova a neng a e hlakisitse ka teng.—Johanne 5:36; 17:5; Ba-Filippi 2:9-11.

19. Ke tokelo efe e hlomphehang ea tšebeletso e atamelang phethahatso ea eona e felletseng, ’me boikemisetso ba rōna ke bofe ntlheng ee?

¹⁹ Bofelo bo boletsoeng esale pele ba tsamaiso ena ea lintho ea bodiabolose bo ke ke ba tla pele bopaki ba ’Muso bo fanoa lefatšeng lohle e le qetello e hlollang ea mosebetsi oa balateli ba Jesu Kreste, Lipaki tsa Jehova. (Mattheu 24:14) Hona joale bopaki ba ’Muso bo se bo fanoe ka nako e etsang likotara tse tharo tsa lekholo la lilemo, ’me joalokaha liphetoho tsa lefatše tsa mehleng ea rōna li bontša, e tlameha e be bofelo boo bo boletsoeng esale pele bo haufi. Ka baka leo, tokelo e hlomphehang ea ho kopanela tšebeletsong ea puso ea borena, e halalelang e lokela hore e be e atamela phethahatso ea eona e felletseng. (Mattheu, likhaolo 24, 25; Mareka, khaolo 13; Luka, khaolo 21) Tokelo ea rōna ea ho kopanela ho faneng ka bopaki lefatšeng ka bophara ka ’Muso o hlomiloeng ka sebele ke letlotlo le khanyang leo Lipaki tsa Jehova, joaloka balateli ba Mora oa hae ea behiloeng teroneng, Jesu Kreste, li le nkang e le la bohlokoahali. Ka tieo li batla ho le khomarela ho fihlela bopaki ba ’Muso bo phethiloe ’me Molimo o Matla ’Ohle, Jehova, o tlotlisa boemo ba bokahohleng ka bopaki ba oona ka seqo bobusing ba oona ba bokahohleng.—Sofonia 3:8.

Likarabelo Tsa Hao ke Life?

◻ Ke hobane’ng ha tšebeletso ea Lipaki tsa Jehova e le e khanyang?

◻ Ke hobane’ng ha litaba tse molemo li sa koaholleloa ba bangata hakaale kajeno?

◻ “Letlotlo lena le lijaneng tsa letsopa” ke eng?

◻ Ke hobane’ng ha Molimo o sebelisitse li-jana tse pshatlehang habobebe, tsa letsopa bakeng sa tšebeletso ee eo e leng letlotlo?

◻ Batho ba Jehova ba nka “letlotlo lena” joang, hona hobane’ng?

[Setšoantšo se leqepheng la 17]

Khanya ea Molimo e bonahatsoa sefahlehong sa Jesu Kreste, Moshe e Moholoanyane. Lipaki tsa Jehova li fuoe tokelo ea ho bona leseli le khanyang la Molimo le tsoang Bibeleng le ho le bonahatsa ho ba bang