“Le Bontšane Lerato le Mofuthu”

“Ka lerato la bara ba motho le bontšane lerato le mofuthu.”—BAROMA 12:10.

1, 2. Moromuoa e mong oa kajeno le moapostola Pauluse ba ne ba e-na le kamano efe le barab’abo bona?

LILEMONG tse 43 tseo Don a bileng tšebeletsong ea boromuoa ka tsona Bochabela bo Hōle, o ne a tsebahala ka tsela e mofuthu eo a neng a tšoara bao a ba sebeletsang ka eona. Ha a se a kulela lefu, ba bang ba batho bao a neng a ithuta le bona ba ile ba tsamaea lik’hilomithara tse likete ho tla re ho eena, “Kamsahamnida, kamsahamnida!”—“Re u leboha ho menahane!” ka Sekorea. Lerato la Don le mofuthu le ne le ba amme lipelo.

² Mohlala ona oa Don hase mokhelo. Lekholong la pele la lilemo, moapostola Pauluse o ile a bontša kameho e tebileng ka bao a neng a ba sebeletsa. Pauluse o ile a itela. Le hoja e ne e le motho ea nang le kholiseho e matla, o ne a boetse a le bonolo a bile a tsotella, “joaloka ha ’mè ea anyesang a baballa bana ba hae.” O ile a ngolla phutheho ea Thesalonika a re: “Re e-na le lerato le mofuthu bakeng sa lōna, ha rea ka ra khahloa ke ho le fa litaba tse molemo feela tsa Molimo, empa le meea ea rōna, hobane le bile ba ratoang ho rōna.” (1 Bathesalonika 2:7, 8) Hamorao, ha Pauluse a bolella barab’abo ba Baefese hore ha ba sa tla hlola ba mo bona, ho ile “ha tsoha ho lla ho hoholo har’a bona kaofela, eaba ba itihela molaleng oa Pauluse ’me ba mo aka ka lerato.” (Liketso 20:25, 37) Ho hlakile hore kamano eo Pauluse a neng a e-na le eona le barab’abo e ne e tebile ho feta taba ea hore ba ne ba le tumelong e le ’ngoe. Ba ne ba e-na le lerato le mofuthu e mong ho e mong.

Litšobotsi Tse Fapaneng Tsa Lerato

 3. Mantsoe a mang a amanang le lerato ka Bibeleng ke afe?

³ Ka Mangolong, lerato le mofuthu, kutloelo-bohloko le qenehelo li amahanngoa haufi-ufi le tšobotsi e ikhethang ka ho fetisisa ea Bokreste—e leng lerato. (1 Bathesalonika 2:8; 2 Petrose 1:7) Ho tšoana le likarolo tsa daemane e ntle, litšobotsi tsena tsohle tsa bomolimo lia tlatsana le ho sebelisana e le hore li hlahise litholoana tse ntle. Ha li etse feela hore Bakreste ba atamelane empa li boetse li ba atametsa ho Ntate oa bona oa leholimo. Kahoo, moapostola Pauluse o ile a phehella balumeli-’moho le eena a re: “Lerato la lōna e ke e be le se nang boikaketsi. . . . Ka lerato la bara ba motho le bontšane lerato le mofuthu.”—Baroma 12:9, 10.

 4. Poleloana “lerato le mofuthu” e bolela’ng?

⁴ Lentsoe la Segerike leo Pauluse a ileng a le sebelisa bakeng sa “lerato le mofuthu” le na le meelelo e ’meli, o mong ke oa botsoalle ’me o mong ke oa lerato la tlhaho. Joalokaha setsebi se seng sa Bibele se hlalosa, sena se bolela hore Bakreste “ba lokela ho tsejoa ka boinehelo bo khethollang lelapa le ratanang, le momahaneng, le tšehetsanang.” Na ke kamoo u ikutloang kateng ka bara le barali beno ba Bakreste? Ka phuthehong ea Bokreste ho lokela hore ho rene boikutlo bo mofuthu—ba botsoalle bo kang ba lelapa. (Bagalata 6:10) Ka hona, The New Testament in Modern English, ea J. B. Phillips, e fetolela Baroma 12:10 tjena: “A re beng le lerato la ’nete le mofuthu le kang la bara ba motho.” The Jerusalem Bible eona e baleha tjena: “Le ratane joalokaha bara ba motho ba lokela ho ratana.” E, Bakreste ha ba ratane feela hobane e le ntho e utloahalang ho etsa joalo kapa hobane ba tlamehile. Re lokela ‘ho ratana ka matla haholo ho tloha pelong,’ re ratane ka “lerato la bara ba motho le se nang boikaketsi.”—1 Petrose 1:22.

“Le Rutoa ke Molimo ho Ratana”

5, 6. (a) Jehova o sebelisitse likopano tsa machaba joang ho ruta batho ba hae lerato la Bokreste? (b) Maqhama a pakeng tsa bara ba motho a tiea le ho feta joang ha nako e ntse e ea?

⁵ Le hoja “lerato la ba bangata” le ntse le tapa lefatšeng lena, Jehova o ruta batho ba hae ba kajeno hore ba ‘ratane.’ (Matheu 24:12; 1 Bathesalonika 4:9) Likopano tsa machaba tsa Lipaki Tsa Jehova ke liketsahalo tse ikhethang tse bontšang koetliso ena. Likopanong tsena, Lipaki tsa moo kopano e tšoaretsoeng teng li kopana le barab’abo rōna ba tsoang linaheng tse hōle, ’me tse ngata li ’nile tsa amohela baeti ba tsoang linaheng tse ling malapeng a tsona. Kopanong e ’ngoe e sa tsoa tšoaroa, ba bang ba ne ba tsoa linaheng tseo ho tsona batho ba sa tloaelang ho bontša maikutlo a bona phatlalatsa. Mokreste e mong ea neng a thusa ka tsa marobalo o re: “Ha baeti bana ba qala ho fihla, ba ne ba tšohile haholo ba bile ba le lihlong. Empa ka mor’a matsatsi a tšeletseng feela ha ba se ba arohana, bona le batho ba ba amohetseng ba ne ba se ba hakana ba bile ba lla. Ba ne ba thabetse mofuta oa lerato la Bokreste oo ba neng ba ke ke ba hlola ba o lebala.” Ho amohela barab’abo rōna ka mofuthu ho sa tsotellehe semelo sa bona, ho ka hlahisa litšobotsi tse ratehang ho moeti le ho motho ea mo amohetseng.—Baroma 12:13.

⁶ Le hoja liphihlelo tseo tsa likopano li thabisa, Bakreste ba ba le botsoalle bo atamelaneng le ho feta ha ba sebeletsa Jehova hammoho ka nako e itseng. Ha re tseba barab’abo rōna hantle, re khona ho ananela ka botlalo litšobotsi tse ratehang tseo ba nang le tsona—ho bua ’nete, ho tšepahala, ho ba mosa, ho fana ka seatla se bulehileng, ho nahanela, ho ba le qenehelo le ho hloka boithati. (Pesaleme ea 15:3-5; Liproverbia 19:22) Mark, ea sebelelitseng e le moromuoa Afrika Bochabela, o ile a re, “Ho sebetsa re tšoarisane le barab’abo rōna ho etsa hore re thehe maqhama a ke keng a senyeha.”

 7. Re lokela ho etsa’ng e le hore re thabele lerato la Bokreste ka phuthehong?

⁷ E le hore ho be le maqhama a joalo ka phuthehong le ho a boloka, litho tsa eona li lokela ho atamelana. Ka ho ba teng kamehla libokeng tsa Bokreste, re tiisa botsoalle boo re nang le bona le bara le barali babo rōna. Ka ho ba teng libokeng le ho buisana le batho pele ho liboka le ka morao ho tsona, haesita le ho ba le seabo ha li ntse li tsoela pele, rea khothatsana le ho susumelletsana “leratong le mesebetsing e metle.” (Baheberu 10:24, 25) Moholo e mong oa United States o re: “Ke sa hopola hore ha ke sa le ngoana lelapa leso e ne e le le leng la a atisang ho tloha Holong ea ’Muso qetellong, le thabela meqoqo e nang le botsoalle le e hahang halelele kamoo ho ka khonehang.”

Na U Lokela ho ‘Atoloha’?

 8. (a) Pauluse o ne a bolela eng ha a phehella Bakorinthe hore ba “atolohe”? (b) Re ka etsa’ng ho hōlisa lerato ka phuthehong?

⁸ E le hore re bontše lerato le joalo ka ho feletseng, ho ka ’na ha hlokahala hore re “atolohe” lipelong tsa rōna. Ha moapostola Pauluse a ngolla phutheho ea Korinthe o ile a re: “Lipelo tsa rōna li atolohile. Ha lea patisana ka ho rōna hoo ho seng sebaka.” Pauluse o ile a ba phehella hore le bona ba “atolohe.” (2 Bakorinthe 6:11-13) Na le uena u ka “atoloha” leratong la hao? Ha ua lokela ho emela ba bang hore ebe bona ba tlang ho uena. Lengolong la hae le eang ho Baroma, Pauluse o ile a amahanya taba ea hore ho hlokahala hore re be le lerato le mofuthu le keletso ena: “Etellang pele ho bontšaneng tlhompho.” (Baroma 12:10) E le ho bontša hore u hlompha ba bang, e ka ba uena ea ba lumelisang pele libokeng. Mohlomong u ka ba ua ba memela ho sebetsa le uena tšebeletsong ea tšimo kapa ha u lokisetsa liboka. Ho etsa joalo ho thusa ho etsa hore lerato le mofuthu le hōle.

 9. Ba bang ba nkile mehato efe e le hore e be metsoalle e atamelaneng le Bakreste-’moho le bona? (Kenyelletsa le mehlala leha e le efe ea sebakeng sa lōna.)

⁹ Malapa le batho ka bomong ka phuthehong ba ka ‘atoloha’ ka hore ba etelane, mohlomong ba je hammoho lijo tse bobebe le ho etsa lintho tse hahang ba le ’moho. (Luka 10:42; 14:12-14) Ka linako tse ling Hakop o hlophisa lipikiniki tsa batho ba seng bakae. O re: “Ho ba teng ba baholo le ba banyenyane, hammoho le batsoali ba se nang balekane. E mong le e mong o khutlela hae a thabile, a bile a ikutloa a atamelane le ba bang.” Joaloka Bakreste, ha rea lokela ho ikitlaelletsa ho ba balumeli-’moho feela empa le ho ba metsoalle ea sebele.—3 Johanne 14.

10. Re ka etsa’ng haeba re e-ba le mathata le bara le barali babo rōna?

¹⁰ Leha ho le joalo, ka linako tse ling ho se phethahale ho ka ’na ha re thatafalletsa ho hlaolela botsoalle le lerato. Re ka etsa’ng ka seo? Ntlha ea pele, re ka rapella hore re be le kamano e ntle le barab’abo rōna. Thato ea Molimo ke hore bahlanka ba hae ba be le kutloano, ’me o tla arabela lithapelo tse joalo tse tiileng. (1 Johanne 4:20, 21; 5:14, 15) Hape re lokela ho sebetsa tumellanong le lithapelo tsa rōna. Ric, eo e leng mosebeletsi ea tsamaeang Afrika Bochabela, o re o hopola mora e mong oabo rōna ea neng a sa tsebe ho buisana le batho hantle, e leng ho neng ho etsa hore ho be thata ho sebelisana le eena. Ric oa hlalosa: “Ho e-na le ho koekoetla eo mor’eso, ke ile ka ikemisetsa ho mo tseba hamolemonyana. Ke ile ka fumana hore ntate oa mora eo oabo rōna e ne e le motho ea lulang a khalemela ka thata. Eitse hoba ke utloisise kamoo mora eo oabo rōna a sokotseng kateng ho hlōla tsela eo a hōlisitsoeng ka eona le kamoo a hatetseng pele kateng, ke ile ka mo ananela. Re ile ra ba metsoalle e meholo.”—1 Petrose 4:8.

Bontša Maikutlo a Hao!

11. (a) Ho hlokahala eng e le hore lerato le hōle ka phuthehong? (b) Ke hobane’ng ha ho qoba ho bontša ba bang maikutlo ho ka ba kotsi moeeng?

¹¹ Kajeno, batho ba bangata ba iphelela feela ba se na motsoalle ea haufi. Ke ho utloisang bohloko hakaakang! Ha hoa lokela ho ba joalo ka phuthehong ea Bokreste. Lerato la sebele la bara ba motho hase ho buisana ka tlhompho feela le ho ba le mekhoa e metle; hape hase ho thabela ba bang ho tlōla. Ho e-na le hoo, re lokela ho ikemisetsa ho bontša maikutlo a rōna, joalokaha Pauluse a ile a bontša Bakorinthe maikutlo a hae, ’me re bontše balumeli-’moho le rōna hore re hlile re amehile ka boiketlo ba bona. Le hoja e se motho e mong le e mong eo ka tlhaho a leng botsoalle kapa a ratang ho qoqa, ho itšehla thajana ho ka ba kotsi. Bibele ea lemosa: “Ea itšehlang thajana o tla batla tabatabelo ea hae ea boithati; o tla phasoloha khahlanong le bohlale bohle bo sebetsang.”—Liproverbia 18:1.

12. Ke hobane’ng ha puisano e ntle e le ea bohlokoa e le hore ho be le botsoalle bo atamelaneng ka phuthehong?

¹² Ho buisana ka botšepehi ke motheo oa botsoalle ba sebele. (Johanne 15:15) Kaofela ha rōna re hloka metsoalle eo re ka e bolellang menahano le maikutlo a rōna a tebileng. Ho feta moo, ha re tsebana hamolemo, ho batla ho e-ba bonolo ho khotsofatsa seo e mong a se hlokang. Ha re ameha ka seo e mong le e mong a se thahasellang ka tsela ena, re hōlisa lerato le mofuthu, ’me re tla bona bonnete ba mantsoe a Jesu a reng: “Ho fana ho tlisa thabo e khōlō ho feta ho amohela.”—Liketso 20:35; Bafilipi 2:1-4.

13. Re ka etsa’ng ho bontša hore re rata barab’abo rōna ka lerato la sebele?

¹³ E le hore lerato la rōna le hlahise molemo, re lokela ho le bonahatsa. (Liproverbia 27:5) Ha lerato la rōna e le la sebele, lifahleho tsa rōna li ka bonahatsa seo, ’me seo se ka ’na sa susumelletsa ba bang hore ba etse ka tsela e tšoanang. Monna ea bohlale o ile a ngola a re: “Ho khanya ha mahlo ho thabisa pelo.” (Liproverbia 15:30) Liketso tse bontšang ho nahanela le tsona li hōlisa lerato le mofuthu. Le hoja lerato la sebele le sa rekoe, mpho e fanoang ho tsoa pelong e ka bolela ho hongata. Karete, lengolo le “lentsoe le builoeng ka nako e nepahetseng”—lintho tsena kaofela li ka bonahatsa lerato le tebileng. (Liproverbia 25:11; 27:9) Ha re se re entse botsoalle le ba bang, re lokela ho bo baballa ka hore re tsoele pele ho ba bontša lerato le se nang boithati. Re batla ho tšehetsa metsoalle ea rōna, haholo-holo linakong tse thata. Bibele e re: “Motsoalle oa ’nete o lerato ka linako tsohle, ’me ke mor’abo motho ea tsoaletsoeng ha ho e-na le mahlomola.”—Liproverbia 17:17.

14. Re ka etsa’ng haeba motho e mong a bonahala eka ha a ananele lerato leo re le bontšang?

¹⁴ Ha e le hantle, re ke ke ra lebella ho ba metsoalle e ntšanang se inong le motho e mong le e mong ka phuthehong. Ho na le bao ka tlhaho re tla ikutloa re batla re atamelane le bona ho feta ba bang. Kahoo haeba motho e mong a bonahala eka ha a u thabele joalokaha u ne u ka rata, u se ke ua potlakela ho etsa qeto ea hore ho na le ho hong ho phoso ka uena kapa ka motho eo. Hape u se ke ua leka ho qobella motho eo hore e be motsoalle oa hao ea haufi. Hafeela u bontša motho eo botsoalle ho isa moo ho khonehang, seo se tla u thusa ho bula monyetla oa hore le atamelane haholoanyane nakong e tlang.

“Ke U Amohetse”

15. Ho babatsoa, kapa ho se babatsoe, ho ama ba bang joang?

¹⁵ E tlameha ebe Jesu o ile a thaba hakaakang ha a qeta ho kolobetsoa, ’me a utloa mantsoe a tsoang leholimong a reng: “Ke u amohetse”! (Mareka 1:11) Mantsoe ana a kamohelo a tlameha a ile a kholisa Jesu ka ho teba hore Ntate oa hae oa mo rata. (Johanne 5:20) Ka masoabi, ba bang ha ho mohla ba kileng ba utloa batho bao ba ba hlomphang le bao ba ba ratang ba ba babatsa joalo. Ann o re: “Bacha ba bangata ba kang ’na ha ba na litho tsa malapa tse kopanelang le bona tumelong ea Bokreste. Lapeng re lula re tšoauoa liphoso feela. Sena se re utloisa bohloko haholo.” Leha ho le joalo, ha e e-ba litho tsa phutheho ba utloa mofuthu oa ho tšehetsoa ke lelapa le tsotellang la moea—bo-ntate le bo-’mè le bara le barali babo bona tumelong.—Mareka 10:29, 30; Bagalata 6:10.

16. Ke hobane’ng ha ho nyatsa-nyatsa ba bang ho se na thuso?

¹⁶ Litsong tse ling, ke ka seoelo batsoali, batho ba baholo le matichere ba babatsang bana ka pelo eohle, ba nahana hore thoriso e joalo e ka ’na ea etsa hore e be ba sa tsotelleng kapa ea ba mathela hloohong. Monahano o joalo o ka ba oa ama malapa a Bakreste le phutheho. Ha ba bua ka puo kapa boiteko bo bong boo a bo entseng, batho ba baholo ba ka ’na ba re: “U entse hantle, empa u ka etsa hantle le ho feta!” Kapa ka tsela e itseng, ba ka ba ba fana ka maikutlo a ho se khotsofatsoe ke seo mocha a se entseng. Ka ho etsa joalo, ba bangata ba lumela hore ba susumelletsa bacha hore ba etse sohle se matleng a bona. Empa mokhoa ona o atisa ho hlahisa phello e fapaneng le seo, kaha bacha ba ka ’na ba nyahama kapa ba nahana hore ba ke ke ba finyella se hlokoang.

17. Ke hobane’ng ha re lokela ho batla menyetla ea ho babatsa ba bang?

¹⁷ Leha ho le joalo, pabatso ha ea lokela ho fanoa feela e le selelekela sa keletso. Ho babatsa motho ho tsoa pelong ho hōlisa lerato le mofuthu ka lapeng le ka phuthehong, kahoo ho khothalletsa bacha hore ba batle keletso ea bara le barali babo rōna ba nang le phihlelo. Kahoo, ho e-na le ho lumella setso hore se laole tsela eo re tšoarang ba bang ka eona, a re ‘apareng botho bo bocha bo ileng ba bōptjoa ho ea ka thato ea Molimo ho lokeng ha ’nete le botšepehing.’ Fana ka pabatso joalokaha Jehova a etsa.—Baefese 4:24.

18. (a) Bacha, le lokela ho nka keletso eo batho ba baholo ba fanang ka eona joang? (b) Ke hobane’ng ha batho ba baholo ba le hlokolosi ka tsela eo ba fanang ka keletso ka eona?

¹⁸ Ka lehlakoreng le leng, bacha, le se ke la etsa qeto ea hore ha batho ba baholo ba le khalemela kapa ba le eletsa, seo se bolela hore ha ba le rate. (Moeklesia 7:9) Ha ho joalo! Mohlomong ba etsa seo hobane ba amehile ka lōna ba bile ba le rata ka ho teba. Ho seng joalo, ke hobane’ng ha ba ka ikhathatsa ka ho buisana le lōna ka taba eo? Kaha batho ba baholo—ka ho khetheha baholo ka phuthehong—ba tseba kamoo mantsoe a ka amang motho kateng, ba atisa ho qeta nako e ngata ba nahana ba bile ba rapela pele ba fana ka keletso, kaha ba na le boikemisetso bo botle feela.—1 Petrose 5:5.

“Jehova o na le Lerato le Mofuthu Haholo”

19. Ke hobane’ng ha ba ileng ba soetseha ba ka tšepela ho Jehova hore a ba tšehetse?

¹⁹ E ka ’na eaba lintho tse sa thabiseng tse ileng tsa hlahela ba bang li entse hore ba nahane hore ho bontša lerato le mofuthu ho tla etsa hore ba boele ba soetsehe. Ho hlokahala hore ba be le sebete le tumelo e matla e le hore ba boele ba bontše ba bang maikutlo a bona. Empa ha baa lokela ho lebala hore Jehova ‘ha a hōle le e mong le e mong oa rōna.’ O re mema hore re mo atamele. (Liketso 17:27; Jakobo 4:8) Hape oa utloisisa hore re tšaba ho utloisoa bohloko, ’me o re tšepisa ho re tšehetsa le ho re thusa. Mopesaleme Davida oa re tiisetsa: “Jehova o haufi le ba lipelo li robehileng; o pholosa ba sithabetseng moeeng.”—Pesaleme ea 34:18.

20, 21. (a) Re tseba joang hore re ka ba le kamano e haufi le Jehova? (b) Ho hlokahala eng e le hore motho a be le kamano e haufi le Jehova?

²⁰ Ho ba le botsoalle bo haufi le Jehova ke kamano ea bohlokoa ka ho fetisisa eo re ka e hlaolelang. Empa na re ka khona ho ba le botsoalle bo joalo? E, re ka khona. Bibele e hlalosa kamoo banna le basali ba lokileng ba neng ba e-na le kamano e haufi kateng le Ntate oa rōna oa leholimo. Lipolelo tsa bona tse mofuthu li boloketsoe ho re kholisa hore le rōna re ka atamela ho Jehova.—Pesaleme ea 23, 34, 139; Johanne 16:27; Baroma 15:4.

²¹ Motho e mong le e mong a ka finyella seo Jehova a se hlokang hore a be haufi le eena. Davida o ile a botsa: “Jehova, ke mang eo e tla ba moeti tenteng ea hao? Ke ea tsamaeang ka mokhoa o se nang molato ’me a etsa ho loka ebile a bua ’nete ka pelong ea hae.” (Pesaleme ea 15:1, 2; 25:14) Ha re ntse re bona hore ho sebeletsa Molimo ho hlahisa litholoana tse molemo ebile ho etsa hore a re tataise a be a re sireletse, re tla hlokomela hore “Jehova o na le lerato le mofuthu haholo.”—Jakobo 5:11.

22. Jehova o batla hore batho ba hae ba be le kamano ea mofuta ofe le eena?

²² Ruri re lehlohonolo hore ebe Jehova o lakatsa ho ba le kamano e joalo ea botho le batho ba sa phethahalang! Ka hona, na ha rea lokela ho bontšana lerato le mofuthu? Ka thuso ea Jehova, e mong le e mong oa rōna a ka tlatsetsa le ho thabela lerato le mofuthu le khethollang mokhatlo oa rōna oa Bokreste oa bara ba motho. Tlas’a ’Muso oa Molimo, motho e mong le e mong lefatšeng o tla thabela lerato lena ka ho sa feleng.

Na U ka Hlalosa?

• Ho lokela ho rena moea ofe ka phuthehong ea Bokreste?

• E mong le e mong oa rōna a ka tlatsetsa joang e le hore ho be le lerato le mofuthu ka phuthehong?

• Ho babatsa motho ho tsoa pelong ho hōlisa lerato la Bokreste joang?

• Lerato la Jehova le mofuthu le re tšehetsa joang le hona ho re boloka?

[Setšoantšo se leqepheng la 15]

Bakreste ha ba ratane feela hobane ba tlamehile

[Litšoantšo tse leqepheng la 16, 17]

Na u ka ‘atoloha’ leratong la hao?

[Setšoantšo se leqepheng la 18]

Na u motho ea nyatsa-nyatsang kapa ea khothatsang?