Ho Hlōla ho ba Makhoba a Lintho tse Itseng

HO KHAOTSA bokhoba ho tšoana le ho falla ntlong eo u hōliselitsoeng ho eona. Le hoja ntlo eo e tsofetse ebile e sohlokehile, ho e siea ho thata. E ne e le lehae la hao.

Haeba u lekhoba, mohlomong bokhoba e bile lehae la hao la maikutlo. Le hoja ntle le pelaelo le ne le tletse pherekano, le tloaelehile. Charles, lekhoba la tahi le khaotsang temallo o re: “Ho tahoa ho tloaelehile ho ’na. Ho hlaphoheloa ha hoa tloaeleha.” Ho khaotsa bokhoba ho tla ba thata, empa hoa lokela ho etsa boiteko boo.

Mohato oa pele ke ho tela lintho tseo motho e leng lekhoba la tsona.a Se ke ua ho liehisa kapa ua tšepisa feela ho khaotsa butle-butle. Lahla thepa eohle le lisebelisoa tse amanang le eona hang-hang. Ho tla latela nako e khutšoaane ea ho lokoloha, eo ka linako tse ling ho ka talimanoang le eona hamolemohali ka thuso ea lingaka. Ena ke qalo ea ho tela ha bophelo kaofela. Empa u se ke ua nahana hore ho ke ke ha etsahala. Qala ka ho ipehela pakane eo u ka e finyellang: ho tela nako ea khoeli, beke, kapa esita le letsatsi. Bofelong ba nako ka ’ngoe, ntle le ho khutlela tšebelisong, nchafatsa boikemisetso ba hao.

Hona ke qalo feela ea ho fetola boitšoaro ba bokhoba. Bibele e re khothalletsa ho ‘itlhatsoa litšila tsohle tsa nama le tsa moea.’ (2 Ba-Korinthe 7:1) Bokhoba ke ho fetang feela tšilafatso ea nama. Moea, kapa tšekamelo ea kelello, le oona oa ameha. Ke eng e ka u thusang ho khaotsa temallo, nameng le moeeng?

Ho Hlokahala Boiteko bo sa Khaotseng

Dr. Robert L. DuPont o re: “Bokhoba ke ho hloka taolo ha botho bohle.” Kahoo, ho hlōla bokhoba ho tlameha ho ama motho kaofela. Ho tlameha ho fetola tekanyo ea hao eohle ea seo e leng sa bohlokoa. Sena se nka nako. Ha ho na tsela ea ho khaoletsa ho khaotsa temallo. Tšepiso leha e le efe ea ho khaotsa temallo kapele e tla baka ho khutlela bokhobeng kapele.

Ntoa ea ho etsa se nepahetseng e tsoela pele. Moapostola oa Mokreste Pauluse o ile a ngola: “Ke fumana molao osele lithong tsa ka, o loantšanang [“o khohlanong e tsoelang pele le,” Phillips] le molao oa kelello ea ka.” (Ba-Roma 7:23) O ile a boela a ngola hore Bakreste ba lokela ho “phetha khalalelo.” (2 Ba-Korinthe 7:1) Buka Word Pictures in the New Testament e hlokomela hore lentsoe “phetha” mona le fetisa mohopolo, “eseng ho fumana khalalelo e feletseng hang-hang, empa tšebetso e tsoelang pele.” Ka hona ho hlōla bokhoba ho etsahala butle-butle.

Ho Batla Sesosa

Bakeng sa ba bangata, bokhoba ke teko ea ho itebatsa liketsahalo tse bohloko tsa nako e fetileng. Janis o re: “Ho ja ho sa laoleheng ho lateloang ke ho itlhatsisa [bothata ba ho ja] ho ne ho ntšitisa mehopolong eo. Ho ile ha fetoha leqheka la ka la ho pholoha.” Bakeng sa Janis, ho iphapanyetsa nako e fetileng ho ne ho ntšetsa bokhoba ba hae pele. Ho utloisisa mabaka a boitšoaro ba hae ho ile ha thusa Janis ho fetola boitšoaro ba hae ba bokhoba.

Ba bang ba fetola mekhoa ea pele ’me ba khona ho tsoella hantle ntle le ho hlahlobisisa nako e fetileng. Ba bang ba fumana hore maikutlo a theiloeng tikolohong ea bona ea pele a tsoela pele ho susumetsa takatso e ba etsang makhoba. Ba ka ’na ba ikutloa joaloka mopesaleme Davida, ea ileng a ngola: “Molimo, u ntlhohlotse, u lekole pelo ea ka; u nteke, u tsebe mehopolo ea ka, u talime hoba a tsela ea bokhopo e teng ho ’na na, ’me u ntsamaise tseleng e isang bophelong bo sa feleng.”—Pesaleme ea 139:23, 24.

Ho Sebetsana le Maikutlo

Na u kile ua tsoa moahong o lefifi ’me ua fihla khanyeng e tobileng ea letsatsi? U honyetsoa ke tlhaselo e mabifi ea khanya e hlahang ka tšohanyetso. Ka ho tšoanang, ha u qala ho sebetsana le bokhoba, u ka fumana hore ka tšohanyetso ebile e le habohloko u imelitsoe maikutlo a mangata. Lerato, khalefo, boikhohomoso, mōna, tšabo, lehloeo, le maikutlo a mang ao e leng khale a patiloe joale a hlahella ka ho feletseng.

Matšoenyeho a ka u bolella hore u khutlele lefifing le tloaelehileng la tšebeliso e mpe ea ntho e itseng. Empa ha ua lokela ho baleha maikutlo a hao. E ka ba mohloli oa hao oa bohlokoa oa boitsebiso. Hangata maikutlo ke feela pontšo ea hore ho na le se hlokang tlhokomelo. Kahoo haeba ho hlokahala, nahanisisa ka maikutlo a hao. A u bolella eng? Haeba molaetsa o sa hlaka kapa haeba maikutlo a bonahala a sithabetsa, phetlela motsoalle ea hōlileng sefuba sa hao. (Jobo 7:11) Ha ua lokela ho talimana le maikutlo a hao u le mong.—Bapisa le Liproverbia 12:25.

Hopola hore maikutlo ehlile hase lira tsa hao. Jehova Molimo ka boeena o na le maikutlo a matla haholo, ’me motho—ea bōpiloeng ka setšoantšo sa Molimo—o latsoa se tšoanang. (Genese 1:26; Pesaleme ea 78:21, 40, 41; 1 Johanne 4:8) Joaloka phatšimo ea tšohanyetso ea letsatsi, ka lekhetlo la pele maikutlo a ka ba bohloko. Empa ka mor’a nako e tla ba, joaloka letsatsi, mohloli oa tataiso le mofuthu.

Tharollo ea Mathata

Ho tsamaea holim’a mohala e ka ba ho tšosang haholo ho motho ea tšabang libaka tse phahameng. Ho lekhoba le qalang ho khaotsa temallo, bophelo bo ka bonahala bo tšoana le ho tsamaea holim’a mohala. Ho ka ba joalokaha eka boikarabello bo phahameng ba ho hlaphoheloa bo tlisa tšabo ea libaka tse phahameng. Tebello ea ho hlōleha e ka etsa hore u behe mabaka: ‘Ke ntse ke tla oela. Ke hobane’ng ha ke sa hla ka ho etsa?’

Empa hopola, mathata hase litlhaselo ho uena. Ke feela maemo ao ho lokelang ho sebetsanoa le ’ona. Kahoo u se ke ua hlōloa ke tšabo. Tobana le mathata a hao ka bonngoe. Sena se tla u thusa ho a talima ka pono e hlakileng ea lintho.—1 Ba-Korinthe 10:13.

Ho Italima U le Bohlokoa

Marion, lekhoba la tahi le khaotsang temallo, o ile a tlameha ho sebetsana le maikutlo a hae a ho ikhalala. O re: “Ka linako tsohle ke ne ke e-na le boikutlo ba hore ha ke itlhahisa kamoo ke leng kateng, [batho] ba ke ke ba nthata.”

Ho itokolla tlamong ea bokhoba ho hloka hore u ithute—mohlomong ka lekhetlo la pele—bohlokoa ba hao u le motho. Sena se thata haeba bophelo ba hao bo tsekollotsoe ke bokhoba. Ke eng e ka thusang?

Bibele ke buka e fanang ka matšeliso ho ba nyahameng. E ka u thusa ho haha boitlhompho bo lokileng. (Pesaleme ea 94:19) Ka mohlala, mopesaleme Davida o ile a ngola hore batho ba roesitsoe moqhaka oa “khanya le boholo.” O ile a boela a re: “Ka tsela e susumetsang tšabo ke entsoe ka mokhoa o hlollang.” (Pesaleme ea 8:5; 139:14, NW) Tseo ke lipolelo tse lokileng hakaakang tsa boitlhompho!

Talima ’mele oa hao e le letlotlo, ’me u tla o hlokomela tumellanong le lengolo lena: “Ha ho e-so ho be motho ea kileng a hloea nama ea hae le ka mohla o le mong; empa o ee a e fepe, a e baballe.” (Ba-Efese 5:29) E, u ka talimana ka katleho le phephetso ea ho khaotsa temallo ea bokhoba.b

Leha ho le joalo, bokhoba bo ka akarelletsa ho eketsehileng. Mesebetsi e ka phehelloa ka boinehelo bo tšoanang le ka lebaka le tšoanang le leo lithethefatsi, tahi, le lijo li phehelloang ka lona. Joale ho tla hlahlojoa e meng ea mesebetsi ena.

[Mongolo o botlaaseng ba leqephe]

[Ntlha e Qolotsoeng e leqepheng la 14]

“Ho khaotsa temallo ke taba ea hore [motho] a fetole ka ho feletseng boikutlo ba hae ba seo e leng sa bohlokoa.”—Dr. Robert L. DuPont.

[Setšoantšo se leqepheng la 16]

Mohato oa pele ke ho tela lintho tse u etsang lekhoba

[Setšoantšo se leqepheng la 17]

Ha maikutlo a u sithabetsa, bua le e mong ka ’ona