Le Tloaele ho Etsa Lintho Tseo le Ithutileng Tsona

“Lintho tseo le ileng la ithuta tsona hammoho le ho li amohela le ho li utloa le ho li bona mabapi le ’na, le tloaele ho li etsa; ’me Molimo oa khotso o tla ba le lōna.”—BAFILIPI 4:9.

1, 2. Ka kakaretso, na Bibele e susumetsa bophelo ba ba nkang hore ke balumeli? Hlalosa.

“BOLUMELI bo Hloa Mekoalaba, Empa Boitšoaro Boa Nyotobela.” Sehlooho sena se neng se le koranteng ea Emerging Trends se ne se akaretsa liphello tsa phuputso ea sechaba e neng e entsoe United States. Ho hlakile hore naheng eo ho bonahetse keketseho palong ea batho ba kenang kereke ba bolelang hore bolumeli ke ba bohlokoa bophelong ba bona. Leha ho le joalo, tlaleho ena e re: “Ho sa tsotellehe lipalo tsena tse khahlisang, ho hlakile hore Maamerika a mangata a belaella matla ao bolumeli bo nang le ’ona bophelong ba motho ka mong le sechabeng ka kakaretso.”

² Boemo bona ha bo fumanoe feela naheng e le ’ngoe. Lefatšeng ka bophara, batho ba bangata ba bolelang hore ba amohela Bibele le hore ke balumeli ha ba lumelle Mangolo hore a ba susumetse kannete bophelong ba bona. (2 Timothea 3:5) Moeta-pele oa sehlopha se seng sa bafuputsi o ile a re: “Re sa ntsane re hlompha Bibele, empa tabeng ea hore re hle re iphe nako ea ho e bala, ea ho ithuta eona le ho e sebelisa—ha re sa etsa joalo.”

 3. (a) Bibele e ama ba fetohang Bakreste ba ’nete joang? (b) Balateli ba Jesu ba sebelisa keletso ea Pauluse e ho Bafilipi 4:9 joang?

³ Leha ho le joalo, ha ho joalo ka Bakreste ba ’nete. Monahano oa bona le boitšoaro ba bona li fetotsoe ke ho sebelisa keletso e tsoang Lentsoeng la Molimo. Hape, botho bo bocha boo ba bo bontšang, bo hlokomeloa habonolo ke batho ba bang. (Bakolose 3:5-10) Balateli ba Jesu ha ba nke Bibele e le buka e sa sebelisoeng e bokellang lerōle seluloaneng sa libuka. Ho fapana le moo, moapostola Pauluse o ile a re ho Bakreste ba Filipi: “Lintho tseo le ileng la ithuta tsona hammoho le ho li amohela le ho li utloa le ho li bona mabapi le ’na, le tloaele ho li etsa; ’me Molimo oa khotso o tla ba le lōna.” (Bafilipi 4:9) Bakreste ha ba felle feela ka ho amohela ’nete ea Lentsoe la Molimo. Ba etsa seo ba ithutang sona, ba ntse ba tsoela pele ho sebelisa keletso ea Bibele—ka lapeng, mosebetsing, ka phuthehong le likarolong tse ling tsohle tsa bophelo.

 4. Ke hobane’ng ha e le phephetso ho itloaetsa ho sebelisa melao ea Molimo?

⁴ Ha ho bonolo ho itloaetsa ho ea ka melao le melao-motheo ea Molimo. Re phela lefatšeng le matleng a Satane Diabolose, eo Bibele e mo bitsang “molimo oa tsamaiso ena ea lintho.” (2 Bakorinthe 4:4; 1 Johanne 5:19) Kahoo, hoa hlokahala hore re ikalose ho eng kapa eng e tla re sitisa ho phehella ho tšepahala ho Jehova Molimo. Re ka ba baboloki ba botšepehi joang?

Tšoara ‘Mohlala oa Mantsoe a Phelisang Hantle’

 5. Polelo ea Jesu e reng: “Ntatele [u] sa khaotse,” e bolela’ng?

⁵ Karolo e ’ngoe ea ho tloaela ho etsa seo re ithutileng sona e akarelletsa ho tšehetsa borapeli ba ’nete ka botšepehi ho sa tsotellehe khanyetso ea ba sa lumelang. Mamello e hloka boiteko. Jesu o ile a re: “Haeba mang kapa mang a batla ho ntšala morao, a ke a itatole ’me a nke thupa ea hae ea tlhokofatso a ntatele a sa khaotse.” (Matheu 16:24) Jesu ha aa ka a re re mo latele feela ka beke e le ’ngoe, khoeli e le ’ngoe kapa selemo se le seng. Ho e-na le hoo, o ile a re: “Ntatele [u] sa khaotse.” Mantsoe a hae a bontša hore re ke ke ra ba barutuoa ka nakoana kapa bolumeli ea e-ba karolo ea nakoana bophelong ba rōna. Ho tšehetsa borapeli ba ’nete ka botšepehi ho bolela ho mamella ka botšepehi tseleng eo re e khethileng, ho sa tsotellehe se etsahalang. Seo re ka se etsa joang?

 6. Mohlala oa mantsoe a phelisang ao Bakreste ba lekholong la pele la lilemo ba ileng ba ithuta oona ho Pauluse ke’ng?

⁶ Pauluse o ile a phehella mosebetsi-’moho le eena Timothea a re: “U ’ne u tšoare mohlala oa mantsoe a phelisang hantle ao u a utloileng ho ’na ka tumelo le lerato le mabapi le Kreste Jesu.” (2 Timothea 1:13) Pauluse o ne a bolela’ng? Lentsoe la Segerike le fetoletsoeng mona e le “mohlala” ka ho toba le bolela sampole ea moetsi oa litšoantšo tsa litsebi. Le hoja e le sampole feela, e entsoe ka mokhoa o bonahalang hantle e le hore motho ea lemohang a ka bona setšoantšo sohle sa se tlil’o etsoa. Ka ho tšoanang, mohlala oa ’nete oo Pauluse a ileng a o ruta Timothea le ba bang o ne o sa lokisetsoa ho fana ka likarabo tse tobileng bakeng sa potso e ’ngoe le e ’ngoe e ka hlahang. Empa ka puo ea tšoantšetso, sehlopha sena sa lithuto ke moralo o lekaneng hore batho ba lipelo li tšepahalang ba ka lemoha seo Jehova a se hlokang ho bona. Ha e le hantle, e le hore ba khahlise Molimo, ho ne ho hlokahala hore ba ’ne ba tšoare mohlala oa ’nete ka ho itloaetsa ho etsa seo ba ithutileng sona.

 7. Bakreste ba ka khomarela joang mohlala oa mantsoe a phelisang?

⁷ Lekholong la pele la lilemo, batho ba kang Hymenea, Alexandere, le Filetase ba ne ba buella likhopolo tse sa tšoaneleng “mohlala oa mantsoe a phelisang.” (1 Timothea 1:18-20; 2 Timothea 2:16, 17) Bakreste ba pele ba ne ba ka qoba ho khelosoa ke bakoenehi joang? Ka ho ithuta ka hloko mangolo a bululetsoeng le ka ho a sebelisa bophelong ba bona. Ba neng ba latela mohlala oa Pauluse le ba bang ba tšepahalang ba ne ba khona ho bona le ho hana eng kapa eng e neng e sa lumellane le mohlala oa ’nete oo ba neng ba o rutiloe. (Bafilipi 3:17; Baheberu 5:14) Ho e-na le ho “kula kelellong ka lebaka la litsekisano le ho pheha khang ka mantsoe,” ba ile ba tsoela pele tseleng ea bona e nepahetseng ea boinehelo ba bomolimo. (1 Timothea 6:3-6) Re etsa se tšoanang ha re ntse re tsoela pele ho sebelisa linnete tseo re ithutileng tsona. Ho tiisa tumelo hakaakang ho bona kamoo ba bangata haholo ba sebeletsang Jehova lefatšeng lohle ba tšoere ka tieo mohlala oa ’nete ea Bibele oo ba o rutiloeng!—1 Bathesalonika 1:2-5.

Hana ‘Lipale Tsa Bohata’

 8. (a) Satane o batla ho senya tumelo ea rōna joang kajeno? (b) Ke temoso efe ea Pauluse e fumanoang ho 2 Timothea 4:3, 4?

⁸ Satane o leka ho senya botšepehi ba rōna ka ho jala lipelaelo ka seo re se rutiloeng. Kajeno, joaloka lekholong la pele la lilemo, bakoenehi le ba bang ba batla ho senya tumelo ea ba sa lemoheng. (Bagalata 2:4; 5:7, 8) Ka linako tse ling ba sebelisa mecha ea litaba ho jala boitsebiso bo sothehileng kapa mashano a pepenene ka mekhoa ea batho ba Jehova le lipakane tsa bona. Pauluse o ile a lemosa hore ba bang ba ne ba tla furalla ’nete. O ile a ngola, a re: “Ho tla ba le nako ea ha ba sa tl’o mamella thuto e phelisang hantle, empa, tumellanong le litakatso tsa bona, ba tla ipokellela mesuoe hore litsebe tsa bona li tsikinyetsoe; ’me ba tla retelletsa litsebe tsa bona hōle le ’nete, athe ba tla khelosetsoa lipaleng tsa bohata.”—2 Timothea 4:3, 4.

 9. E ka ’na eaba Pauluse o ne a hopotse’ng ha a bua ka ‘lipale tsa bohata’?

⁹ Ho e-na le ho tšoara mohlala oa mantsoe a phelisang, ba bang ba ne ba khahloa ke ‘lipale tsa bohata.’ Lipale tsee tsa bohata e ne e le eng? Mohlomong Pauluse o ne a hopotse lipale tsa bohata, tse kang e fumanoang bukeng ea Tobita ea neano eo e seng karolo ea Bibele. Mohlomong lipale tsa bohata li ne li boetse li akarelletsa litaba tse monate tsa bo-ba-re. Mohlomong ba bang—“tumellanong le litakatso tsa bona”—likelello tsa bona li ne li thetsitsoe ke ba neng ba lumela hore litekanyetso tsa Molimo li ka nkoa e le tse lumellang ntho e ’ngoe le e ’ngoe kapa ba neng ba nyatsa ba etellang pele ka phuthehong. (3 Johanne 9, 10; Juda 4) Ho sa tsotellehe hore na ho ne ho ameha likhopiso life, ho totobetse hore ba bang ba ne ba rata mashano ho feta linnete tsa Lentsoe la Molimo. Kapele feela ha baa ka ba hlola ba itloaetsa ho etsa lintho tseo ba neng ba ithutile tsona, ’me sena se ile sa ba ntša kotsi moeeng.—2 Petrose 3:15, 16.

10. Lipale tse ling tsa bohata tsa mehleng ee ke life, ’me Johanne o ile a totobatsa joang hore ho hlokahala hore re itebele?

¹⁰ Kajeno re ka qoba ho khelosoa ke lipale tsa bohata haeba re hlahlobisisa re bile re khetha seo re se mamelang le seo re se balang. Ka mohlala, hangata mecha ea litaba e khothalletsa boitšoaro bo bobe. Batho ba bangata ba buella hore Molimo ha a tsejoe ebile a ke ke a tsejoa kapa ba latola boteng ba Molimo ka ho totobetseng. Bahlahlobisisi ba Bibele ba soma Bibele ha e bolela hore e bululetsoe ke Molimo. Bakoenehi ba kajeno bona ba ntse ba tsoela pele ho leka ho jala lipeō tsa lipelaelo e le hore ba senye tumelo ea Bakreste. Moapostola Johanne o ile a lemosa ka kotsi e tšoanang e neng e bakoa ke baprofeta ba bohata lekholong la pele la lilemo, a re: “Baratuoa, le se ke la lumela polelo e ’ngoe le e ’ngoe e bululetsoeng, empa lekang lipolelo tse bululetsoeng ho bona hore na li simoloha ho Molimo, hobane baprofeta ba bangata ba bohata ba kene lefatšeng.” (1 Johanne 4:1) Kahoo, ho hlokahala hore re be hlokolosi.

11. Tsela e ’ngoe ea ho inonya le ho bona hore na re tumelong ke efe?

¹¹ Ntlheng ena, Pauluse o ile a ngola a re: “Le ’ne le inonye hore na le tumelong.” (2 Bakorinthe 13:5) Moapostola o re khothalletsa hore re ’ne re inonye hore na re khomaretse litumelo tsohle tsa Bokreste. Haeba re rata ho mamela babelaeli, ho hlokahala hore re itlhahlobe ka thapelo. (Pesaleme ea 139:23, 24) Na re rata ho tšoaea batho ba Jehova liphoso? Haeba ho joalo, lebaka ke lefe? Na re hlabehisitsoe ke mantsoe kapa liketso tsa motho e mong? Haeba ho joalo, na re bona litaba ka leihlo le letle? Matšoenyeho ’ohle ao re thulanang le ’ona tsamaisong ena ke a nakoana. (2 Bakorinthe 4:17) Le haeba re ka thulana le teko ka phuthehong, ha rea lokela ho khaotsa ho sebeletsa Molimo. Haeba ho e-na le ntho e re khopisitseng, na ha ho molemo ho etsa sohle se matleng a rōna ho lokisa taba eo ebe re e siea matsohong a Jehova?—Pesaleme ea 4:4; Liproverbia 3:5, 6; Baefese 4:26.

12. Batho ba Berea ba ile ba re behela mohlala o motle joang?

¹² Ho e-na le ho nyatsa ba bang, a re luleng re e-na le pono e ntle ea moea ka boitsebiso boo re bo fumanang ka thuto ea botho le liboka tsa phutheho. (1 Bakorinthe 2:14, 15) Hape, ho e-na le ho belaella Lentsoe la Molimo, ho molemo hakaakang ho ba le boikutlo ba batho ba lekholong la pele la lilemo ba Berea ba ileng ba hlahloba Mangolo ka hloko! (Liketso 17:10, 11) Joale, a re sebeliseng seo re ithutileng sona, re hane lipale tsa bohata ’me re khomarele ’nete.

13. Re ka jala lipale tsa bohata re sa ikemisetsa joang?

¹³ Ho na le pale ea bohata ea mofuta o mong eo ho hlokahalang hore re ikalose ho eona. Ho na le lipale tse ngata tse hapang maikutlo, hangata li hlaha ka melaetsa e romeloang ka k’homphieutha. Ho molemo hore re ele hloko lipale tse joalo, haholo-holo haeba re sa tsebe mohloli oa tsona. Esita leha phihlelo kapa pale e rometsoe ke Mokreste ea hlomphuoang, ho ka etsahala hore ebe motho eo o e utloile ka ba-re. Ke ka lebaka leo e leng habohlokoa ho ba hlokolosi hore re se ke ra pheta le ho fetisa litlaleho tse se nang bopaki. Ka sebele ha rea lokela ho pheta “litšōmo tse bontšang ho se tšabe Molimo,” kapa “lipale tsa bohata tse senyang se halalelang.” (1 Timothea 4:7; New International Version) Kaha hape re tlamehile ho bua ’nete e mong ho e mong, ke bohlale ho qoba eng kapa eng e ka re etsang hore re iphumane re jetse bohata re sa ikemisetsa.—Baefese 4:25.

Melemo ea ho Sebelisa ’Nete

14. Ke melemo efe e hlahisoang ke ho itloaetsa ho etsa lintho tseo re ithutileng tsona Lentsoeng la Molimo?

¹⁴ Ho itloaetsa ho etsa seo re ithutang sona ka thuto ea botho ea Bibele le ka liboka tsa Bokreste ho tla re thusa haholo. Ka mohlala, re ka fumana hore likamano tsa rōna le bao re amanang le bona tumelong lia ntlafala. (Bagalata 6:10) Botho ba rōna bo tla ntlafala ha re sebelisa melao-motheo ea Bibele. (Pesaleme ea 19:8) Ho feta moo, ha re sebelisa seo re ithutang sona, re ‘khabisa thuto ea Molimo,’ ’me kahoo re ka hohella ba bang borapeling ba ’nete.—Tite 2:6-10.

15. (a) Mocha e mong o ile a ba sebete joang ho paka sekolong? (b) U ithutile’ng ketsahalong ee?

¹⁵ Har’a Lipaki tsa Jehova ho na le bacha ba bangata ba itloaelitseng ho etsa seo ba ithutileng sona ka thuto ea botho ea Bibele le ka lingoliloeng tsa Bokreste hammoho le ka ho ba teng kamehla libokeng tsa phutheho. Boitšoaro ba bona bo botle ke bopaki bo matla ho mesuoe le liithuti-’moho le bona sekolong. (1 Petrose 2:12) Nahana ka Leslie, ngoanana ea lilemo li 13 oa United States. Oa lumela hore hangata o ne a thatafalloa ho bua le bao a kenang sekolo le bona ka tumelo ea hae, empa ka letsatsi le leng boemo bo ile ba fetoha. “Sehlopha se ne se buisana ka tsela eo batho ba lekang ho rekisetsa ba bang lintho ka eona. Ngoanana e mong o ile a phahamisa letsoho ’me a etsa mohlala ka Lipaki tsa Jehova.” Kaha Leslie ke Paki, o ile a itšoara joang? O re: “Ke ile ka emela tumelo ea ka, ’me ke lumela hore e mong le e mong o ile a makala kahobane ha ke liberoane sekolong.” Sebete sa Leslie se ile sa fella ka’ng? O re: “Ke ile ka khona ho tsamaisetsa seithuti se seng bukana le pampitšana, kahobane se ne se e-na le lipotso tse ling.” Jehova o thaba hakaakang ha bacha ba itloaelitseng ho etsa seo ba ithutileng sona ba e-ba le sebete sa ho paka sekolong!—Liproverbia 27:11; Baheberu 6:10.

16. Sekolo sa Tšebeletso sa Puso ea Molimo se thusitse mocha e mong oa Paki joang?

¹⁶ Mohlala o mong ke oa Elizabeth. Ho tloha ha a e-na le lilemo tse supileng le nakong ea lilemo tsohle tsa ha a le sekolong sa mathomo, ngoanana enoa o ne a memela mesuoe ea hae Holong ea ’Muso neng le neng ha a e-na le puo Sekolong sa Tšebeletso sa Puso ea Molimo. Haeba mosuoe a ne a tla sitoa ho ba teng, Elizabeth o ne a sala ha sekolo se tsoa ’me a phetela mosuoe puo ea hae. Selemong sa ho qetela sa Elizabeth sekolong se phahameng, o ile a ngola tlaleho ea maqephe a leshome ka melemo ea Sekolo sa Tšebeletso sa Puso ea Molimo ’me a bua ka taba ena ka pel’a sehlopha sa mesuoe e mene. Hape o ile a kōptjoa ho bontša hore na puo e fanoa joang Sekolong sa Tšebeletso sa Puso ea Molimo, ’me o ile a khetha sehlooho se reng “Ke Hobane’ng ha Molimo a Lumelletse Bokhopo?” Elizabeth o thusitsoe ke lenaneo la thuto la Lipaki tsa Jehova la Sekolo sa Tšebeletso sa Puso ea Molimo. Ke e mong feela oa bacha ba bangata ba Bakreste ba rorisang Jehova ka ho itloaetsa ho etsa lintho tseo ba ithutileng tsona Lentsoeng la hae.

17, 18. (a) Bibele e fana ka keletso efe mabapi le botšepehi? (b) Monna e mong o ile a angoa joang ke boitšoaro bo bontšang botšepehi ba e mong oa Lipaki tsa Jehova?

¹⁷ Bibele e eletsa Bakreste hore ba itšoare ka tsela e tšepahalang linthong tsohle. (Baheberu 13:18) Ho se tšepahale ho ka senya kamano ea rōna le ba bang, ’me ho hobe ka ho fetisisa, ho ka senya kamano ea rōna le Jehova ka boeena. (Liproverbia 12:22) Boitšoaro ba rōna bo bontšang botšepehi bo paka hore re itloaetsa ho etsa lintho tseo re ithutileng tsona, ’me bo entse hore ba bangata ba hlomphe Lipaki tsa Jehova haholoanyane.

¹⁸ Nahana ka phihlelo ea monna oa lesole ea bitsoang Phillip. O ile a lahla cheke e saennoeng empa e sa tlatsoa hore na ke ea chelete e kae, ’me ha aa ka a hlokomela ho fihlela ha e khutlela ho eena ka poso. Cheke ena e ile ea tholoa ke e mong oa Lipaki tsa Jehova, ’me lengolo le neng le qhoaelletsoe ho eona le ne le bolela hore motho ea e thotseng o ile a susumetsoa ke tumelo ea hae hore a e tholise mong’a eona. Phillip o ile a hlolloa. O ile a re: “Ba ka be ba nketse ka liphalana ka $9 000!” O ne a ile a soaba ka lekhetlo le leng ha katiba ea hae e utsuoa kerekeng. Ho totobetse hore katiba ea hae e nkiloe ke motho eo a mo tsebang, empa motho osele feela eena o mo tholisitse cheke ea likete tsa lidolara! Ke ’nete hore Bakreste ba tšepahalang ba tlotlisa Jehova Molimo!

Tsoela Pele ho Sebelisa Seo U Ithutileng Sona

19, 20. Re tla rua molemo joang ka ho itšoara tumellanong le lintho tseo re ithutang tsona Mangolong?

¹⁹ Ba sebelisang seo ba ithutileng sona Lentsoeng la Molimo ba kotula melemo e mengata. Morutuoa Jakobo o ile a ngola, a re: “Ea nyarelang ka molaong o phethahetseng oa tokoloho le ea phehellang ho oona, motho enoa, kahobane e se moutloi ea lebalang, empa e le moetsi oa mosebetsi, o tla thaba ho o etseng ha hae.” (Jakobo 1:25) E, haeba re itšoara tumellanong le lintho tseo re ithutang tsona Mangolong, re tla thaba e le kannete ’me re tla khona ho sebetsana ka katleho le likhatello tsa bophelo. Ka holim’a tsohle, Jehova o tla re hlohonolofatsa ’me re be le tšepo ea bophelo bo sa feleng!—Liproverbia 10:22; 1 Timothea 6:6.

²⁰ Kahoo, ikitlaelletse ho tsoela pele u ithuta Lentsoe la Molimo. Kopanela kamehla le barapeli ba Jehova, ’me u ele hloko taba eo ho buuoang ka eona libokeng tsa Bokreste. Sebelisa seo u ithutang sona, tsoela pele ho itloaetsa ho se etsa, ’me “Molimo oa khotso o tla ba le [uena].”—Bafilipi 4:9.

[Mongolo o botlaaseng ba leqephe]

Na U sa Hopola?

• “Mohlala oa mantsoe a phelisang hantle” ke eng, ’me re ka tsoela pele re o tšoere joang?

• ‘Lipale tsa bohata’ tseo re lokelang ho li hana ke life?

• Ba itloaelitseng ho etsa lintho tseo ba ithutang tsona Lentsoeng la Molimo ba tleloa ke melemo efe?

[Setšoantšo se leqepheng la 17]

Bakreste ba pele ba ne ba ka qoba ho khelosoa ke bakoenehi joang?

[Setšoantšo se leqepheng la 18]

Lipeō tsa lipelaelo li ka jaloa ka mecha ea litaba, ka “Internet” le ka bakoenehi ba kajeno

[Setšoantšo se leqepheng la 19]

Hase bohlale ho jala litlaleho tse se nang bopaki

[Setšoantšo se leqepheng la 20]

Mosebetsing, sekolong le libakeng tse ling, Lipaki tsa Jehova li sebelisa seo li se balang Lentsoeng la Molimo