Ithabeleng ho Jehova!
“Ithabeleng Moreneng ka mehla; ke boela ke rialo, ke re: Ithabeleng.”—BA-FILIPPI 4:4.
1. Ke hobane’ng ha re ka ’na ra ipotsa hore na Pauluse o ne a bolela’ng ha a ne a re Bakreste ba lokela ho thaba kamehla?
KAJENO, mabaka a ho thaba a ka ’na a bonahala a fokola a bile a ba teng ngope-setšoha. Batho ba entsoeng ka lerōle, esita le Bakreste ba ’nete, ba thulana le maemo a bakang masoabi—a kang ho se hiroe, ho kula, ho shoeloa ke baratuoa, mathata a botho, kapa khanyetso e hlahang ho litho tsa lelapa tse sa lumelang kapa metsoalle ea nakong e fetileng. Kahoo re lokela ho utloisisa keletso ea Pauluse joang, ea ho ‘thaba kamehla’? Ha re talima maemo a sa thabiseng le a lekang ao kaofela ha rōna re tlamehang ho loana le ’ona, na see se ka hla sa etsahala? Puisano ea taba e potolohileng mantsoe ana e tla thusa ho hlakisa taba ena.
Thabang—Hobane’ng Hona Joang?
2, 3. Bohlokoa ba thabo ke bofe, joalokaha ho bontšitsoe tabeng ea Jesu le Baiseraele ba boholo-holo?
2 “Ithabeleng Moreneng ka mehla; ke boela ke rialo, ke re: Ithabeleng.” Sena se ka ’na sa re hopotsa mantsoe a ileng a lebisoa ho Baiseraele makholong a lilemo a 24 a fetileng: “Thabo ea Jehova ke qhobosheane ea lōna,” kapa ho latela phetolelo ea Moffatt: “Ho ithabela ho Ea sa Feleng ke matla a lōna.” (Nehemia 8:10) Thabo e fana ka matla ’me e tšoana le qhobosheane moo motho a ka balehelang teng bakeng sa matšeliso le tširelo. Thabo e ile ea sebetsa ho thuseng esita le motho ea phethahetseng Jesu ho mamella. “Ea mameletseng sefapano ka baka la thabo eo a e beetsoeng, a sa kang a re letho ka lihlong, a ba a ea lula letsohong le letona la terone ea Molimo.” (Ba-Heberu 12:2) Ka ho hlakileng, ho khona ho thaba ha ho talimanoe le mathata hoa hlokahala bakeng sa poloko.
3 Pele ba kena Naheng e Tšepisitsoeng, Baiseraele ba ne ba ile ba laeloa: “U tla thabela molemo oohle oo Jehova, Molimo oa hao, a u neileng oona, uena le ba ntlo ea hao; u thabe, uena, le mo-Levi, le molichaba ea ahileng ha eno.” Liphello tsa ho hlōleha ho sebeletsa Jehova ka thabo e ne e tla ba tse bohloko. “Lithohako tseo kaofela li tla u hlahela, li u phallele, li u tšoare, u be u timele . . . kahobane u tla be u sa ka ua sebeletsa Jehova, Molimo oa hao, ka thabo le ka pelo e monate, ka baka la ho ateloa ke ntho tsohle.”—Deuteronoma 26:11; 28:45-47.
4. Ke hobane’ng ha re ka ’na ra hlōleha ho thaba?
4 Kahoo, ke ho tlamang hore masala a tlotsitsoeng a kajeno le metsoalle ea ’ona ea “linku tse ling” ba thabe! (Johanne 10:16) Pauluse, ka ho pheta keletso ea hae, “ke boela ke rialo, ke re,” o ile a hatisa bohlokoa ba ho thabela lintho tsohle tse molemo tseo Jehova a re etselitseng tsona. Na re etsa joalo? Kapa na re tšoarehile haholo kemisong ea letsatsi le letsatsi ea bophelo hoo ka linako tse ling re lebalang mabaka a rōna a mangata a ho thaba? Na mathata a hloellana holimo hoo a thibang pono ea rōna ka ’Muso le litlhohonolofatso tsa oona? Na re lumella lintho tse ling—tse kang ho se mamele melao ea Molimo, ho hlokomoloha melao-motheo ea bomolimo, kapa ho se tsotelle mesebetsi ea Bokreste—hore li re amohe thabo ea rōna?
5. Ke hobane’ng ha motho ea sa nahaneleng maemo a fumana ho le thata ho thaba?
5 “Ho nahanela maemo ha lōna ho ke ho tsejoe ke batho bohle. Morena o haufi.” (Ba-Filippi 4:5, NW) Motho ea sa nahaneleng maemo ha a na botsitso. A ka ’na a hlōleha ho hlokomela bophelo ba hae bo botle ka tsela e loketseng, a nehella ’mele oa hae khatello ea kelello e sa hlokahaleng kapa matšoenyeho. Mohlomong ha aa ithuta ho amohela likhaello tsa hae le ho phela ka tsela e loketseng. A ka ’na a ipehela lipakane tse phahameng haholo ’me a leka ho li finyella ho sa tsotellehe liphello. Kapa a ka ’na a sebelisa likhaello tsa hae e le phephi bakeng sa ho khoehlisa kapa ho khaotsa ho ba mafolo-folo. Ka lebaka la ho hloka botsitso le ho se nahanele maemo, o fumana ho le thata ho thaba.
6. (a) Bakreste-’moho le rōna ba lokela ho bona eng ho rōna, ’me see se tla etsahala neng feela? (b) Mantsoe a Pauluse a ho 2 Ba-Korinthe 1:24 le Ba-Roma 14:4 a re thusa joang hore re nahanele maemo?
6 Le haeba bahanyetsi ba re talima re le ba nang le cheseho e feteletseng, Bakreste-’moho le rōna ba lokela hore kamehla ba khone ho bona hore re nahanela maemo. ’Me ba tla bona sena haeba re na le botsitso ’me re sa lebelle phetheho ho rōna ka borōna kapa ho ba bang. Ka holimo ho tsohle, re lokela ho qoba ho beha meroalo e boima holim’a ba bang e fetelang ka ’nģane ho seo Lentsoe la Molimo le se hlokang. Moapostola Pauluse o itse: “E seng hore re benghali holim’a tumelo ea lōna‚ empa re le ba sebetsang le lōna ho le thabisa.” (2 Ba-Korinthe 1:24, NW) Joalokaha e ne e le Mofarisi nakong e fetileng, Pauluse o ne a tseba hantle hore litaelo tse sa fetoheng tse behiloeng le tse tlamang tsa balaoli li felisa thabo, ha litlhahiso tse thusang tse fanoang ke basebetsi-’moho le eena li e eketsa. ’Nete ea hore “Morena o haufi” e lokela ho hopotsa motho ea nahanelang maemo hore ha rea lokela ‘ho ahlola mofo oa e mong. Leha a ema, leha a ka oa, ho na le monghali oa hae.’—Ba-Roma 14:4.
7, 8. Ke hobane’ng ha Bakreste ba tlameha ho lebella ho ba le mathata, empa ke joang ho ka etsahalang hore ba tsoele pele ho thaba?
7 “Le se ke la belaella letho; empa nthong tsohle seo le se batlang, le ke le se tsebise Molimo ka thapelo le ka kōpo e nang le teboho.” (Ba-Filippi 4:6) Kajeno re angoa ke “linako tse bohloko tseo ho leng thata ho sebetsana le tsona” tseo Pauluse a ileng a ngola ka tsona. (2 Timothea 3:1-5, NW) Kahoo Bakreste ba tlameha ho lebella ho tobana le mathata. Mantsoe a Pauluse ‘ithabeleng kamehla’ ha a qhele taba ea hore ho ka etsahala hore ka linako tse ling Mokreste ea tšepahalang a hlaseloe ke ho hloka tšepo kapa ho nyahama. Tabeng ea Pauluse ka boeena, ka botšepehi o ile a lumela: “Re hlomohile ka ’ng̀a tsohle, empa ha re tsielehe ruri; re bothateng bo boholo, empa ha re tele; rea hlorisoa, empa ha re lahloe; re liheloa fatše, empa ha re timele.” (2 Ba-Korinthe 4:8, 9) Leha ho le joalo, thabo ea Mokreste e fokotsa bothata ba linako tse khutšoanyane tsa matšoenyeho le masoabi ’me qetellong ea bo felisa. E fana ka matla a hlokahalang bakeng sa ho ikemisetsa ho tsoela pele, ho se mohla a hlokomolohang mabaka a mangata a ho thaba.
8 Ha mathata a hlaha, ho sa tsotellehe hore na ke a mofuta ofe, Mokreste ea thabileng ka boikokobetso o kōpa thuso ea Jehova ka thapelo. Ha a inehele matšoenyehong a feteletseng. Ka mor’a ho etsa seo ka ho utloahalang eena ka boeena a ka se etsang ho rarolla bothata, o tlohella phello matsohong a Jehova tumellanong le memo ena: “Jarisa Jehova phahlo tsa hao, ’me o tla u tšehetsa.” Ka nako e tšoanang, Mokreste o tsoela pele ho leboha Jehova bakeng sa molemo oohle oa Hae.—Pesaleme ea 55:22; bona le Mattheu 6:25-34.
9. Tsebo ea ’nete e tlisa khotso ea kelello joang, ’me see se na le phello efe e molemo ho Mokreste?
9 “Khotso ea Molimo, e fetisang kutloisiso eohle, e tla boloka lipelo tsa lōna le mehopolo ea lōna ho Jesu Kreste.” (Ba-Filippi 4:7) Tsebo ea ’nete ea Bibele e lokolla kelello ea Mokreste mashanong ’me e mo thusa ho hlaolela mekhoa e molemo ea ho nahana. (2 Timothea 1:13) Ka tsela eo o thusoa hore a qobe boitšoaro bo fosahetseng kapa bo sa bonahatseng bohlale bo neng bo ka senya likamano tsa khotso le ba bang. Ho e-na le ho tsielehisoa ke ho hloka toka le bokhopo, o beha tšepo ea hae ho Jehova bakeng sa hore a rarolle mathata a moloko oa batho ka ’Muso. Khotso e joalo ea kelello e lebela pelo ea hae, e boloka merero ea hae e hloekile, ’me e tataisa monahano oa hae tseleng ea ho loka. Ka lehlakoreng le leng, merero e hloekileng le menahano e nepahetseng e fana ka mabaka a mangata haholo a ho thaba, ho sa tsotellehe mathata le likhatello tse tlisoang ke lefatše le ferekaneng.
10. Thabo ea ’nete e ka fumanoa feela ka ho bua kapa ho nahana ka eng?
10 “Ha e le ka ho hong, banab’eso, tsohle tsee e leng tsa ’nete, tsohle tse hlomphehang, tsohle tse lokileng, tsohle tse hloekileng, tsohle tse ratehang, tsohle tse botumo bo botle, tsohle tseo bokhabane bo bong le poko e ’ngoe e leng teng ho tsona, le ke le hopole tsona.” (Ba-Filippi 4:8) Mokreste ha a fumane thabo ka ho bua kapa ho nahana lintho tse mpe. Sena ntle ho pelaelo se qhela boithabiso bo bongata boo lefatše le fanang ka bona. Ha ho ea ka bolokang thabo ea Bokreste haeba a tlatsa kelello ea hae le pelo ka mashano, mesoaso ea booatla, le litaba tse sa lokang, tsa boitšoaro bo bobe, tse seng khabane, tsa lehloeo, le tse manyala. Ka mantsoe a hlakileng ha ho ea ka fumanang thabo ea ’nete ka ho tlatsa kelello ea hae le pelo ka litšila. Lefatšeng la Satane le silafetseng, ke ho hahang hakaakang ho tseba hore Bakreste ba na le lintho tse ngata haholo tseo ba ka li nahanang le ho buisana ka tsona!
Mabaka a Mangata Haholo a ho Thaba
11. (a) Ke’ng e sa lokelang ho nkoa habobebe, hona hobane’ng? (b) Ho ba teng kopanong ea machaba ho bile le phello efe ho moeti e mong le mosali oa hae?
11 Ha re bua ka mabaka a ho thaba, a re se keng ra lebala boena ba rōna ba machaba. (1 Petrose 2:17, NW) Ha lihlopha tsa lefatše tsa lichaba le tsa merabe li bontšana lehloeo le matla, batho ba Molimo ba atamelana haufi ka lerato. Bonngoe ba bona bo bonahala ka ho khethehileng likopanong tsa machaba. Moeti ea tsoang United States o ngotse tjena ka e neng e tšoaretsoe Kiev, Ukraine, ka 1993: “Meokho ea thabo, mahlo a phatsimang, ho hakana ho sa khaotseng ho kang ha litho tsa lelapa, le ho lumelisana ha lihlopha tse phahamisang likhele tse mebala le lisakatuku ho etsoang ho pholletsa le lebala la lipapali e ne e le bopaki bo hlakileng ba bonngoe ba bomolimo. Lipelo tsa rōna li motlotlo ka lebaka la seo Jehova a se finyeletseng ka mohlolo boeneng ba lefatše lohle. Sena se amme ’na le mosali oa ka ka ho teba ’me se ekelitse moelelo o mocha tumelong ea rōna.”
12. Esaia 60:22 e phethahala joang ka pel’a mahlo a rōna?
12 Ho matlafatsa tumelo hakaakang bakeng sa Bakreste kajeno ha ba bona boprofeta ba Bibele bo phethahala ka pel’a mahlo a bona! Ka mohlala, nahana mantsoe a Esaia 60:22: “E monyenyane ho bona o tla ata ho isa seketeng, ea nyatsehang a fetohe sechaba se sengata. ’Na Jehova, ke tla phakisa ke etse hoo ka nako ea teng.” Nakong ea ho tsoaloa ha ’Muso ka 1914, ke feela ba 5 100—e monyenyane—ba neng ba bolela ka mafolo-folo. Empa lilemong tse hlano tse fetileng, boholo ba boena ba lefatše ka bophara bo ’nile ba eketseha ka lebelo le akaretsang la Lipaki tse kolobetsoang bocha tse 5 628 beke le beke! Ka 1993, ho ile ha finyelloa tlhōrō ea basebeletsi ba mafolo-folo ba 4 709 889. Nahana feela! Sena se bolela hore “e monyenyane” oa 1914 ha e le hantle o haufi le ho ba ‘sekete’!
13. (a) Ho ’nile ha etsahala eng ho tloha ka 1914? (b) Lipaki tsa Jehova li boloka molao-motheo oa mantsoe a Pauluse a ho 2 Ba-Korinthe 9:7 joang?
13 Ho tloha ka 1914 Morena oa Bomessia o tsoetse pele ho busa ka har’a lira tsa hae. Puso ea hae e ’nile ea tšehetsoa ke balateli ba batho ba ithaopang ba nehelang nako, matla, le chelete bakeng sa ho tsoela pele ka mosebetsi oa ho bolela lefatšeng ka bophara haesita le oa phutuho ea machaba ea ho haha. (Pesaleme ea 110:2, 3) Lipaki tsa Jehova li thabela hore menehelo ea chelete ea etsoa e le hore mesebetsi ena e ka phethoa, le hoja ho buuoa ka chelete ngope-setšoha libokeng tsa tsona.a (Bapisa le 1 Likronike 29:9.) Ha ho hlokahale hore Bakreste ba ’nete ba susumeletsoe ho fana; ba nka e le tokelo ho tšehetsa Morena oa bona ho fihlela moo maemo a bona a ba lumellang, e mong le e mong “kamoo a seng a lekantse pele kateng, pelong ea hae; e seng ka ho soaba, leha e le ka ho khannoa.”—2 Ba-Korinthe 9:7.
14. Ke boemo bofe har’a batho ba Molimo bo ileng ba hlahella ho tloha ka 1919, bo ba fa lebaka lefe la ho thaba?
14 Tsosoloso e boletsoeng esale pele ea borapeli ba ’nete har’a batho ba Molimo e feletse ka ho thehoa ha paradeise ea moea. Ho tloha ka 1919 e tsoetse pele ho atolosa meeli ea eona. (Pesaleme ea 14:7; Esaia 52:9, 10) Phello e bile efe? Bakreste ba ’nete ba latsoa “nyakallo le thabo.” (Esaia 51:11) Litholoana tse molemo tseo e fellang ka tsona ke bopaki ba seo moea o halalelang oa Molimo o ka khonang ho se finyella ka batho ba sa phethahalang. Tlotla eohle le tlhompho li ea ho Jehova, empa ke tokelo efe e khōloanyane ho feta ea ho ba mosebetsi-’moho le Molimo? (1 Ba-Korinthe 3:9) Jehova o na le matla a lekaneng bakeng sa ho etsa hore majoe a hoeletse molaetsa oa ’nete, haeba ho hlokahala. Leha ho le joalo, o bone ho sa lokela hore a sebelise mokhoa ona, ho e-na le hoo, o bone ho loketse hore a susumetse libōpuoa tse ithaopang tse entsoeng ka lerōle ho phetha thato ea hae.—Luka 19:40.
15. (a) Ke liketsahalo life tsa kajeno tseo re li shebeletseng ka thahasello? (b) Re lebeletse ketsahalo efe ka thabo?
15 Ba e-na le tšabo e nang le tlhompho, hona joale bahlanka ba Jehova ba shebeletse liketsahalo tsa lefatše kaha li amana le boprofeta ba Bibele bo hlaheletseng. Lichaba li leka ka matla—empa li sa atlehe—ho finyella khotso e tsitsitseng. Liketsahalo li li qobella hore li ipiletse ho mokhatlo oa Machaba a Kopaneng hore o nke khato libakeng tsa lefatše moo ho nang le mefere-fere. (Tšenolo 13:15-17) Ka nako e tšoanang, batho ba Molimo ba se ba ntse ba talimme pele ka tebello e khōlō ho e ’ngoe ea liketsahalo tse thabisang ka ho fetisisa tse lokelang ho etsahala, e atamelang letsatsi le letsatsi. “A re thabeng, re nyakalle, ’me re ise khanya ho oona; hobane lenyalo la Konyana le hlahile, ’me mosali oa eona o itokisitse.”—Tšenolo 19:7.
Boboleli—Moroalo o Boima Kapa Thabo?
16. Bontša hore na ho hlōleha ha Mokreste ho sebelisa seo a ithutileng sona ho ka mo amoha thabo joang.
16 “Tseo le ithutileng tsona, la li amohela, la li utloa, la li bona ho ’na, etsang tsona; ’me Molimo oa khotso o tla ba le lōna.” (Ba-Filippi 4:9) Ka ho sebelisa seo ba ithutileng sona, Bakreste ba ka lebella ho amohela tlhohonolofatso ea Molimo. E ’ngoe ea lintho tse molemo ka ho fetisisa tseo ba ithutileng tsona ke tlhokahalo ea ho bolela litaba tse molemo ho ba bang. Ha e le hantle, ke mang ea neng a ka thabela khotso ea kelello kapa a thaba haeba a hana ho fetisetsa boitsebiso ho batho ba pelo li tšepahalang bao bophelo ba bona bo itšetlehileng ka ho bo utloa?—Ezekiele 3:17-21; 1 Ba-Korinthe 9:16; 1 Timothea 4:16.
17. Ke hobane’ng ha mosebetsi oa rōna oa ho bolela e lokela ho ba mohloli oa thabo kamehla?
17 Ke thabo e kaakang ho fumana batho ba kang linku ba ratang ho ithuta ka Jehova! Ruri, ba sebeletsang ka morero o nepahetseng kamehla ba tla fumana tšebeletso ea ’Muso e le mohloli oa thabo. Ke hobane lebaka le ka sehloohong la ho ba Paki ea Jehova ke ho rorisa lebitso la Hae le ho tšehetsa boemo ba Hae e le ’Musi ea Phahameng. (1 Likronike 16:31) Motho ea hlokomelang ’nete ena o tla thaba esita leha batho ka booatla ba hana litaba tse molemo tseo a li tlisang. Oa tseba hore ho bolela ho batho ba sa lumelang ho tla fela ka letsatsi le leng; ho rorisa lebitso la Jehova ho tla tsoela pele ka ho sa feleng.
18. Mokreste o susumetsoa ke’ng hore a etse thato ea Jehova?
18 Bolumeli ba ’nete bo susumeletsa ba bo sebelisang ho etsa lintho tse hlokoang ke Jehova, eseng hobane ba tlameha, empa hobane ba rata. (Pesaleme ea 40:8; Johanne 4:34) Batho ba bangata ba fumana ho le thata ho utloisisa sena. Mosali e mong o kile a re ho Paki e mo etetseng: “Ua tseba ke’ng, ke tlameha ho le babatsa. Ka sebele le ka mohla ke ne nke ke ka ea ka ntlo le ntlo ke bolela ka bolumeli ba ka joalokaha le etsa.” Ka pososelo Paki e ile ea araba: “Kea utloisisa hore na u ikutloa joang. Pele ke e-ba e mong oa Lipaki tsa Jehova, u ne u ke ke ua etsa hore ke ee ho batho ba bang ho bua le bona ka bolumeli. Empa hona joale kea rata.” Mosali enoa o ile a inahana ka nakoana eaba o etsa qeto: “Ho totobetse hore bolumeli ba hao bo na le ntho e ’ngoe eo bo fanang ka eona eo ba ka bo sa faneng ka eona. Mohlomong ke lokela ho batlisisa.”
19. Ke hobane’ng ha hona joale e le nako ea ho thaba ho feta leha e le neng pele?
19 Temana ea selemo ea 1994, e behiloeng sebakeng se hlaheletseng Liholong tsa rōna tsa ’Muso, kamehla ea re hopotsa: “U tšepe Jehova ka pelo ea hao eohle.” (Liproverbia 3:5) Na ho ne ho ka ba le lebaka le leholoanyane la ho thaba ho feta ho khona ho beha tšepo ea rōna ho Jehova, qhobosheane ea rōna eo re tšabelang ho eona? Pesaleme ea 64:10 ea hlalosa: “Ea lokileng o tla ithabela ho Jehova, a tšabele ho eena.” Ena hase nako ea ho qea-qea kapa ho tela. Khoeli e ’ngoe le e ’ngoe e fetang e re atametsa haufinyane haholo le ntho ea sebele eo bahlanka ba Jehova ba ’nileng ba laba-labela ho e bona ho tloha mehleng ea Abele. Hona joale ke nako ea ho tšepa Jehova ka lipelo tsa rōna tsohle, re tseba hore ha ho mohla re kileng ra ba le mabaka a mangata hakana a ho thaba!
[Mongolo o botlaaseng ba leqephe]
a Likopanong le hang ka khoeli liphuthehong, ho baloa tlaleho e khutšoanyane e bontšang hore na menehelo ea boithatelo e amohetsoeng ke bokae haesita le litšenyehelo tse lefuoeng. Ka linako tse ling ho romeloa mangolo a bolelang hore na menehelo e joalo e sebelisoa joang. E mong le e mong o hopotsoa ka boemo ba lichelete ba mosebetsi oa lefatše lohle oa Lipaki tsa Jehova.
U ne U Tla Araba Joang?
◻ Ho latela Nehemia 8:10 ke hobane’ng ha re lokela ho thaba?
◻ Deuteronoma 26:11 le 28:45-47 li bontša bohlokoa ba ho thaba joang?
◻ Ba-Filippi 4:4-9 e ka re thusa joang hore re thabe kamehla?
◻ Temana ea selemo ea 1994 e re fa lebaka lefe la ho thaba?
[Setšoantšo se leqepheng la 16]
Lipaki tsa Russia le tsa Jeremane li thabela ho ba karolo ea boena ba lefatše lohle
[Setšoantšo se leqepheng la 17]
Ho arolelana ’nete le ba bang ke mohloli oa thabo