Ho Pholosoa, Eseng ka Mesebetsi Feela, Empa ka Mosa o sa Tšoanelang
“Le pholositsoe ka tumelo . . . Hase ka lebaka la mesebetsi, e le hore ho se ke ha e-ba le motho ea ka bang le lebaka la ho ithorisa.”—BAEFESE 2:8, 9.
1. Bakreste ba fapana joang le batho ka kakaretso mabapi le lintho tseo motho ka mong a li finyellang, ’me ke hobane’ng ha ho le joalo?
KAJENO batho ba ba motlotlo haholo ka lintho tseo ba li finyellang, ’me hangata ba potlakela ho ithorisa ka tsona. Empa Bakreste ha ba joalo. Ha ba bue haholo ka lintho tseo ba li finyeletseng, esita le haeba li amana le borapeli ba ’nete. Le hoja ba thabela seo batho ba Jehova ka kakaretso ba se finyellang, ha ba bue haholo ka seo ba se etsang ka bomong. Ba ela hloko hore tšebeletsong ea Jehova, ntho ea bohlokoa haholo ke sepheo se nepahetseng eseng lintho tseo motho a li finyellang. Mang kapa mang ea tla qetella a fuoe mpho ea bophelo bo sa feleng, o tla be a e fumane ka lebaka la tumelo le ka mosa o sa tšoanelang oa Molimo, eseng ka lebaka la lintho tseo a li finyeletseng.—Luka 17:10; Johanne 3:16.
2, 3. Pauluse o ile a ithorisa ka eng, ’me e le ka lebaka lefe?
2 Moapostola Pauluse o ile a elelloa ’nete ena. Ka mor’a hore a rapele ka makhetlo a mararo hore a hlomolloe “moutloa nameng,” Jehova o ile a mo araba tjena: “Mosa oa ka o sa tšoanelang o u lekane; kaha matla a ka a ntse a etsoa a phethahetseng bofokoling.” Ka boikokobetso Pauluse o ile a amohela qeto ea Jehova eaba o re: “Ka hona, ho e-na le hoo ka nyakallo e khōlō ke tla ithorisa mabapi le mefokolo ea ka, e le hore matla a Kreste a ka lula holim’a ka joaloka tente.” Re lokela ho batla ho etsisa moea oa Pauluse oa boikokobetso.—2 Bakorinthe 12:7-9.
3 Le hoja Pauluse a ne a ipabola mesebetsing ea Bokreste, o ile a hlokomela hore ha a finyelle lintho ka lebaka la bokhoni bo itseng boo a nang le bona. Ka boinyenyefatso o ile a re: “’Na motho ea ka tlaase ho e monyenyane ka ho fetisisa ho bahalaleli bohle, ke ile ka fuoa mosa ona o sa tšoanelang, e le hore ke bolelle lichaba litaba tse molemo tse mabapi le maruo a ke keng a lekanngoa a Kreste.” (Baefese 3:8) Mantsoeng ana ha ho na moea oa boithoriso kapa oa boikakaso ba ho iketsa ea lokileng ho feta ba bang. “Molimo o hanyetsa ba ikhohomosang, empa o fana ka mosa o sa tšoanelang ho ba ikokobetsang.” (Jakobo 4:6; 1 Petrose 5:5) Na re latela mohlala oa Pauluse oa hore ka boikokobetso re inke re le ba tlaase ho e monyenyane ka ho fetisisa oa barab’abo rōna?
‘Ho Nka Hore ba Bang ba re Phahametse’
4. Ke hobane’ng ha ka linako tse ling re ka thatafalloa ho nka hore ba bang ba re phahametse?
4 Moapostola Pauluse o ile a eletsa Bakreste a re: “Le [se] etse letho ka lebaka la ho rata likhang kapa ka lebaka la ho ipolelisa, empa ka ho ikokobetsa kelellong le nka hore ba bang ba le phahametse.” (Bafilipi 2:3) Ho ka ’na ha e-ba thata ho etsa joalo, haholo haeba re le boemong ba boikarabelo. Mohlomong bothata bo bakoa ke hore e ka ’na eaba ka tsela e itseng, re susumelitsoe ke moea oa tlhōlisano o tletseng hohle lefatšeng kajeno. Ho ka etsahala hore ebe ha re sa le bana, re ile ra rutoa ho hlōlisana le banab’abo rōna kapa bao re balang le bona sekolong. Mohlomong nako le nako re ne re khothalletsoa ho ba libapali tse hloahloa ka ho fetisisa kapa liithuti tse hlaheletseng sekolong. Ha e le hantle, ho ipabola nthong efe kapa efe e nepahetseng hoa babatseha. Leha ho le joalo, lebaka la hore Bakreste ba ipabole hase hore ba etse mponeng, empa ke hore ba rue molemo o feletseng mosebetsing o itseng le hore haeba ho etsahala, ba ruise ba bang molemo. Leha ho le joalo, ho batla thoriso ea ho ba oa pele kamehla ho ka ba kotsi. Joang?
5. Moea oa tlhōlisano o ka baka eng haeba o sa laoloe?
5 Haeba moea oa tlhōlisano kapa oa ho ipolelisa o sa laoloe, o ka etsa hore motho a hloke tlhompho le ho ikhohomosa. A ka honohela bokhoni ba batho ba bang le litokelo tsa bona. Liproverbia 28:22 e re: “Motho ea leihlo le mohono o hahamalla lintho tsa bohlokoa, empa ha a tsebe hore bohloki bo tla mo oela holimo.” A ka ba a iketelletsa pele ka ho batla maemo a sa mo tšoaneleng. E le hore a ikemele, a ka qala ho korotla le ho nyatsa batho ba bang—e leng mekhoa eo Bakreste ba lokelang ho e qoba. (Jakobo 3:14-16) Ho sa tsotellehe seo, o kotsing ea ho ba le moea oa boikhabi.
6. Bibele e lemosa joang ka moea oa tlhōlisano?
6 Kahoo, Bibele e khothatsa Bakreste tjena: “A re se keng ra fetoha ba ipolelisang, ba hlohlelletsang tlhōlisano, ba honohelanang.” (Bagalata 5:26) Moapostola Johanne o ile a bua ka Mokreste-’moho le eena eo ho neng ho totobetse hore o na le moea ona. Johanne o itse: “Ke ile ka ngolla phutheho ho hong, empa Diotrefe, ea ratang ho ba le sebaka sa pele har’a bona, ha a amohele letho le tsoang ho rōna ka tlhompho. Ke ka lebaka leo, haeba ke tla, ke tlang ho hopola mesebetsi ea hae eo a tsoelang pele ho e etsa, a bebera ka rōna ka mantsoe a khopo.” Ka sebele ho utloisa bohloko haeba Mokreste a oela boemong bona!—3 Johanne 9, 10.
7. Ke eng seo Mokreste a tla rata ho se qoba mesebetsing ea kajeno moo ho nang le tlhōlisano?
7 Ha e le hantle, ha ho utloahale ho nahana hore Mokreste a ka qoba ka ho feletseng lintho tsohle tse nang le tlhōlisano. Ka mohlala, mosebetsi oa hae oa boipheliso o ka ’na oa akarelletsa ho hlōlisana le batho ba bang litabeng tsa moruo kapa khoebong e etsang lihlahisoa kapa litšebeletso tse tšoanang le tsa hae. Leha ho le joalo, esita le maemong a joalo, Mokreste o lokela ho etsa khoebo ea hae ka moea o nang le tlhompho, lerato le ho nahanela. O tla hana mekhoa eo e seng ea molao kapa eo e seng ea Bokreste a be a qobe ho ba motho ea tsebahalang ka moea oa tlhōlisano, kapa oa se-mphete-ke-u-fete. A ke ke a nahana hore ho hlahella—ho eng kapa eng e etsoang—ke ntho ea bohlokoahali bophelong. Haeba Mokreste a lokela ho ba le boikutlo boo linthong tsa lefatše, ruri ke habohlokoa hakaakang hore a be le bona litabeng tsa borapeli!
“Eseng ka ho Ipapisa le Motho e Mong”
8, 9. (a) Ke hobane’ng ha ho sa hlokahale hore baholo ba Bakreste ba hlōlisane? (b) Ke hobane’ng ha 1 Petrose 4:10 e sebetsa ho bahlanka bohle ba Molimo?
8 Moea oo Bakreste ba lokelang ho ba le oona borapeling ba bona o hlalositsoe mantsoeng ana a bululetsoeng: “E mong le e mong a ke a leke seo mosebetsi oa hae o leng sona, joale o tla ba le sesosa sa thabo e khaphatsehang mabapi le eena a le mong, eseng ka ho ipapisa le motho e mong.” (Bagalata 6:4) Ha baholo ba phutheho ba tseba hore ha ba hlōlisane, baa momahana ebile ba sebelisana hantle joaloka sehlopha. Ba thabela seo e mong le e mong a se etsetsang boiketlo ba phutheho eohle. Kahoo ba qoba tlhōlisano e bakang likhaohano ’me ba behela phutheho eohle mohlala o motle oa bonngoe.
9 Ka lebaka la lilemo, phihlelo, kapa bokhoni ba tlhaho, baholo ba bang ba ka sebetsa hantle ho feta ba bang, kapa mohlomong ba ba le temohisiso e khōloanyane. Ka lebaka leo, baholo ba na le boikarabelo bo sa tšoaneng ka mokhatlong o hlophisitsoeng oa Jehova. Ho e-na le ho ipapisa, ba hopola keletso ena: “Ka tekanyo eo e mong le e mong a amohetseng mpho ka eona, le e sebelise ho sebeletsaneng joaloka batsamaisi ba khabane ba mosa o sa tšoanelang oa Molimo o bontšitsoeng ka litsela tse sa tšoaneng.” (1 Petrose 4:10) Ha e le hantle, temana ena e sebetsa ho bahlanka bohle ba Jehova, hobane ka tsela e itseng bohle ba filoe mpho ea tsebo e nepahetseng ’me bohle ba na le tokelo ea ho kopanela tšebeletsong ea Bokreste.
10. Ke ka tsela efe feela tšebeletso e halalelang eo re e etsetsang Jehova e ka amohelehang?
10 Tšebeletso ea rōna e halalelang e khahlisa Jehova hafeela re e etsa ka lerato le ka boinehelo, eseng ka lebaka la ho iphahamisetsa ba bang. Ka lebaka leo, ke habohlokoa hore re be le pono e leka-lekaneng ka mosebetsi oa rōna oa ho tšehetsa borapeli bo hloekileng. Le hoja ho se motho ea ka tsebang ka nepo sepheo sa e mong, Jehova ke eena “ea lekanyang lipelo.” (Liproverbia 24:12; 1 Samuele 16:7) Kahoo, nako le nako re lokela ho ipotsa, ‘Ebe ke etsa mesebetsi ea tumelo ka sepheo sefe?’—Pesaleme ea 24:3, 4; Matheu 5:8.
Pono e Loketseng ka Mosebetsi oa Rōna
11. Ke lipotso life tse mabapi le tšebeletso ea rōna tseo ho utloahalang hore re ka nahana ka tsona?
11 Haeba sepheo e le eona ntho ea bohlokoa haholo e le hore re amohelehe ho Jehova, ebe joale re lokela ho ameha hakae ka mesebetsi ea rōna ea tumelo? Hafeela re etsa tšebeletso ea rōna ka sepheo se nepahetseng, na ho hlile hoa hlokahala ho boloka tlaleho ea seo re se etsang kapa ea hore na re etsa se sekae? Lipotso tsena lia utloahala hobane ha re batle hore lipalo e be tsa bohlokoa ho feta mesebetsi ea tumelo kapa hore tlaleho e ntle e fetohe ntho e ka sehloohong mosebetsing oa rōna oa Bokreste.
12, 13. (a) Ebe mabaka a mang ao ka ’ona re bolokang tlaleho ea tšebeletso ea rōna ea tšimo ke afe? (b) Re na le mabaka afe a ho thaba ha re sheba tlaleho e akaretsang ea mosebetsi oa rōna oa boboleli?
12 Hlokomela se buuoang ke buka ea Ho Hlophisetsoa ho Etsa Thato ea Jehova: “Balateli ba pele ba Jesu Kreste ba ne ba thahasella litlaleho tsa kamoo mosebetsi oa boboleli o neng o hōla kateng. (Mar. 6:30) Buka ea Bibele ea Liketso e re bolella hore ho ne ho e-na le batho ba ka bang 120 ha moea o halalelang o ne o tšolleloa holim’a barutuoa ka Pentekonta. Ka potlako palo ea barutuoa e ile ea eketseha ’me ba e-ba 3 000, hamorao ba e-ba 5 000. . . . (Lik. 1:15; 2:5-11, 41, 47; 4:4; 6:7) E tlameha ebe litaba tsa keketseho ee li ile tsa khothatsa barutuoa hakaakang!” Ka lebaka lona leo, kajeno Lipaki Tsa Jehova li leka ho boloka litlaleho tse nepahetseng tsa se finyelloang lefatšeng lohle ha ho phethahatsoa mantsoe ana a Jesu: “Litaba tsena tse molemo tsa ’muso li tla boleloa lefatšeng lohle leo ho ahiloeng ho lona hore e be bopaki ho lichaba tsohle; joale e ntan’o ba hona bofelo bo tla tla.” (Matheu 24:14) Litlaleho tsena li fana ka mohlala oa sebele oa se etsoang lefatšeng lohle. Li bontša hore na thuso e hlokoa hokae le hore na e le hore mosebetsi oa boboleli o tsoele pele, ho hlokahala lingoliloeng tsa mofuta ofe le hona tse kae.
13 Kahoo, ho tlaleha mosebetsi oa rōna oa boboleli ho re thusa hore re atlehe haholoanyane ho phetha thōmo ea rōna ea ho bolela litaba tse molemo tsa ’Muso. Ntle ho moo, na ha re khothale ha re utloa ka mosebetsi oo barab’abo rōna ba o etsang likarolong tse ling tsa lefatše? Re thaba haholo ha re utloa litaba tsa khōlo le keketseho e etsahalang lefatšeng ka bophara, li re susumelletsa ho sebetsa haholo, ’me li re kholisa hore Jehova oa re hlohonolofatsa. Ka sebele hoa thabisa ho tseba hore litlaleho tsa rōna ka bomong li akarellelitsoe tlalehong eo ea lefatše lohle! Karolo ea rōna ka bomong e nyenyane ha e bapisoa le kakaretso ea tlaleho ea lefatše lohle, empa Jehova o e ela hloko. (Mareka 12:42, 43) U hopole hore ntle ho tlaleho ea hao, tlaleho e akaretsang e ne e ke ke ea fella.
14. Ntle ho ho bolela le ho ruta, borapeli ba rōna ho Jehova bo boetse bo akarelletsa eng?
14 Ha e le hantle, boholo ba seo Paki e ’ngoe le e ’ngoe e se etsang ho phetha boikarabelo ba eona joaloka mohlanka ea inehetseng oa Jehova, ha se bontšoe kaofela tlalehong ea eona. Ka mohlala, tlaleho ha e akareletse thuto ea botho ea kamehla ea Bibele, ho ba teng libokeng tsa Bokreste le ho nka karolo ho tsona, mesebetsi ea phutheho, ho thusa balumeli-’moho le uena ha ho hlokahala, ho tšehetsa mosebetsi oa ’Muso oa lefatše lohle ka lichelete le lintho tse ling. Kahoo, le hoja tlaleho ea rōna ea tšebeletso ea tšimo e le ea bohlokoa, ’me e re thusa hore re chesehele mosebetsi oa boboleli kamehla le hore re se ke ra khoehlisa, re lokela ho ba le pono e loketseng ka eona. Ha rea lokela ho nka hore e re etsa ba tšoanelehang moeeng kapa ba nang le tokelo ea ho fumana bophelo bo sa feleng.
“Chesehelang Mesebetsi e Metle”
15. Le hoja re ke ke ra pholosoa ke mesebetsi feela, ke hobane’ng ha e hlokahala?
15 Ho hlakile hore le hoja re ke ke ra pholosoa ke mesebetsi feela, ea hlokahala. Ke ka lebaka leo Bakreste ba bitsoang “sechaba seo ka ho khethehileng e leng sa hae, se chesehelang mesebetsi e metle” ba bileng ba khothalletsoang ho ‘nahanelana hore ba susumeletsane leratong le mesebetsing e metle.’ (Tite 2:14; Baheberu 10:24) Mongoli e mong oa Bibele, e leng Jakobo, o toba taba ka ho re: “Joalokaha ’mele o se nang moea o shoele, kahoo le tumelo e se nang mesebetsi e shoele.”—Jakobo 2:26.
16. Ntho ea bohlokoa le ho feta mesebetsi ke efe, empa re lokela ho ba hlokolosi ka eng?
16 Le hoja mesebetsi e metle ka boeona e ka ba ea bohlokoa, sepheo seo e etsoang ka sona ke sa bohlokoa haholoanyane. Kahoo, ho loketse hore nako le nako re hlahlobe sepheo sa rōna. Leha ho le joalo, kaha ha ho motho ea ka tsebang ka nepo sepheo sa batho ba bang, re lokela ho ba hlokolosi hore re se ke ra ba ahlola. Rea botsoa: “U mang hore u ahlole mohlanka oa ntlo oa e mong?” ’Me karabo ea eona e totobetseng ke ena: “Ho mong’a hae oa ema kapa oa oa.” (Baroma 14:4) Jehova, Monghali oa bohle, le Moahloli eo a mo khethileng, e leng Kreste Jesu, ha ba na ho re ahlola ka mesebetsi ea rōna feela empa ba tla re ahlola motheong oa sepheo sa rōna, menyetla ea rōna, lerato la rōna le boinehelo ba rōna. Ke Jehova le Kreste Jesu feela ba ka ahlolang ka nepo hore na ebe re entse seo Bakreste ba khothalletsoang ho se etsa mantsoeng ana a moapostola Pauluse: “Etsa sohle se matleng a hao ho itlhahisa u amoheleha ho Molimo, mosebetsi eo ho seng letho leo a ka hlajoang ke lihlong ka lona, ea tšoarang lentsoe la ’nete ka nepo.”—2 Timothea 2:15; 2 Petrose 1:10; 3:14.
17. Ha re ntse re leka ho etsa sohle seo re ka se khonang, ke hobane’ng ha re lokela ho hopola Jakobo 3:17?
17 Jehova o na le kahlolo e molemo ho seo a lebeletseng hore re se etse. Ho ea ka Jakobo 3:17, har’a lintho tse ling, “bohlale bo tsoang holimo . . . bo na le . . . kahlolo e molemo.” Na ha hoa lokela, hape na hase ketso e ntle e le kannete, hore re etsise Jehova ntlheng ee? Kahoo, ha rea lokela ho leka ho ikimetsa kapa ho imetsa barab’abo rōna ho sa hlokahale.
18. Re ka lebella eng ka thabo ha re e-na le pono e loketseng ka mesebetsi ea rōna le ka mosa o sa tšoanelang oa Jehova?
18 Hafeela re e-na le pono e loketseng ka mesebetsi ea rōna ea tumelo le ka mosa o sa tšoanelang oa Jehova, re tla ba le thabo eo e leng letšoao la bahlanka ba ’nete ba Jehova. (Esaia 65:13, 14) Ho sa tsotellehe hore na ke eng seo re ka se etsang re le motho ka mong, re ka thabela mahlohonolo ao Jehova a a tšollelang batho ba hae ka kakaretso. Ha re ntse re tsoela pele ka “thapelo le thapeli hammoho le liteboho,” re tla kōpa Molimo ka tieo hore a re thuse hore re etse sohle seo re ka se khonang. Joale, ha ho pelaelo hore, “khotso ea Molimo e fetang monahano oohle e tla lebela lipelo tsa [rōna] le matla a [rōna] a kelello ka Kreste Jesu.” (Bafilipi 4:4-7) Ka sebele re ka tšelisoa le ho khothatsoa ke ho tseba hore re ke ke ra pholosoa ke mesebetsi feela, empa re ka pholosoa ka mosa o sa tšoanelang oa Jehova!
Na U ka Hlalosa Hore na ke Hobane’ng ha Bakreste
• ba sa ithorise ka lintho tseo motho ka mong a li finyellang?
• ba qoba ho bontša moea oa tlhōlisano?
• ba tlaleha mosebetsi oa Bokreste oo ba o etsang tšebeletsong ea tšimo?
• ba qoba ho ahlola Bakreste-’moho le bona?
[Setšoantšo se leqepheng la 15]
“Mosa oa ka o sa tšoanelang o u lekane”
[Litšoantšo tse leqepheng la 16, 17]
Baholo ba thabela seo e mong le e mong a se etsetsang boiketlo ba phutheho
[Litšoantšo tse leqepheng la 18, 19]
Ntle ho tlaleho ea hao, tlaleho e akaretsang e ne e ke ke ea fella