Tsoela Pele “ho Etsa se Setle”
1 U ile ua etsa ntho e ntle ha u e-ba mohlanka oa Jehova Molimo. Leha ho le joalo, hona joale phephetso ke ho tsoela pele “ho etsa se setle” linakong tsena tse mahlonoko. (Bagal. 6:9) Le hoja sena se hloka boiteko ba sebele, u ka ho etsa. Joang?
2 Hlaolela Boikutlo ba Kelello ba Jesu: U ka mamella liteko joaloka Jesu haeba u lula u tsepamisitse mohopolo tšepong ea ’Muso. (Baheb. 12:2, 3) Kholiseha hore Jehova oa u rata le hore o batla hore u atlehe. (2 Pet. 3:9) Mo tšepe ka ho feletseng, u kholisehe hore o tla u thusa. (1 Bakor. 10:13) Phehella thapelong, u kōpe Jehova hore a u thuse ho mamella. (Bar. 12:12) Thaba ka kholiseho ea hore mamello ea hao e tla etsa hore u be le boemo bo amohelehang mahlong a Molimo. (Bar. 5:3-5) Ho tšepahalla ha hao ho hlaolela “boikutlo ba kelello bo tšoanang le boo Kreste Jesu a neng a e-na le bona” ho tla u tlisetsa khotsofalo ’me ho thabise pelo ea Jehova.—Bar. 15:5; Liprov. 27:11.
3 Tsoela Pele ho Etsa Lintho Tse Nepahetseng: Sebelisa ka botlalo monyetla oa litokisetso tseo Jehova a li etselitseng batho ba hae ho ba thusa hore ba tsoele pele ho etsa se setle. E-ba le kemiso e ntle ea ho ipalla Lentsoe la Molimo le ho ithuta lingoliloeng tse thehiloeng Bibeleng tsa sehlopha sa lekhoba le tšepahalang le le masene. Tšepahalla ho lokisetsa, ho ba teng libokeng tsohle tsa phutheho le ho ba le seabo ho tsona. Pele le ka mor’a liboka tsa Bokreste, tloaelana haufi-ufi le bara le barali beno ba moea. Ipehele lipakane tsa sebele tšebeletsong e le hore u ka kopanela ka tsela e nang le morero tšebeletsong ea tšimo le ho ntlafatsa tsebo ea hao ea ho nehelana ka litaba tse molemo ho ba bang.
4 Ena ke tsela eo ka eona u ka tsoelang pele ho etsa se setle le ho ba le thabo e khōlō ka nako e tšoanang. Tabeng ena, mor’abo rōna e mong Italy o ile a re: “Ha shoalane e tšoara, ’me ke khutlela hae ka mor’a letsatsi ke le tšebeletsong ea Jehova, ke ’nete hore ke ikutloa ke khathetse. Empa ke thabile, ’me ke leboha Jehova hore ebe o mphile thabo eo ho seng ea ka nkamohang eona.” Ka lebaka leo, tsoela pele ho etsa se setle ’me le uena u tla ba le thabo e khōlō.