E le Hore U Hape Moputso, Sebelisa Boitšoaro!
“Monna e mong le e mong ea nkang karolo tlhōlisanong o sebelisa boitšoaro linthong tsohle.”—1 BAKORINTHE 9:25.
1. Tumellanong le Baefese 4:22-24, ba limilione ba bontšitse joang hore ba lumela ho etsa thato ea Jehova?
HAEBA u ile ua kolobetsoa u le e mong oa Lipaki Tsa Jehova, u ile ua bolela phatlalatsa hore u ne u ikemiselitse ho kena tlhōlisanong eo moputso oa eona e leng bophelo bo sa feleng. U ile ua lumela hore u tla etsa thato ea Jehova. Pele re inehela ho Jehova, boholo ba rōna re ile ra tlameha ho etsa liphetoho tse khōlō e le hore boinehelo ba rōna bo ka amoheleha e le kannete ho Molimo. Re ile ra latela keletso ea moapostola Pauluse ho Bakreste e reng: “Le lahle botho ba khale bo lumellanang le tsela ea lōna ea pele ea boitšoaro le bo ntseng bo bolisoa ho ea ka litakatso tsa bona tse thetsang . . . Le apare botho bo bocha bo ileng ba bōptjoa ho ea ka thato ea Molimo ho lokeng ha ’nete le botšepehing.” (Baefese 4:22-24) Ka mantsoe a mang, pele re lumela hore re inehela ho Molimo, re ile ra tlameha ho lahla tsela e sa amoheleheng eo re neng re phela ka eona pele.
2, 3. Bakorinthe ba Pele 6:9-12 e bontša joang hore ho na le mefuta e ’meli ea liphetoho eo motho a lokelang ho e etsa hore a amoheloe ke Molimo?
2 Litšobotsi tse itseng tsa botho ba khale tseo bao e tla ba Lipaki Tsa Jehova ba lokelang ho li tlohela, li nyatsoa ka ho toba ka Lentsoeng la Molimo. Pauluse o ile a thathamisa tse ling lengolong la hae le eang ho Bakorinthe, a re: “Leha e le lihlola, kapa barapeli ba litšoantšo, kapa bafebi, kapa banna ba boloketsoeng merero eo e seng ea tlhaho, kapa banna ba robalang le banna, kapa masholu, kapa batho ba meharo, kapa matahoa, kapa ba litlhapa, kapa bahanyapetsi ba ke ke ba rua ’muso oa Molimo.” Ka mor’a moo o ile a bontša hore Bakreste ba lekholong la pele la lilemo ba ile ba fetola botho ba bona kamoo ho neng ho hlokahala kateng, a eketsa ka ho re: “Leha ho le joalo ke seo ba bang ba lōna ba neng ba le sona.” Hlokomela hore ho thoe, ba neng, eseng, ba leng.—1 Bakorinthe 6:9-11.
3 Pauluse o ile a bolela hore ho ka ’na ha hlokahala liphetoho tse eketsehileng, hobane o ile a tsoela pele a re: “Lintho tsohle li lumelloa ke molao bakeng sa ka; empa hase lintho tsohle tse molemo.” (1 Bakorinthe 6:12) Kahoo, batho ba bangata kajeno ba lakatsang ho ba Lipaki Tsa Jehova ba bona bohlokoa ba ho hana esita le lintho tseo le hoja li lumelloa ke molao, li se nang molemo kapa e le tsa molemo oa nakoana feela. Lintho tsena li ka ’na tsa ja nako ’me tsa ba sitisa ho hahamalla lintho tsa bohlokoa haholo.
4. Bakreste ba inehetseng ba lumellana le Pauluse ka eng?
4 Ho inehela ho Molimo ho etsoa ka ho rata, eseng ka ho qobelloa, eseng joalokaha eka ho ameha ho etsa sehlabelo se seholohali. Bakreste ba inehetseng ba lumellana le Pauluse, eo ka mor’a ho ba molateli oa Kreste a ileng a re: “Ka lebaka la [Jesu] ke amohetse tahlehelo ea lintho tsohle ’me ke li nka e le lithōle tse ngata, e le hore nka rua Kreste.” (Bafilipi 3:8) Ka boithatelo Pauluse o ile a hana lintho tseo e seng tsa bohlokoa hakaalo e le hore a ka tsoela pele ho lumela ho etsa thato ea Molimo.
5. Pauluse o ile a matha lebelong la mofuta ofe ka katleho, ’me re ka mo etsisa joang?
5 Pauluse o ile a sebelisa boitšoaro ha a ntse a matha peisong ea hae ea moea ’me qetellong o ile a khona ho re: “Ke loanne ntoa e ntle, ke mathile tseleng ea peiso ho fihlela qetellong, ke bolokile tumelo. Ho tloha nakong ena ho ea pele ke boloketsoe moqhaka oa ho loka, oo Morena, moahloli ea lokileng, a tla ’neha oona e le moputso ka letsatsi leo, empa leha ho le joalo eseng ’na feela, empa le bohle ba ratileng ponahalo ea hae.” (2 Timothea 4:7, 8) Na ka letsatsi le leng le rōna re tla khona ho bua joalo? Re tla khona haeba ka tumelo re sebelisa boitšoaro ha re ntse re matha peisong ea rōna ea Bokreste re sa khathale ho fihlela qetellong.
E le Hore re Etse se Molemo, ho Hlokahala Boitšoaro
6. Boitšoaro ke eng, ’me re ka bo sebelisa ka litsela life tse peli?
6 Mantsoe a Seheberu le Segerike a fetoletsoeng e le “boitšoaro” ka Bibeleng ka ho toba a bolela hore motho o na le matla kapa bokhoni ba ho itšoara. Hangata a fetisa maikutlo a hore motho o khona ho ithiba hore a se ke a etsa ntho e mpe. Empa ho hlakile hore ho boetse ho hlokahala boitšoaro ka tekanyo e itseng haeba re tla sebelisa ’mele ea rōna ho etsa mesebetsi e molemo. Ka tlhaho batho ba sa phethahalang ba tloaetse ho etsa se sebe, kahoo re loana ntoa ea mefuta e ’meli. (Moeklesia 7:29; 8:11) Ha re ntse re ithiba hore re se ke ra etsa se sebe, re boetse re lokela ho iqobella ho etsa se molemo. Ha e le hantle, ho laola ’mele ea rōna hore re etse se molemo ke e ’ngoe ea litsela tse ntlehali tsa ho qoba ho etsa se sebe.
7. (a) Re lokela ho rapella eng joaloka Davida? (b) Ke ho thuisa ka eng ho tla re thusa ho sebelisa boitšoaro haholoanyane?
7 Ho hlakile hore boitšoaro ke ba bohlokoa haeba re tla phelela boinehelo ba rōna ho Molimo ho fihlela qetellong. Re lokela ho rapela joaloka Davida ea ileng a re: “Molimo, bōpa ka ho ’na pelo e hloekileng, u kenye ka ho ’na moea o mocha, o tiileng.” (Pesaleme ea 51:10) Re ka thuisa ka melemo ea ho qoba lintho tsa boitšoaro bo fosahetseng kapa tse fokolisang nameng. Nahana ka liphello tse sa lakatseheng tse ka ’nang tsa hlahisoa ke ho se qobe lintho tse joalo: e leng mathata a tebileng a ho kula, ho senyeha ha likamano esita le ho shoa kapele. Ka lehlakoreng le leng, nahana ka melemo e mengata e tlisoang ke ho khomarela tsela ea bophelo eo Jehova a laelang hore re phele ka eona. Leha ho le joalo, kaha ha re iphapanyetse ’nete, ha rea lokela ho lebala hore lipelo tsa rōna li bolotsana. (Jeremia 17:9) Re lokela ho ikemisetsa ka tieo ho hanyetsa lipelo tsa rōna ha li leka ho nyenyefatsa botebo ba ho tšehetsa litekanyetso tsa Jehova.
8. Hantle-ntle phihlelo e re ruta eng? Etsa mohlala.
8 Boholo ba rōna re tseba ka phihlelo hore nama e monyebe hangata e tapisa moea o chesehang. Nka ka mohlala mosebetsi oa ho bolela ka ’Muso. Jehova o thabela ha batho ba ithaopela ho kopanela mosebetsing ona o fanang ka bophelo. (Pesaleme ea 110:3; Matheu 24:14) Ha hoa ka ha e-ba bonolo ho ba bangata ba rōna ho ithuta ho paka phatlalatsa. Ho ile ha hlokahala—’me mohlomong ho ntse ho hlokahala—hore re laole ’mele ea rōna, re e ‘teteke’ ’me re e ‘tšoare joaloka makhoba,’ ho e-na le ho e lumella hore e re laele hore re se ke ra bolela.—1 Bakorinthe 9:16, 27; 1 Bathesalonika 2:2.
“Linthong Tsohle”?
9, 10. Ho sebelisa “boitšoaro linthong tsohle” ho akarelletsa eng?
9 Keletso ea Bibele ea ho sebelisa “boitšoaro linthong tsohle” e bontša hore sena ha se akarelletse feela ho laola bohale le ho ithiba boitšoarong bo bobe. Re ka ’na ra nahana hore re se re atlehile ho sebelisa boitšoaro linthong tsena, ’me haeba ho joalo, ka sebele re ka thaba. Leha ho le joalo, ho thoe’ng ka likarolo tse ling tsa bophelo tseo e ka ’nang eaba ha hoa hlaka hantle hore ho hlokahala boitšoaro ho tsona? Ka mohlala, ha re re motho o lula naheng e batlang e ruile ’me mokhoa oa bophelo oa moo e le o phahameng. Na ho ne ho ke ke ha e-ba bohlale ho ithuta ho qoba ho kena litšenyehelong tse sa hlokahaleng? Batsoali ba lokela ho ruta bana ba bona ho se reke ntho e ’ngoe le e ’ngoe eo ba e bonang hobane feela e le teng, e rateha, kapa ba e-na le chelete ea ho e reka. ’Nete ke hore, haeba thuto e joalo e tla sebetsa, batsoali ba lokela ho beha mohlala o motle.—Luka 10:38-42.
10 Ho ithuta ho phela ka ntle ho ntho e itseng ho ka matlafatsa boikemisetso ba rōna. Ho ka boela ha eketsa kananelo ea rōna bakeng sa lintho tse bonahalang tseo re nang le tsona ’me ha etsa hore re qenehele haholoanyane ba se nang tsona, eseng ka hobane ba rata, empa e le hobane ba li hloka. Ke ’nete hore tsela ea bophelo e itekanetseng e khahlanong le lipuo tse atileng tse kang “u itšotlela’ng” kapa “molomo oa ketlele o sa u shebile.” Baphatlalatsi ba khothalletsa takatso ea ho ikhotsofatsa hang-hang, empa ba etsa seo e le hore ba ithuise. Boemo bona bo ka ’na ba sitisa boiteko ba rōna ba ho bontša boitšoaro. Makasine o mong oa naha e ’ngoe e ruileng ea Europe morao tjena o ile oa re: “Haeba ho laola litšekamelo tse sa rateheng ho hloka hore batho ba phelang tlas’a maemo a bohloko a bofutsana bo feteletseng ba loane le maikutlo a bona, hona ke ’nete hakaakang ho batho ba phelang linaheng tse phallang lebese le mahe a linotši lichabeng tsa kajeno tse ruileng!”
11. Ke hobane’ng ha ho ithuta ho phela ntle le lintho tse itseng e le habohlokoa, empa ke eng se etsang hore ho be thata ho etsa see?
11 Haeba re thatafalloa ke ho khetholla ntho eo re e batlang ho eo ka sebele re e hlokang, re ka ’na ra thusoa ke ho nka mehato ea ho netefatsa hore ha re etse lintho ka mokhoa o hlokang boikarabelo. Ka mohlala, haeba re lakatsa ho hlōla tloaelo ea ho reka feela re sa lekanyetse, re ka ’na ra ikemisetsa hore re se ke ra reka ka sekoloto, kapa ha re e-ea mabenkeleng, re nke feela chelete e lekaneng seo re se hlokang. Hopola hore Pauluse o itse “boinehelo . . . ba bomolimo hammoho le ho khotsofala” ke “mokhoa oa ho rua ho hoholo.” O ile a beha lebaka la ho re: “Ha rea tlisa letho lefatšeng, leha e le hore re ka tloha le letho. Kahoo, ha re e-na le lintho tsa ho iphelisa le liaparo le tšireletso, re tla li khotsofalla.” (1 Timothea 6:6-8) Na re khotsofetse? Ho ithuta ho phela bophelo bo bonolo le bo se nang litšitiso tse bakoang ke ho ikhotsofatsa ho tlōla—ka tsela ea mofuta ofe kapa ofe—ho hloka boikemisetso le boitšoaro. Leha ho le joalo, ke thuto eo re lokelang ho ithuta eona.
12, 13. (a) Ke ka litsela life liboka tsa Bokreste li hlokang hore re be le boitšoaro? (b) Ke lintlheng life tse ling tseo ho tsona re lokelang ho sebeletsa ho ba le boitšoaro?
12 Ho ba teng libokeng tsa Bokreste, likopanong tse nyenyane le tse khōlō le hona ho hloka hore re bontše boitšoaro ka tsela e itseng. Ka mohlala, e le hore likelello tsa rōna li se ke tsa lelera nakong ea lenaneo, boitšoaro boa hlokahala. (Liproverbia 1:5) Ho ka ’na ha hloka boitšoaro hore re se ke ra sitisa ba bang ka ho hoesheletsa ba lutseng haufi le rōna ebe ha re mamele sebui ka hloko. Ho hlophisa kemiso ea rōna e le hore re ka fihla ka nako ho ka ’na ha hloka boitšoaro. Ho feta moo, ho ka ’na ha hlokahala boitšoaro e le hore re behelle ka thōko nako ea ho lokisetsa liboka le ho nka karolo ho tsona.
13 Ho sebelisa boitšoaro linthong tse nyenyane ho matlafatsa bokhoni ba rōna ba ho etsa joalo litabeng tse khōlō. (Luka 16:10) Kahoo, ho hotle hakaakang hore re itaee hore re bale Lentsoe la Molimo le likhatiso tsa Bibele kamehla, re ithute tsona le ho thuisa ka seo re ithutang sona! Ho bohlale hakaakang hore re itaee tabeng ea mesebetsi, setsoalle, boikutlo le mekhoa e sa lokelang, kapa re itaee ho hana mesebetsi e ka re jellang nako ea bohlokoa ea ho etsa mosebetsi oa Molimo! Ho ba maphathaphathe tšebeletsong ea Jehova ka sebele ke tšireletso e molemo linthong tse ka ’nang tsa re suthisetsa hōle le paradeise ea moea ea phutheho ea Jehova ea lefatše ka bophara.
E-bang ba Hōlileng ka ho Feletseng ka ho ba le Boitšoaro
14. (a) Bana ba lokela ho ithuta ho sebelisa boitšoaro joang? (b) Ho ka ba le melemo efe ha bana ba ithuta lintho tse joalo ba sa le banyenyane?
14 Lesea le sa tsoa hlaha ha le tsejoe le e-na le boitšoaro. Pampitšana e ngotsoeng ke litsebi tsa boitšoaro ba bana e fana ka tlhaloso ena: “Boitšoaro ha bo itlise kapa hona ho etsahala ka tšohanyetso. Masea le bana ba hloka hore batsoali ba ba tataise le ho ba tšehetsa e le hore ba qale ho ithuta boitšoaro. . . . Ha batsoali ba ntse ba ba tataisa, ba ba le boitšoaro haholoanyane lilemong tsa ha ba ntse ba kena sekolo.” Phuputsong e ileng ea etsoa baneng ba nang le lilemo tse ’nè, ho ile ha fumanoa hore ba neng ba ithutile ho sebelisa boitšoaro ka tekanyo e itseng “ka kakaretso ha ba hōla e ba bacha ba hlaphohetsoeng hamolemonyana kelellong, ba ratoang, ba nang le tjantjello, ba sebete le ba ka tšeptjoang haholoanyane.” Ba neng ba e-s’o qale ho ithuta boitšoaro, “ho ne ho ka etsahala hore ba hlore, ba ferekane habonolo hape ba be manganga. Ba ile ba sekisetsa ha ho le boima ’me ba balehela mathata.” Ho hlakile hore e le hore ngoana e tle e be motho e moholo ea hlaphohetsoeng kelellong, o lokela ho ithuta ho sebelisa boitšoaro.
15. Ho haelloa ke boitšoaro ho bontša eng, ha ho bapisoa le pakane e boletsoeng ka Bibeleng?
15 Ka tsela e tšoanang, haeba re batla ho ba Bakreste ba hōlileng ka ho feletseng re lokela ho ithuta ho bonahatsa boitšoaro. Haeba bo haella, ho bontša hore re sa ntse re le bana moeeng. Bibele e re khothaletsa ho ba “ba hōlileng ka ho feletseng matleng a kutloisiso.” (1 Bakorinthe 14:20) Pakane ea rōna ke hore re ‘fihlele bonngoe tumelong le tsebong e nepahetseng ea Mora oa Molimo, ho isa ho monna ea hōlileng ka ho feletseng, ho isa tekanyong ea boholo ba botlalo ba Kreste.’ Hobane’ng? “E le hore re se ke ra hlola re e-ba bana, ba akhotsoang joalokaha eka ba akhotsoa ke maqhubu ’me ba isoa koana le koana ke moea o mong le o mong oa thuto ka ho qhekella ha batho, ka mano a ho qapa phoso.” (Baefese 4:13, 14) Ho hlakile hore ho ithuta ho sebelisa boitšoaro ke ntho ea bohlokoa bomoeeng ba rōna.
Ho Sebeletsa ho ba le Boitšoaro
16. Jehova o fana ka thuso joang?
16 E le hore re sebeletse ho ba le boitšoaro, re hloka thuso ea Molimo, ’me ea fumaneha. Lentsoe la Molimo joaloka seipone se phethahetseng, le re bontša hore na re lokela ho etsa liphetoho hokae ’me le fana ka keletso ea hore na seo se ka etsoa joang. (Jakobo 1:22-25) Mokhatlo oa bara ba motho le oona o ikemiselitse ho re thusa. Baholo ba Bakreste ba bontša kutloisiso ha ba fana ka thuso. Jehova ka boeena o fana ka moea oa hae o halalelang ka bolokolohi haeba re o kōpa ka thapelo. (Luka 11:13; Baroma 8:26) Kahoo, a re thabeleng ho sebelisa litokisetso tsena. Litlhahiso tse leqepheng la 21 li ka thusa.
17. Liproverbia 24:16 e re fa khothatso efe?
17 Ho tšelisa hakaakang ho tseba hore Jehova o nka boiteko ba rōna e le ba bohlokoa ha re leka ho mo khahlisa! Sena se lokela ho re susumelletsa hore re tsoele pele ho loanela ho bontša boitšoaro haholoanyane. Ho sa tsotellehe hore na re ka khoptjoa hangata hakae, le ka mohla ha rea lokela ho tlohela ho etsa boiteko. “Ea lokileng a ka ’na a oa esita le ka makhetlo a supileng, ’me ka sebele o tla ema.” (Liproverbia 24:16) Nako le nako ha re atleha, re na le lebaka la ho thaba. Hape re ka kholiseha hore re thabisitse Jehova. Mor’abo rōna e mong o bolela hore pele a nehela bophelo ba hae ho Jehova, nako le nako ha a ne a atlehile ho qeta beke a sa tsube o ne a iputsa ka ho ithekela ntho e ’ngoe e molemo ka chelete eo boitšoaro bo neng bo mo thusitse hore a e boloke.
18. (a) Ho ameha eng ntoeng ea rōna ea boitšoaro? (b) Jehova o re fa kholiseho efe?
18 Ka holim’a tsohle re lokela ho hopola hore boitšoaro bo ama kelello le maikutlo. Sena re ka se bona mantsoeng a Jesu a reng: “E mong le e mong ea ntseng a tsoela pele ho sheba mosali e le hore a be le takatso e matla bakeng sa hae o se a febile le eena ka pelong ea hae.” (Matheu 5:28; Jakobo 1:14, 15) Motho ea ithutileng ho laola kelello ea hae le maikutlo o tla nolofalloa ho laola ’mele oohle oa hae. Kahoo, a re matlafatseng boikemisetso ba rōna ba hore re se ke ra qoba ho etsa se sebe feela empa re qobe le ho nahana ka sona. Haeba u ka ba le menahano e fosahetseng, e qhele ka potlako. Re ka balehela moleko ka hore ka thapelo mahlo a rōna a lule a tsepamisitsoe ho Jesu. (1 Timothea 6:11; 2 Timothea 2:22; Baheberu 4:15, 16) Ha re ntse re etsa sohle seo re ka se khonang, re tla be re latela keletso e ho Pesaleme ea 55:22 e reng: “Lahlela moroalo oa hao ho Jehova, o tla o tšehetsa. Le ka mohla a ke ke a lumella ea lokileng hore a therekele.”
Na Ua Hopola?
• Re lokela ho sebelisa boitšoaro ka litsela life tse peli?
• Ho sebelisa “boitšoaro linthong tsohle” bo bolela eng?
• Ke litlhahiso life tse sebetsang tsa ho sebeletsa ho ba le boitšoaro tseo u li hlokometseng ka ho khethehileng thutong ea rōna?
• Boitšoaro bo qala hokae?
[Lebokose/Litšoantšo tse leqepheng la 21]
Kamoo re ka Matlafatsang Boitšoaro Kateng
• Sebeletsa ho ba le bona esita le linthong tse nyenyane
• Thuisa ka melemo ea bona ea hona joale le ea nakong e tlang
• Nkela lintho tseo Molimo a li hanelang sebaka ka tseo a li khothalletsang
• Qhela menahano e sa lokang ka potlako
• Tlatsa kelello ea hao ka menahano e hahang moeeng
• Amohela thuso eo Bakreste-’moho le uena ba hōlileng tsebong ba ka fanang ka eona
• Qoba maemo a ka etsang hore u lekehe
• Rapella thuso ea Molimo linakong tsa meleko
[Litšoantšo tse leqepheng la 18, 19]
Boitšoaro bo re susumelletsa ho etsa se molemo