Tšepa Jehova le Lentsoe la Hae

“Ba tsebang lebitso la hao ba itšepisa ka uena.”—PESALEME EA 9:10.

 1. Ke hobane’ng ha re sa ntse re ka tšepela ho Jehova le Lentsoe la hae mehleng ea rōna ea kajeno?

LEFATŠENG lena la kajeno, memo ea ho tšepa Molimo le Lentsoe la hae, Bibele, e ka ’na ea bonahala e le e sa sebetseng ebile e se ea sebele. Empa, bohlale ba Molimo bo ipakile e le ba ’nete bo bile bo sebetsa ka nako e telele. ’Mōpi oa monna le mosali ke Moqapi oa lenyalo le lelapa, ’me o tseba seo re se hlokang hamolemo ho feta mang kapa mang. Feela joalokaha litlhoko tsa batho tsa motheo li sa fetoha, ka hona litsela tse ka sehloohong tsa ho khahlametsa litlhoko tseo ha lia fetoha. Keletso ea Bibele e bohlale, le hoja e ngotsoe lilemong tse makholo tse fetileng, e ntse e fana ka tataiso e molemo ka ho fetisisa bakeng sa ho atleha bophelong le ho rarolleng mathata. Ho e latela ho fella ka thabo e khōlō—esita le lefatšeng le rarahaneng, la saense leo re phelang ho lona!

 2. (a) Ho utloa litaelo tsa Molimo ho hlahisitse litholoana life tse ntle bophelong ba batho ba Jehova? (b) Jehova o tšepisa ba ikokobeletsang eena le Lentsoe la hae eng e eketsehileng?

² Ho tšepa Jehova le ho sebelisa melao-motheo ea Bibele ho tlisa melemo e sebetsang letsatsi le leng le le leng. Bopaki ba sena bo bonahala bophelong ba Lipaki tsa Jehova tse limilione ho pota lefatše tse bileng le kholiseho le sebete sa ho sebelisa keletso ea Bibele. Ho tsona, ho tšepa ’Mōpi le Lentsoe la hae ho ipakile e le ho loketseng. (Pesaleme ea 9:9, 10) Ho utloa litaelo tsa Molimo ho entse hore e be batho ba molemo tabeng ea bohloeki, botšepehi, mahlaha-hlaha, ho hlompha bophelo le thepa ea ba bang, le ho ba ba itekanetseng lijong le linong. Sena se felletse ka lerato le koetliso e loketseng lapeng—ho amohela baeti ka mofuthu, ho ba le mamello, ho ba mohau le ho tšoarela—esita le lintho tse ling tse ngata. Ka tekanyo e khōlō ba khonne ho qoba litholoana tse mpe tsa bohale, lehloeo, ho bolaea, mohono, tšabo, botsoa, boikhohomoso, leshano, ho etselletsa, boitšoaro bo hlephileng ba botona le botšehali le litšila. (Pesaleme ea 32:10) Empa Molimo o etsa se fetang ho tšepisa ba bolokang melao ea hae phello e molemo. Jesu o boletse hore ba latelang tsela ea Bokreste ba ne ba tla fumana ‘halekholo, joale, mehleng ena bo-’m’a bona, le bana, le masimo, hammoho le lihloriso; ’me mehleng e tla tla, ba neoe bophelo bo sa feleng.’—Mareka 10:29, 30.

Qoba ho Tšepa Bohlale ba Lefatše

 3. Bakreste ba talimana le mathata afe ka linako tse ling ha ba tsoela pele ho tšepa Jehova le Lentsoe la hae?

³ Bothata ba batho ba sa phethahalang ke hore ba sekamela ho nyenyefatsa kapa ho lebala seo Molimo a se batlang. Ho bonolo hore ba qale ho nahana hore ba tseba hamolemohali kapa hore bohlale bo tsoang ho barutehi ba lefatše lena bo phahametse ba Molimo, hore bo nakong haholoanyane. Bahlanka ba Molimo le bona ba ka hōlisa boikutlo bona, kaha ba phela lefatšeng lena. Kahoo, ha Ntate oa rōna oa leholimo a re mema hore re mamele keletso ea hae, o kenyeletsa le litemoso tse loketseng: “Mora oa ka, u se ke ua lebala thuto tsa ka, pelo ea hao e ke e boloke likeletso tsa me; ’me u tla ekelletsoa ke tsona litšiu, le lilemo, le ho phela, le khotso. U tšepe Jehova ka pelo ea hao eohle, u se ke ua itšepa hlalefo ea hao. U mo kenye mererong ea hao eohle, ’me o tla u tsamaisa litseleng tsohle tsa hao. U se ke ua ipona bohlale. Tšaba Jehova, u sesefe bobe.”—Liproverbia 3:1, 2, 5-7.

 4. “Bohlale ba lefatše lena” bo namme hakae, hona ke hobane’ng ha e le “bohlanya pel’a Molimo”?

⁴ Bohlale ba lefatše lena bo bongata ’me bo tsoa mehloling e mengata. Ho na le litsi tse ngata tsa thuto, ’me ‘libuka, tse ngata tse etsoang ha li fele.’ (Moeklesia 12:12) Hona joale seo ho thoeng ke tsamaiso ea boitsebiso bo fapanyetsanoang ka lik’homputha se tšepisa ho fana ka boitsebiso bo sa lekanyetsoang tabeng efe kapa efe. Empa ho ba le tsebo ena eohle ha ho etse hore lefatše le be bohlale haholoanyane kapa hore le rarolle mathata a lona. Ho e-na le hoo, boemo ba lefatše bo mpefala letsatsi le letsatsi. Ka ho utloahalang, Bibele e re bolella hore “bohlale ba lefatše lena ke bohlanya pel’a Molimo.”—1 Ba-Korinthe 3:19, 20.

 5. Bibele e fana ka litemoso life mabapi le “bohlale ba lefatše lena”?

⁵ Karolong ena ea ho qetela ea mehla ea qetello, ho ka lebelloa feela hore mothetsi ea ka sehloohong, Satane Diabolose, o tla qala mashano a mangata haholo ha a leka ho fokolisa tšepo bonneteng ba Bibele. Bahlahlobisisi ba Bibele ba hlahisitse libuka tse atang ka potlako tsa khopolo-taba tse phephetsang bonnete le botšepehi ba Bibele. Pauluse o ile a lemosa Mokreste-’moho le eena: “Oho Timothea, boloka hle se beiloeng kalosong ea hao, u tšabe lipolelo tsa lefeela, tsa bonyefoli, le liphapang tsa tsebo e bitsoang joalo ka leshano; eo ba bang, ka ho e lumela, ba khelohileng tumelo.” (1 Timothea 6:20, 21) Bibele e tsoela pele ho lemosa: “Itebeleng, motho a se ke a le hulanya ka bohlale ba batho le ka mashano a lefeela, ka ho ea ka lithuto tsee batho ba neanang tsona, ka ho latela litaba tsa qalo tsa lefatše, e seng Kreste.”—Ba-Kolosse 2:8.

Loantša Tšekamelo ea ho Belaela

 6. Ke hobane’ng ha ho ba seli ho hlokahala bakeng sa ho thibela lipelaelo ho mela ka metso pelong?

⁶ Leqheka le leng le bolotsana la Diabolose ke ho jala lipelaelo ka kelellong. O lutse a falimehetse ho bona bofokoli bo itseng tumelong ebe oa bo sebelisa. Mang le mang ea bang le lipelaelo o lokela ho hopola hore mohloli oa lipelaelo tse joalo ke ea ileng a re ho Eva: “A efela Molimo o itse: Le se ke la ja lifate tsohle tsa tšimo na?” Hang ha Moleki a jalile pelaelo kelellong ea hae, bohato bo latelang e ile ea e-ba ba ho mo bolella leshano, leo a ileng a le kholoa. (Genese 3:1, 4, 5) Ho qoba hore tumelo ea rōna e senngoe ke ho belaela joaloka ea Eva, ho hlokahala hore re be seli. Haeba tlhase ea ho belaela ka Jehova, Lentsoe la hae kapa mokhatlo oa hae o hlophisitsoeng e qalile ho hanella ka pelong ea hao, nka bohato bo potlakileng ba ho e felisa pele e hōla ’me e e-ba ntho e ka senyang tumelo ea hao.—Bapisa le 1 Ba-Korinthe 10:12.

 7. Ho ka etsoa eng ho felisa lipelaelo?

⁷ Ho ka etsoa’ng? Le mona, karabo ke ho tšepa Jehova le Lentsoe la hae. ‘Ha e mong ho lōna a hloka bohlale, a bo kōpe ho Molimo, o sitsang bohle ka phano e khōlō, o se na ho khanana, ’me o tla bo neoa. Feela, a kōpe ka tumelo, a se ke a lika-lika; hobane motho ea lika-likang o joalo ka leqhubu la leoatle le tsukutloang, le akheloang hohle ke moea.’ (Jakobo 1:5, 6; 2 Petrose 3:17, 18) Ka hona thapelo e tiileng ho Jehova ke bohato ba pele. (Pesaleme ea 62:8) Joale, u se ke ua qea-qea ho kōpa thuso ho balebeli ba lerato ka phuthehong. (Liketso 20:28; Jakobo 5:14, 15; Juda 22) Ba tla u thusa ho fumana mohloli oa lipelaelo tsa hao, tseo e ka ’nang eaba li bakoa ke boikhohomoso kapa monahano o itseng o fosahetseng.

 8. Monahano oa bokoenehi o atisa ho qaleha joang, ’me pheko ke efe?

⁸ Na ho bala kapa ho mamela likhopolo tsa bokoenehi kapa filosofi ea lefatše ho hlahisitse lipelaelo tse kotsi? Ka bohlale, Bibele ea eletsa: “U tiee matla ho iketsa ea lumelehang ho Molimo, mosebeletsi ea se nang ho nyatsuoa, ea rutang lentsoe la ’nete ka ho loka. U hane mesoaso ea lipolelo tsa lefeela; hobane ba tsamaeang ka tsona ba tla ’ne ba fetele nyefolong e fetisang; ’me litaba tsa bona li tla tsoela pele joalo ka seso se kekang.” (2 Timothea 2:15-17) Hoa thahasellisa hore ebe ba bangata ba khelositsoeng ke bokoenehi ba ile ba qalisa tseleng e fosahetseng ka hore qalong ba belaele ka tsela eo ba ileng ba ikutloa hore ba tšoeroe ka eona mokhatlong o hlophisitsoeng oa Jehova. (Juda 16) Ho fumana liphoso litumelong ho ile ha tla hamorao. Hantle feela joalokaha ngaka e buoang e potlakela ho tlosa seso se kekang, potlakela ho tlosa kelellong ea hao tšekamelo ea ho belaela, ea ho se khotsofalle tsela eo lintho li etsoang ka eona ka phuthehong ea Bokreste. (Ba-Kolosse 3:13, 14) Tlosa ntho leha e le efe e hōlisang lipelaelo tse joalo.—Mareka 9:43.

 9. Kemiso e ntle ea puso ea Molimo e tla re thusa joang ho lula re le matla tumelong?

⁹ Khomarela Jehova le mokhatlo oa hae o hlophisitsoeng haufi-ufi. Ka botšepehi etsisa Petrose, eo ka tieo a ileng a re: “Morena, re ka ea ho mang? ke uena ea nang le mantsoe a bophelo bo sa feleng.” (Johanne 6:52, 60, 66-68) E-ba le lenaneo le letle la ho ithuta Lentsoe la Jehova e le hore u ka boloka tumelo ea hao e le matla, e tšoana le thebe e khōlō, e khonang “ho tima metsu eohle e tukang ea molotsana.” (Ba-Efese 6:16) Lula u le mafolo-folo tšebeletsong ea Bokreste, ka lerato u abele ba bang molaetsa oa ’Muso. Letsatsi le leng le le leng, u thuise ka kananelo ka kamoo Jehova a u hlohonolofalitseng. U lebohe hore ebe u tseba ’nete. Ho etsa lintho tsena kaofela kemisong ea Bokreste e ntle ho tla u thusa ho thaba, ho mamella le ho lula u lokolohile lipelaelong.—Pesaleme ea 40:4; Ba-Filippi 3:15, 16; Ba-Heberu 6:10-12.

Ho Latela Tataiso ea Jehova Lenyalong

10. Ke hobane’ng ha ho le bohlokoa ka ho khethehileng ho itšetleha ka tataiso ea Jehova lenyalong la Bokreste?

¹⁰ Ha a lokisetsa hore monna le mosali ba lule hammoho e le banyalani, Jehova o ne a sa rera feela ho tlatsa lefatše hantle empa hape le ho eketsa thabo ea bona. Leha ho le joalo, sebe le ho se phethahale li tlisitse mathata a tebileng kamanong ea lenyalo. Bakreste hase mekhelo linthong tsena, kaha le bona ha baa phethahala ba bile ba angoa ke likhatello tsa bophelo bona ba kajeno. Ho ntse ho le joalo, Bakreste ba ka atleha hamolemo lenyalong le khōlisong ea bana ba bona hafeela ba tšepa Jehova le Lentsoe la hae. Mekhoa ea lefatše le boitšoaro ba lona ha li na sebaka lenyalong la Bakreste. Lentsoe la Molimo lea re eletsa: “Lenyalo a le ke le hlomphehe har’a batho bohle, le liphate li hloke litšila; hobane Molimo o tla ahlola babōki le bafebi.”—Ba-Heberu 13:4.

11. Balekane ka bobeli ba lokela ho hlokomela eng ha ba rarolla mathata a lenyalo?

¹¹ Lenyalo le tsamaisoang ho latela keletso ea Bibele le na le moea oa lerato, boitlamo le tšireletseho. Monna le mosali ba utloisisa le ho hlompha molao-motheo oa bohlooho. Ha ho hlaha mathata, hangata a bakoa ke ho hlokomoloha keletso ea Bibele ka mokhoa o itseng. E le hore bothata bo bileng teng ka nako e telele bo ka rarolloa, ho hlokahala hore balekane ka bobeli ka botšepehi ba lebise tlhokomelo ho seo e hlileng e leng bothata ’me ba sebetsane le lisosa tsa bona e seng matšoao a bo bontšang. Haeba lipuisano tseo ba sa tsoa ba le tsona li sa fella ka tumellano e feletseng kapa li felletse ka ho se lumellane, banyalani ba ka ’na ba kōpa thuso ho molebeli ea lerato ea seng leeme.

12. (a) Bibele e fana ka keletso mabapi le mathata afe a tloaelehileng lenyalong? (b) Ke hobane’ng ha ho hlokahala hore balekane ka bobeli ba etse lintho ka tsela ea Jehova?

¹² Na bothata bo amana le puisano, ho hlompha ha e mong maikutlo a e mong, ho hlompha bohlooho kapa tsela eo liqeto li etsoang ka eona? Na bo amana le ho hōlisoa ha bana kapa ho leka-lekana mabapi le litlhoko tsa likamano tsa botona le botšehali? Kapa na ke taba e amanang le ho rera tšebeliso ea chelete ea lelapa, boikhathollo, metsoalle, hore na mosali o lokela ho hiroa kapa e amanang le sebaka sa bolulo? Ho sa tsotellehe hore na bothata ke bofe, Bibele e fana ka keletso e sebetsang ka melao e tobileng kapa melao-motheo e sa tobang. (Mattheu 19:4, 5, 9; 1 Ba-Korinthe 7:1-40; Ba-Efese 5:21-23, 28-33; 6:1-4; Ba-Kolosse 3:18-21; Tite 2:4, 5; 1 Petrose 3:1-7) Ha banyalani ka bobeli ba qoba ho hatella ka boithati hore e mong a etsetse e mong lintho tse ngata ka ho tlōlisang ’me ba etsa hore lerato le iponahatse ka ho feletseng lenyalong la bona, phello e tla ba thabo e khōloanyane. Balekane ba lenyalo ka bobeli ba lokela ho ba le takatso e matla ea ho etsa liphetoho tse hlokahalang, ho etsa lintho ka tsela ea Jehova. “Ea hloko litabeng o tla bona molemo, ho lehlohonolo ea tšepang Jehova.”—Liproverbia 16:20.

Bacha—Mamelang Lentsoe la Molimo

13. Ke hobane’ng ha ho se bonolo hore bacha ba Bakreste ba hōle ba e-na le tumelo e matla ho Jehova le Lentsoe la hae?

¹³ Ha ho bonolo hore bacha ba Bakreste ba hōle ba le matla tumelong kaha ba pota-potiloe ke lefatše le khopo. Lebaka le leng ke hore “lefatše lohle le rapaletse ka tlase ho e mobe,” Satane Diabolose. (1 Johanne 5:19) Bacha ba tlas’a tlhaselo ea sera sena se mabifi se ka etsang hore se sebe se bonahale se le setle. Maikutlo a ’na-pele, takatso ea boithati, takatso e feteletseng ea boitšoaro bo bobe le bokhopo le ho lelekisa menyaka ho sa tloaelehang—lintho tsena ha li kopane kaofela ke tsela ea ho nahana e tletseng hohle le e busang eo Bibele e e hlalosang e le “moea o sebetsang joale baneng ba ho se lumele.” (Ba-Efese 2:1-3) Satane ka bolotsana o khothalelitse “moea” ona libukeng tsa sekolo, ’minong o mongata o leng teng, lipapaling le mefuteng e meng ea boithabiso. Ho hlokahala hore batsoali ba falimehele ho felisa litšusumetso tse joalo ka ho thusa bana ba bona ho hōla ba tšepa Jehova le Lentsoe la hae.

14. Bacha ba ka ‘balehela litakatso tsa bocha’ joang?

¹⁴ Pauluse o ile a fana ka keletso ea botsoali ho motsoalle oa hae e monyenyane Timothea: “U ke u balehele litakatso tsa bocha, ’me u phehelle ho loka, le tumelo, le lerato, le khotso hammoho le bohle ba rapelang Morena ka pelo e hloekileng.” (2 Timothea 2:22) Le hoja e se “litakatso [tsohle] tsa bocha” tse mpe ka botsona, bacha ba lokela hore ba li “balehele” ka hore ba se itumelle ho ameha ka ho teba ka lintho tsena, ebe ba siea nako e nyenyane, haeba e ka ba teng, bakeng sa lipakane tsa bomolimo. Ho ikoetlisa ’meleng, lipapali, ’mino, boithabiso, lintho tse etsoang ka morero oa ho phomotsa kelello le ho nka maeto, le hoja li hlile li sa fosahala, e ka ba leraba haeba e e-ba lintho tse khōlō bophelong. Balehela ka ho feletseng moqoqo o se nang morero, ho lelera, ho thahasella litaba tsa likamano tsa botona le botšehali ka tsela e sa tloaelehang, ho se etse letho le ho teneha le ho belaela ka hore batsoali ba hao ha ba u utloisise.

15. Ke lintho life tse ka etsahalang lekunutung lapeng tse ka kolekelang tabeng ea hore bacha ba phele bophelo bo habeli?

¹⁵ Esita le lekunutung lapeng, bacha ba ka ’na ba nanareloa ke kotsi. Haeba ho shebelloa mananeo a TV le livideo tsa boitšoaro bo bobe kapa pefo, takatso ea ho etsa lintho tse mpe e ka mela ka metso. (Jakobo 1:14, 15) Bibele ea eletsa: “Lōna ba ratang Jehova, hloeang bobe!” (Pesaleme ea 97:10; 115:11) Jehova oa tseba haeba motho leha e le ofe a leka ho phela bophelo bo habeli. (Liproverbia 15:3) Bacha ba Bakreste, shebang hohle ka likamoreng tsa lōna. Na le fanyeha litšoantšo tsa batho ba tummeng ka boitšoaro bo bobe ba lefatše la lipapali kapa la ’mino maboteng kapa le fanyeha lintho tse hahang tseo e leng likhopotso tse molemo? (Pesaleme ea 101:3) Polokelong ea lōna ea liaparo, na le na le liaparo tse itekanetseng kapa na liaparo tse ling tsa lōna li bontša mekhoa ea ho apara e feteletseng ea lefatše lee? Ka litsela tse mano Diabolose a ka le tšoasa haeba le inehela molekong oa ho leka se sebe. Ka bohlale Bibele ea eletsa: “Le tsohe masene, le falimehe; hobane Diabolose, e leng sera sa lōna, o ntse a lika-lika joalo ka tau e purumang, e batlang eo e ka mo jang.”—1 Petrose 5:8.

16. Keletso ea Bibele e ka thusa mocha joang ho etsa hore e mong le e mong ea mo tsotellang a be motlotlo ka eena?

¹⁶ Bibele e le bolella hore le lebele litloaelano tsa lōna. (1 Ba-Korinthe 15:33) Metsoalle ea lōna e lokela ho ba e tšabang Jehova. U se ke ua inehela khatellong ea lithaka. (Pesaleme ea 56:11; Liproverbia 29:25) Ikokobeletse batsoali ba hao ba tšabang Molimo. (Liproverbia 6:20-22; Ba-Efese 6:1-3) Itšetlehe ka tataiso le khothatso ea baholo. (Esaia 32:1, 2) Tsepamisa kelello ea hao le mahlo a hao litekanyetsong le lipakaneng tsa moea. Batla menyetla ea ho tsoela pele moeeng le ho kopanela mesebetsing ea phutheho. Ithute kamoo u ka etsang lintho ka matsoho a hao. E-ba matla tumelong, ’me u tla ipaka hore ka sebele u motho oa bohlokoa—motho ea tšoanelehang bakeng sa ho phela lefatšeng le lecha la Jehova! Ntate oa rōna oa leholimo o tla ba motlotlo ka uena, batsoali ba hao ba lefatšeng ba tla nyakalla ka uena ’me u tla khothatsa baena le bo-khaitseli ba hao ba Bakreste. Seo ke sona sa bohlokoa!—Liproverbia 4:1, 2, 7, 8.

17. Ke melemo efe e tlelang ba tšepang Jehova le Lentsoe la hae?

¹⁷ Ka puo ea lithothokiso mopesaleme o ile a bululeloa ho ngola: “Jehova . . . ba tsamaeang ka ho loka a ke ke a ba hanela le molemo leha o le mong. Jehova oa makhotla, ho lehlohonolo motho ea u tšepang!” (Pesaleme ea 84:11, 12) E, thabo le katleho, e seng masoabi le ho hlōleha, li tla tlela bohle ba tšepang Jehova le Lentsoe la hae, Bibele.—2 Timothea 3:14, 16, 17.

U ne U Tla Araba Joang?

◻ Ke hobane’ng ha Bakreste ba sa lokela ho tšepa “bohlale ba lefatše lena”?

◻ Ke’ng se lokelang ho etsoa haeba motho a e-na le lipelaelo?

◻ Ho etsa lintho ka tsela ea Jehova ho tlisa katleho le thabo joang lenyalong?

◻ Bibele e thusa bacha joang ho ‘balehela litakatso tsa bocha’?

[Setšoantšo se leqepheng la 23]

Bakreste ba retelehela ho Jehova le Lentsoe la hae, ha ka nako e tšoanang ba ntse ba hana “bohlale ba lefatše lena” e le bohlanya

[Setšoantšo se leqepheng la 25]

Malapa a tšepang Jehova le Lentsoe la hae a atleha hamolemo a bile a thabile