Ho Ikokobeletsa Bolaoli ka Nyakallo
“Le bile ba mamelang ho tsoa lipelong.”—BA-ROMA 6:17, NW.
1, 2. (a) Ke moea ofe o totobetseng lefatšeng kajeno, ’me mohloli oa oona le phello ea oona ke efe? (b) Bahlanka ba inehetseng ba Jehova ba bontša joang hore ha ba tšoane le ba bang?
“MOEA oo hona joale o sebetsang ka ho bara ba sa mameleng” o totobetse ka mokhoa o sisimosang kajeno. Ke moea oa boipuso bo sa thijoeng, o tsoang ho Satane, “’musi oa bolaoli ba moea.” “Moea” ona, kapa boikutlo bo tletseng hohle ba boikhabi le ho se mamele, o sebelisa “bolaoli,” kapa matla, holim’a boholo ba moloko oa batho. Lena ke le leng la mabaka ao ka ’ona lefatše le leng ho se ’nileng sa bitsoa maqakabetsi a bolaoli.—Ba-Efese 2:2, NW.
2 Ho thabisang, bahlanka ba inehetseng ba Jehova kajeno ha ba tlatse matšoafo a bona a moea ka “moea” ona o silafetseng kapa oa borabele. Baa tseba hore “khalefo ea Molimo e tlela bara ba sa mameleng.” Moapostola Pauluse oa eketsa: “Ka hona le se ke la kopanela le bona.” (Ba-Efese 5:6, 7, NW) Ho e-na le hoo, Bakreste ba ’nete ba leka ka matla ho ‘tlala moea [oa Jehova],’ ’me ba noa “bohlale bo tsoang holimo,” bo ‘hloekileng, bo nang le khotso, bo nang le kahlolo e molemo, bo loketseng ho mamela.’—Ba-Efese 5:17, 18, NW; Jakobo 3:17, NW.
Ho Ikokobeletsa ’Muso oa Jehova ka Boithatelo
3. Senotlolo sa ho ikokobetsa ka boithatelo ke sefe, ’me histori e re ruta thuto efe e khōlō?
3 Senotlolo sa ho ikokobetsa ka boithatelo ke ho hlokomela bolaoli bo lumeletsoeng ka molao. Histori ea moloko oa batho e bontša hore ho hana ’muso oa Jehova ha ho tlise thabo. Adama le Eva, kapa mofehli oa borabele ba bona, Satane Diabolose, ha baa ka ba tleloa ke thabo ka lebaka la ho hana ho joalo. (Genese 3:16-19) Satane o “halefile hampe” boemong bo theohileng boo a leng ho bona hona joale, kahobane oa tseba hore nako ea hae e khutšoanyane. (Tšenolo 12:12) Khotso le thabo tsa moloko oa batho, e, tsa bokahohleng bohle, li itšetlehile ka hore ka kakaretso ho eloe hloko boteng ba ’muso o lokileng oa Jehova.—Pesaleme ea 103:19-22.
4. (a) Jehova o batla hore bahlanka ba hae ba bontše boikokobetso le ho mamela tsa mofuta ofe? (b) Re lokela ho kholiseha ka eng, ’me mopesaleme o hlalosa see joang?
4 Leha ho le joalo, ka lebaka la litšoaneleho tsa hae tse leka-lekanang ka mokhoa o babatsehang, Jehova ha a khotsofatsoe ke ho mamela ho se nang thabo. Ke ’nete hore o matla! Empa hase mohatelli. Ke Molimo oa lerato, ’me o batla hore libōpuoa tsa hae tse bohlale li mo mamele ka boithatelo, ka lebaka la lerato. O batla hore li ikokobeletse ’muso oa hae ka lebaka la hore li khetha hore ka lipelo tsohle li ipehe tlas’a bolaoli ba hae bo lokileng le bo lumeletsoeng ka molao, li kholisehile hore ha ho letho le ka bang molemo ho feta ho mo mamela ka ho sa feleng. Mofuta oa motho eo Jehova a mo batlang bokahohleng ba hae o na le boikutlo ba mopesaleme ea ileng a ngola: “Molao oa Jehova o lokile, o khatholosa moea; bopaki ba Jehova boa tšepeha, bo hlalefisa sethoto. Litemoso tsa Jehova li lokile, li thabisa pelo; litaelo tsa Jehova li hloekile, li elisa mahlo. Tšebeletso ea Jehova e hloekile, e hloleha ka mehla; likahlolo tsa Jehova ke ’nete, li lokile kaofela.” (Pesaleme ea 19:7-9) Ho kholiseha ka ho feletseng ka ho nepahala le ho lokela ha ’muso oa Jehova—bona e lokela ho ba boikutlo ba rōna haeba re batla ho phela lefatšeng le lecha la Jehova.
Ho Ikokobeletsa Morena oa Rōna ka Nyakallo
5. Jesu o ile a putsoa joang bakeng sa ho utloa ha hae, ’me ke eng seo re se lumelang ka boithatelo?
5 Kreste Jesu ka boeena ke mohlala o phahameng ka ho fetisisa oa ho ikokobeletsa Ntate oa hae oa leholimo. Re bala hore “o ile a ikokobetsa ’me a utloa ho isa lefung, e, lefu thupeng ea tlhokofatso.” Pauluse oa eketsa: “Ka baka lena Molimo o mo phahamiselitse sebakeng se holimo le ho mo neha lebitso le fetang lebitso leha e le lefe le leng, e le hore lebitsong la Jesu mangole ’ohle a khumame a ba leng leholimong le ba leng lefatšeng ba leng ka tlaase ho mobu, ’me maleme ’ohle a lumele phatlalatsa hore Jesu Kreste ke Morena khanyeng ea Molimo Ntate.” (Ba-Filippi 2:8-11, NW) E, ka nyakallo re khumama ka pel’a Moeta-pele le Morena ea busang oa rōna, Kreste Jesu.—Mattheu 23:10.
6. Jesu o ipakile joang hore ke paki le moeta-pele oa lihlopha tsa lichaba, ’me “borena” ba hae bo tla tsoela pele joang ka mor’a mahlomola a maholo?
6 Jehova o ile a profeta mabapi le Kreste e le Moeta-pele oa rōna: “Bonang! E le paki ho lihlopha tsa lichaba ke fane ka eena, e le moeta-pele le molaoli ho lihlopha tsa lichaba.” (Esaia 55:4, NW) Ka tšebeletso ea hae ea lefatšeng le ka ho laola ha hae mosebetsi oa boboleli a le leholimong ka mor’a lefu la hae le tsoho, Jesu o iponahalitse e le “paki e tšepehang, ea ’nete” ea Ntate oa hae bathong ba lichaba tsohle. (Tšenolo 3:14; Mattheu 28:18-20) Lihlopha tse joalo tsa lichaba hona joale li emeloa ke palo e ntseng e hōla ea “bongata bo boholo,” bo tla pholoha ‘mahlomola a maholo’ tlas’a boeta-pele ba Kreste. (Tšenolo 7:9, 14) Empa boeta-pele ba Jesu ha bo felle moo. “Borena” ba hae bo tla nka lilemo tse sekete. Bakeng sa batho ba mamelang, o tla phelela lebitso la hae la “Moeletsi ea makatsang, Molimo o matla, Ra-bo-sa-feleng, Morena oa khotso.”—Esaia 9:6, 7; Tšenolo 20:6.
7. Haeba re lakatsa hore Kreste Jesu a re etelle pele ho ea “lilibeng tsa metsi a bophelo,” re tlameha ho etsa’ng ntle ho tieho, ’me ke eng e tla etsa hore Jesu le Jehova ba re rate?
7 Haeba re lakatsa ho rua molemo “lilibeng tsa metsi a bophelo” tseo Konyana, Kreste Jesu, a isang batho ba lipelo li lokileng ho tsona, re tlameha hore ntle ho tieho re hlakise ka tsela eo re e nkang hore ka nyakallo re ikokobeletsa bolaoli ba hae e le Morena. (Tšenolo 7:17; 22:1, 2; bapisa le Pesaleme ea 2:12.) Jesu o ile a bolela: “Ekare ha le nthata, bolokang melao ea ka. Ea nang le melao ea ka, ’me a e boloka, ke eena ea nthatang; ’me ea nthatang o tla ratoa ke Ntate; le ’na ke tla mo rata.” (Johanne 14:15, 21) Na u rata ho ratoa ke Jesu le Ntate oa hae? Ka hona ikokobeletse bolaoli ba bona.
Balebeli ba Mamela ka Nyakallo
8, 9. (a) Kreste o fane ka eng bakeng sa ho hahuoa ha phutheho, ’me ke lintlheng life moo banna baa ba lokelang ho ba mehlala ho mohlape? (b) Boikokobetso ba balebeli ba Bakreste bo tšoantšelitsoe joang ka bukeng ea Tšenolo, ’me ba lokela ho batla “pelo e kelello” joang ha ba sebetsa litaba tsa boahloli?
8 ‘Phutheho e ikokobeletsa Kreste.’ E le Molebeli oa eona, o fane ka “limpho tsa banna” bakeng sa “ho hahuoa” ha phutheho. (Ba-Efese 4:8, 11, 12, NW; 5:24, NW) Banna bana ba hōlileng moeeng ba bolelloa hore ba ‘alose mohlape oa Molimo o tlhokomelong ea bona,’ eseng ‘ho iketsa marena holim’a bao e leng letlotlo la Molimo, empa e be mehlala ho mohlape.’ (1 Petrose 5:1-3, NW) Mohlape ke oa Jehova, ’me Kreste ke “molisa ea molemo” oa oona. (Johanne 10:14) Kaha ka tšoanelo balebeli ba lebeletse hore linku tseo Jehova le Kreste ba li behileng kalosong ea bona li sebelisane le bona ka boithatelo, bona ka bobona ba lokela ho ba mehlala e metle ea boikokobetso.—Liketso 20:28.
9 Lekholong la pele la lilemo, ka tšoantšetso balebeli ba tlotsitsoeng ba ne ba tšoantšoa ba le “ka” letsohong kapa “holim’a” letsoho le letona la Kreste, ho bontša hore ba ikokobeletsa eena e le Hlooho ea phutheho. (Tšenolo 1:16, 20, NW; 2:1, NW) Ho joalo le kajeno, balebeli ba ka liphuthehong tsa Lipaki tsa Jehova ba lokela ho ikokobeletsa tataiso ea Kreste le ‘ho ikokobetsa ka tlas’a letsoho le matla la Molimo.’ (1 Petrose 5:6) Ha ba biletsoa ho tla sebetsa litaba tsa boahloli, joaloka Salomone lilemong tsa ha a sa tšepahala, ba lokela ho rapela Jehova: “U nee ke hona mohlanka oa hao pelo e kelello ea ho ahlolela sechaba sa hao, ke tle ke tsebe ho khetha botle le bobe.” (1 Marena 3:9) Pelo e kelello e tla susumetsa moholo hore a bone lintho ka tsela eo Jehova le Kreste Jesu ba li bonang ka eona e le hore qeto e entsoeng lefatšeng e tšoane haufi haholo le e entsoeng leholimong.—Mattheu 18:18-20.
10. Balebeli bohle ba lokela ho leka ka matla ho etsisa Jesu joang ka tsela eo a ileng a tšoara linku ka eona?
10 Ka ho tšoanang, balebeli ba tsamaeang le baholo ba phutheho ba tla leka ka matla ho etsisa Kreste ka tsela eo a ileng a tšoara linku ka eona. Ho fapana le Bafarisi, Jesu ha aa ka a beha litaelo tse ngata tseo ho neng ho le thata ho li latela. (Mattheu 23:2-11) O ile a re ho ba kang linku: “Tloong ho ’na, lōna bohle ba khathetseng, ba imeloang, ’me ke tla le imolla! Inkeleng joko ea ka, ’me le ithute ho ’na; hobane ke mosa le pelo e nolo, ’me le tla fumanela meea ea lōna phomolo. Hobane joko ea ka e chatsi, le phahlo ea ka ha e na boima.” (Mattheu 11:28-30) Leha e le ’nete hore Mokreste ka mong o tlameha ho “jara phahlo ee e leng ea hae,” balebeli ba lokela ho hopola mohlala oa Jesu ’me ba thuse baena ba bona hore ba ikutloe hore phahlo ea bona ea boikarabelo ba Bokreste e “chatsi,” “ha e na boima,” ’me ke nyakallo ho e jara.—Ba-Galata 6:5.
Boikokobetso bo Tšehetsang Puso ea Bomolimo
11. (a) Motho a ka hlompha bohlooho joang empa leha ho le joalo e se ea hlileng a tšehetsang puso ea bomolimo? Bontša. (b) Ho ba ea tšehetsang puso ea bomolimo kannete ho bolela’ng?
11 Puso ea bomolimo ke puso ea Molimo. E ama molao-motheo oa bohlooho o boletsoeng ho 1 Ba-Korinthe 11:3. Empa e bolela ho fetang hoo. Motho ea itseng a ka ’na a bonahala a bontša ho hlompha bohlooho empa leha ho le joalo a sa tšehetse puso ea bomolimo ka kutloisiso e feletseng ea polelo eo. Hoo ho ka etsahala joang? E le mohlala, puso ea sechaba ka sechaba ke ’muso oa sechaba, ’me motho ea tšehetsang puso ea sechaba ka sechaba o ’nile a hlalosoa e le “motho ea lumelang likhopolo tsa puso ea sechaba ka sechaba.” Monna ea itseng a ka ’na a bolela hore o tšehetsa puso ea sechaba ka sechaba, a kopanela likhethong, ’me ea ba ea e-ba ralipolotiki ea mafolo-folo. Empa haeba, boitšoarong ba hae ka kakaretso, a nyelisa moea oa puso ea sechaba ka sechaba le melao-motheo eohle eo e e amang, na ho ka thoe kannete o tšehetsa puso ea sechaba ka sechaba? Ka ho tšoanang, hore motho e be ea tšehetsang puso ea bomolimo kannete, o tlameha ho etsa ho fetang feela ho iketsa eka o ikokobeletsa bohlooho. O tlameha ho etsisa litsela le litšoaneleho tsa Jehova. O tlameha ho busoa ke Jehova ka litsela tsohle. ’Me kaha Jehova o neile Mora oa hae bolaoli bo feletseng, ho tšehetsa puso ea bomolimo ho boetse ho bolela ho etsisa Jesu.
12, 13. (a) Ho ba ea tšehetsang puso ea bomolimo ho hlile ho ama eng ka ho khethehileng? (b) Na boikokobetso bo tšehetsang puso ea bomolimo bo ama ho mamela litaelo tse ngata? Bontša.
12 Hopolang, Jehova o batla boikokobetso bo etsoang ka boithatelo bo susumetsoang ke lerato. Eo ke tsela ea hae ea ho busa bokahohle. Ke mothofatso oa lerato ka sebele. (1 Johanne 4:8) Kreste Jesu ke “lehlaseli la khanya ea oona, le setšoantšo sa boleng ba oona.” (Ba-Heberu 1:3) O tlama barutuoa ba hae ba ’nete hore ba ratane. (Johanne 15:17) Kahoo ho tšehetsa puso ea bomolimo ha ho ame boikokobetso feela empa hape ho ama ho ba ea nang le lerato. Taba ena e ka akaretsoa ka mokhoa o latelang: Puso ea bomolimo ke puso ea Molimo; Molimo o lerato; ka hona puso ea bomolimo ke puso e etsoang ka lerato.
13 Moholo a ka ’na a nahana hore haeba baena e le ba tšehetsang puso ea bomolimo, ba lokela ho mamela melao ea mefuta-futa. Baholo ba bang ba ’nile ba etsa melao ka litlhahiso tse fanoang nako le nako ke “mohlanka ea khabane, ea bohlale.” (Mattheu 24:45) Ka mohlala, ho kile ha etsoa tlhahiso ea hore molemong oa ho tseba baena ba rōna habonolo ka phuthehong, ho ka ba molemo ho se lule setulong se le seng ka mehla ka Holong ea ’Muso. Sena se ne se reretsoe hore e be tlhahiso e sebetsang, eseng molao o thata-thata. Empa baholo ba bang ba ka ’na ba sekamela ho e fetoleng molao le ho ikutloa hore ba sa e lateleng ha ba tšehetse puso ea bomolimo. Leha ho le joalo, ho ka ’na ha ba le mabaka a mangata a matle ao ka ’ona moena kapa khaitseli a ka khethang ho lula sebakeng se itseng. Haeba moholo a sa nahanele lintho tse joalo ka lerato, na eena ka boeena kannete o tšehetsa puso ea bomolimo? E le ho ba ba tšehetsang puso ea bomolimo, “litaba tsohle tsa lōna li etsoe ka lerato.”—1 Ba-Korinthe 16:14.
Ho Sebeletsa ka Nyakallo
14, 15. (a) Moholo a ka hlokisa baena kapa bo-khaitseli ba itseng nyakallo joang ha ba sebeletsa Jehova, ’me ke hobane’ng ha see e ka ba se sa tšehetseng puso ea bomolimo? (b) Jesu o ile a bontša joang hore o ananela lerato le bontšoang ka tšebeletso ea rōna ho e-na le hore na eona e kae? (c) Baholo ba lokela ho nahanela eng?
14 Ho ba ea tšehetsang puso ea bomolimo ho boetse ho bolela ho sebeletsa Jehova ka nyakallo. Jehova ke “Molimo ea thabileng.” (1 Timothea 1:11, NW) O batla hore barapeli ba hae ba mo sebeletse ka nyakallo. Ba ngangellang hore ho bolokoe litaelo ba lokela ho hopola hore har’a litaelo tseo Iseraele e neng e lokela ho “hlokomela ho etsa ka tsona” e ne e le e latelang: “U tla nyakalla pel’a Jehova, Molimo oa hao, ka tsohle tseo u li ruileng ka matsoho a hao.” (Deuteronoma 12:1, 18) Eng kapa eng eo re e etsang tšebeletsong ea Jehova e lokela ho ba nyakallo, eseng moroalo. Balebeli ba ka etsa ho hongata hore baena ba ikutloe ba thabile ho etsa seo ba ka se khonang ha ba sebeletsa Jehova. Ka lehlakoreng le leng, haeba baholo ba se hlokolosi, ba ka hlokisa baena ba bang nyakallo. Ka mohlala, haeba ba bapisa, ba babatsa ba finyeletseng kapa ba fetileng karolelano ea lihora tseo phutheho e li sebetsang bopaking ’me ka mokhoa o sa tobang ba nyatsa ba sa finyellang karolelano eo, ebe ba neng ba e-na le mabaka a utloahalang a ho tlaleha nako e nyenyane haholo ba tla ikutloa joang? Na see se ke ke sa ba etsa hore ba ikutloe ba le molato ka ho sa hlokahaleng ebe kahoo ba hloka nyakallo?
15 Ka lebaka la bocha lilemong, bophelo ba ’mele bo botle haholoanyane, le maemo a mang, lihora tse seng kae tseo ba bang ba ka nehelanang ka tsona bopaking ba phatlalatsa li ka emela boiteko bo boholo ho feta lihora tse ngata tseo ba bang ba li sebetsang boboleling. Baholo ha baa lokela ho ba ahlola ntlheng ena. Ka sebele, Jesu ke eena eo Ntate a mo nehileng “matla a ho ahlola.” (Johanne 5:27) Na Jesu o ile a nyatsa mohlolohali oa mofutsana hobane nyehelo ea hae e ne e le ka tlaase ho karolelano? Che, o ile a susumetsoa ke hore na ha e le hantle licheletana tseo tse peli tsa tšepe li ile tsa hloka eng ho mosali eo. E ne e le “hohle hoo a neng a na le hona, hohle hoo a neng a phela ka hona.” Li ne li emela lerato le tebileng hakaakang bakeng sa Jehova! (Mareka 12:41-44) Na baholo ba lokela ho susumetsoa hanyenyane ke boiteko bo lerato ba bao sohle seo ba nang le sona se leng ka tlaase ho “karolelano”? Tabeng ea lerato bakeng sa Jehova, boiteko bo joalo bo ka ’na ba be bo fetile karolelano haholo!
16. (a) Haeba baholo ba sebelisa lipalo lipuong tsa bona, ke hobane’ng ha ho hlokahala hore ba sebelise temoho le ho leka-lekana ho hotle? (b) Baena ba ka thusoa hamolemo ka ho fetisisa joang hore ba eketse tšebeletso ea bona?
16 Na tlhaloso ee joale e lokela ho fetoloa “taelo” e ncha ea hore lipalo—esita le likarolelano—ha hoa lokela ho bua ka tsona le ka mohla? Le hanyenyane! Taba ea bohlokoa ke hore balebeli ba lokela ho seha moeli pakeng tsa ho khothaletsa baena hore ba atolose tšebeletso ea bona le ho ba thusa hore ka nyakallo ba etse seo ba ka se khonang. (Ba-Galata 6:4) Setšoantšong sa Jesu sa litalenta, morena o ile a beha thepa ea hae boikarabelong ba makhoba a hae “e mong le e mong a neoa ka matla a hae.” (Mattheu 25:14, 15) Ka mokhoa o tšoanang baholo ba lokela ho nahanela menyetla ea mohoeletsi ka mong oa ’Muso. Sena se hloka temoho. E ka ’na eaba mohlomong ba bang ba hlile ba hloka khothatso ea hore ba etse ho eketsehileng. E ka ’na eaba mohlomong ba tla ananela thuso mabapi le tlhophiso e molemo ea mosebetsi oa bona. Leha ho le joalo, haeba ba ka thusoa hore ba etse ka nyakallo seo ba ka se khonang, mohlomong nyakallo eo e tla ba matlafatsa hore, moo ho khonehang, ba atolose mosebetsi oa bona oa Bokreste.—Nehemia 8:10; Pesaleme ea 59:16; Jeremia 20:9.
Khotso e Tlisoang ke ho Ikokobetsa ka Nyakallo
17, 18. (a) Ho ikokobetsa ka nyakallo ho ka re tlisetsa khotso le ho loka joang? (b) Re ka rua eng haeba ka sebele re ela hloko litaelo tsa Molimo?
17 Ho ikokobetsa ka nyakallo pusong e lumeletsoeng ka molao ea Jehova ho re tlisetsa khotso e khōlō. Thapelong mopesaleme o ile a re ho Jehova: “Ba ratang molao oa hao ba na le khotso e kholo, ha ho khopiso ho bona.” (Pesaleme ea 119:165) Ka ho mamela molao oa Molimo, re ithuisa molemo. Jehova o ile a bolella Iseraele: “Ke sena seo Jehova a se boletseng, Molopolli oa hao, Mohalaleli oa Iseraele: ‘’Na, Jehova, ke Molimo oa hao, Ea u rutang ho ithuisa molemo, Ea u etsang hore u tsamaee tseleng eo u lokelang ho tsamaea ka eona. Hafeela u ne u ka hla ua ela hloko litaelo tsa ka! Joale khotso ea hao e ne e tla ba feela joaloka nōka, ’me ho loka ha hao ho be joaloka maqhubu a leoatle.’”—Esaia 48:17, 18, NW.
18 Sehlabelo sa thekollo sa Kreste se tlisa khotso pakeng tsa rōna le Molimo. (2 Ba-Korinthe 5:18, 19) Haeba re e-na le tumelo maling a lokollang a Kreste ’me re le seli ho leka ka matla ho loantša mefokolo ea rōna le ho etsa thato ea Molimo, re lokoloha boikutlong ba hore re molato. (1 Johanne 3:19-23) Tumelo e joalo, e tšehelitsoeng ke mesebetsi, e re fa boemo bo lokileng ka pel’a Jehova le tšepo e hlollang ea ho pholoha ‘mahlomola a maholo’ le ho phela ka ho sa feleng lefatšeng le lecha la Jehova. (Tšenolo 7:14-17; Johanne 3:36; Jakobo 2:22, 23) Re ka rua sena sohle ‘hafeela re ne re ka hla ra ela hloko litaelo tsa Molimo.’
19. Thabo ea rōna hona joale le tšepo ea bophelo bo sa feleng li itšetlehile ka eng, ’me Davida o ile a bolela joang kholiseho ea rōna e tlohang botebong ba pelo?
19 E, thabo ea rōna hona joale le tšepo ea rōna bakeng sa bophelo bo sa feleng lefatšeng la paradeise li itšetlehile ka hore ka nyakallo re ikokobeletse bolaoli ba Jehova e le Morena ’Musi oa bokahohle. E se eka kamehla re ka kopanela boikutlong ba Davida, ea ileng a re: “Oho, Jehova, boholo, le matla, le letlōtlo, le hlōlo, le khanya, ke tsa hao! Hobane tsohle tse maholimong le lefatšeng ke tsa hao. Borena le bona ke ba hao, Jehova, ’me u phahametse tsohle u le Morena. ’Me joale, Molimo oa rōna, rea u boka, re rorisa lebitso la hao le khanyang.”—1 Likronike 29:11, 13.
Lintlha tse Lokelang ho Hopoloa
◻ Jehova o batla hore bahlanka ba hae ba bontše boikokobetso le ho mamela tsa mofuta ofe?
◻ Jesu o ile a putsoa joang bakeng sa ho mamela ha hae, ’me re lokela ho paka eng ka tsela eo re e nkang?
◻ Balebeli bohle ba lokela ho etsisa Jesu joang ka tsela eo a ileng a tšoara linku ka eona?
◻ Ho ameha eng ho beng ea tšehetsang puso ea bomolimo?
◻ Ho ikokobetsa ka nyakallo ho tlisa litlhohonolofatso life?
[Setšoantšo se leqepheng la 24]
Baholo ba khothaletsa mohlape ho etsa ka nyakallo eng kapa eng eo o ka e khonang
[Setšoantšo se leqepheng la 26]
Jehova o thabisoa ke ba mo mamelang ho tsoa pelong