Bontša Mamello ho Bohle

“Banab’eso, rea le rapela, hore le ke le lokise ba sa eeng ka molao, le tšelise ba pelo li tepeletseng, le tiise ba fokolang, ’me le be le mamello ho bohle.”—1 BA-THESSALONIKA 5:14.

 1. Lipaki tsa Jehova li ’nile tsa bontša mamello hokae le tlas’a maemo afe?

LIPAKI TSA JEHOVA tsa kajeno li ’nile tsa beha mohlala o motle hakaakang oa ho bontša mamello! Li ’nile tsa mamella mathata a mangata le mahloriso linaheng tseo e kileng ea e-ba tsa Bonazi le tsa Bofascista le linaheng tse kang Malawi ho tla fihlela hona joale. Hape, le tse phelang malapeng a arohaneng bolumeling lia mamella.

 2. Ke lintho life tse peli tse entseng hore batho ba Jehova ba thabele paradeise ea moea?

² Ho sa tsotellehe mahloriso le mathata ao batho ba inehetseng ba Jehova ba thulanang le ’ona, ba ’nile ba thabela mahlohonolo a paradeise ea moea. Ka sebele, linnete li bontša hore Bakreste ba tlotsitsoeng ba qalile ho e thabela ka selemo sa 1919. Ke eng se hlahisitseng paradeise ee ea moea? Pele ho tsohle, maemo ana a kang paradeise a teng har’a batho ba Jehova hobane Molimo o khutliselitse batlotsuoa ba oona ‘naheng’ ea bona ea borapeli bo hloekileng kapa boemo. (Esaia 66:7, 8) Paradeise ea moea e boetse e atlehisoa ke hobane e mong le e mong ea leng ka har’a eona o bontša litholoana tsa moea oa Molimo. Mamello ke e ’ngoe ea tsona. (Ba-Galata 5:22, 23) Bohlokoa ba tšoaneleho ena paradeiseng ea rōna ea moea bo ka bonoa polelong ena ea setsebi William Barclay: “Ho ke ke ha e-ba le ntho leha e le efe e kang botsoalle ba Bokreste ka ntle ho makrothumia [mamello]. . . . ’Me lebaka la sena ke lena feela—ke hore makrothumia ke tšobotsi e khōlō ea Molimo (Ba-Roma 2.4; 9.22).” (A New Testament Wordbook, leqephe 84) E, mamello ke ea bohlokoa bo boholo joalo!

Ho Bontša Mamello ho Baena ba Rōna

 3. Jesu o ile a fa Petrose thuto efe ea ho bontša mamello?

³ Ho bonahala hore moapostola Petrose o ne a e-na le bothata bo itseng ba ho bontša mamello, hobane ka nako e ’ngoe o kile a botsa Jesu: “Morena, ngoan’eso ha a ntse a ntšiteloa, ke tla mo tšoarela hakae na? E tla ba hasupa na?” Jesu o ile a mo eletsa: “Ke re ho uena: E se ke ea e-ba hasupa, e mpe e be hamashome a supileng a baloang hasupa.” (Mattheu 18:21, 22) Ka mantsoe a mang, ha ho na moeli oa makhetlo ao re lokelang ho mamellana ka ’ona le ho tšoarela motho e mong ea re siteloang. Etsoe, ha re nahane hore motho leha e le ofe a ka bala makhetlo ana ho fihlela a ba 77! Empa, ruri ho tšoarela ka tsela ena ho hloka mamello.

 4. Ke hobane’ng haholo-holo ha ho hlokahala hore baholo ba bontše mamello?

⁴ Ha ho tluoa tabeng ea hore baena ba moea ba bontše mamello, ha ho pelaelo hore baholo ba phutheho ba lokela ho beha mohlala o motle. Mamello ea bona e ka ’na ea behoa tekong hobane mohlomong balumeli-’moho ba itseng ba sa tsotelle kapa ba se na thahasello. Mohlomong ba bang e ka ’na eaba ba hulanya maoto ha ba lokela ho lokisa mekhoa e itseng e mebe. Baholo ba tlameha ho ba hlokolosi hore ba se ke ba teneha habonolo kapa ba khopisoa ke mefokolo ea baena le bo-khaitseli ba bona ba Bakreste. Ho e-na le hoo, ho hlokahala hore balisa bana ba moea ba hopole keletso ena: “Rōna ba matla, re tšoanetse ho jara mefokolo ea ba fokolang, ’me re se ke ra batla ho khahlisang rōna feela.”—Ba-Roma 15:1.

 5. Haeba re bontša mamello, re khona ho tiisetsa ho eng?

⁵ Hape, ho ka ’na ha hlaha khohlano pakeng tsa batho ba nang le botho bo sa tšoaneng ka baka la mefokolo ea botho le ho haelloa ho itseng. Ka baka la liphoso kapa botho ba baena ba rōna, re ka ’na ra ba khopisa ’me le bona ba ka ’na ba re etsa se tšoanang. Ka hona, keletso ee ke e loketseng hakaakang: “Le mamellane, le rekolohelane, ’me ekare ha e mong a e-na le komang le e mong joale ka ha Kreste a le hauhetse, etsang joalo le lōna.” (Ba-Kolosse 3:13) ‘Ho mamellana’ ho bolela ho bontša mamello, le hoja mohlomong re na le mabaka a utloahalang a ho tletleba ka motho e mong. Ha rea lokela ho iphetetsa ho moena oa rōna kapa ho mo fa kotlo, esita le hona ho feheloa ka baka la hae.—Jakobo 5:9.

 6. Ke hobane’ng ha ho bontša mamello e le tsela e bohlale?

⁶ Keletso e tšoanang e fumanoa ho Ba-Roma 12:19: “Le se ke la iphetetsa e le lōna, le mpe le etsetse bohale sebaka; hobane ho ngoliloe, ho thoe: Phetetso ke ea ka; ke ’na ea tlang ho busetsa, ho rialo Morena.” ‘Ho etsetsa bohale sebaka’ ho bolela ho lieha ho halefa, kapa ho bontša mamello. Ho bontša tšoaneleho ena ke tsela e bohlale, hobane ho ruisa rōna ka borōna molemo hammoho le ba bang. Haeba ho hlahile bothata, rōna ka borōna re ikutloa hamolemonyana hobane ha re mpefatse litaba empa re bontša mamello. ’Me motho eo re ’montšang mamello le eena o ikutloa hamolemonyana hobane ha re mo fe kotlo kapa ho iphetetsa ka tsela e itseng. Ha ho makatse ha Pauluse a ile a khothalletsa Bakreste-’moho hore ba “tšelise ba pelo li tepeletseng, [ba] tiise ba fokolang, ’me [ba] be le mamello ho bohle.”—1 Ba-Thessalonika 5:14.

Ka Lapeng

 7. Ke hobane’ng ha ho hlokahala hore banyalani ba bontše mamello?

⁷ Ho ’nile ha thoe lenyalo le thabileng ke kopano ea batho ba babeli ba tšoarelanang. See se bolela eng? Se bolela hore batho ba nyalaneng ba thabileng ba bontša mamello litšebelisanong tsa bona. Hangata batho ba hohelana ka baka la boikutlo ba bona bo sa tšoaneng. Ho se tšoane hona e ka ’na ea ba ho hlollang, empa hape e ka ’na ea e-ba mohloli oa khohlano e eketsang khatello le likhathatso tse seng li ntse li etsa hore Bakreste ba nyalaneng ba be le “matšoenyeho nameng.” (1 Ba-Korinthe 7:28) Ka mohlala, a re re mohlomong monna o iphapanyelitse litaba tse itseng kapa o na le tšekamelo ea ho se tsotelle kapa ho ba bokhoahlapa. Sena e ka ’na ea e-ba ho beha mosali oa hae tekong. Empa haeba litlhahiso tse fanoang ka mantsoe a mosa li sa thuse letho, ho ka ’na ha hlokahala hore mosali a mamelle mefokolo ea hae ka ho ba ea mamellang.

 8. Ke hobane’ng ha ho ka hlokahala hore banna ba bontše mamello?

⁸ Ka lehlakoreng le leng, mohlomong mosali a ka pheha khang ka litaba tse itseng ’me a rata ho omanya monna oa hae. Sena se ka ’na sa hopotsa motho lengolo lena: “Ho molemo ho lula marulelong ho feta ho kopanela ntlo le mosali ea ratang ho omana.” (Liproverbia 25:24, Today’s English Version) Tabeng e joalo, ho hlokahala hore monna a bontše mamello a ikamahantse le keletso ea Pauluse: “Banna, ratang basali ba lōna, ’me le se ke la ba halefela.” (Ba-Kolosse 3:19) Ho boetse ho hlokahala mamello hore banna ba ele hloko keletso ena ea moapostola Petrose: “Lōna banna, tsoelang pele ho phela ka mokhoa o tšoanang le [basali ba lōna] ho latela tsebo, le ba fe tlhompho joaloka lijana tse fokolang, motho e motšehali, kaha le boetse le majalefa hammoho le bona mohaung o sa tšoanelang oa bophelo, e le hore lithapelo tsa lōna li tle li se ke tsa sitisoa.” (1 Petrose 3:7, NW) Ka linako tse ling monna a ka ’na a lekoa ke mefokolo ea mosali oa hae, empa mamello e tla mo thusa ho e jara.

 9. Ke hobane’ng ha ho hlokahala hore batsoali ba bontše mamello?

⁹ Ho hlokahala hore batsoali ba bontše mamello e le hore ba tle ba atlehe ho hōlisa bana ba bona. Bana ba ka ’na ba etsa liphoso tse tšoanang khafetsa. Ho ka ’na ha bonahala ba le manganga kapa ba lieha ho ithuta lintho ’me mohlomong ba ka beha batsoali ba bona tekong khafetsa. Tlas’a maemo a joalo, ho hlokahala hore batsoali ba Bakreste ba liehe ho halefa, ba se ke ba fela pelo kapa ba hlōleha ho ithiba empa ba lule ba iketlile le hoja ba ntse ba eme ba tiile bakeng sa melao-motheo e lokileng. Bo-ntate ba lokela ho hopola hore le bona e kile ea e-ba bana ’me le bona ba ne ba etsa liphoso. Ho hlokahala hore ba sebelise keletso ena ea Pauluse: “Bo-ntat’a bana, se halefiseng bana ba lōna, ba tle ba se ke ba nyahama lipelo.”—Ba-Kolosse 3:21.

Ho ba Leng ka Ntle

10. Re lokela ho itšoara joang libakeng tseo re hiriloeng ho tsona, joalokaha ho bonoa phihlelong efe?

¹⁰ Ka baka la ho se phethahale ha botho le boithati, maemo a sa thabiseng a ka ’na a hlaha sebakeng seo Mokreste a sebetsang ho sona. Ke tsela e bohlale hore a be chatsi ’me a mamelle liphoso e le hore a ka bōpa khotso. Phihlelo ea Mokreste e mong ea neng a khopisitsoe haholo ke motho ea sebetsang le eena ea neng a mo honohela e bontša hore na ho bohlale hakae ho etsa joalo. Kaha moena ha aa ka a pheha khang ka sena a mpa a mamella, ka mor’a nako o ile a qala thuto le motho eo ea sebetsang le eena ea neng a mo khathatsa.

11. Haholo-holo ho hlokahala hore re bontše mamello neng, hona hobane’ng?

¹¹ Ho hlokahala hore batho ba Jehova ba bontše mamello haholo-holo ha ba pakela batho ba ka ntle ho phutheho ea Bokreste. Khafetsa, Bakreste ba teana le batho ba hlaha kapa ba bohale. Na e ka ba ho loketseng kapa ho bohlale ho itšoara ka tsela e tšoanang? Che, hobane ho etsa joalo e ne e ke ke ea e-ba ho bontša mamello. Tsela e bohlale ke ho hopola le ho latela maele ana a bohlale: “Karabo e bonolo e thethefatsa bohale, empa polelo e hlabang ea bo leotsa.”—Liproverbia 15:1.

Tumelo le Tšepo Lia Thusa ho Bontšeng Mamello

12, 13. Ke litšoaneleho life tse tla re thusa ho bontša mamello?

¹² Ke eng se ka re thusang ho bontša mamello, ho mamella maemo a sithabetsang? Ntho e ’ngoe ke ho ba le tumelo litšepisong tsa Molimo. Re tlameha ho kholoa sohle seo Molimo o re bolellang sona. Mangolo a re: “Ha le e-so ho ka le hlaheloa ke moleko o sa lekaneng motho; empa Molimo oa tšepeha, o ke ke oa lumela hore le hlaheloe ke moleko o ka le sitang; empa moleko ha o le teng, o tla le etsetsa le sebaka sa ho tsoa ho oona, le tle le tsebe ho o jara.” (1 Ba-Korinthe 10:13) Ka mantsoe a mang, ho joalokaha motho e mong ea seng a hōlile a kile a re: “Ha o lumelletsoe ke Molimo, nka o jara.” E, re ka o jara ka ho bontša mamello.

¹³ Tšepo ea ’Muso oa Molimo e amana haufi-ufi le tumelo. Ha o se o busa lefatše, maemo ’ohle a mabe a bakang mahlomola a tla tlosoa. Tabeng ena, mopesaleme Davida o itse: “U kokobetse bohale ba hao, u tele khalefo, u se ke ua hlora; ebe etlaba u etsa bobe. Hobane ba bolotsana ba tla felisoa, athe ba itšepetseng Jehova ba tla rua lefatše.” (Pesaleme ea 37:8, 9) Tšepo e tiileng ea hore haufinyane Molimo o tla felisa maemo ana ’ohle a lekang e re thusa ho bontša mamello.

14. Ke phihlelo efe e bontšang lebaka leo ka lona re lokelang ho bontša mamello ho molekane ea sa lumelang?

¹⁴ Re lokela ho itšoara joang haeba molekane ea sa lumelang a re hlonamisa? Tsoela pele u talimile ho Molimo bakeng sa thuso, ’me u tsoele pele u tšepile hore mohanyetsi o tla fetoha morapeli oa Jehova. Ka linako tse ling mosali oa Mokreste e mong o ne a hana ho mo lokisetsa lijo le ho hlatsoa liaparo tsa hae. Mosali oa hae o ne a sebelisa puo e litšila, o ne a ee a qete matsatsi a sa ’muise, a ba a leka le ho mo loea. Monna oa hae o ile a re: “Empa ka linako tsohle ke ne ke retelehela ho Jehova ka thapelo, ’me ke ne ke Mo tšepile hore a nthuse ho hlaolela tšoaneleho e ntle ea mamello e le hore ke se ke ka lahleheloa ke botsitso ba ka ba Bokreste. Ke ne ke boetse ke tšepile hore ka letsatsi le leng boikutlo ba hae ba pelo bo tla fetoha.” Ka mor’a hore mosali oa hae a mo tšoare joalo ka lilemo tse 20, o ile a qala ho fetoha, ’me monna oa hae o ile a re: “Ke leboha Jehova haholo ka hore ebe o ile a nthusa ho hlaolela tholoana ea moea, e leng mamello, hobane joale ke bona phello: Mosali oa ka o qalisitse ho tsamaea tseleng ea bophelo!”

Thapelo, Boikokobetso, le Lerato li Tla Thusa

15. Ke hobane’ng ha thapelo e ka re thusa ho bontša mamello?

¹⁵ Thapelo ke thuso e ’ngoe e khōlō ea ho bontša mamello. Pauluse o re phehelletse: “Le se ke la belaella letho; empa nthong tsohle seo le se batlang, le ke le se tsebise Molimo ka thapelo le ka kōpo e nang le teboho. ’Me khotso ea Molimo, e fetisang kutloisiso eohle, e tla boloka lipelo tsa lōna le mehopolo ea lōna ho Jesu Kreste.” (Ba-Filippi 4:6, 7) Hape hopola ho ela hloko khothatso ena: “Jarisa Jehova phahlo tsa hao, ’me o tla u tšehetsa; a ke ke a lumela hore ea lokileng a ’ne a sisinngoe.”—Pesaleme ea 55:22.

16. Tabeng ea ho bontša mamello, boikokobetso bo ka re thusa joang?

¹⁶ Boikokobetso le bona ke thuso e ’ngoe e khōlō ea ho hlaolela tholoana ea moea ea mamello. Motho ea ikhohomosang ha a na mamello. O khopeha habonolo, o halefa kapele, ’me ha a mamelle ho tšoaroa ka tsela leha e le efe e sa thabiseng. Sena sohle ke se fapaneng le ho bontša mamello. Empa motho ea ikokobelitseng a ke ke a inka ka ho tebileng. O tla letela Jehova, joalokaha Davida a ile a etsa ha a ne a tsongoa ke Morena Saule le ha a ne a rohakoa ke Shimei oa Mobenjamine. (1 Samuele 24:4-6; 2 Samuele 16:5-13) Ka hona, re lokela ho lakatsa ho tsamaea ka “boikokobetso bohle, le ka mosa, le ka sebete [“mamello,” NW], [re] ntse [re] mamellana ka lerato.” (Ba-Efese 4:2) Ho feta moo, re lokela ho ‘ikokobetsa pel’a Jehova.’—Jakobo 4:10.

17. Ke hobane’ng ha lerato le tla re thusa ho bontša mamello?

¹⁷ Haholo-holo lerato le se nang boithati le re thusa ho bontša mamello. Ka sebele, “lerato lea mamella,” hobane le re etsa hore re nahane se molemo bakeng sa ba bang. (1 Ba-Korinthe 13:4, NW) Lerato le re nolofalletsa ho ipeha boemong ba ba bang, re kene lieteng tsa bona, kamoo ho ka boleloang ka teng. Ho feta moo, lerato le re thusa ho bontša mamello hobane le “mamella tsohle, le lumela tsohle, le tšepa tsohle, le jara tsohle. Lerato ha le ka ke la timela le ka mohla o le mong.” (1 Ba-Korinthe 13:7, 8) E, ho joalokaha pina ea ’Muso ea 200 bukeng ea Binelang Jehova Lithoriso e bolela:

“Ka lerato boena

Ba sebele bo’a theoa.

Leha ba bang ba fosa

Lona lea ba tšoarela.”

Na U ka Mamella ka Thabo?

18. Ho ka etsahala joang hore motho a mamelle ka thabo?

¹⁸ Pauluse o ile a rapella hore balumeli-’moho le eena ba leng Kolosse ba tlale tsebo e nepahetseng ea thato ea Molimo e le hore ba tle ba tsamaee ka mokhoa o tšoanelehang pel’a Jehova, ba mo khahlise, ’me ba hlahise litholoana mosebetsing o mong le o mong o motle. Ka ho etsa joalo ba ne ba tla ‘matlafatsoa ka matla ’ohle ka tekanyo ea matla a hae a khanyang e le hore ba ka mamella ka ho felletseng ’me ba mamelle ka thabo.’ (Ba-Kolosse 1:9-11, NW) Ho sa le joalo, ke joang motho a ka ‘mamellang ka thabo’? Hoo ha ho itoantše, hobane ho ba le thabo e boleloang ka Mangolong hase feela taba ea ho ba mosa kapa ho ba motlōtlō. Tholoana ea moea ea thabo e akarelletsa ho ba le boikutlo ba khotsofalo e tebileng ea ho etsa ntho e lokileng pel’a Molimo. Hape ke pontšo ea ho ba le tšepo ea ho amohela moputso o tšepisitsoeng ka baka la ho bontša mamello. Ke ka baka leo Jesu a ileng a re: “Le tla thaba ha batho ba le nyefola ’me ba le hlorisa ’me ka leshano ba bua ntho ea mofuta o mong le o mong e khopo ka lōna molemong oa ka. Thabang ’me le tlōle ke thabo, kaha moputso oa lōna o moholo leholimong; hobane ka tsela eona eo ba hlorisitse baprofeta ba bileng teng pele ho lōna.”—Mattheu 5:11, 12, NW.

19. Ke mehlala efe e bontšang hore motho a ka bontša mamello a ntse a thabile?

¹⁹ Jesu o ne a e-na le thabo e joalo. Ha e le hantle, “o ile a mamella thupa ea tlhokofatso, ho nyelisoa ho hlabisang lihlong, ka baka la thabo e neng e behiloe ka pel’a hae.” (Ba-Heberu 12:2, NW) Thabo eo e ile ea nolofalletsa Jesu ho bontša mamello. Ka ho tšoanang, nahanisisa ka se ileng sa etsahala ha baapostola ba ne ba shaptjoa ’me ba laeloa hore “ba se ka ba boela ba ruta ka lebitso la Jesu.” Ba ile ba “tloha khotla, ba thabile kahobane ba entsoe ba tšoaneloang ke ho hlabisoa lihlong ka baka la lebitso la Jesu. Ha ba ka ba phetsa ka matsatsi ’ohle ho ruta le ho bolela tempeleng le ka matlung, hore Jesu ke Kreste.” (Liketso 5:40-42) Ke mohlala o motle hakaakang o pakang hore balateli ba Kreste ba ka bontša mamello ka thabo!

20. Haeba re bontša mamello, see se ka ama kamano ea rōna le ba bang joang?

²⁰ Ka sebele Lentsoe la Molimo le fana ka keletso e bohlale ha le re khothalletsa ho se iphetetse, ho lieha ho halefa ha re ntse re lebelletse se molemohali—e, ho bontša mamello! Re hloka thapelo ea ka mehla le tholoana ena ea moea oa Molimo e le hore re ka sebelisana hammoho le baena le bo-khaitseli ba rōna ka phuthehong, hammoho le ba ka lapeng la rōna, hammoho le batho ba leng libakeng tseo re sebetsang ho tsona, hammoho le batho ka bomong bao re teanang le bona tšebeletsong ea Bokreste. Ke eng se ka re thusang ho bontša mamello? Ke tumelo, tšepo, boikokobetso, thabo, le lerato. Kannete, ha re e-na le litšoaneleho tse joalo re ka bontša mamello ho bohle.

Na U sa Hopola?

◻ Ke hobane’ng ha mamello e hlokahala e le hore re kopanele paradeiseng ea moea?

◻ Ke hobane’ng haholo-holo ha ho hlokahala hore baholo ba bontše mamello?

◻ Ke hobane’ng ha banna le basali ba lokela ho hlaolela mamello?

◻ Ke litšoaneleho life tse ling tse tla re thusa ho bontša mamello?

[Setšoantšo se leqepheng la 17]

Ke keletso efe e tsoang ho Jesu e ileng ea thusa Petrose ho bontša mamello?