Ho Beleha Bana Ka Kutloisiso Mehleng Ena ea Bofelo
“Ba busang bana ba bona hantle.”—1 TIMOTHEA 3:12.
1. Takatso ea tlhaho ea basali ba bangata ke efe, ’me see se iponahatsa joang ha ba sa le banyenyane bophelong?
HO KE ke ha latoloa hore botsoali ke ntho e thabisang. Ke tlhaho ho rata ho ba ’mè, le hoja ho le matla ho basali ba bang ho feta ho ba bang. Linaheng tse ngata tsa Bophirima, bashemane ba banyenyane ba thahasella haholo ho bapala ka lintho tsa ho bapala tsa mechine, ha bananyana ka kakaretso ba thahasella lipopi tsa bana, tseo baetsi ba lintho tsa ho bapala ba lekang ka matla ho li etsa hore e be tsa sebele kamoo ho ka khonehang. Banana ba bangata ba laba-labela letsatsi leo ka lona ba tlang ho sika lesea la bona le phelang, le mofuthu le le keketehang, e seng popi.
Lintho Tse Thabisang le Boikarabelo
2. Batsoali ba lokela ho nahana joang ka lesea le sa tsoa tsoaloa, ’me ba tlameha hore ba be ba itokiselitse ho jara eng?
2 Empa ho beleha bana ka kutloisiso ho hloka hore batsoali ba nahane hore lesea le sa tsoa tsoaloa hase popi empa ke sebopuoa seo ba ikarabellang ho ’Mōpi ka bophelo ba sona le bokamoso ba sona. Ha ba tlisa ngoana lefatšeng, batsoali ba tlameha ho itokisetsa ho jara boikarabelo bo boholo ’me ba etse liphetoho kamoo ho hlokahalang. Ba kena lenaneong la lilemo tse 20 la ho fepa, la ho apesa, la ho hlokomela nakong ea ho kula le la ho ruta, empa ba sa tsebe se tlang ho hlaha moo qetellong.
3. Ke hobane’ng ha Liproverbia 23:24, 25 e ka sebelisoa ho batsoali ba bangata ba Bakreste?
3 Ka thabo, batsoali ba bangata ba Bakreste ba hōlisitse bana ba fetohileng bahlanka ba tšepahalang le ba ineetseng ba Jehova. Ba bang ba bone ha bana ba bona ba hōla ’me ba kenela tšebeletso ea nako e tletseng e le bo-pula-maliboho, baromuoa, kapa litho tsa lelapa la Bethele. Kannete ho ka boleloa tjena ka batsoali ba joalo: “Ntat’a ea lokileng o tla nyakalla haholo; ea tsoetseng ngoana ea bohlale o tla thaba ka eena. A a ke a thabe, ntat’ao, le eena ’m’ao; a nyakalle, ea u belehileng.”—Liproverbia 23:24, 25.
Masisa-pelo a Botsoali
4, 5. (a) Ho ea ka Mangolo ke eng se hlokoang ho baholo le bahlanka ba sebeletsang ba nang le bana? (b) Bana ba bang e ile ea e-ba “tlokotsi” joang ho bo-ntat’a bona?
4 Empa ha ho be joalo kamehla, le ho baholo ba nang le bana. Moapostola Pauluse o ile a ngola: “E ka khona molebeli a hloke sekoli, e be monna oa mosali a le mong, . . . ea busang ntlo ea hae hantle, ea khannelang bana ba hae kutlong ka bokhabane bohle. Hobane motho ha a sa tsebe ho busa ntlo ea hae, a ka lisa kereke ea Molimo joang?” Pauluse a eketsa: “Bahlanka ba kereke e be banna ba nang le basali ka bong, ba busang bana ba bona hantle le matlo a bona.”—1 Timothea 3:2-5, 12.
5 Ha e le hantle, baholo le bahlanka ba sebeletsang ba Bakreste ba ke ke ba nkoa ba ikarabella haeba bana ba bona, hang ha ba le lilemong, ba hana ho tsoela pele ho sebeletsa Jehova. Empa baa ikarabella bakeng sa bana ba bona ba tlaase lilemong kapa bana ba bona ba baholoanyane ba sa ntsaneng ba lula ka lapeng. Baholo le bahlanka ba sebeletsang ba lahlehetsoe ke litokelo tsa bohlokoa tsa tšebeletso hobane ba ile ba hlokomoloha kapa ba hlōleha ka ho tebileng ho finyella tlhokahalo ea Mangolo ea ‘ho busa matlo a bona le bana ba bona hantle.’ Bakeng sa ba joalo, le ba bang ba bangata, bana ba bona ba ba tliselitse masoabi ho feta thabo. Maele a reng: “Ngoana ea lehlasoa ke tlokotsi ho ntat’ae,” a ipakile e le ’nete hangata hakaakang!—Liproverbia 19:13.
Bontate Bo Nang le Kutloisiso
6. Banna ba Bakreste ba lokela ho ipotsa potso efe?
6 Banna bohle ba Bakreste, e-bang ba na le boikarabelo ka phuthehong kapa che, ba lokela hore ba boele ba nahanele phello eo ho hlokomela bana ba banyenyane e ka ’nang ea e-ba le eona boemong ba moea ba basali ba bona. Haeba mosali a se matla moeeng, lesea, kapa bana ba bangata ba banyenyane, ba tla ama joang boithuto ba mosali ba botho le menyetla ea hae ea ho kopanela mosebetsing oa ho bolela?
7. Ho ’nile ha etsahala joang ho basali ba bang ba Bakreste, ’me ke eng eo hangata e bakang boemo boo?
7 Na kamehla banna baa hlokomela hore ho hlokomela lesea kapa ngoana e monyenyane hangata ho thibela basali ba bona ho rua molemo o feletseng Thutong ea Buka ea Phutheho, libokeng tse Holong ea ’Muso, likopanong tsa potoloho le tsa setereke? Boemo bo joalo bo ka ba teng ka likhoeli, esita le lilemo, ha bana ba hlahlamana ka potlako. Ke ha tlhaho hore ntlheng ena, mojaro o oele haholo ho ’mè, ho e-na le ho ntate. Ka linako tse ling ho ’nile ha hlokomeloa hore ha banna ba bang ba Bakreste ba tsoela pele moeeng, haesita le ho isa ntlheng ea ho abeloa litokelo ka phuthehong, basali ba bona ba fokola moeeng. Hobane’ng? Hobane hangata bana ba bona ba banyenyane ba ba sitisa ho bea maikutlo libokeng, ho ithuta Bibele ka botebo, kapa ho kopanela ka ho lekaneng mosebetsing oa bopaki. Na bontate bo ka bitsoa bo nang le kutloisiso haeba bo lumella maemo a joalo ho tsoela pele?
8. Bo-ntate ba bangata ba kopanela mojarong oa ho hlokomela bana joang, ka melemo efe ho basali ba bona?
8 Ka lehlohonolo, ha ho be joalo kamehla. Bo-ntate ba bangata ba Bakreste ba etsa kahohle ho jara mojaro oa ho hlokomela bana. Ba phetha karolo ea bona e feletseng ho bona hore bana ba bona ba lula ba khutsitse nakong ea liboka tsa phutheho. Haeba ngoan’a bona a qala ho lla, kapa a e-ba leferesane, e mong o phomotsa e mong ka ho mo isa kantle bakeng sa taeo e loketseng. Ke hobane’ng ha e tlameha ho ba ’mè ea lahleheloang ke likarolo tsa liboka kamehla? Ha ba le lapeng, banna ba nahanelang ba thusa basali ba bona ka mesebetsi le ho robatsa bana e le hore monna le mosali ba ka lula fatše ’me ba beha maikutlo litabeng tsa moea ho khutsitse.
9. Ke eng e pakang hore hase kamehla bana e leng tšitiso?
9 Ha lintho li hlophisitsoe hantle ka phuthehong, bo-’mè ba banyenyane ba nang le bana ba masea ba ka kopanela tšebeletsong ea bopula-maliboho bo thusang. Ba bang e bile ke bo-pula-maliboho ba kamehla. Kahoo hase kamehla bana e leng tšitiso. Batsoali ba bangata ba Bakreste ba bontša moea o motle oa bopula-maliboho.
Ha Ba Na Bana Empa Ba Thabile
10. Banyalani ba bang ba entse qeto efe, ’me ba hlohonolofalitsoe joang?
10 Banyalani ba bang ba bacha ba ile ba etsa qeto ea ho lula ba se na bana esita le hoja basali bao ba ne ba ntse ba e-na le takatso e matla ea tlhaho ea ho ba le bana joaloka basali ba bang, ka ho lumellana le banna ba bona, ba ile ba etsa qeto ea hore ba ke ke ba e-ba le bana e le hore ba ka ineela ho sebeletseng Jehova ka nako e tletseng. Ba bangata ho bona ba sebelelitse joaloka bo-pula-maliboho kapa baromuoa. Hona joale ba ka hetla morao lilemong tseo ka teboho. Bonneteng, ha baa ba le bana ba nama. Empa ba entse barutuoa ba bacha ba ntseng ba rapela Jehova ka botšepehi. ‘Bana bana ba sebele tumelong’ le ka mohla ba ke ke ba lebala hore na ke mang eo e ileng ea e-ba kofuto ea ho ba tlisetsa “lentsoe la ’nete.”—1 Timothea 1:2; Ba-Efese 1:13; bapisa 1 Ba-Korinthe 4:14, 17; 1 Johanne 2:1.
11. (a) Banyalani ba bangata ba se nang bana ba sebeletsa Jehova hokae, ’me ke hobane’ng ha ba sa ikoahlaee? (b) Ho ka sebelisoa lengolo lefe ho banyalani bohle ba lutseng ba se na bana “ka baka la ’muso”?
11 Banyalani ba bang ba bangata lefatšeng lohle ba tetseng thabo ea botsoali ba ile ba khona ho sebeletsa Jehova mosebetsing oa potoloho, mosebetsing oa setereke, kapa Bethele. Bana le bona ba hetla morao ka ho khotsofala ha ba sheba bophelo ba bona boo ba bo phetseng ba sebeletsa Jehova le baena ba bona litokelong tsena tse khethehileng. Ha ba ikoahlaee. Le hoja ba sa ba le thabo ea ho tlisa bana lefatšeng lena, ba phethile karolo ea bohlokoa ho ntšetseng pele lithahasello tsa ’Muso mabaleng a bona a fapa-fapaneng a tšebeletso. Ho banyalani bana bohle ba lutseng ba se na bana “ka baka la ’muso,” ruri ho sebetsa lengolo le reng: “Molimo ha o khopo; o ke ke oa lebala mesebetsi ea lōna, le kamoo lerato la lōna le sebelitseng kateng ka baka la lebitso la oona, ha le babaletse bahalaleli, le joale le sa ba baballa.”—Mattheu 19:12; Ba-Heberu 6:10.
Taba Ea Botho
12. (a) Ke hobane’ng ha ho beleha bana e le tokelo e ikhethang? (b) Ke linakong life ho beleha bana e neng e le kabelo e fanoeng ke Molimo?
12 Joalokaha re bone qalehong ea puisano ena, ho beleha bana ke mpho ea Molimo. (Pesaleme ea 127:3) Ke tokelo e ikhethang eo libopuoa tsa moea tsa Jehova li se nang kabelo ho eona. (Mattheu 22:30) Ho ’nile ha e-ba le linako tseo ka tsona ho beleha bana e neng e le karolo ea mosebetsi oo Jehova a neng a o abetse bahlanka ba hae lefatšeng. Ho bile joalo ka Adama le Eva. (Genese 1:28) E bile ’nete ka baphonyohi ba Moroallo. (Genese 9:1) E ne e le thato ea Jehova hore bana ba Iseraele ba ngatafale ka ho beleha bana.—Genese 46:1-3; Exoda 1:7, 20; Deuteronoma 1:10.
13, 14. (a) Ho ka thoe’ng ka ho beleha bana kajeno, ’me ke ho nyatsa hofe ho sa lokelang? (b) Le hoja ho beleha bana mehleng ena ea bofelo e le taba ea botho, ho fanoa ka keletso efe?
13 Kajeno ho beleha bana hase karolo e khethehileng ea mosebetsi oo Jehova a o fileng batho ba hae. Leha ho le joalo, e sa ntsane e le tokelo eo a e fang banyalani haeba ba e lakatsa. Ka baka leo, banyalani ba Bakreste ha baa lokela ho nyatsuoa haeba ba etsa qeto ea ho ba le bana esita le bona banyalani ba tlohelang ho ba le bana ha baa lokela ho nyatsuoa.
14 Kahoo taba ea ho beleha bana mehleng ena ea bofelo ke taba ea botho eo banyalani ka bomong ba tlamehang ho iketsetsa qeto ka eona. Leha ho le joalo, kaha ‘nako e setseng e khutšoanyane,’ ke hantle ha banyalani ba ka lekanyetsa ka hloko le ka thapelo linnete tse emelang le tse tsoang ho tlisa bana lefatšeng mehleng ena. (1 Ba-Korinthe 7:29) Ba khethang ho ba le bana ha baa tlameha ho ela hloko ka ho feletseng feela lintho tse thabisang tseo ho beleha bana ho ka li tlisang empa le boikarabelo bo amehang le mathata a ka hlahelang bona le bana bao ba ba tlisang lefatšeng.
Haeba Ho Sa Reroa
15, 16. (a) Ke boikutlo bofe bo lokelang ho qobjoa ha ho hlaha kemaro e sa lebelloang, hona hobane’ng? (b) Ngoana ofe kapa ofe o lokela ho talingoa joang, ’me hoo ho akarelletsa boikarabelo bofe?
15 Ba bang ba ka ’na ba re: ‘Hoo hoa utloahala, empa ho thoe’ng haeba ngoana a tla a sa lebelloa?’ Sena se ’nile sa etsahalla banyalani ba bangata ba neng ba ela hloko ka ho feletseng ’nete ea hore ena hase nako e molemohali ea ho tlisa bana lefatšeng. Ba bang ba bona ba ne ba bile tšebeletsong ea nako e tletseng ka lilemo-lemo. Ba lokela ho talima ho fihla ha lesea le lecha le sa lebelloang joang?
16 Mona ke hona moo botsoali bo nang le kutloisiso bo sebetsang. Ke ’nete hore e ka ’na eaba kemaro e ne e sa lebelloa, empa batsoali ba Bakreste ba ke ke ba talima lesea le tlang e le le sa batloeng. Ho sa tsotellehe hore na ho fihla ha lona ho ka tlisa liphetoho life bophelong ba bona, ka sebele ha baa lokela ho ikutloa ba hloname ke lona. Ha e le hantle, ba ne ba ikarabella bakeng sa ho emoloa ha lona. Kaha joale le se le le teng, ba lokela ho amohela boemo ba bona bo fetohileng, ba tseba hore, ka tsela e ’ngoe e itseng, “nako le ketsahalo e sa lebelloang li oela” batho bohle. (Moeklesia 9:11, NW) E-bang ba ne ba ikemiselitse kapa che, ba ile ba kopanela ketsong ea pōpo eo Jehova Molimo e leng Mohloli oa eona. Ba lokela ho amohela ngoana oa bona e le letlotlo le bolokiloeng le halalelang ’me ka lerato ba nke boikarabelo ba bona joaloka ‘batsoali ba nang le kamano le Morena.’—Ba-Efese 6:1.
“Le Etse Tsohle ka Lebitso la Morena”
17. Moapostola Pauluse o ile a fa Bakolosse keletso efe, ’me keletso ee e ka lateloa joang kajeno?
17 Pelenyana a fana ka keletso litabeng tsa lelapa, moapostola Pauluse o ile a ngola: “Seo le se etsang, leha e ka ba eng le eng, ka ho bua, kapa ka ho sebetsa, le etse tsohle ka lebitso la Morena Jesu, le ntse le leboha ka eena Molimo Ntate.” (Ba-Kolosse 3:17-21) Boemong bofe kapa bofe boo Mokreste a ka iphumanang a le ho bona, o lokela ho leboha Jehova le ho nka monyetla oa ho ‘etsa tsohle ka lebitso la morena’ boemong ba hae.
18, 19. (a) Bakreste ba masooa le banyalani ba se nang bana ba ka ‘etsa tsohle ka lebitso la Morena’ joang? (b) Batsoali ba Bakreste ba lokela ho talima bana ba bona joang, ’me ba lokela ho ipeela pakane efe?
18 Mokreste ea khethileng ho lula e le lesooa ha a na ho sebelisa bolokolohi ba hae bakeng sa monyaka oa boikhabi, empa ho sebetsa “ka moea oohle joaloka ho Jehova,” haeba ho khoneha mofuteng o mong oa tšebeletso ea nako e tletseng. (Ba-Kolosse 3:23, NW; 1 Ba-Korinthe 7:32) Ka ho tšoanang, banyalani ba etsang qeto ea ho tlohela ho ba le bana ba ke ke ba ‘sebelisa lefatše ka botlalo’ ka boithati empa ba tla nea tšebeletso ea ’Muso sebaka se seholo ka hohle kamoo ba ka khonang bophelong ba bona.—1 Ba-Korinthe 7:29-31.
19 Ha e le Bakreste ba nang le bana, ba lokela ho amohela botsoali ba bona ka tsela e nang le kutloisiso. Ho fapana le ho talima bana ba bona e le tšitiso ea ho sebeletsa Jehova, ba lokela ho ba talima e le kabelo e khethehileng. Hoo ho tla akarelletsa eng? Koana, ha Mokreste ea ineetseng a kopana le motho e mong ea bontšang thahasello ’neteng, o qalisa thuto ea kamehla ea lehae ea Bibele le motho eo. Ha e se e qalisitse thuto, Paki e cheseha haholo, ’me e khutlela beke le beke e le ho thusa motho ea thahasellang ho etsa tsoelo-pele moeeng. Ho hlokahala ho tšoanang tabeng ea bana ba Mokreste. Thuto ea kamehla, eo ho nahannoeng ka eona hantle, e qaloang ngoana a sa le monyenyane kahohle kamoo ho ka khonehang ’me e tšoaroa kamehla, ea hlokahala ho thusa ngoana ho hōla moeeng le ho ithuta ho rata ’Mōpi oa hae. (2 Timothea 3:14, 15) Ho phaella moo, batsoali ba tla ba seli ho behela bana ba bona mohlala o motle oa boitšoaro ba Bokreste lapeng, joalokaha ba etsa Holong ea ’Muso. Hape moo ho khonehang ba tla nka boikarabelo ba ho koetlisa bana ba bona tšebeletsong ea tšimo. Ka tsela ena, ho phaella ho bolelleng batho ba bang ba baholo, ka thuso ea Jehova, batsoali ba tla batla ho ‘etsa bana ba bona barutuoa.’—Mattheu 28:19, NW.
Bana Nakong ea “Mahlomola a Maholo”
20. (a) Ke eng se ka pel’a rōna, ’me Jesu o ile a lemosa ka mathata afe? (b) Mantsoe a Jesu a sebetsa joang tabeng ea ho hōlisa bana nakong ea bofelo?
20 Ka pel’a rōna ke ‘mahlomola a tla ba maholo, ha e sa le le tšimolohong ea lefatše, ho fihlela joale, tsietsi e kalo e e-song ho ka e e-ba teng, ’me e ke keng ea hlola e e-ba teng.’ (Mattheu 24:21) E tla ba nako e mahlonoko bakeng sa batho ba baholo le bana ka ho tšoanang. Boprofeteng ba hae bo buang ka bofelo ba tsamaiso ea lintho ea joale, Jesu o profetile hore ’nete ea Bokreste e ne e tla arohanya malapa. O itse: “Ngoan’abo motho o tla neela ngoan’abo polaong, ntat’a motho a etse ngoan’a hae joalo, ’me bana ba tla tsohela batsoali ba bona matla, ba ba bolaee.” (Mareka 13:12) Ka ho hlakileng, ho beleha bana mehleng ea bofelo e ne e ke ke ea e-ba thabo e feletseng kamehla. Ho ne ho ka ’na ha tlisa masisa-pelo, masoabi, le eona kotsi, joalokaha mantsoe a Jesu a qotsitsoeng kaholimo a bontša.
21. (a) Le hoja ba nahana ka nepo ka bokamoso, ke hobane’ng ha batsoali ba sa lokela ho ameha ntle ho mabaka? (b) Tšepo ea bona e ka ba efe, bakeng sa bona le bana ba bona?
21 Empa le ha ba sheba ka nepo mathata a tlang, ba nang le bana ba banyenyane ha baa lokela ho tšoenyeha ntle ho mabaka ka bokamoso. Haeba ba lula ba tšepahetse ka bobona ’me ba etsa sohle seo ba ka se khonang ho hōlisa bana ba bona ‘ba ba rutela Moreneng,’ ba ka tšepa hore bana ba bona ba utloang ba tla amoheloa. (Ba-Efese 6:4; bapisa 1 Ba-Korinthe 7:14.) E le karolo ea “bongata bo boholo ba batho,” bona le bana ba bona ba banyenyane ba ka tšepa ho pholoha ‘mahlomola a maholo.’ Haeba bana ba joalo ba hōla ho ba bahlanka ba tšepahalang ba Jehova, kamehla ba tla be sa le ba mo leboha ka hore ba ile ba ba le batsoali ba nang le kutloisiso.—Tšenolo 7:9, 14; Liproverbia 4:1, 3, 10.
Lipotso tsa Tlhahlobo
◻ Ke lenaneo lefe la nako e telele leo ho tsoaloa ha ngoana ho le akarelletsang?
◻ Ke hobane’ng ha baholo ba bang le bahlanka ba sebeletsang ba lahlehetsoe ke litokelo tsa bona?
◻ Ke maemo afe ao monna oa Mokreste a lokelang ho nahana ka ’ona mabapi le ho ima ha mosali oa hae?
◻ Ke eng se pakang hore banyalani ba Bakreste ba ka hloka bana empa ea ’na ea e-ba ba thabileng?
◻ Batsoali ba lokela ho talima ho tsoaloa ha ngoana joang, ’me ke hobane’ng ha ba ka qoba ho ameha ntle ho mabaka ka bokamoso?
[Setšoantšo se leqepheng la 24]
Bo-ntate ba ka kopanela boikarabelo ba ho boloka bana ba khutsitse nakong ea liboka