16, 17. (a) Pauluse o ile a fumana sebete joang bakeng sa tšebeletso? (b) Ke mehato efe eo re lokelang ho e nka haeba re iphumana re tšaba likarolo tse itseng tsa tšebeletso ea Bokreste?

¹⁶ Pauluse o ile a ngolla Bakreste ba Thesalonika: ‘Ka mor’a hore pele re utloe bohloko le ho nyelisoa (feela joalokaha le tseba) Filippi, re ile ra iteta sebete ka Molimo oa rōna ho le bolella litaba tse molemo tsa Molimo ka ntoa e khōlō.’ (1 Bathesalonika 2:2) Pauluse le metsoalle ea hae ba ne ba ‘nyelisitsoe’ joang Filippi? Ho latela litsebi tse ling, lentsoe la Segerike le sebelisitsoeng ke Pauluse le hlalosa tšoaro e tlotlollang, e lihlong kapa e mabifi. Ba boholong Filippi ba ne ba ba shapile ka lithupa, ba ba kenya chankaneng le ho ba tlama ka metšoaso. (Liketso 16:16-24) Phihlelo eo e bohloko e ile ea ama Pauluse joang? Na ba leng Thesalonika, e leng motse o latelang leetong la hae la boromuoa, ba fumane Pauluse a ikhula ke tšabo? Che, o ‘ile a iteta sebete.’ O ile a hlōla tšabo ’me a tsoela pele ho bolela ka sebete.

¹⁷ Sebete sa Pauluse se ne se tsoa hokae? Ho eena ka boeena? Che, o itse o itetile sebete “ka Molimo oa rōna.” Buka e ’ngoe ea litšupiso ea bafetoleli ba Bibele e re polelo ena e ka ’na ea fetoleloa ka ho re: “Molimo o ile a ntša tšabo lipelong tsa rōna.” Kahoo, haeba u ikutloa u se sebete ka ho lekaneng tšebeletsong, kapa haeba u utloa u tšaba karolo e itseng ea eona, ke hobane’ng ha u sa ipiletse ho Jehova hore a u etsetse ntho e tšoanang? Mo kōpe hore a ntše tšabo pelong ea hao. Mo kōpe hore a u thuse ho iteta sebete bakeng sa mosebetsi ona. Ho phaella moo, nka mehato e meng e sebetsang. Ka mohlala, lokisetsa ho sebetsa le e mong ea nang le bokhoni bopaking ba mofuta o u thatafallang. Bo ka ’na ba ama tšimo ea khoebo, bopaki ba seterateng, bopaki bo sa reroang kapa bopaki ba thelefono. Mohlomong eo u sebetsang le eena a ka ’na a etella pele qalong. Haeba ho le joalo, shebella ’me u ithute. Empa joale itete sebete hore u iteke.

18. Re ka ’na ra ba le litlhohonolofatso life haeba re iteta sebete tšebeletsong ea rōna?

¹⁸ Haeba u hlile u iteta sebete, nahana hore na ho ka ’na ha etsahala eng. Ha u phehella ’me u sa itlohelle hore u nyahame, ho ka etsahala hore u be le liphihlelo tse molemo ha u buisana le ba bang ka ’nete, e leng liphihlelo tseo mohlomong u neng u sa tl’o ba le tsona haeba u ne u sa ho etsa. (Bona leqephe la 25.) U tla khotsofatsoa ke ho tseba hore u khahlisitse Jehova ka ho etsa ntho e ’ngoe e u thatafallang. O tla u hlohonolofatsa le ho u thusa hore u hlōle lintho tseo u li tšabang. Tumelo ea hao e tla ba matla haholoanyane. Ka sebele, ho ke ke ha etsahala hore ka nako eo u hahang tumelo ea ba bang, ebe ha u hahe ea hao.—Jude 20, 21.

Ba lle ba Iteta Sebete

HASE kamehla ho leng bonolo ho iteta sebete hore re bolele. Ha e le hantle, moapostola Pauluse o boletse hore ka lekhetlo le leng, o ile a etsa joalo “ka ntoa e khōlō.” (1 Bathesalonika 2:2) Na boiteko ba ho loana “ntoa” ea ho bolela bo na le molemo? Ha ho na tiiso ea hore ho tla ba le liphihlelo tse itseng tse khethehileng, feela batho ba Molimo ba atisa ho thabela hore ba ile ba iteta sebete. Nahana ka mehlala e itseng.

Ngoanana ea lilemo li robeli ea bitsoang Tara o ne a mametse ka hloko ha mosuoe oa hae a bolella tlelase hore nakong ea Ntoa ea II ea Lefatše, batšoaruoa ba Bajuda ba neng ba le likampong tsa mahloriso ba ne ba tlameha ho qhoaela Naleli ea Davida e tšehla hore ba tsejoe ka eona. Tara o ile a ipotsa hore na a ka bua. Oa hopola: “Ke ile ka rapela ke sa tutubala.” Ka mor’a moo o ile a phahamisa letsoho ’me a bolela hore Lipaki tsa Jehova le tsona li ne li le teng likampong tseo, ’me li ne li tlameha ho qhoaela lesela le pherese le likhutlo li tharo. Mosuoe o ile a thabela taba eo ’me a mo leboha. Tlhaloso eo ea Tara e ile ea bula tsela ea lipuisano tse eketsehileng le mosuoe eo, hoo hamorao a bileng a bontša tlelase eohle ea hae video ea Jehovah’s Witnesses Stand Firm Against Nazi Assault.

Guinea, Afrika Bophirimela, mohoeletsi e mong e monyenyane ea bitsoang Irène o ne a batla ho hatela pele tšebeletsong ea hae. Moromuoa ea neng a ithuta Bibele le eena o ile a mo khothalletsa hore a leke ho tsamaisetsa liithuti-’moho le eena limakasine tsa Molula-Qhooa le Tsoha! Irène o ne a le lekhonono hobane ho ne ho se mohla bana ba tlelase ea hae ba mo mamelang. Leha ho le joalo, ka lebaka la ho susumetsoa ke khothatso ea moromuoa, Irène o ile a etsa qeto ea hore o tla qala ka ho bua le seithuti seo ho neng ho bonahetse e le sona se hanyetsang ka ho fetisisa. Irène o ile a makala haholo hobane ngoanana enoa o ile a arabela hantle ’me a nka limakasine ka thahasello. Liithuti tse ling li ile tsa mo etsisa. Khoeling eo, Irène o ile a tsamaisa limakasine tse ngata ho feta tseo a neng a li tsamaisitse likhoeling tse hlano pele ho moo li kopane.

Trinidad, moholo e mong o ne a ikutloa a le lekhonono ho buisana le mosuoe-hlooho oa sekolo se seng hore a mo bontše hore makasine ea Tsoha! e molemo bakeng sa ho ruta.

Leha ho le joalo, o ile a iteta sebete. O re: “Ke ile ka rapela ha ke kena ka jareteng. Ke ile ka makala ha ke bona mosuoe-hlooho a thabile ka mokhoa o sa tloaelehang.” O ile a amohela makasine ea Tsoha! e neng e e-na le sehlooho se reng, “Ho na le Tšepo Efe Bakeng sa Bacha ba Kajeno?,” a ba a lumela hore o tla e sebelisa ha a ruta ka tlelaseng. Ho tloha ka nako eo, o amohetse limakasine tse 40 tse buang ka litaba tse fapa-fapaneng.

Joaloka mocha, kamehla Vaughn o ne a thatafalloa ke ho bolela. “Ke ne ke tšoha, liatla tsa ka li fufuleloa ’me ke ne ke peteketsa ha ke bua—ke ne ke sitoa ho bua butle.” Ho sa tsotellehe seo, e ile ea e-ba ’moleli oa nako e tletseng. Leha ho le joalo, ho ne ho se bonolo kamehla ho eena hore a be sebete ’me a bue. Ka lekhetlo le leng ka mor’a letsatsi le nyahamisang a batla mosebetsi, o ne a batla ho pakela motho e mong ka tereneng, “e le hore bonyane letsatsi leo le bosula le hlahise ho hong ho molemo.” Empa o ile a utloa a tšaba banna ba bahoebi ba shebahalang ba hlompheha ba neng ba le ka tereneng e tsamaeang “ka tlas’a lefatše.” Qetellong, o ile a iteta sebete hore a bue le monna-moholo ea neng a lutse pel’a hae. Ho ile ha tsoha moqoqo o molelele. Monna eo oa mohoebi o ile a re: “Lipotso tsa hao li ntle hoo li rōnang mocha oa lilemo tsa hao,” eaba oa botsa: “U tsoa sekolong sa boruti?” Vaughn o ile a araba, “Che, ke e mong oa Lipaki tsa Jehova.” Monna eo a bososela, eaba o re: “Oh, joale ke bona lebaka.”