Ke Hobane’ng ha U Lokela ho Boloka Botšepehi ba Hao?

“Jehova, nkahlole . . . ho ea ka botšepehi ba ka.”​—PES. 7:8.

1, 2. Ke maemo afe a tloaelehileng a ka etsang hore ho be thata hore Mokreste a tšepahale?

NAHANA ka liketsahalo tsena tse tharo: Moshanyana o songoa ke bao a kenang sekolo le bona. Ba leka ho mo hlohlelletsa hore a halefe, mohlomong a be a rohakane kapa a loane. Na o tla iphetetsa, kapa o tla itšoara ebe oa itsamaela? Ntate o mong lapeng o etsa lipatlisiso Inthaneteng. Ho hlaha lebokose k’homphieutheng ea hae le nang le molaetsa o khothalletsang hore a shebe Web site e litšila. Na o tla lekeha hore a bule Web site eo, kapa o tla leka ka hohle hore a e qobe? Mosali oa Mokreste o ntse a iqoqela le sehlotšoana sa barali babo rōna ’me joale moqoqo o leba hosele, ho se ho buuoa hampe ka morali e mong oabo rōna ka phuthehong. Na o tla kopanela moqoqong oo, kapa o tla leka ho fetola taba eo ho buuoang ka eona?

² Le hoja liketsahalo tsena li fapane, ho na le ntho eo li tšoanang ka eona: Kaofela ha tsona li amana le taba ea ho lula u le Mokreste ea tšepahalang. Na u nahana ka botšepehi ba hao ha u tobane le lintho tse u tšoenyang, tseo u li hlokang le lipakane tsa hao bophelong? Letsatsi le leng le le leng, batho ba nahana ka tsela eo ba shebahalang ka eona, bophelo ba bona, mathata a ho iphelisa, maima le manolo a setsoalle, mohlomong le litaba tsa lerato. Re ka ’na ra qeta nako e ngata haholo re nahana ka lintho tse joalo tse re tšoenyang. Leha ho le joalo, ke sefe seo e leng sa bohlokoa haholo ho Jehova ha a ntse a hlahloba lipelo tsa rōna? (Pes. 139:23, 24) Ke botšepehi ba rōna.

 3. Ke tlotla efe eo Jehova a re fang eona, hona re tla tšohla eng sehloohong see?

³ Jehova, Mofani oa “mpho e ’ngoe le e ’ngoe e molemo le neo e ’ngoe le e ’ngoe e phethahetseng,” o file e mong le e mong oa rōna limpho tsa mefuta-futa. (Jak. 1:17) Ke eena ea re fileng limpho tse kang ’mele, kelello le bophelo le bokhoni ba ho etsa lintho tse sa tšoaneng. (1 Bakor. 4:7) Leha ho le joalo, Jehova ha a re qobelle hore re tšepahale. O re tlohella hore re ikhethele hore na re tla tšepahala kapa che. (Deut. 30:19) Kahoo, ho hlokahala hore re hlahlobe hore na botšepehi ke eng. Hape, re tla hlahloba mabaka a mararo a hore na ke hobane’ng ha botšepehi e le ntho ea bohlokoa hakana.

Botšepehi ke Eng?

 4. Botšepehi bo akarelletsa eng, hona re ka ithuta eng ka molao oa Jehova o mabapi le mahlabelo a liphoofolo?

⁴ Ho bonahala eka batho ba bangata ha ba tsebe hantle hore na botšepehi ke eng. Ka mohlala, ha batho ba ikotla sefuba ka hore baa tšepahala, hangata baa be ba bolela hore ba bua ’nete. Ho bua ’nete ke habohlokoa, empa ho etsa joalo e mpa e le feela karolo ea botšepehi. Ho ea kamoo Bibele e bo sebelisitseng kateng, botšepehi bo akarelletsa ho ba le boitšoaro bo phethahetseng, bo nepahetseng. Mantsoe a Seheberu a amanang le “botšepehi” a tsoa motsong oa lentsoe le bolelang ntho e phetseng hantle, e feletseng, kapa e se nang sekoli. Le leng la mantsoe ana le sebelisoa mabapi le mahlabelo a neng a nyeheloa ho Jehova. Jehova o ne a amohela phoofolo ea sehlabelo hafeela e ne e phetse hantle, kapa e feletse. (Bala Levitike 22:19, 20.) Jehova o ne a khalemela ka thata batho ba neng ba hlokomoloha taelo ena ka boomo ka hore ba etse mahlabelo ka liphoofolo tse holofetseng, tse kulang, kapa tse foufetseng.​—Mal. 1:6-8.

5, 6. (a) Ke mehlala efe e bontšang hore hangata re nka ntho e feletseng e le ea bohlokoa? (b) Ho batho ba sa phethahalang, na botšepehi bo bolela ho phethahala? Hlalosa.

⁵ Taba ea ho batla kapa ho nka ntho e feletseng e le ea bohlokoa hase e makatsang. Ka mohlala, nahana ka motho ea bokellang libuka ea fumanang buka ea bohlokoa haholo ka mor’a ho batla ka nako e telele, empa a fumana hore e tsoile maqephe a mangata a bohlokoa. A khathetse matla, a ka ’na a e khutlisetsa shelefong. Kapa nahana ka mosali ea il’o reka litholoana ’marakeng. A hloletsoe ke ho fapana ha tsona le botle ba tsona o lula a ntse a li phetho-phethola. O khetha tse joang? Tse feletseng, le tse sa utloang bohloko. Molimo le eena o batla batho ba feletseng.​—2 Likron. 16:9.

⁶ Leha ho le joalo, u ka ’na ua ipotsa hore na ebe botšepehi bo hloka hore motho e be ea phethahetseng. Ka lebaka la sebe le ho se phethahale, re ka ’na ra nahana hore re tšoana le buka e sa fellang kapa tholoana e utloileng bohloko. Na ka linako tse ling u ikutloa joalo? Kholiseha hore Jehova ha aa lebella hore re phethahale ka ho feletseng. Le ka mohla ha aa lebella hore re etse se fetang matla a rōna.a (Pes. 103:14; Jak. 3:2) Leha ho le joalo, o ntse a lebeletse hore re boloke botšepehi. Kahoo, na ho na le phapang pakeng tsa ho phethahala le botšepehi? E, e teng. Ka mohlala: Mohlankana o rata moroetsana eo a tla mo nyala. Ho hlakile hore a ke ke a lebella hore moroetsana eo e be ea phethahetseng. Leha ho le joalo o ne a ka lebella hore moroetsana eo a mo rate ka pelo eohle ea hae, ke hore, a rate eena feela. Ka tsela e tšoanang, Jehova “ke Molimo ea batlang boinehelo bo khethehileng.” (Ex. 20:5) Ha aa lebella hore re be ba phethahetseng, empa o lebeletse hore re mo rate ka pelo eohle, re rapele eena feela.

7, 8. (a) Jesu o ile a beha mohlala ofe mabapi le botšepehi? (b) Hantle-ntle ka Mangolong botšepehi bo bolela’ng?

⁷ Sena se ka ’na sa re hopotsa karabo eo Jesu a ileng a fana ka eona ha a ne a botsoa hore na molao oa bohlokoa ho feta eohle ke ofe. (Bala Mareka 12:28-30.) Jesu ha aa ka a fana ka karabo feela, empa o ne a phela tumellanong le eona. O ile a beha mohlala o ka sehloohong tabeng ea ho rata Jehova ka kelello ea hae eohle, pelo ea hae eohle, moea oa hae oohle le ka matla a hae ’ohle. O ile a bontša hore botšepehi ha bo bontšoe ka lipolelo feela, empa bo bontšoa ka liketso tse ntle tse etsoang ka sepheo se setle. E le hore re boloke botšepehi, ho hlokahala hore re latele mehato ea Jesu.​—1 Pet. 2:21.

⁸ Kahoo, se boleloang ke botšepehi ba rōna, kamoo Mangolo a bo hlalosang kateng, ke sena: ho inehela ka pelo eohle ho Motho a le mong oa leholimo, e leng Jehova Molimo le ho inehela thatong ea hae le morerong oa hae o boletsoeng ka ho hlaka. Ho boloka botšepehi ho bolela hore bophelong ba rōna ba letsatsi le letsatsi, re tla batla ho khahlisa Jehova ka hohle-hohle. Bophelong ba rōna, re tla etelletsa pele lintho tseo a nkang hore ke tsa bohlokoa ka ho fetisisa. A re tšohleng mabaka a mararo a bontšang hore na ke hobane’ng ha ho etsa joalo e le habohlokoa hakana.

1. Botšepehi ba Rōna le Taba ea Bobusi ba Jehova

 9. Botšepehi ba rōna re le batho ka bomong bo amana joang le taba ea bobusi ba bokahohle?

⁹ Bobusi ba Jehova ha boa itšetleha ka botšepehi ba rōna. Bobusi ba hae bo lokile, ke ba ka ho sa feleng ebile ke ba bokahohle. Ho tla lula ho le joalo, ho sa tsotellehe hore na sebōpuoa sefe kapa sefe se re’ng kapa se etsa’ng. Leha ho le joalo, bobusi ba Molimo bo ile ba nyefoloa haholo maholimong le lefatšeng. Kahoo, bobusi ba hae bo lokela ho tlosoa qoso—ho tiisoe hore bo nepahetse le hore bo lokile ebile bo lerato—ka pel’a libōpuoa tsohle tse bohlale. Rōna Lipaki Tsa Jehova, re rata ho bua ka bobusi ba Molimo ba bokahohle le motho e mong le e mong ea tla mamela. Leha ho le joalo, re ka bontša joang hore re emela bobusi boo? Re bontša joang hore re khetha Jehova e le ’Musi oa rōna? Ka ho boloka botšepehi.

10. Ke qoso efe eo Satane a e entseng mabapi le botšepehi ba batho, ’me u ne u ka rata ho etsa joang ka qoso eo?

¹⁰ Hlokomela hore na botšepehi ba hao bo ameha joang tabeng ena. Ha e le hantle, Satane o ile a bolela hore ha ho motho ea tla emela bobusi ba Molimo, le hore ha ho motho ea tla sebeletsa Jehova ka lebaka la lerato le se nang boithati. Ka pel’a lekhotla le leholo la libōpuoa tsa moea, Diabolose o ile a re ho Jehova: “Letlalo bakeng sa letlalo, ’me motho o tla nehelana ka ntho e ’ngoe le e ’ngoe eo a nang le eona bakeng sa moea oa hae.” (Jobo 2:4) Hlokomela hore Satane o ne a sa qose monna ea lokileng Jobo feela, empa o ne a qosa le batho ka kakaretso. Ke ka lebaka leo Bibele e bitsang Satane “moqosi oa barab’abo rōna.” (Tšen. 12:10) O nyelisa Jehova ka ho bolela hore Bakreste ba ke ke ba tšepahala, ho akarelletsoa le uena. Satane o bolela hore u tla koenehela Jehova e le hore u pholose bophelo ba hao. Liqoso tsee li etsa hore u ikutloe joang? Na u ne u ke ke ua rata hore u fuoe monyetla oa ho bontša hore Satane o leshano? Ka ho boloka botšepehi ba hao, u ka bontša hore o leshano.

11, 12. (a) Ke mehlala efe e bontšang kamoo liqeto tsa rōna litabeng tsa letsatsi le letsatsi li amanang kateng le taba ea botšepehi ba rōna? (b) Ke hobane’ng ha ho boloka botšepehi e le tlotla?

¹¹ Kahoo, taba ea botšepehi ba hao e etsa hore boitšoaro ba hao ba letsatsi le letsatsi le liqeto tsa hao e be tsa bohlokoa. Nahana hape ka liketsahalo tse tharo tseo re buileng ka tsona pejana. Batho bao ho builoeng ka bona moo ba ne ba ka bontša botšepehi joang? Moshanyana ea neng a songoa ke bao a kenang sekolo le bona o ikutloa a lekehile hore a ba halefele, empa o hopola keletso ena: “Le se ke la iphetetsa, baratuoa, empa le fe khalefo sebaka; kaha ho ngoliloe: ‘Phetetso ke ea ka; ke tla buseletsa, ho bolela Jehova.’” (Bar. 12:19) Oa itsamaela. Ntate ea sebelisang Inthanete o ne a ka ’na a sheba litšoantšo tse tsosang takatso empa o hopola molao-motheo o mantsoeng ana a Jobo: “Ke hlabile selekane le mahlo a ka. Kahoo nka ela moroetsana hloko joang?” (Jobo 31:1) Ka ho tšoanang, ntate eo ha a lumelle mahlo a hae hore a shebe litšoantšo tse litšila, o li qoba joalokaha eka ke chefo. Mosali ea neng a qoqa le ba bang moo a neng a ka ’na a utloa ha ho buuoa hampe ka ba bang oa inahana, o hopola taelo e reng: “E mong le e mong oa rōna a khahlise moahelani oa hae ho se leng molemo bakeng sa ho mo haha.” (Bar. 15:2) Haeba a ne a ka kopanela ha ho buuoa hampe ka motho e mong seo e ne e ke ke ea e-ba se hahang. Sena se ne se ke ke sa hlahisa morali’abo oa Mokreste hantle, ebile se ne se ke ke sa khahlisa Ntate oa hae oa leholimo. Kahoo o laola leleme la hae ’me o fetola taba eo ho buuoang ka eona.

¹² Liketsahalong tsena kaofela, Mokreste o etsa khetho eo ka eona ha e le hantle a reng: ‘Jehova ke ’Musi oa ka. Ke tla leka ho etsa se mo khahlisang tabeng ena.’ Na le uena u leka ho khahlisa Jehova linthong tseo u li khethang le ha u etsa liqeto? Ha u etsa joalo, u hlile u mamela mantsoe a khothatsang a tlalehiloeng ho Liproverbia 27:11 a reng: “Mora oa ka, hlalefa ’me u thabise pelo ea ka, e le hore nka araba ea ’nyelisang.” Ke tlotla e kaakang eo re nang le eona ea ho thabisa pelo ea Molimo! Na ha rea lokela ho etsa sohle se matleng a rōna hore re boloke botšepehi ba rōna?

2. Jehova o re Ahlola a Itšetlehile ka Botšepehi ba Rōna

13. Mantsoe a Jobo le a Davida a bontša joang hore Jehova o re ahlola a itšetlehile ka botšepehi ba rōna?

¹³ Rea hlokomela hore botšepehi bo re thusa hore re emele bobusi ba Jehova. Kahoo, Molimo a ka re ahlola a itšetlehile ka sena. Jobo o ne a utloisisa ’nete ena hantle. (Bala Jobo 31:6.) Jobo o ne a tseba hore Molimo o bekha batho bohle “sekaleng se nepahetseng,” a sebelisa tekanyetso ea Hae ea toka e phethahetseng, ho bekha botšepehi ba rōna. Ka tsela e tšoanang Davida o ile a re: “Jehova o tla liha kahlolo holim’a lichaba. Jehova, nkahlole ho ea ka ho loka ha ka le ho ea ka botšepehi ba ka bo ka ho ’na. . . . Molimo e le ea lokileng o leka pelo le liphio.” (Pes. 7:8, 9) Rea tseba hore Molimo a ka sheba ka hare-hare ho motho, e leng ‘pelong le liphiong’ tsa tšoantšetso. Leha ho le joalo, re lokela ho hopola hore na ke sefe seo a se batlang. Joalokaha Davida a boletse, Jehova o re ahlola ho latela botšepehi ba rōna.

14. Ke hobane’ng ha le ka mohla re sa lokela ho nahana hore ho se phethahale ha rōna, le boetsalibe li re thibela hore re boloke botšepehi ba rōna?

¹⁴ Nahana Jehova Molimo a phenya lipelo tsa batho ba limilione tse likete kajeno. (1 Likron. 28:9) Ke hangata hakae a fumanang motho ea bolokang botšepehi ba Bokreste? Ka sebele, ke ka seoelo! Leha ho le joalo, ha rea lokela ho nahana hore ho se phethahale ha rōna ho re thibela hore re boloke botšepehi. Ho fapana le moo, re na le lebaka le letle la ho tšepa hore, joaloka Davida le Jobo, Jehova o tla fumana hore re ntse re boloka botšepehi le hoja re sa phethahala. Hopola hore ho phethahala hase tiiso ea hore re tla boloka botšepehi ba rōna. Ke batho ba bararo feela ba phethahetseng ba kileng ba phela lefatšeng lena, ’me ba babeli ba bona, e leng Adama le Eva, ha baa ka ba boloka botšepehi. Leha ho le joalo, batho ba limilione ba sa phethahalang ba ’nile ba atleha ho etsa joalo. Le uena u ka atleha.

3. Botšepehi bo Hlokahala Haholo e le Hore re be le Tšepo

15. Davida o ile a bontša joang hore botšepehi bo hlokahala haholo e le hore re be le tšepo ea bokamoso?

¹⁵ Kaha Jehova o re ahlola a itšetlehile ka botšepehi ba rōna, bo hlokahala haholo e le hore re be le tšepo ea bokamoso. Davida o ne a tseba hore sena ke ’nete. (Bala Pesaleme ea 41:12.) O ne a nka tšepo ea ho hlokomeloa ke Molimo ka ho sa feleng e le ntho ea bohlokoa haholo. Joaloka Bakreste ba ’nete kajeno, Davida o ne a e-na le tšepo ea ho phela ka ho sa feleng, a ntse a tsoela pele ho atamela ho Jehova Molimo ebile a ntse a mo sebeletsa. Davida o ne a tseba hore o ne a lokela ho boloka botšepehi e le hore a tle a bone ha tšepo ea hae e phethahala. Ka ho tšoanang, Jehova oa re tšehetsa, oa re ruta, oa re tataisa ebile oa re hlohonolofatsa ha re ntse re boloka botšepehi ba rōna.

16, 17. (a) Ke hobane’ng ha u ikemiselitse hore u tla boloka botšepehi ba hao kamehla? (b) Ho tla tšohloa lipotso life sehloohong se latelang?

¹⁶ Ho hlokahala hore re be le tšepo e le hore re thabe hona joale. E ka re fa thabo eo re e hlokang e le hore re sebetsane le linako tse thata. Tšepo e boetse e ka sireletsa monahano oa rōna. Hopola hore, Bibele e tšoantša tšepo le helmete. (1 Bathes. 5:8) Joalokaha helmete e sireletsa hlooho ea lesole ntoeng, tšepo e sireletsa likelello tsa rōna maikutlong a mabe le a ho felloa ke tšepo ao Satane a a khothalletsang lefatšeng lena la khale le shoang. Ka sebele, bophelo e ba lefeela ha re se na tšepo. Re lokela ho itlhahloba ka botšepehi, re ntse re le hlokolosi ho hlahloba botšepehi ba rōna le tšepo e amanang le bona. U se ke ua lebala hore ha u boloka botšepehi, u tšehetsa bobusi ba Jehova ebile u sireletsa tšepo ea hao ea bohlokoa ea bokamoso. E se eka kamehla u ka boloka botšepehi ba hao!

¹⁷ Kaha botšepehi ke ba bohlokoa haholo, ho na le lipotso tse ling tseo re lokelang ho li hlahloba. Re ka etsa joang hore re be le botšepehi? Re ka bo boloka joang? Hona ho ka etsoa joang haeba ka nakoana motho e mong a sa ka a bo boloka? Lipotso tsena li tla tšohloa sehloohong se latelang.

[Mongolo o botlaaseng ba leqephe]

U ka Araba Joang?

• Botšepehi ke eng?

• Botšepehi bo amana joang le taba ea bobusi ba bokahohle?

• Botšepehi bo thusa joang hore re be le tšepo?

[Litšoantšo tse leqepheng la 5]

Bophelong ba letsatsi le letsatsi re thulana le mathata a mangata a etsang hore ho be thata ho boloka botšepehi