Itokisetse Letsatsi la Jehova!

Lintlha tse Khōlō tsa Ba-Thessalonika ba Pele

LETSATSI la Jehova! Bakreste ba Thessalonika ea boholo-holo ba ne ba nahana hore le ne le se le atametse. Na ba ne ba nepile? Le ne le tla tla neng? Eo ke taba e ’ngoe ea bohlokoa eo ho builoeng ka eona lengolong la pele la moapostola Pauluse le eang ho Bathessalonika, leo a ileng a le romela a le Korinthe hoo e ka bang ka selemo sa 50 sa Mehla ea rōna e Tloaelehileng.

Pauluse le Silase ba ile ba theha phutheho Thessalonika, setsi sa puso ea profensi ea Roma, Macedonia. (Liketso 17:1-4) Hamorao, lengolong la hae la pele le eang ho Bathessalonika, Pauluse o ile a fana ka pabatso, a fana ka taeo, ’me a bua ka letsatsi la Jehova. Le rōna re ka rua molemo lengolong lena, haholo-holo kaha hona joale letsatsi la Jehova le se le atametse haholo.

Babatsa ’me u Khothatse

Pele Pauluse o ile a babatsa Bathessalonika. (1:1-10) Pabatso e ne e loketse bakeng sa mosebetsi oa bona o tšepahalang le mamello ea bona. Hape, ho ne ho babatseha hore ba ile ba “amohela lentsoe, har’a matšoenyeho a maholo, ka thabo ea Moea o Halalelang.” Na u babatsa ba bang, joalokaha Pauluse a entse?

Moapostola o ne a behile mohlala o motle. (2:1-12, NW) Ho sa tsotellehe tšoaro e mpe Filippi, ‘ka thuso ea Molimo o ile a ba le sebete sa ho bolela litaba tse molemo’ ho Bathessalonika. O ne a ile a qoba ho fana ka thoriso e fetelletseng, ho lakatsa lintho tsa ba bang, le ho batla thoriso. Pauluse ha aa ka a fetoha moroalo o bakelang ba bang litšenyehelo tse boima empa o ile a ba bonolo ho bona joalokaha ’mè ea anyesang a le bonolo joalo ho ngoana oa hae. Ke mohlala o motle hakaakang ho baholo kajeno!

Mantsoe a latelang a Pauluse a ile a khothalletsa Bathessalonika ho lula ba tiile ha ba hlorisoa. (2:13–3:13) Ba ne ba ile ba mamella tlhoriso e tsoang ho batho ba habo bona, ’me Timothea o ne a ile a tlisetsa Pauluse tlaleho e ntle ka boemo ba bona ba moea. Moapostola o ile a rapella hore ba hōle leratong le hore lipelo tsa bona li tiisoe. Ka ho tšoanang, hona joale Lipaki tsa Jehova li rapella balumeli-’moho ba hlorisoang, lia ba khothatsa haeba ho khoneha, ’me li thabela litlaleho tsa botšepehi ba bona.

Lulang le Falimehile Moeeng!

Ka mor’a tsena Bathessalonika ba ile ba boela ba fumana keletso. (4:1-18, NW) Ba ne ba lokela ho tsamaea ka botlalo tseleng e thabisang Molimo, ba bonahatse lerato le eketsehileng la boena le ho sebetsa ka matsoho a bona bakeng sa ho finyella litlhoko tsa bona. Ho feta moo, ba ne ba lokela ho tšelisana ka tšepo ea hore nakong ea ho ba teng ha Jesu balumeli ba tsoetsoeng ka moea ba neng ba se ba shoele ba ne ba tla tsoha pele ’me ba kopanngoe le eena. Ka mor’a moo, ha batlotsuoa ba ntseng ba phela ba e-shoa ’me ba tsosoa ba ne ba tla kopana le Kreste le ba neng ba se ba tsoselitsoe bophelong ba leholimo.

Ha a tsoela pele Pauluse o ile a bua ka letsatsi la Jehova ’me a fana ka keletso e eketsehileng. (5:1-28, NW) Letsatsi la Jehova le ne le tla tla joaloka lesholu, ’me ntle le pelaelo timetso ea tšohanyetso e ne e tla tla ka mor’a mohoo: “Khotso le tšireletseho!” Kahoo Bathessalonika ba ne ba lokela ho lula ba falimehile moeeng, ba sirelelitsoe ke poleiti ea sefuba ea tumelo le lerato le tšepo ea poloko joaloka heleme. Ba ne ba lokela ho ba le tlhompho e tebileng ho ba okametseng ka phuthehong ’me ba ne ba lokela ho tela bokhopo, joalokaha le rōna re tlameha ho bo tela.

Lengolo la pele la Pauluse le eang ho Bathessalonika le lokela ho re susumelletsa ho babatsa le ho khothatsa balumeli-’moho. Le boetse le lokela ho re susumelletsa hore re behe mohlala o motle oa boitšoaro le boikutlo. ’Me ka sebele keletso ea lona e ka re thusa ho itokisetsa letsatsi la Jehova.

[Lebokose/Setšoantšo se leqepheng la 22]

Poleiti ea Sefuba le Heleme: Ha Pauluse a khothalletsa phalimeho moeeng, o ile a ngola: “A re hlaphoheloeng ’me re apare poleiti ea sefuba ea tumelo le lerato le tšepo ea poloko joaloka heleme.” (1 Ba-Thessalonika 5:8, NW) Poleiti ea sefuba e ne e le tšireletso ea sefuba ea seaparo sa ntoa sa mohlabani, e entsoeng ka makhakhapha a tšepe, liketane, kapa tšepe e thata. Ka ho tšoanang, poleiti ea sefuba ea tumelo ea re sireletsa moeeng. ’Me ho thoe’ng ka heleme ea boholo-holo? Hangata e ne e etsoa ka tšepe, e le katiba ea masole e etselitsoeng ho sireletsa lesole nakong ea ntoa. Joalokaha heleme e ne e sireletsa hlooho ea mohlabani, ka ho tšoanang tšepo ea poloko le eona e sireletsa matla a kelello, ka hona e thusa Mokreste ho boloka botšepehi. Ke habohlokoa hakaakang hore batho ba Jehova ba apare seaparo se joalo sa lihlomo tsa moea!—Ba-Efese 6:11-17.