“Ho Thaba ba Elang Hloko Tlhoko ea Bona ea Moea”

HA LINONYANA li tsoha hoseng, li atisa ho bina-bina ho se hokae li ntan’o fofa li e’o batla lijo. Ebe mantsiboea li khutlela moo li robalang teng, li bina-bina ho se hokae hape li ntan’o ithoballa. Ka nako e itseng ea selemo lia kopana, ebe lia behela ’me li hōlise malinyane. Liphoofolo tse ling le tsona li phela ka tsela e tšoanang e ka tsejoang esale pele.

Rōna batho ha re joalo. Ke ’nete hore rea ja, rea robala, re ba le bana, empa ba bangata ba rōna ha re khotsofatsoe ke seo feela. Re batla ho tseba hore na re phelela eng. Re batla ho fumana morero bophelong ba rōna. Re boetse re lakatsa ho ba le tšepo ka bokamoso. Boikutlo bona bo tebileng ba hore re hloka lintho tsena bo bontša hore batho ba na le tšobotsi e ikhethang—hore ba hloka lintho tsa moea ebile ba na le matla a ho li hahamalla.

Re Entsoe ka Setšoantšo sa Molimo

Bibele e hlalosa lebaka leo ka tlhaho motho a hlokang lintho tsa moea ka lona, ha e re: “Molimo a bōpa motho ka setšoantšo sa hae, a mo bōpa ka setšoantšo sa Molimo; a ba bōpa e le e motona le e motšehali.” (Genese 1:27) Hore ebe re entsoe ka “setšoantšo sa Molimo” ho bolela hore le hoja re silafalitsoe ke sebe le ho se phethahale, re khona ho bonahatsa litšobotsi tse itseng tsa Molimo. (Baroma 5:12) Ka mohlala, re khona ho qapa lintho. Re boetse re na le matla a ho sebelisa bohlale ho isa bohōleng bo itseng, ho bonahatsa toka le bokhoni bo itseng ba ho bontšana lerato le nang le boitelo. Ho feta moo, re khona ho nahana ka se etsahetseng nakong e fetileng le ho rera bokamoso.—Liproverbia 4:7; Moeklesia 3:1, 11; Mikea 6:8; Johanne 13:34; 1 Johanne 4:8.

Se bontšang ka ho hlaka hore re na le matla a ho hahamalla lintho tsa moea ke takatso ea tlhaho eo re nang le eona ea ho rapela Molimo. Re ke ke ra fumana thabo ea sebele le e tšoarellang haeba re sa khotsofatse ka ho loketseng seo re se hlokang, e leng ho ba le kamano e ntle le ’Mōpi oa rōna. Jesu o ile a re: “Ho thaba ba elang hloko tlhoko ea bona ea moea.” (Matheu 5:3) Leha ho le joalo, re lokela ho ba hlokolosi hore re khotsofatsa tlhoko eo ka ’nete ea moea—ke hore seo e leng ’nete ka Molimo, litekanyetso tsa hae le seo a se reretseng moloko oa batho. Re ka fumana ’nete ea moea hokae? Ka Bibeleng.

“Lentsoe la Hao ke ’Nete”

Moapostola Pauluse o ile a ngola a re: “Lengolo lohle le bululetsoe ke Molimo ’me le molemo bakeng sa ho ruta, bakeng sa ho khalemela, bakeng sa ho otlolla lintho.” (2 Timothea 3:16) Mantsoe ana a Pauluse a lumellana le a Jesu, eo ha a ne a rapela Molimo a ileng a re: “Lentsoe la hao ke ’nete.” Kajeno, rea tseba hore Lentsoe leo ke Bibele e Halalelang, ’me re tla be re etsa ka bohlale ha re netefatsa hore seo re se lumelang le litekanyetso tsa rōna li lumellana le se ka Bibeleng.—Johanne 17:17.

Ha re bapisa seo re se lumelang le se ka Lentsoeng la Molimo, re etsisa batho ba Berea ea boholo-holo, ba ileng ba netefatsa hore lithuto tsa Pauluse li ne li lumellana le Mangolo. Ho e-na le hore Luka a nyatse Baberea bao, o ile a babatsa tsela eo ba etsang lintho ka eona. O ile a ngola a re: “Ba ile ba amohela lentsoe ka tabatabelo e khōlō ea kelello, ba hlahloba Mangolo ka hloko letsatsi le leng le le leng mabapi le hore na lintho tsena li joalo kapa che.” (Liketso 17:11) Kaha kajeno ho na le lithuto tse ngata tse hanyetsanang tabeng ea bolumeli le ea boitšoaro, ke habohlokoa hore re etsise mohlala oa Baberea bao ba neng ba e-na le likelello tse bulehileng.

Tsela e ’ngoe eo motho a ka tsebang ’nete ea moea ka eona ke ha a bona kamoo e amang bophelo ba batho kateng. (Matheu 7:17) Ka mohlala, ho phela ka ’nete ea Bibele ho lokela ho etsa motho hore e be monna ea molemo, ntate ea molemo, mosali ea molemo, kapa ’mè ea molemo, kahoo ho tlatsetse thabong ea lelapa le ho tlisetseng motho khotsofalo. Jesu o ile a re: “Ho thaba ba utloang lentsoe la Molimo ’me ba le boloka.”—Luka 11:28.

Mantsoe ao a Jesu a re hopotsa a builoeng ke Ntate oa hae oa leholimo, ea ileng a re ho Baiseraele ba boholo-holo: “’Na, Jehova, ke Molimo oa hao, ke ’na Ea u rutang hore u itsoele molemo, Ea etsang hore u tsamaee tseleng eo u lokelang ho tsamaea ka eona. Hoja u ka ela litaelo tsa ka hloko! Joale khotso ea hao e ne e tla tšoana le nōka, ’me ho loka ha hao ho tšoane le maqhubu a leoatle.” (Esaia 48:17, 18) Ka sebele bohle ba ratang molemo le ho loka ba ne ba tla susumetsoa ke boipiletso boo bo lerato!

Ba Bang ba Rata “Hore Litsebe Tsa Bona li Tsikinyetsoe”

Molimo o ile a ipiletsa ho Baiseraele ka tsela eo e mofuthu hobane ba ne ba khelosoa ke mashano a bolumeli. (Pesaleme ea 106:35-40) Le rōna ka ho tšoanang re lokela ho itebela khahlanong le mashano. Ha Pauluse a ne a ngola ka batho ba neng ba ipolela hore ke Bakreste o ile a re: “Ho tla ba le nako ea ha ba sa tl’o mamella thuto e phelisang hantle, empa, tumellanong le litakatso tsa bona, ba tla ipokellela mesuoe hore litsebe tsa bona li tsikinyetsoe; ’me ba tla retelletsa litsebe tsa bona hōle le ’nete.”—2 Timothea 4:3, 4.

Baeta-pele ba bolumeli ba tsikinyetsa litsebe tsa batho ka ho lumella mekhoa e khotsofatsang litakatso tse fosahetseng, e kang ho kopanela liphate ka ntle ho lenyalo, bosodoma le botahoa. Bibele e bontša ka ho hlaka hore ba amohelang lintho tse joalo le ba li etsang “ba ke ke ba rua ’muso oa Molimo.”—1 Bakorinthe 6:9, 10; Baroma 1:24-32.

Ruri ho hlokahala sebete hore motho a phele ka litekanyetso tsa Bibele, haholo-holo ha a songoa, empa seo se ka etsoa. Ba bang ba bangata har’a Lipaki Tsa Jehova e ne e le makhoba a lithethefatsi, matahoa, lihlola, linokoane, masholu le batho ba leshano. Empa ba ile ba nka Lentsoe la Molimo ka ho teba ’me ka thuso ea moea o halalelang ba etsa liphetoho bophelong ba bona e le hore ba “tsamaee ka mokhoa o tšoanelang Jehova.” (Bakolose 1:9, 10; 1 Bakorinthe 6:11) Ha ba se ba le khotsong le Molimo, ba ile ba boela ba fumana khotso ea kelello, ’me joalokaha re tla bona, ba ba le tšepo ea sebele ka bokamoso.

Tšepo ea ’Muso

’Muso oa Molimo o tla tlisa khotso e sa feleng eo Bibele e e tšepisang batho ba mamelang. Jesu o ile a re thapelong ea mohlala: “’Muso oa hao o ke o tle. Thato ea hao e ke e etsahale lefatšeng, joalokaha e etsahala leholimong.” (Matheu 6:10) E, ke ’Muso oa Molimo feela o ka tiisang hore thato ea Molimo ea etsahala lefatšeng. Hobane’ng? Hobane ’Muso oo oa leholimo—e leng puso e taolong ea Jesu Kreste—ke tsela eo Molimo a e sebelisang ho bonahatsa hore O na le tokelo ea ho busa holim’a lefatše.—Pesaleme ea 2:7-12; Daniele 7:13, 14.

Jesu Kreste e le Morena ’Musong oo oa leholimo, o tla lokolla batho ba mamelang botlamuoeng ba mofuta o mong le o mong, ho akarelletsa litlamo tse thata tsa sebe sa Adama le ho kula le lefu tse tlisitsoeng ke sebe seo. Tšenolo 21:3, 4 e re: “Bonang! Tente ea Molimo e ho moloko oa batho . . . [Jehova Molimo] o tla hlakola meokho eohle mahlong a bona, lefu ha le sa tla hlola le e-ba teng, ’me ho siama kapa ho bokolla kapa bohloko ha li sa tla hlola li e-ba teng. Lintho tsa pele li fetile.”

Ho tla rena khotso e sa feleng lefatšeng ka bophara. Ke hobane’ng ha re ka kholiseha hore seo se tla etsahala? Lebaka le hlalositsoe ho Esaia 11:9, e reng: ‘[Bafo ba ’Muso] ba ke ke ba ntša kotsi leha e le efe kapa ba baka tšenyo leha e le efe thabeng eohle ea ka e halalelang; hobane ka sebele lefatše le tla tlala tsebo ea Jehova joalokaha metsi a koahetse leoatle.’ E, motho e mong le e mong lefatšeng o tla ba le tsebo e nepahetseng ka Molimo ’me o tla mo mamela. Na eo hase tebello e thabisang? Haeba ho joalo, joale ke nako ea hore u qale ho amohela “tsebo ea Jehova.”

Na U Tla Mamela Molaetsa oa ’Muso?

Molimo o tla sebelisa ’Muso oo ho felisa mesebetsi eohle ea Satane le ho ruta batho litsela tsa Hae tse lokileng. Kahoo, ha ho makatse hore ebe taba e ka sehloohong eo Jesu a neng a ruta ka eona e ne e le ’Muso. O ile a re: “Ke tla bolela litaba tse molemo tsa ’muso oa Molimo . . . , hobane ke rometsoe sena.” (Luka 4:43) Kreste o ile a laela barutuoa ba hae hore ba bolelle ba bang molaetsa oo. (Matheu 28:19, 20) O ile a bolela esale pele a re: “Litaba tsena tse molemo tsa ’muso li tla boleloa lefatšeng lohle leo ho ahiloeng ho lona hore e be bopaki ho lichaba tsohle; joale e ntan’o ba hona bofelo bo tla tla.” (Matheu 24:14) Bofelo boo bo ntse bo atamela ka potlako. Ka hona, ruri ke habohlokoa hore batho ba lipelo li tšepahalang ba mamele litaba tse molemo tse pholosang bophelo!

Albert, eo ho buuoeng ka eena sehloohong se fetileng, o ile a utloa molaetsa oa ’Muso ha mosali oa hae le mora ba qala ho ithuta Bibele le Lipaki Tsa Jehova. Qalong, Albert o ne a belaela. O ile a ba a kōpa moruti oa moo ba lulang teng hore a etele mosali oa hae le mora e le hore a talole Lipaki. Empa moruti eo ha aa ka a batla ho itšunya-tšunya. Kahoo Albert o ile a etsa qeto ea hore o tla thōla a mamele ha ba ntse ba buisana ka Bibele e le hore a hlahatse liphoso leha e le life. Ka mor’a ho mamela puisano e le ’ngoe feela, o ile a kopanela thutong, a labalabela ho ithuta ho eketsehileng. Hamorao o ile a hlalosa se entseng hore a fetohe. O ile a re: “Sena ke sona seo esale ke se batla.”

Qetellong, Albert o ile a qala ho khotsofatsa tlhoko ea hae ea moea, ’me ha a ikoahlaee ka seo. ’Nete ea Bibele e mo file seo esale a se batla bophelo bohle ba hae—e leng tharollo ea ho hloka toka le bobolu bo atileng hohle le ho mo fa tšepo ka bokamoso. ’Nete ea Bibele e mo file khotso ea kelello. Na tlhoko ea hao ea moea e-ea khotsofatsoa? Ka kōpo sheba ho se hokae lipotso tse thathamisitsoeng lebokoseng le leqepheng la 6. Haeba u ka thabela ho fumana boitsebiso bo eketsehileng, Lipaki Tsa Jehova li tla thabela ho u thusa.

[Lebokose/Setšoantšo se leqepheng la 6]

NA TLHOKO EA HAO EA MOEA E-EA KHOTSOFATSOA?

Na u khotsofaletse lijo tsa moea tseo u li fumanang? Re kōpa u bale lipotso tse latelang ’me u tšoaee tseo u ka li arabelang ka nepo.

□ Molimo ke mang, hona lebitso la hae ke mang?

□ Jesu Kreste ke mang? Ke hobane’ng ha a ile a tlameha ho shoa? Lefu la hae le ka u tsoela molemo joang?

□ Na Diabolose o teng? Haeba o teng, o tsoa hokae?

□ Ho etsahala’ng ka rōna ha re e-shoa?

□ Morero oa Molimo ke ofe ka lefatše le moloko oa batho?

□ ’Muso oa Molimo ke eng?

□ Molimo o behile litekanyetso life tsa boitšoaro?

□ Ka lapeng, Molimo o abetse monna le mosali likarolo life? Ke melao-motheo efe e meng ea Bibele e tlatsetsang thabong ea lelapa?

Haeba u sa nepisise karabo potsong leha e le efe ho tsena, u ka ’na ua kōpa bukana ea Ke Eng Seo Molimo a se Hlokang ho Rōna? Bukana ena e hatisitsoeng ke Lipaki Tsa Jehova ka lipuo tse ka bang 300, e tšohla lithuto tse 16 tsa motheo tsa Bibele ’me e fana ka likarabo tsa Mangolo lipotsong tsohle tse thathamisitsoeng ka holimo.

[Litšoantšo tse leqepheng la 4]

Ho fapana le liphoofolo, batho bona ba hloka lintho tsa moea

[Setšoantšo se leqepheng la 5]

“Ba tla ipokellela mesuoe hore litsebe tsa bona li tsikinyetsoe.”—2 Timothea 4:3

[Setšoantšo se leqepheng la 7]

’Muso oa Molimo oa Bomesia o tla tlisa khotso e sa feleng