Poloko

Tlhaloso: Ho bolokoa kapa ho lopolloa kotsing kapa thipitlong. Topollo eo e ka ’na ea e-ba matsohong a bahatelli kapa bahlorisi. Bakeng sa Bakreste bohle ba ’nete, Jehova, ka Mora oa hae o lokisitse topollo tsamaisong ea hona joale e khopo ea lintho hammoho le poloko bohlankeng ba sebe le lefu. Bakeng sa bongata bo boholo ba bahlanka ba khabane ba Jehova ba phelang “mehleng ea qetello,” poloko e tla akarelletsa ho pholosoa mahlomoleng a maholo.

Na Molimo, mohaung oa oona o moholo, o tla qetella o bolokile batho bohle?

Na 2 Petrose 3:9 e bontša hore ho tla ba le poloko e akaretsang? E re: “Morena ha a liehise lipallo tsa hae, joale ka ha ba bang ba lekanya hobane tieho e teng; empa o sa mameletse ka baka la rōna; hobane ha a rate ha ba bang ba ka timela, empa o rata hore bohle ba finyelle pakong.” Ke takatso e mohau ea Molimo hore bana bohle ba Adama ba bake, ’me ka mohau o entse tokisetso bakeng sa tšoarelo ea libe tsa ba bakang. Empa ha ho eo o mo qobellang hore a amohele tokisetso eo. (Bapisa Deuteronoma 30:15-20.) Ba bangata baa e hana. Ba tšoana le motho ea qoelang ea qhelang ntho e pholosang bophelo ha a e akheloa ke e mong ea lakatsang ho thusa. Leha ho le joalo, ho ke ho hlokomeloe hore, seo motho a se fumanang ha a sa bake hase mollo oa lihele ka ho sa feleng. Joalokaha 2 Petrose 3:9 e bontša, ba sa bakeng ba tla fela, kapa ba ‘timetsoe.’ Temana ea 7 le eona e bua ka “tšenyeho ea banyefoli.” Mona ha ho mohopolo oa poloko e akaretsang.—Bona le sehlooho se seholo “Lihele.”

Na 1 Ba-Korinthe 15:22 e paka hore qetellong ho tla bolokoa batho bohle? E re: “Joale ka ha bohle ba e-shoa ka Adama, bohle le joale ba tla boela ba phele ka Kreste.” Joalokaha ho bontšoa litemaneng tse potolohileng, seo ho buuoang ka sona mona ke tsoho. Ho tla tsosoa bo-mang? Bohle ba shoang ka lebaka la sebe sa Adama (bona temana ea 21) empa e se ba boetseng ba entse litlōlo tsa ka boomo tse ngotsoeng ho Ba-Heberu 10:26-29. Joalokaha Jesu a tsositsoe Hades (Lik. 2:31, NW), ka hona bohle ba Hades ba tla ‘phelisoa’ ka tsoho. (Tšen. 1:18; 20:13) Na baa bohle ba tla fumana poloko ea ka ho sa feleng? Ba tla buleheloa ke monyetla oo, empa hase bohle ba tla o sebelisa hamolemo, joalokaha ho bontšoa ho Johanne 5:28, 29, e bontšang hore ho ba bang phello etlaba “tsuo.”

Ho thoe’ng ka litemana tse kang Tite 2:11, e buang ka ‘poloko ea batho bohle’? Litemana tse ling, tse kang Johanne 12:32, Ba-Roma 5:18, le 1 Timothea 2:3, 4 li fana ka maikutlo a tšoanang ho RS, KJ, NE, TEV, jj. Mantsoe a Segerike a ngotsoeng e le “bohle” le ‘e mong le e mong’ litemaneng tsena ke lentsoe pas ha le ngoloa ka libopeho lisele. Joalokaha ho bontšitsoe ho Expository Dictionary of New Testament Words ea Vine (London, 1962, Moq. I, leq. 46), pas e ka ’na ea boela ea bolela “mofuta o mong le o mong kapa tse sa tšoaneng.” Ka hona, litemaneng tse kaholimo, ho e-na le “bohle,” mantsoe “mofuta o mong le o mong oa” a ka ’na a sebelisoa; kapa “mefuta eohle ea,” joalokaha ho entsoe ho NW. Ke hofe ho nepahetseng—“bohle” kapa mohopolo o fetisoang ke “mefuta eohle ea”? Ebe joale ke phetolelo efe e lumellanang le Bibele ka kakaretso? Ho nepahetse ea bobeli. Nahana ka Liketso 10:34, 35; Tšenolo 7:9, 10; 2 Ba-Thessalonika 1:9. (Hlokomela: Bafetoleli ba bang le bona ba hlokomela kutloisiso ena ea lentsoe la Segerike, joalokaha ho bontšoa ke phetolelo ea lona ho Mattheu 5:11—“mefuta eohle ea,” RS, TEV; “mofuta o mong le o mong oa,” NE; “mokhoa ’ohle oa,” KJ.)

Na ho na le mangolo a bontšang ka tieo hore ba bang ba ke ke ba bolokoa ho hang?

2 Ba-Thess. 1:9: “Ba tla otloa ka tšenyeho e sa feleng, ba tlosoe pel’a Morena, le pel’a khanya ea matla a hae.” (Mongolo o tšekaletseng ke keketso.)

Tšen. 21:8: “Ha e le ba boi, le ba sa lumelang, le ba manyala, le babolai, le bafebi, le baloi, le ba rapelang melimo, le mahata kaofela, kabelo ea bona e ka letšeng le tukileng hampe la mollo le sebabole: hona ke lefu la bobeli.”

Matt. 7:13, 14: “Kenang ka monyako o patisaneng; hobane monyako oa timelo o hebehebe, le tsela e eang teng e phatlaletse, ’me ba kenang teng ba bangata. Hobane monyako oa bophelo o patisane, le tsela e eang teng e tšesane, ’me ba e fumanang ha ba bakae.”

Hang ha motho a bolokiloe, na o bolokiloe kamehla?

Juda 5: “Ke rata ho le hopotsa taba eo le seng le e tseba, ke hoba Morena, hobane a loele [“a boloke,” NW] sechaba sa hae naheng ea Egepeta, hamorao o felisitse ba sa kang ba lumela.” (Mongolo o tšekaletseng ke keketso.)

Matt. 24:13: “Ea tiisetsang ho fihlela qetellong, ke eena ea tla bolokeha.” (Ka hona polokeho ea motho ea ho qetela ha e reroe motsotsong oa ha a qala ho lumela ho Jesu.)

Ba-Fil. 2:12: “Joale ka ha le bile le kutlo ka mehla, le fele le sebetse polokeho ea lōna ka tšabo le ka thothomelo, e seng feela ha ke le ho lōna, empa haholo-holo leha ke le sieo.” (Hona ho ne ho tobisitsoe ho “bahalaleli” ba Filippi, joalokaha ho boletsoe ho Ba-Filippi 1:1. Pauluse o ba phehelletse hore ba se ke ba itšepa haholo empa hore ba ele seli hore polokeho ea bona ea ho qetela ha e-ea s’o tiisoe.)

Ba-Heb. 10:26, 27: “Ha re etsa sebe ka boomo, ha re se re filoe tsebo ea ’nete, ha ho sa le sehlabelo se seng sa libe; e se e mpa e le tebello e tšabehang ea kahlolo, le bohale ba mollo o tlang ho ja bahanyetsi.” (Ka hona Bibele ha e ee le maikutlo a hore ho sa tsotellehe libe tseo motho a ka ’nang a li etsa ha a “bolokiloe” a ke ke a lahleheloa ke poloko ea hae. E khothalletsa botšepehi. Bona le Ba-Heberu 6:4-6, moo ho bontšoang hore le eena motho ea tlotsitsoeng ka moea o halalelang a ka felloa ke tšepo ea hae ea poloko.)

Na ho hlokahala ho hong ho fetang tumelo hore ho fumanoe poloko?

Ba-Ef. 2:8, 9: “Le bolokehile ke mohau [“mosa o sa tšoanelang,” NW], ka tumelo; ha ho tsoe ho lōna, ke mpho ea Molimo: hase ka mesebetsi, ho tle ho se ke ha e-ba motho ea ithorisang.” (Tokisetso eohle bakeng sa poloko ke pontšo ea mosa o sa tšoanelang oa Molimo. Ha ho tsela eo ka eona ngoana oa Adama a ka iphumanelang poloko ka boeena, ho sa tsotellehe hore na mesebetsi ea hae ke e babatsehang hakae. Poloko ke mpho e tsoang ho Molimo e fuoang ba lumelang molemo oa sehlabelo se tlosang libe sa Mora oa oona.)

Ba-Heb. 5:9: “O [Jesu] entsoe moetsi oa poloko e sa feleng ho bohle ba mo utloang.” (Mongolo o tšekaletseng ke keketso.) (Na hoo ho hanana le polelo ea hore Bakreste ba ‘bolokoa ka tumelo’? Le hanyenyane. Kutlo e bontša feela hore tumelo ea bona ke ea ’nete.)

Jak. 2:14, 26: “Banab’eso, ho thusa’ng, leha motho a ka re, o na le tumelo, empa a se na mesebetsi? Na tumelo eo e ka ’moloka na? Hobane, joale ka ha ’mele o se nang moea o shoele, le eona tumelo, ha e se na mesebetsi, e shoele.” (Motho ha a lefuoe ka poloko ka mesebetsi ea hae. Empa mang le mang ea nang le tumelo ea ’nete o tla ba le mesebetsi e tsamaeang le eona—mesebetsi ea kutlo melaong ea Molimo le Kreste, mesebetsi e bontšang tumelo ea hae le lerato. Ntle ho mesebetsi e joalo, tumelo ea hae e shoele.)

Lik. 16:30, 31: “Benghali, e ka khona ke etse joang ho bolokeha? Ba [Pauluse le Silase] re: Lumela ho Morena Jesu Kreste, ’me u tla bolokeha, uena le ba ntlo ea hao!” (Haeba monna eo le ba ntlo ea hae ba ne ba lumela kannete, na ba ne ba sa tl’o sebetsa tumellanong le tumelo ea bona? Ho joalo ruri.)

Haeba e Mong a Re—

‘Ke pholositsoe’

U ka ’na ua arabela: ‘Ke thabela ho tseba hoo, hobane ho mpolella hore u lumela ho Jesu Kreste. Mosebetsi oo ke nkileng karolo ho oona ke oo Jesu a o abetseng balateli ba hae hore ba o etse, ke hore, ba bolelle ba bang ka ho hlongoa hoa ’Muso oa hae. (Matt. 24:14)’ ’Me mohlomong u ka eketsa: (1) ‘’Muso oo ke eng? Ho tla hoa oona ho tla bolela eng lefatšeng? (Dan. 2:44)’ (2) ‘Ho tla ba le maemo afe mona lefatšeng tlas’a puso eo ea leholimo? (Pes. 37:11; Tšen. 21:3, 4)’

Kapa u ka re: ‘Joale u ananela se boletsoeng ke moapostola Petrose, mona ho Liketso 4:12, na ha ho joalo? . . . Na u kile ua ipotsa hore na re neiloe lebitso la Jesu ke mang hore re lumele ho lona?’ ’Me mohlomong u ka eketsa: (1) ‘Jesu ka boeena o-oa re bolella. (Joh. 17:3)’ (2) ‘Hlokomela hore Jesu o itse o tsebahalitse lebitso la Ntate oa hae. (Joh. 17:6) Lebitso la Ntate oa hae ke mang? Le u hopotsa lintho life? (Ex. 3:15; 34:5-7)’

‘Na u pholositsoe?’

U ka ’na ua arabela: ‘Hona joale, E. Ke bua joalo hobane ke boetse ke le seli ka keletso ea Bibele ea hore re se ke ra itšepa ho tlōla ka boemo ba rōna. Na u tloaelane le temana ee? (1 Ba-Kor. 10:12)’ ’Me mohlomong u ka eketsa: ‘Lebaka la hoo ke lefe? Ho batho ba neng ba tsoetsoe la bobeli ’me ba e-na le tšepo ea bophelo ba leholimo (Ba-Heb. 3:1), moapostola Pauluse o ile a ba ngolla . . . (Ba-Heb. 3:12-14) Ke ka ho hōla tsebong ea Lentsoe la Molimo moo re matlafatsang tumelo ea rōna.’

Kapa u ka re: ‘Nka arabela habonolo feela ka hore, E. Empa na u ne u tseba hore Bibele ha e bue ka polokeho e le ’ngoe feela? Ka mohlala, na u kile ua nahana ka se boleloang ke Tšenolo 7:9, 10, 14? . . . Kahoo, ho na le batho ba tla pholosoa mahlomoleng a maholo a tlang, hore ba tl’o phela hona mona lefatšeng. (Matt. 5:5)’

‘Na u amohela Jesu e le ’Moloki oa hao?’

Bona leqephe 200, tlas’a sehlooho “Jesu Kreste.”

‘Le re ho tla pholosoa ba 144 000 feela’

U ka ’na ua arabela: ‘Ke thabetse ha u phahamisitse taba eo e le hore nka u bolella seo re hlileng re se lumelang. Pholoho e buletsoe feela batho ba bangata ba tlang ho bontša tumelo ea ’nete tokisetsong eo Molimo o e entseng ka Jesu. Empa Bibele e re ke feela ba 144 000 ba tla ea leholimong ho ba le Kreste. Na u kile ua ho bona hoo ka Bibeleng? . . . Ho mona ho Tšenolo 14:1, 3.’ ’Me mohlomong u ka eketsa: (1) ‘Ba tla etsa joang leholimong? (Tšen. 20:6)’ (2) ‘Ho hlakile hore ba tla be ba busa holim’a e mong. Ebe ho tla busoa mang? . . . (Matt. 5:5; 6:10)’