“Likōpo Tsa Lōna Tse Matla li ke li Tsebisoe Molimo”
“Nthong e ’ngoe le e ’ngoe ka thapelo le thapeli hammoho le liteboho likōpo tsa lōna tse matla li ke li tsebisoe Molimo.”—BAFILIPI 4:6.
1. Ke mang eo re nang le tokelo ea ho buisana le eena, hona ke hobane’ng ha seo se hlolla?
HAEBA u ne u ka kōpa ho bona ’musi oa naha ea heno, ebe u ne u tla fumana karabo ea mofuta ofe? Mohlomong u ne u tla fumana karabo e hlomphehang e tsoang ofising ea hae, empa ho hang ho ne ho ke ke ha etsahala hore u lumelloe ho bua le ’musi eo ka boeena. Leha ho le joalo, boemo bo fapane ka ’Musi e moholo ka ho fetisisa, Jehova Molimo, eo e leng ’Musi oa bokahohle. Re ka khona ho bua le eena re le sebakeng leha e le sefe le ka nako leha e le efe eo re khethang ho bua le eena ka eona. Kamehla lithapelo tse amohelehang li tla fihla ho eena. (Liproverbia 15:29) Ruri seo sea hlolla! Na kananelo ea rōna ha ea lokela ho re susumelletsa hore kamehla re rapele Eo ka nepo a bitsoang “Ea Utloang thapelo”?—Pesaleme ea 65:2.
2. Ho hlokahala eng hore Molimo a amohele lithapelo?
2 Leha ho le joalo, e mong a ka ’na a botsa, ‘Ke lithapelo life tseo Molimo a li amohelang?’ Bibele e hlalosa ntho e ’ngoe e hlokahalang hore thapelo e amohelehe ha e re: “Kantle ho tumelo ho ke ke ha khoneha ho mo khahlisa, kaha ea atamelang Molimo o lokela ho lumela hore o teng le hore e ba moputsi oa ba mo batlang ka tieo.” (Baheberu 11:6) Ka sebele, joalokaha ho hlalositsoe sehloohong se eteletseng sena pele, ntlha ea bohlokoa haholo tabeng ea ho atamela Molimo ke ho ba le tumelo. Molimo o ikemiselitse ho amohela lithapelo tsa ba mo atamelang, empa ba lokela ho etsa joalo ba e-na le tumelo ebile ba etsa mesebetsi e lokileng, ba tšepahala ’me ba e-na le pelo e lokileng.
3. (a) Joalokaha lithapelo tsa bahlanka ba tšepahalang ba khale li bontšitse, ke lipolelo tsa mofuta ofe tse ka akarelletsoang lithapelong? (b) Thapelo e ka etsoa ka mekhoa efe e sa tšoaneng?
3 Moapostola Pauluse o ile a khothatsa Bakreste ba mehleng ea hae a re: “Le se ke la tšoenyeha ka letho, empa nthong e ’ngoe le e ’ngoe ka thapelo le thapeli hammoho le liteboho likōpo tsa lōna tse matla li ke li tsebisoe Molimo.” (Bafilipi 4:6, 7) Bibele e na le mehlala e mengata ea ba ileng ba rapela Molimo mabapi le lintho tseo ba neng ba amehile ka tsona. Ba bang ba bona ke Anna, Elia, Ezekiase le Daniele. (1 Samuele 2:1-10; 1 Marena 18:36, 37; 2 Marena 19:15-19; Daniele 9:3-21) Re lokela ho latela mohlala oa bona. Hape, hlokomela hore mantsoe a Pauluse a bontša hore thapelo e ka etsoa ka mekhoa e sa tšoaneng. O ile a bua ka liteboho, ke hore thapelo eo ka eona re bolelang kamoo re ananelang seo Molimo a re etsetsang sona. E ka ’na ea tsamaea le thoriso. Thapeli e bolela kōpo e tiileng e etsoang ka boikokobetso. Hape re ka etsa likōpo tse matla, kapa ra kōpa ntho e itseng ka ho toba. (Luka 11:2, 3) Ntate oa rōna oa leholimo o thabela hore re mo atamele ka mokhoa leha e le ofe ho ena e boletsoeng.
4. Le hoja Jehova a tseba lintho tseo re li hlokang, ke hobane’ng ha re ntse re etsa likōpo tse matla ho eena?
4 Ba bang ba ka ’na ba botsa, ‘Na Jehova o se a ntse a sa tsebe tsohle tseo re li hlokang?’ E, oa li tseba. (Matheu 6:8, 32) Joale, ke hobane’ng ha a ntse a batla hore re mo atamele ka likōpo tse matla? Ak’u nahane ka mohlala ke ona: Mong’a lebenkele a ka ’na a fana ka mpho ho batho ba bang ba rekang lebenkeleng la hae. Leha ho le joalo, hore bareki ba fumane mpho ena, ba lokela ho tla lebenkeleng hore ba kōpe ho e fuoa. Ba sa batleng ho etsa boiteko boo ba ne ba tla be ba bontša hore ehlile ha ba ananele mpho eo. Ka ho tšoanang, ho se etse likōpo tse matla ka thapelo ho ne ho tla bontša hore ha re ananele seo Jehova a re fang sona. Jesu o ile a re: “Kōpang ’me le tla amohela.” (Johanne 16:24) Ka tsela ena, re bontša hore re tšepa Molimo.
Re Lokela ho Atamela Molimo Joang?
5. Ke hobane’ng ha re lokela ho rapela ka lebitso la Jesu?
5 Jehova ha a behe melao e thata e mengata ea hore na re rapele joang. Leha ho le joalo, re lokela ho ithuta mokhoa o nepahetseng oa ho atamela Molimo, o hlalositsoeng ka Bibeleng. Ka mohlala, Jesu o ile a ruta balateli ba hae a re: “Haeba le kōpa Ntate ntho leha e le efe o tla le fa eona ka lebitso la ka.” (Johanne 16:23) Kahoo, ho hlokahala hore re rapele ka lebitso la Jesu, re lemohe hore ke ka Jesu feela moloko oohle oa batho o fumanang litlhohonolofatso tsa Molimo.
6. Ha re rapela, boemo ba rōna ba ’mele e lokela e be bofe?
6 Boemo ba rōna ba ’mele e lokela e be bofe ha re rapela? Ka Bibeleng, ha ho boleloe boemo bo khethehileng boo re lokelang ho ba ho bona e le hore lithapelo tsa rōna li utluoe. (1 Marena 8:22; Nehemia 8:6; Mareka 11:25; Luka 22:41) Ntho ea bohlokoa ke ho rapela Molimo ka botšepehi le ka boikutlo bo nepahetseng pelong.—Joele 2:12, 13.
7. (a) “Amen” e bolela’ng? (b) E sebelisoa joang ka nepo lithapelong?
7 Ho thoe’ng ka ho sebelisa lentsoe lee “amen”? Mangolo a bontša hore ena ke tsela e tloaelehileng ea ho phethela thapelo, haholo-holo ha re rapela phatlalatsa. (Pesaleme ea 72:19; 89:52) Moelelo oa mantlha oa lentsoe la Seheberu a·menʹ ke ho re “ka sebele.” Cyclopedia ea McClintock le Strong e hlalosa hore se boleloang ke “Amen” qetellong ea lithapelo ke “ho tiisa mantsoe a qetang ho boleloa, le ho kōpa hore a phethahatsoe.” Kahoo, ha motho ea rapelang a phethela ka ho re “Amen” e tlohang botebong ba pelo, o bontša maikutlo a hae a tiileng mabapi le seo a qetang ho se bua. Ha Mokreste ea rapellang phutheho a phethela thapelo ka lentsoe lena, ba mametseng le bona ba ka re “Amen” ka lipelong tsa bona kapa ka melomo ho bontša hore ba lumellana ka tieo le se qetang ho boleloa.—1 Bakorinthe 14:16.
8. Lithapelo tse ling tsa rōna li ka ’na tsa tšoana le tsa Jakobo kapa Abrahama joang, hona see se tla be se bontša eng ka rōna?
8 Ka linako tse ling Molimo a ka ’na a lumella hore re bontše hore na re amehile ka ho teba hakae ka lintho tseo re li rapellang. Ho ka ’na ha hlokahala hore re tšoane le Jakobo oa khale, ea ileng a betana le lengeloi bosiu kaofela e le hore a hlohonolofatsoe. (Genese 32:24-26) Kapa maemo a ka ’na a hloka hore re be joaloka Abrahama, eo ka makhetlo a mangata a ileng a kōpa Jehova ka matla molemong oa Lota le batho leha e le bafe ba bang ba lokileng bao mohlomong ba neng ba le teng Sodoma. (Genese 18:22-33) Ka ho tšoanang, re ka ’na ra kōpa Jehova ka tieo mabapi le lintho tsa bohlokoa ho rōna, re mo kōpa ka matla ka lebaka la toka ea hae, mosa oa hae o lerato le mohau oa hae.
Ke Eng Seo re ka se Kōpang?
9. Ha re rapela, ke lintho life tse ka sehloohong tseo re lokelang ho ameha ka tsona?
9 Hopola hore Pauluse o itse: “Nthong e ’ngoe le e ’ngoe . . . likōpo tsa lōna tse matla li ke li tsebisoe Molimo.” (Bafilipi 4:6) Kahoo, lithapelo tsa rōna li ka ama hoo e batlang e le likarolo tsohle tsa bophelo. Leha ho le joalo, ntho ea pele eo re amehileng ka eona ha re rapela e lokela e be lintho tseo Jehova a li thahasellang. Daniele o ile a beha mohlala o motle tabeng ena. Ha Baiseraele ba ne ba otleloa libe tsa bona, Daniele o ile a kōpa Jehova ka tieo hore a ba hauhele, a re: “U se ke ua lieha, ka lebaka la hao, Molimo oa ka, etsoe motse oa hao le sechaba sa hao li ’nile tsa bitsoa ka lebitso la hao.” (Daniele 9:15-19) Na ka tsela e tšoanang lithapelo tsa rōna li bontša hore lintho tse ka sehloohong tseo re amehileng ka tsona ke ho halaletsoa ha lebitso la Jehova le hore thato ea hae e phethoe?
10. Re tseba joang hore ho loketse hore batho ba rapelle lintho tse ba amang ka bobona?
10 Empa, ho boetse ho loketse hore re kōpe lintho tseo re amehileng ka tsona re le batho ka bomong. Ka mohlala, joaloka mopesaleme, re ka ’na ra rapella hore re utloisise lintho tse tebileng tsa Molimo. O ile a rapela a re: “Etsa hore ke utloisise, e le hore nka boloka molao oa hao le hore nka o boloka ka pelo eohle.” (Pesaleme ea 119:33, 34; Bakolose 1:9, 10) Jesu “o ile a nyehela lithapeli le likōpo tse matla ho Ea neng a khona ho mo pholosa hore a tsoe lefung.” (Baheberu 5:7) Ka ho etsa joalo, o ile a bontša hore ho loketse hore motho a kōpe ho fuoa matla ha a tobane le kotsi kapa liteko. Ha Jesu a ne a ruta barutuoa ba hae thapelo ea mohlala, o ile a akarelletsa lintho tse amang batho ka bobona, tse kang ho tšoareloa litšito le ho fumana lijo tsa letsatsi le letsatsi.
11. Thapelo e ka re thusa joang hore re se ke ra inehela melekong?
11 Thapelong eo ea mohlala, Jesu o ile a akarelletsa kōpo ena: “U se ke ua re kenya molekong, empa u re lopolle ho ea khopo.” (Matheu 6:9-13) Hamorao, o ile a fana ka keletso ena: “Lulang le lebetse ’me le rapele le sa khaotse, e le hore le se ke la kena molekong.” (Matheu 26:41) Thapelo e bohlokoa haholo ha re tobana le meleko. Re ka ’na ra lekoa hore re tlōle melao-motheo ea Bibele ha re le mosebetsing kapa sekolong. Batho bao e seng Lipaki ba ka ’na ba re memela hore re kopanele le bona liketsong tse belaetsang. Re ka ’na ra kōptjoa ho etsa ntho e hlomphollang melao-motheo e lokileng. Linakong tse joalo, re lokela ho latela keletso ea Jesu ea hore re rapele—pele re tobana le moleko le nakong eo re hlileng re tobaneng le oona—re kōpe Molimo hore a re thuse e le hore re se ke ra oela molekong.
12. Ke lintho life tse re bakelang matšoenyeho tse ka re susumetsang hore re rapele, hona re ka lebella hore Jehova a etse’ng?
12 Kajeno bahlanka ba Molimo ba hlaheloa ke likhatello le matšoenyeho a sa tšoaneng bophelong. Ho kula le khatello ea maikutlo ke lintho tse khōlō tse bakelang ba bangata matšoenyeho kajeno. Pefo e re pota-potileng e re tlisetsa khatello bophelong. Mathata a moruo a re thatafaletsa ho fumana lintho tse hlokahalang bophelong. Ka sebele ho khothatsa hakaakang ho tseba hore Jehova o mamela bahlanka ba hae ba mo bolellang lintho tsee! Ha Pesaleme ea 102:17 e bua ka Jehova, e re: “Ka sebele o tla retelehela thapelong ea ba nketsoeng ntho e ’ngoe le e ’ngoe, a se ke a nyelisa thapelo ea bona.”
13. (a) Ke lintho life tsa botho tseo ho loketseng hore re li rapelle? (b) Pheta mohlala mabapi le thapelo e joalo.
13 Ha e le hantle, ntho leha e le efe e amang tšebeletso ea rōna ho Jehova kapa kamano ea rōna le eena e ka ba taba e loketseng hore re e rapelle. (1 Johanne 5:14) Haeba u lokela ho etsa liqeto mabapi le lenyalo kapa mosebetsi kapa ho atolosa tšebeletso ea hao, u se ke ua qea-qea ho bolella Molimo litaba tsena, u kōpe hore a u tataise. Ka mohlala, moroetsana e mong oa Philippines, o ne a batla ho kopanela tšebeletsong ea nako e tletseng. Leha ho le joalo, o ne a se na mosebetsi oa ho iphelisa. O re: “Ka Moqebelo o mong, ke ile ka rapela Jehova ka ho toba mabapi le bopula-maliboho. Hamorao letsatsing lona leo, ha ke ntse ke le mosebetsing oa boboleli, ke ile ka fa mocha e mong buka. Ka tšohanyetso feela, ngoanana eo o ile a re: ‘Ntho ea pele eo u lokelang ho e etsa hoseng ka Mantaha ke hore u tle sekolong sa rōna.’ Ka mo botsa, ‘Molato?’ O ile a hlalosa hore ho ne ho e-na le sekheo sa mosebetsi se neng se lokela ho tlatsoa kapele kamoo ho neng ho ka khoneha. Ke ile ka ea, ’me ka hiroa hang-hang. Taba ena e ile ea etsahala ka potlako hakaakang!” Lipaki tse ngata lefatšeng lohle li bile le liphihlelo tse tšoanang le ena. Kahoo u se ke ua tsilatsila ho rapela Molimo ka likōpo tsa hao tse matla tse tsoang botebong ba pelo!
Ho Thoe’ng Haeba re Entse Sebe?
14, 15. (a) Ke hobane’ng ha motho a sa lokela ho tlohela ho rapela esita le ha a entse sebe? (b) Ntle ho lithapelo tseo motho a li etsang ka boeena, ke eng hape e tla mo thusa hore a hlaphoheloe sebeng sa hae?
14 Ha motho a entse sebe, thapelo e ka mo thusa joang? Ba bang ba tlohela ho rapela ha ba entse sebe ka lebaka la ho hlajoa ke lihlong. Leha ho le joalo, hase bohlale ho etsa joalo. Ho etsa mohlala: Ha re re motho ea nkileng leeto a tsamaea ka maoto oa lahleha. Oa tseba hore ha a ka kōpa thuso o ne a ka fumana tsela e nepahetseng. Empa ho thoe’ng haeba a sa kōpe thuso hobane a hlajoa ke lihlong ka hore ebe o lahlehile? O ne a ka ’na a nka tsela e kotsi eaba o thulana le mathata! Ka ho tšoanang, motho ea entseng sebe ’me a hlajoa ke lihlong hore a rapele Molimo a ka lemala le ho feta. Ho hlajoa ke lihlong ka lebaka la sebe ha hoa lokela ho sitisa motho hore a bue le Jehova. Ha e le hantle, Molimo o mema ba entseng libe tse tebileng hore ba mo rapele. Moprofeta Esaia o ile a khothalletsa baetsalibe mehleng ea hae hore ba ipiletse ho Jehova, “etsoe o tla tšoarela ka tsela e khōlō.” (Esaia 55:6, 7) Ho hlakile hore ho ka ’na ha hlokahala hore motho a ‘nolofatse sefahleho sa Jehova’ ka hore a qale ka ho ikokobetsa, a furalle tsela ea boetsalibe, ’me a bake e le kannete.—Pesaleme ea 119:58; Daniele 9:13.
15 Ha motho a entse sebe, thapelo e bohlokoa ka lebaka le leng hape. Mabapi le motho ea hlokang thuso moeeng, morutuoa Jakobo o re: “A ke a bitsetse banna ba baholo ba phutheho ho eena, ’me ba mo rapelle, . . . ’me Jehova o tla mo tsosa.” (Jakobo 5:14, 15) Ka sebele, motho o lokela hore ka boeena a bolele sebe sa hae ho Jehova ka thapelo, empa a ka boetse a kōpa banna ba baholo hore ba mo rapelle. Seo se tla mo thusa hore a hlaphoheloe moeeng.
Kamoo Lithapelo li Arajoang Kateng
16, 17. (a) Jehova o araba lithapelo joang? (b) Ke liphihlelo life tse bontšang hore thapelo e amana haufi-ufi le mosebetsi oa boboleli?
16 Lithapelo li arajoa joang? Tse ling li ka ’na tsa arajoa kapele le ka mokhoa o totobetseng. (2 Marena 20:1-6) Tse ling li ka ’na tsa nka nako, ’me ho ka ’na ha e-ba thata ho lemoha hore li arabetsoe. Joalokaha ho bontšitsoe papisong ea Jesu ea mohlolohali ea ileng a ’na a khutlela ho moahloli, ho ka ’na ha hlokahala hore re atamele Molimo ka makhetlo a mangata. (Luka 18:1-8) Leha ho le joalo, re ka kholiseha hore ha re rapella lintho tse lumellanang le thato ea Molimo, ha ho mohla Jehova a tla re ho rōna: ‘Khaotsang ho nkhathatsa.’—Luka 11:5-9.
17 Maemong a mangata, batho ba Jehova ba bone ha lithapelo tsa bona li arajoa. Hangata sena se ’nile sa totobala tšebeletsong ea rōna ea boboleli. Ka mohlala, Philippines baralib’abo rōna ba babeli ba Bakreste ba ne ba ntse ba aba lingoliloeng tsa Bibele karolong e thōko haholo naheng eo. Eitse ha ba fa mosali e mong pampitšana, mahlo a hae a ile a tlala likhapha. O ile a re: “Bosiung bo fetileng ke rapetse Molimo hore a romele motho ea tla nthuta Bibele, ’me ke nahana hore ena ke karabo ea thapelo ea ka.” Nakoana ka mor’a moo, mosali eo o ile a qala ho tla libokeng Holong ea ’Muso. Karolong e ’ngoe ea Asia Boroa-bochabela, mor’abo rōna oa Mokreste o ne a tšaba ho bolela litaba tse molemo mohahong o mong oa bolulo o neng o sirelelitsoe ka thata. Leha ho le joalo, o ile a rapela Jehova, a iteta sebete eaba o kena mohahong oo. Ha a kokota monyako, ho ile ha hlaha mosetsana e mong. Ha mor’abo rōna a bolela lebaka leo a etileng ka lona, mosetsana eo o ile a qala ho lla. O ile a bolela hore esale a ntse a batla Lipaki Tsa Jehova le hore o ne a rapeletse hore a thusoe ho li fumana. Ka thabo mor’abo rōna o ile a mo thusa hore a ikopanye le phutheho ea Lipaki Tsa Jehova ea sebakeng seo.
18. (a) Ha lithapelo tsa rōna li arajoa, re lokela ho etsa’ng? (b) Re ka kholiseha ka eng haeba re sebelisa monyetla o mong le o mong hore re rapele?
18 Ruri thapelo ke tokisetso e babatsehang. Jehova o ikemiselitse ho mamela lithapelo tsa rōna le ho li araba. (Esaia 30:18, 19) Empa re lokela ho ba hlokolosi hore re bone tsela eo Jehova a arabang lithapelo tsa rōna ka eona. Kamehla e ka ’na ea se ke ea e-ba tsela eo re neng re lebeletse hore a li arabe ka eona. Leha ho le joalo, ha re hlokomela tataiso ea hae, le ka mohla re se ke ra lebala ho mo leboha le ho mo rorisa. (1 Bathesalonika 5:18) Ho feta moo, kamehla u hopole keletso ea moapostola Pauluse ha a re: “Nthong e ’ngoe le e ’ngoe ka thapelo le thapeli hammoho le liteboho likōpo tsa lōna tse matla li ke li tsebisoe Molimo.” Sebelisa monyetla o mong le o mong hore u bue le Molimo. Ka tsela eo, u tla tsoela pele ho utloa bonnete ba seo Pauluse a se bolelang mabapi le bao lithapelo tsa bona li arajoang, ha a re: “Khotso ea Molimo e fetang monahano oohle e tla lebela lipelo tsa lōna le matla a lōna a kelello.”—Bafilipi 4:6, 7.
Na U ka Araba?
• Re ka etsa thapelo ka mekhoa efe?
• Re lokela ho rapela joang?
• Ke lintho life tseo re ka li akarelletsang lithapelong tsa rōna?
• Thapelo e phetha karolo efe ha motho a entse sebe?
[Litšoantšo tse leqepheng la 29]
Thapelo e tlohang botebong ba pelo e re thusa hore re se ke ra inehela melekong
[Litšoantšo tse leqepheng la 31]
Ka thapelo, re bolella Molimo liteboho tsa rōna, lintho tseo re amehileng ka tsona le likōpo tsa rōna tse matla