‘Ho Tšoara Lentsoe la ’Nete ka Nepo’

LENTSOE la Molimo ke ntlo ea polokelo ea melao-motheo ea bohlokoa haholo bakeng sa bophelo bo atlehileng. Le ka thusa mosebeletsi ho ruta, ho khalemela le ho lokisa. (2 Timothea 3:16, 17) Leha ho le joalo, e le ho rua molemo ka ho feletseng tataisong ena e fanoeng ea bomolimo, re lokela ho latela keletso ea moapostola Pauluse ho Timothea: “Etsa sohle se matleng a hao ho itlhahisa u amoheleha ho Molimo, mosebetsi eo ho seng letho leo a ka hlajoang ke lihlong ka lona, ea tšoarang lentsoe la ’nete ka nepo.”—2 Timothea 2:15, NW.

Har’a lintho tse ling, Lentsoe la Molimo le tšoantšoa le lebese le matlafatsang, lijo tse tiileng, metsi a khathollang le a hloekisang, seipone le sabole e bohale. Ho utloisisa se boleloang ke lipolelo tsena ho thusa mosebeletsi ho sebelisa Bibele ka tsebo.

Ho Fana ka Lebese la Lentsoe la Molimo

Lebese ke lijo tse hlokoang ke masea a sa tsoa tsoaloa. Ha ngoana a ntse a hōla, butle-butle lijo tse tiileng li kenyelletsoa lijong tsa hae, empa qalong, a ka khona ho thuisa lebese feela. Mabakeng a mangata, ba tsebang ho fokolang mabapi le Lentsoe la Molimo ba tšoana le bana. Ho sa tsotellehe hore na motho ke hona a thahasellang Lentsoe la Molimo kapa o se a tloaelane le lona ka nako e itseng, haeba a e-na le motheo feela oa kutloisiso ea seo Bibele e se bolelang, ke lesea la moea ’me o hloka lijo tseo ho tla ba bonolo ho li thuisa—“lebese” la moea. Ha a e-s’o be boemong ba ho thuisa “lijo tse tiileng,” lintho tse tebileng tsa Lentsoe la Molimo.—Ba-Heberu 5:12.

Bona e ne e le boemo bo neng bo le teng phuthehong e neng e sa tsoa thehoa ea Korinthe ha Pauluse a ba ngolla: “Ke le fepile ka lebese, e seng ka lijo tse tiileng; hobane le ne le sa lokela tsona.” (1 Ba-Korinthe 3:2) Ho ne ho hlokahala hore Bakorinthe ba ithute pele “litaba tsa bonyenyane, tseo taba tsa Molimo li qaloang ka tsona.” (Ba-Heberu 5:12) Mothating oo ba neng ba le ho oona oa khōlo, ba ka be ba sa khona ho thuisa “tse tebileng tsa Molimo.”—1 Ba-Korinthe 2:10.

Joaloka Pauluse, kajeno basebeletsi ba Bakreste ba bonahatsa kameho ea bona ho masea a moea ka ho a fa “lebese,” ke hore, ho ba thusa ho tsitsa motheong oa lithuto tsa motheo tsa Bokreste. Ba khothalletsa bao ba bacha kapa ba se nang phihlelo hore ba “lapele haholo . . . lebese la moea, le sa tsoakoang.” (1 Petrose 2:2) Moapostola Pauluse o ile a bontša hore o lemoha tlhokomelo e khethehileng eo ba bacha ’neteng ba e hlokang ha a ngola: “Hobane e mong le e mong ea fepjoang ka lebese, o sitoa ho ikutloela lentsoe la ho loka; kahobane e sa le ngoana.” (Ba-Heberu 5:13) Mamello, ho nahanela, kutloisiso le bonolo lia hlokahala ho basebeletsi ba Molimo ha ba arolelana lebese le sa tsoakoang la Lentsoe le ba bacha ’neteng le ba hlokang phihlelo ka lithuto tsa Bibele tsa mahae le ka liphuthehong.

Ho Tšoara Lijo Tse Tiileng Tsa Lentsoe la Molimo

E le ho hōlela pholoho, Mokreste o hloka ho fetang “lebese.” Hafeela linnete tsa motheo tsa Bibele li utloisisitsoe le ho amoheloa, o lokela ho fetela ‘lijong tse tiileng tsa banna ba tiileng.’ (Ba-Heberu 5:14) A ka etsa see joang? Ha e le hantle, e ka ba ka kemiso ea kamehla ea thuto ea botho le ho kopanela libokeng tsa Bokreste. Mekhoa e metle joalo e tla thusa ho etsa hore Mokreste a be matla moeeng, a hōle tsebong hape a hlahise litholoana tšebeletsong. (2 Petrose 1:8) Ha rea lokela ho lebala hore ho phaella tsebong, ho etsa thato ea Jehova le hona ho bolela lijo tsa moea.—Johanne 4:34.

Kajeno, “mohlanka ea khabane, ea bohlale” o khethetsoe ho fa bahlanka ba Molimo lijo ka nako ea teng le ho ba thusa hore ba utloisise “bohlale ba Molimo ka mefuta eohle ea bona.” Ka moea oa hae, Jehova o senola linnete tse tebileng tsa Mangolo ka mohlanka oa hae ea tšepahalang, eo ka botšepehi a hatisang ‘lijo tsa moea ka nako ea teng.’ (Mattheu 24:45-47; Ba-Efese 3:10, 11, BPN; bapisa le Tšenolo 1:1, 2.) Mokreste e mong le e mong o na le boikarabelo ba ho sebelisa ka hohle kamoo a ka khonang litokisetso tse joalo tse hatisitsoeng.—Tšenolo 1:3.

Ha e le hantle, lintho tse ling ka Bibeleng li “thata ho utloisisoa,” esita le ke Bakreste ba hōlileng tsebong. (2 Petrose 3:16, BPN) Ho na le lipolelo tse thata, boprofeta le lipapiso tse hlokang ho ithuta ho matla le ho thuisa. Kahoo, thuto ea botho e akarelletsa ho fata ka Lentsoeng la Molimo. (Liproverbia 1:5, 6; 2:1-5) Ka ho khetheha, baholo ba na le boikarabelo tabeng ena ha ba ruta phutheho. Ebang ba tsamaisa Thuto ea Buka ea Phutheho kapa Thuto ea Molula-Qhooa, ho nehelana ka lipuo tsa phatlalatsa, kapa ba sebeletsa boemong leha e le bofe ba ho ruta, baholo ba lokela ho tloaelana ka ho feletseng le boitsebiso ba bona ’me ba lule ba loketse ho fana ka tlhokomelo ‘tsebong ea bona ea ho ruta’ ha ba fetisetsa lijo tse tiileng tsa moea phuthehong.—2 Timothea 4:2, NW.

Metsi a Khathollang le a Hloekisang

Jesu o ile a bolella mosali oa Mosamaria selibeng hore o ne a tla mo fa seno se tla fetoha ka ho eena “seliba sa metsi a phallelang bophelong bo sa feleng.” (Johanne 4:13, 14; 17:3) Metsi ana a fanang ka bophelo a kopanyelletsa litokisetso tsohle tsa Molimo bakeng sa ho fumana bophelo ka Konyana ea Molimo, ’me litokisetso tsena li hlalositsoe ka Bibeleng. Joaloka batho ba nyoretsoeng “metsi” ao, re amohela memo e fanoeng ke moea le monyaluoa oa Kreste ea ho ‘inkela feela metsi a bophelo.’ (Tšenolo 22:17) Ho noa metsi ana ho ka bolela bophelo bo sa feleng.

Ho feta moo, Bibele e beha litekanyetso tsa boitšoaro le tsa moea bakeng sa Bakreste ba ’nete. Ha re sebelisa litekanyetso tsena tse behiloeng tsa bomolimo, re hloekisoa ke Lentsoe la Jehova, re ‘hlatsuoa’ mekhoa eohle eo Jehova Molimo a e hloileng. (1 Ba-Korinthe 6:9-11) Ka lebaka lena, ’nete e fuperoeng ka Lentsoeng le bululetsoeng e bitsoa “hlatsuo ea metsi.” (Ba-Efese 5:26) Haeba re sa lumelle ’nete ea Molimo hore e re hloekise ka tsela ena, borapeli ba rōna bo ke ke ba amoheleha ho eena.

Ka ho thahasellisang, le baholo ba ‘tšoarang lentsoe la ’nete ka nepo’ ba tšoantšoa le metsi. Esaia o bua ka bona e le ba “joalo ka molatsoana oa metsi naheng e omileng.” (Esaia 32:1, 2) Baholo ba lerato ba phethahatsa tlhaloso ena ha, joaloka balisa ba moea, ba etela baena ba bona, ba sebelisa Lentsoe la Molimo le khathollang ho fana ka boitsebiso ba moea bo hahang le bo tšelisang e le ho matlafatsa le ho tiisa.—Bapisa le Mattheu 11:28, 29.a

Litho tsa phutheho li lebella ka cheseho ho eteloa ke baholo. Bonnie o re: “Ke tseba kamoo baholo e ka bang ba thobang kateng, ’me ke thabela hore e-be Jehova o entse tokisetso ena.” Lynda, eo e leng motsoali a le mong, oa ngola: “Ka khothatso ea Mangolo, baholo ba ile ba nthusa hore ke sebetsane ka katleho le boemo. Ba ile ba mamela ’me ba bontša kutloelo-bohloko.” Michael o re: “Ba ile ba etsa hore ke ikutloe ke le karolo ea mokhatlo o hlophisitsoeng o tsotellang.” E mong o ile a re: “Ketelo ea baholo e ile ea nthusa ho hlōla linako tsa ho tepella maikutlo ho hoholo.” Ketelo e matlafatsang moeeng ea moholo e tšoana le seno se pholileng, se khathollang. Ba kang linku baa tšelisoa ha baholo ba lerato ba ba thusa ho bona kamoo melao-motheo ea Mangolo e sebetsang maemong a bona.—Ba-Roma 1:11, 12; Jakobo 5:14.

Sebelisa Lentsoe la Molimo Joaloka Seipone

Ha motho a e-ja lijo tse tiileng, morero hase feela ho thabela tatso. Ho e-na le hoo, o lebelletse ho fumana phepo e ntle e tla mo nolofalletsa ho sebetsa. Haeba ke ngoana, o lebelletse hore lijo tseo li tla mo thusa hore a hōle, e be motho e moholo. Hoa tšoana le ka lijo tsa moea. Thuto ea Bibele ea botho e ka ba monate, empa leo hase lona feela lebaka la ho ba le eona. Lijo tsa moea li lokela ho re fetola. Li re thusa hore re tsebe litholoana tsa moea le ho li hlahisa ’me li re thusa ho apara “motho e mocha, ea nchafallang tsebong ka setšoantšo sa ea ’mōpileng.” (Ba-Kolosse 3:10; Ba-Galata 5:22-24) Lijo tsa moea li boetse li re thusa hore re be le khōlo e feletseng, li re etsa hore re khone haholoanyane ho sebelisa melao-motheo ea Mangolo ha re sebetsana le mathata a rōna leha re thusa ba bang hore ba sebetsane le a bona.

Re ka tseba joang hore na Bibele e ba le phello eo ho rōna kapa che? Re sebelisa Bibele joaloka seipone. Jakobo o ile a re: “Le be baetsi ba lentsoe, e seng bautloi feela . . . Hobane motho, ha e le moutloi oa lentsoe, e seng moetsi oa lona, o joalo ka motho ea iponang seiponeng tšobotsi eo a tsoetsoeng ka eona. Ere hobane a ipone, o ee a tlohe, a lebale hang hore ke motho ea joang. Empa ea shebisisang molaong o phethehileng, e leng oa tokoloho, ’me a tiisetsa teng, e se moutloi ea hahoang, empa e le moetsi ea sebetsang, motho eo o tla ba le lehlohonolo ho etseng ha hae.”—Jakobo 1:22-25.

Re ‘shebisisa’ Lentsoeng la Molimo ha re le hlahlobela haufi-ufi ’me re bapisa seo re leng sona le seo re tlamehileng ho ba sona ho latela litekanyetso tsa Molimo. Ka ho etsa sena, re tla ba “baetsi ba lentsoe, e seng bautloi feela.” Bibele e tla be e-na le phello e molemo ho rōna.

Lentsoe la Molimo Joaloka Sabole

Qetellong, moapostola Pauluse o re thusa ho bona kamoo re ka sebelisang Lentsoe la Molimo joaloka sabole. Ha a re lemosa khahlanong le “mebuso, khahlanong le ba nang le matla a ho laela, khahlanong le babusi ba lefatše ba lefifi lena, khahlanong le makhotla a moea a khopo a leng libakeng tsa leholimo” o ile a re khothalletsa ho ‘amohela sabole ea Moea, ke hore, lentsoe la Molimo.’ (Ba-Efese 6:12, 17, NW) Lentsoe la Molimo ke sebetsa sa bohlokoahali seo re ka se sebelisang ho poma likhopolo leha e le life “tse phahamelang ho loantša tsebo ea Molimo.”—2 Ba-Korinthe 10:3-5.

Ka ntle ho pelaelo, “lentsoe la Molimo ke lentsoe le phelang, le matla.” (Ba-Heberu 4:12) Jehova o buisana le moloko oa batho ka Lentsoe le bululetsoeng la hae. Le sebelise hantle ha u ruta ba bang leha u pepesa lithuto tsa bohata tsa bolumeli. Le sebelise ho khothatsa ba bang, ho ba haha, ho ba khatholla, ho ba tšelisa, ho ba susumetsa le ho ba matlafatsa moeeng. ’Me e se eka Jehova a ka ‘u bōpela mesebetsi eohle e metle,’ e le hore kamehla u ka etsa ‘se mo khahlisang.’—Ba-Heberu 13:21.

[Mongolo o botlaaseng ba leqephe]

[Setšoantšo se leqepheng la 31]

Baholo ba khothatsa ba bang “ho tšoara lentsoe la ’nete ka nepo”