Potso ea Bohlokoa ka ho Fetisisa

SETSEBI se seng sa liphatsa tsa lefutso se bitsoang Francis S. Collins se ile sa botsa, sa re: “Na ho na le potso ea bohlokoa eo batho ba kileng ba ipotsa eona ho feta ea hore ‘Na Molimo o teng?’” Setsebi sena se bua ntlha ea bohlokoa. Haeba Molimo ha a eo, joale ha ho na bophelo ka mor’a bona bo teng, ha ho na matla a phahameng a laelang litabeng tse amanang le boitšoaro.

Lebaka le etsang hore batho ba bang ba belaelle hore Molimo o teng ke hobane bo-rasaense ba bangata ha ba lumele hore o teng. Empa ka linako tse ling, batho ba bangata ba ba le maikutlo a fosahetseng haholo, joalokaha sehlooho se latelang se tla bontša.

Ka masoabi, malumeli a mangata a lefatše a tlatselitse pherekanong ena ka hore a rute lintho tse khahlanong le tseo ho tsebahalang hore li na le motheo oa sebele oa saense. Mohlala o totobetseng ke oa khopolo e khahlanong le se rutoang ke Bibele ea hore Molimo o entse lefatše ka matsatsi a tšeletseng a lihora tse 24 lilemong tse likete tse ’maloa tse fetileng.

Batho ba bangata ha ba utloa likhopolo le lifilosofi tsena tse loantšanang, ba khaotsa ho batla seo e leng ’nete tabeng ea hore na Molimo o teng. Empa ke’ng e ka bang molemo—le ho ba ea bohlokoa—ho feta ho fumana karabo e ka tšeptjoang potsong ee ea motheo? Ke ’nete hore ha ho le ea mong oa rōna ea kileng a bona Molimo, ebile re ne re le sieo ha ho thehoa bokahohle ho bile ho etsoa lintho tse phelang. Kahoo, ebang rea lumela hore Molimo o teng kapa ha re lumele, seo se bontša hore re na le tumelo ka tsela e itseng. Empa ke tumelo ea mofuta ofe?

Tumelo ea Sebele e Thehiloeng Bopaking bo Tiileng

Tumelo ke ea bohlokoa bo itseng bophelong ba rōna. Re lumela ho hiroa hobane re lebeletse hore re tla fuoa moputso. Re lema lijalo hobane re tšepa hore peō eo e tla mela. Re tšepa metsoalle. Re bile re tšepa melao e tataisang bokahohle. Ena ke tumelo e thehiloeng bopaking. Ka ho tšoanang, taba ea ho lumela hore Molimo o teng e thehiloe bopaking.

Ho Baheberu 11:1, Bibele e re: “Tumelo ke . . . bopaki bo totobetseng ba lintho tsa sebele le hoja li sa bonoe.” Phetolelo e ’ngoe e re: “Tumelo . . . ke ho kholiseha ka tse e-s’ong ho bonoe.” (Bibele—Phetolelo e Ncha) Ka mohlala: Ha u ntse u tsamaea lebōpong la leoatle, ka tšohanyetso u utloa lefatše le sisinyeha. Joale u bona metsi a khutlela morao ka sekhahla. Ua lemoha hore na seo ke pontšo ea eng le hore ke temoso ea hore tsunami ea tla. Boemong bona, ho sisinyeha ha lefatše le ho checha ha metsi ke “bopaki bo totobetseng” ba lintho tse e-s’o bonoe, e leng maqhubu a ntseng a atamela. Tumelo ea hao e thehiloeng bopaking, e u susumelletsa hore u balehele sebakeng se phahameng le se sireletsehileng.

Ho lumela hore Molimo o teng le hona e lokela ho ba tumelo e thehiloeng bopaking, e tlisoang ke hore re na le bopaki bo kholisang. Ke ka tsela eo feela Molimo e ka bang ‘oa sebele le hoja u sa mo bone.’ Na u lokela ho ba rasaense e le hore u hlahlobe le ho seka-seka bopaki bo joalo? Vladimir Prelog ea hapileng khau ea Nobel o boletse hore esita le “batho ba hapang Khau ea Nobel ha ba na tsebo e fetang ea batho ba bang tabeng ea Molimo, bolumeli le bophelo ka mor’a lefu.”

Ho ba le pelo e tšepahalang le ho nyoreloa ’nete ho lokela ho u susumelletsa hore u hlahlobe ka botšepehi bopaki bo teng ’me bopaki boo bo tla u lebisa tseleng e nepahetseng. Ho na le bopaki bofe boo u ka bo hlahlobang?

[Setšoantšo se leqepheng la 3]

Molemi o lumela hore peō e tla hlomela ’me e mele