Pono ea Bibele
Na Molimo o Fana ka Meputso?
E O FANA ka eona. Ka hona, na ke ho bontša boithati ho sebeletsa Molimo re lebelletse moputso? Che, hobane eena ka boeena o behile moputso ka pel’a bahlanka ba hae ba tšepahalang. Ha e le hantle, joalokaha Jehova e le Molimo oa toka le lerato, o iketselitse tlamo ea hore a putse ba mo sebeletsang. Lentsoe la hae ho Ba-Heberu 11:6, karolo ea lona e re: “Motho ea atamelang Molimo o tlameha ho ba le tumelo linthong tse peli, ea pele ke hore Molimo o teng ’me ea bobeli ke hore Molimo o putsa ba mo batlang.”—Phillips.
Ho bontša tumelo ea ’nete ho Molimo ho etsa hore re fumane botsoalle ba hae, ’me botsoalle bona bo lebisa moputsong. Molimo o putsa ba batlang kamohelo ea hae ka tieo.
Meputso ke Liketso tsa Lerato
Jehova o batla hore re tsebe hore ke Molimo ea putsang ba mo ratang. Ka mohlala, batsoali ba nahanelang ba batla litsela tsa ho putsa ngoana oa bona eo ka ho ithatela a etsang mesebetsi lapeng a susumetsoa ke ho rata batsoali. Batsoali ba ka fa ngoana se fetang feela litlhokahalo tsa bophelo, ba mo putsa ka mpho e khethehileng. Ka linako tse ling mpho e ka ba chelete e ka behoang bankeng bakeng sa tšireletseho ea nakong e tlang ea ngoana. Ka hona, Molimo ha a tšoane le batho ba sa ananeleng kapa ba sa nahaneleng batho ba ba etsetsang lintho ka lerato kapa ka botšepehi bo sa sekisetseng. Jehova o na le kutloelo-bohloko ’me o atamela metsoalle ea hae. Haeba u tšoara ka tieo tumelong ho eena, a “ke ke a u tlohela, [a] ke ke [a] u lahla.”—Ba-Heberu 13:5.
Molimo o ananela le ho amohela bohle ba etsang esita le tšebeletso e fokolang ho eena, o ba fa menyetla e eketsehileng ea ho mo tseba. Mantsoe a Jesu ho Mattheu 10:40-42 a hlakisa ntlha ena, a re: “Ea le amohelang oa nkamohela; ’me ea nkamohelang o amohela ea nthomileng. Ea amohelang moporofeta, ka hoba e le moporofeta, o tla neoa moputso oa moporofeta; le ea amohelang ea lokileng, ka hoba a e-na le lebitso la ea lokileng, o tla neoa moputso oa ea lokileng. E mong le e mong ea nosang e mong oa ba banyenyane bana mohope feela oa metsi a batang, ka hoba a e-na le lebitso la morutuoa oa ka, ka ’nete ke re ho lōna: A ke ke a timelloa ke moputso oa hae.”
Jesu o ne a ronngoe ke Ntate oa hae, Jehova. Kahoo, motho ea amohelang barutuoa ba Kreste hantle—ebang ke baprofeta, batho ba lokileng, kapa e monyenyane—o tla be a amohela Kreste haesita le Molimo, ea romileng Kreste. Ka sebele motho ea joalo o tla hlohonolofatsoa; o tla putsoa. Lekese la matlotlo a hae a moea le tla tlala haholoanyane. Hobane’ng? Hobane Jehova o hopola esita le ketso e nyenyane ka ho fetisisa ea tšebeletso e fanoang ho tšehetsa ’Muso oa hae, ’me ketso e joalo e tla putsoa.—Ba-Heberu 6:10.
Ka ho thahasellisang, Petrose, morutuoa oa Jesu, o ile a botsa Jesu ka ho toba hore na ebe eena le baapostola-’moho le eena ba ne ba tla fumana moputso: “Bona, rōna re tlohetse tsohle, ’me re u latetse; re ba le eng ka hona?” (Mattheu 19:27) Jesu ha aa ka a nahana hore potso ena ha ea lokela empa o ile a fana ka karabo e e lumelang, a re: “E mong le e mong ea tlohetseng matlo, leha e le banab’abo, kapa bo-khaitselie, leha e le ntat’ae, kapa ’m’ae, kapa bana, leha e le masimo, ka baka la lebitso la ka, o tla neoa ha lekholo, a je le lefa la bophelo bo sa feleng.”—Mattheu 19:29.
Meputso ea Hona Joale le ea Nakong e Tlang
Karabo eo Jesu a faneng ka eona e ile ea bontša hore balateli ba hae ba ne ba tla putsoa hona joale le nakong e tlang. Moputso o mong oa hona joale ke hore ba fetohe karolo ea lelapa la machaba le ntseng le hōla, la baena le bo-khaitseli ba moea. Le hoja likereke tsa Bokreste-’motōana li tletleba ka lebaka la ho fokotseha ha palo ea litho tsa tsona le ho hloka tšehetso, liholo tseo ho kopaneloang ho tsona tsa Lipaki tsa Jehova ka puo ea tšoantšetso lia tšoloha. Lipaki tse ncha tse makholo a likete li kolobetsoa selemo le selemo.
Moputso o mong ke khotso ea kelello hammoho le khotsofalo le thabo tseo botsoalle le tsebo ea Molimo li li tlisang. E, “borapeli, ha bo e-na le ho kholoa ha pelo, ke leruo le leholo.” (1 Timothea 6:6) Ka sebele ho bonahatsa boemo bo thabileng ba kelello ha motho a khona ho bua joaloka moapostola Pauluse: “Ke ithutile ho kholoa litabeng life le life tseo ke leng ho tsona.”—Ba-Filippi 4:11.
Nakoana pele ho lefu la hae, Pauluse o ile a ngola ka moputso oa nakong e tlang bakeng sa “mohlatsoana” oa balateli ba Jesu ba tlotsitsoeng—moputso oa ho tsosetsoa bophelong ba leholimo: “Ho setseng e se e le ho amohela moqhaka oa ho loka oo ke o behetsoeng, oo Morena, moahloli ea lokileng, a tlang ho nea oona ka letsatsi lela, e seng ’na feela, le bohle ba ratileng ho tla ha hae.”—Luka 12:32; 2 Timothea 4:7, 8.
Balateli ba Jesu ba limilione tse se nang palo bao e leng “linku tse ling” tsa hae ba lebelletse moputso oa nakong e tlang oa bophelo bo sa feleng lefatšeng le fetotsoeng paradeise. (Johanne 10:16) ’Me Jesu o ile a tiisa hore balateli ba hae ba seng ba shoele ba tla “buseletsoa tsohong ea ba lokileng.”—Luka 14:14.
Bona Moputso ka Mahlo a Kelello
Ho loketse ho leka ho bona litlhohonolofatso tse joalo ka mahlo a kelello, le hoja ho se motho ea tsebang hantle hore na li tla ba joang. Na ha u khone ho utloa thabo e hlalositsoeng ho Esaia 25:8: “O tla felisa lefu ka ho sa eeng kae; Morena Jehova o tla felisa meokho lifahlehong tsohle”? Leka ho iketsetsa pono ea mantsoe a Esaia 32:17: “Moputso oa ho loka e tla ba khotso, tholoana ea ho loka e be phomolo le boiketlo ka ho sa eeng kae.” E, batho bohle ba tla be ba sebetsa hammoho ba e-na le botsoalle ba ’nete. (Esaia 65:21-25) Esita le kajeno, mosebetsi o mafolo-folo o fella ka malapa a matle le lihlahisoa tsa boleng bo phahameng. Joale, lefatšeng le lecha la Molimo, batho ba phelang hantle tlas’a maemo a phethahetseng ba tla khona ho hlahisa ntho leha e le efe e hlokahalang ho etsa hore bophelo e be bo thabisang.—Pesaleme ea 37:4.
Meputso eo Molimo a fanang ka eona ha e itšetlehe ka tšebeletso e hlomphehang eo re e etsang empa e tsoa leratong la hae e le mpho ho sa tsotellehe boemo boo re leng ho bona ba boetsalibe. (Ba-Roma 5:8-10) Leha ho le joalo, ho na le kamano pakeng tsa moputso o lebelletsoeng le boitšoaro ba rōna. Ka tieo re tlameha ho batla Jehova ka tumelo e tiileng le mamello. (Ba-Heberu 10:35-39) Ka mantsoe a mang, “seo le se etsang, leha e ka ba eng le eng, le se etse ka pelo e ratang joalo ka hoja le etsetsa Morena, e seng batho; le tsoe le tseba hobane le tla fuoa ke Morena moputso oa lefa.” E, ehlile o fana ka meputso.—Ba-Kolosse 3:23, 24.