Na u Ahlola Lefatše ka Tumelo ea Hao?

“Ka tumelo . . . Noe . . . a haha areka, hore a tle a pholosoe le ba lelapa la hae. Ka ho lumela ha hae o ile a ahlōla lefatše.”—BA-HEBERU 11:7, “TLP”.

1, 2. Re ka ithuta eng ka ho hlahloba bophelo ba Noe?

JEHOVA o ile a neha Noe le lelapa la hae—ba le robeli feela ka palo—tokelo ea hore e be bona feela batho ba pholohang Moroallo. Bophelo ba bohle ba phetseng mehleng ea Noe bo ile ba khutsufatsoa ha Molimo o ba hoholella ka lebitleng la metsi. Kaha ka lebaka leo Noe ke eena moholo-holo oa rōna bohle, re lokela ho leboha haholo bakeng sa tumelo eo a ileng a e bontša.

² Re ka ithuta ho hongata ka ho hlahloba bophelo ba Noe. Mangolo a re bolella hore na ke hobane’ng ha Molimo o ile oa mo hauhela ka pholoho ha O timetsa batho ba moloko oa Noe. Tlaleho eona ena ea bomolimo e bontša ka ho hlaka hore moloko oa rōna o talimane le kahlolo e tšoanang ea Molimo. Ka eona, Jesu o itse: “Mahlomola a tla ba maholo, ha e sa le le tšimolohong ea lefatše, ho fihlela joale, tsietsi e kalo ha e-so ho ka e e-ba teng, ’me ha e ka ke ea boela ea e-ba teng, le ka mohla o le mong.” (Mattheu 24:21) Ka ho etsisa tumelo ea Noe, re ka ba le tšepo e tiileng ea ho pholoha timetso e haufi haholo ea tsamaiso ena ea joale e khopo.—Ba-Roma 15:4; bapisa Ba-Heberu 13:7.

 3. Ke hobane’ng ha Jehova a ile a tlisa Moroallo?

³ Nakong ea lilemo tse 1 656 ho tloha pōpong ea Adama ho isa Moroallong, ke batho ba ’maloa feela ba neng ba e-na le tšekamelo ea ho etsa botle. Boitšoaro bo ile ba theohela boemong bo tlaase ka ho fetisisang. “Jehova a bona bolotsana ba batho hoba bo boholo lefatšeng, le hoba ’mōpo oa mehopolo eohle ea lipelo tsa bona o mobe feela ka matsatsi ’ohle.” (Genese 6:5) Pefo, ho batla menate, le boteng ba mangeloi a iphetotseng a ileng a nyala basali ’me a hlahisa bana ba linatla e bile a mang a mabaka a ileng a isa ho lihoeng ha kahlolo ea Molimo holim’a lefatše leo la boholo-holo la batho. Ho Noe, Jehova o itse: “Bofelo ba nama eohle bo fihlile pel’a ka, hobane lefatše le tletse ho bolaeana ha bona.” Mamello ea ’Mōpi, “Moahloli oa lefatše lohle,” e ne e felile.—Genese 6:13; 18:25, NW.

Noe o Ile a Tsamaea le Molimo

 4. (a) Jehova o ile a talima Noe joang, hona hobane’ng? (b) Le hoja toka ea Molimo e ne e laela hore lefatše leo le khopo le timetsoe, lerato la oona le ile la bontšoa joang molemong oa Noe le lelapa la hae?

⁴ Noe o ne a fapane hakaakang le batho ba mehleng ea hae! O ile a “fumana mohau pel’a Jehova. . . . Noe e ne e le motho ea lokileng, ea khabane mehleng ea hae; ’me Noe o na a tsamaea le Molimo.” (Genese 6:8, 9) Noe o ile a tsamaea le Molimo joang? Ka ho etsa lintho tse nepahetseng tse kang ho bolela e le ’muelli oa ho loka le ho haha areka ka tumelo le kutlo. Kahoo, le hoja lefatše leo la khale le ile la timetsoa hobane le ne le silafetse ka ho felletseng, Molimo o ile “oa boloka Noe, ’moleli oa ho loka, e le eena oa boroba meno e le ’meli, mohla o tlisang moroallo holim’a lefatše la banyefoli.” (2 Petrose 2:5) E, Molimo oa rōna o lerato le o nang le toka, Jehova, ha oa ka oa timetsa ba lokileng le ba khopo. O ile oa laela Noe hore a hahe areka e khōlō bakeng sa ho pholosa eena, lelapa la hae, le liphoofolo tse ’maloa, kaofela e le ka morero oa ho tlatsa lefatše ka baahi hape ka morao ho Moroallo. ’Me Noe “a fela a etsa joalo.”—Genese 6:22.

 5. Mangolo a hlalosa ho loka ha Noe le tumelo ea hae joang?

⁵ Ha areka e felile, Molimo oa re ho Noe: “Kena ka arekeng, uena le ba ntlo ea hao kaofela, hobane ke u bone u lokile pel’a ka lelokong lena.” Pauluse o akaretsa litaba hantle ka tsela ena: “Ka tumelo eitse hoba Molimo a mo tsebise tse e-song ho bonoe, Noe a ba hlokolosi, ’me a haha areka, hore a tle a pholosoe le ba lelapa la hae. Ka ho lumela ha hae o ile a ahlōla lefatše, a ba a ja lefa la ho loka ho fumanoang ka tumelo.”—Genese 7:1; Ba-Heberu 11:7, TLP.

 6. Noe o ile a ahlola lefatše la mehleng ea hae joang ka tumelo ea hae?

⁶ Noe o ne a e-na le tumelo e totobetseng. O ile a lumela seo Molimo o ileng oa se bua ka ho felisa moloko oo. Noe o ne a e-na le tšabo e ntle ea ho se halefise Jehova ’me ka kutlo o ile a haha areka ho ea ka litaelo tse fanoeng ke Molimo. Ho feta moo, e le ’moleli oa ho loka, Noe o ile a bolella ba bang ka timetso e haufi. Le hoja ba sa ka ba ela mantsoe a hae hloko, o ile a hana ho lumella lefatše leo le khopo hore le ‘mo petelletse hore a tšoane le lona.’ (Ba-Roma 12:2, Phillips) Ho e-na le hoo, ka tumelo ea hae, Noe o ile a ahlola lefatše ka bokhopo ba lona ’me a bontša hore le ne le lokeloa ke timetso. Ho utloa ha hae le liketso tsa hae tse lokileng li ile tsa bontša hore ba bang ntle ho eena le lelapa la hae ba ka be ba ile ba pholoha haeba ba ne ba ile ba utloisisa ho fetola mokhoa oo ba neng ba phela ka oona. Ka sebele, Noe o ile a paka hore ho sa tsotellehe likhatello tse tsoang nameng ea hae e sa phethahalang, lefatšeng le khopo le neng le mo potolohile, le Diabolose, ho ne ho ka khoneha ho phela bophelo bo khahlisang Molimo.

Lebaka Leo ka Lona Molimo o Tla Timetsa Tsamaiso Ena

 7. Re tseba joang hore re phela mehleng ea qetello?

⁷ Ka lilemo tse ling le tse ling tse leshome tsa lekholo lena la bo20 la lilemo ho bonahetse lefatše le ntse le tebela haholoanyane bokhopong. Hona e bile ’nete ka ho khethehileng ho tloha qalong ea Ntoa ea I ea Lefatše. Batho ba kene ka ho teba linthong tse kang boitšoaro bo bobe ba likamano tsa botona le botšehali, tlōlo ea molao, pefo, ntoa, lehloeo, meharo le tšebeliso e mpe ea mali hoo batho ba ratang se nepahetseng ba ipotsang hore na ho ka etsahala hore maemo a be mabe ho feta mona. Leha ho le joalo, Bibele e ile ea bolela esale pele ka phetoho ena e teng molokong oa rōna ea bokhopo bo fetelletseng, ea fana ka bopaki bo eketsehileng ba hore re “mehleng ea qetello.”—2 Timothea 3:1-5; Mattheu 24:34.

 8. Ba bang ba ’nile ba re’ng ka ho falimehela sebe?

⁸ Kajeno, maikutlo a akaretsang ka sebe a hlapollotsoe likelellong tsa batho ba bangata. Lilemo tse ka holimo ho tse 40 tse fetileng, Mopapa Pius XII o ile a bolela: “Sebe sa lekholo lena la lilemo ke ho lahleheloa ke kutloisiso eohle ea sebe.” Moloko oa hona joale o hana ho lumela sebe le molato. Bukeng ea hae Whatever Became of Sin? Dr. Karl Menninger o itse: “Lentsoe ‘sebe’ ka bolona . . . le se le batla le nyametse ho hang—lentsoe, hammoho le khopolo e tsamaeang le lona. Hobane’ng? E be ha ho sa na motho ea etsang libe?” Ba bangata ba lahlehetsoe ke matla a ho lemoha se nepahetseng ho se fosahetseng. Empa sena ha se re makatse, hobane Jesu o ile a bolela esale pele liphetoho tse joalo ha a tšohla ‘pontšo ea ho ba teng ha hae’ “nakong ea bofelo.”—Mattheu 24:3, NW; Daniele 12:4.

Mohlala oa Kahlolo o Behiloe Mehleng ea Noe

 9. Jesu o ile a bapisa joang mehla ea Noe le se neng se tla etsahala nakong ea ho ba teng ha Hae?

⁹ Jesu o ile a bontša ho tšoana pakeng tsa liketsahalo tsa mehleng ea Noe le se neng se tla etsahala nakong ea boteng ba Hae matleng a ’Muso, ho tloha ka 1914. O itse: “Joalo ka ha ho bile mehleng ea Nooe, le ho tleng ha Mor’a motho [Jesu] ho tla ba joalo. Hobane joalo ka mehleng e bileng teng pele ho moroallo oa metsi, ha batho ba ne ba e-ja, ba e-noa, ba nyala, ba nyalisa, ha ba ha fihla tsatsi leo Noe a keneng arekeng ka lona; ha ba ka ba lemoha, ha ba ha fihla moroallo, ’me ba nkoa bohle ke oona: ho tla ba joalo le ho tleng ha Mor’a motho.”—Mattheu 24:37-39.

10. Ke joang batho ka kakaretso ba sa lemoheng liketsahalo tsa bohlokoa tse amanang le boteng ba Kreste?

¹⁰ E, joaloka mehleng ea Noe, batho kajeno ha ba lemohe. Ba tšoarehile haholo ke bophelo ba letsatsi le letsatsi le ho lelekisa lintho tsa boikhabi, ba hana ho ela hloko hore maemo a hona joale a fapane haholo le a nakong e fetileng le hore a lumellana hantle le seo Jesu a itseng se ne se tla tšoaea nako ea bofelo. Ka lilemo, Lipaki tsa Jehova li ’nile tsa bolella moloko oa hona joale hore boteng ba Jesu e le Morena oa Messia leholimong bo qalile ka 1914 le hore bo tsamaellana le ‘ho fela ha tsamaiso ea lintho.’ (Mattheu 24:3, NW) Batho ba bangata ba soma molaetsa oa ’Muso, empa le sona sena se ile sa boleloa esale pele ha moapostola Petrose a ngola: “Le ntse le tseba haholo-holo hobane, mehleng ea morao, ho tla hlaha basomi ba tla tsamaea ka litakatso tsa bona, ba soma, ba re: E kae pallo ea ho tla ha hae? Hobane, ha e sa le ho e-shoa bo-ntate moholo, ntho tsohle li sa ntse li tiile, li sa le joalo ka qalong, ha li hloloa.”—2 Petrose 3:3, 4.

11. Ke hobane’ng ha moloko oa kajeno o ke ke oa e-ba le boikemelo ha mahlomola a maholo a fihla?

¹¹ Leha ho le joalo, moloko oa kajeno o tla hloka boikemelo ha mahlomola a maholo a fihla. Hobane’ng? Hobane ho na le litlaleho tsa Bibele tsa likahlolo tsa bomolimo tsa boholo-holo tse behang mohlala oa seo Molimo o tla se etsa mehleng ea rōna. (Juda 5-7) Boprofeta ba Bibele bo ntseng bo phethahala ka pel’a mahlo a rōna bo bontša ntle ho tika-tiko hore na re hokae kemisong ea nako. Moloko ona o boetse o bona ka pel’a oona mosebetsi oa ho bolela oa Lipaki tsa Jehova le tlaleho ea tsona ea ho boloka botšepehi e tšoanang le ea Noe.

12. Ha e le hantle, Petrose o bapisa timetso ea lefatše la mehleng ea Noe le e tlang ho tlela “maholimo a joale le lefatše la joale” joang?

¹² Petrose o hlalosa se tlang ho etsahalla ba sa lemoheng linnete tsena. Joaloka Jesu, moapostola o etsa joalo ka ho supa se ileng sa etsahala mehleng ea Noe, a re: ‘Ba lebala ka boomo hoba maholimo a na a hloloe khale ke lentsoe la Molimo, le hoba le lona lefatše le ntšitsoe metsing, la bolokoa har’a metsi; le hoba lefatše la mehleng eo le timelitsoe ka ’ona, ha le koahetsoe ke metsi. Ha e le maholimo a joale le lefatše la joale, li boloketsoe mollo ke lentsoe lona leo, li boloketsoe letsatsi la kahlolo, le la tšenyeho ea batho ba nyefolang.’—2 Petrose 3:5-7.

13. Ha ho talingoa liketsahalo tsa bohlokoa tse tlang, ke keletso efe e tsoang ho Petrose e lokelang ho eloa hloko?

¹³ Kaha kahlolo ena e ke keng ea checha ea Molimo e re tjametse ka mahlong, a re se keng ra thetsoa kapa ra tšosoa ke basomi. Ha ho hlokahale hore re kopanele ho seo e tla ba qetello ea bona. Petrose oa eletsa: “Ha e le moo ntho tseo tsohle, li abetsoe ho felisoa, e ka khona le be batho ba matla hakakang liketsong tse halalelang tsa borapeli; le ntse le lebeletse, ’me le akofisa ho tla ha letsatsi la Molimo, leo maholimo a tla felisoa ke ho cha ka lona, ’me metheo e tla qhibiliha ke ho cha! Empa re lebeletse, ka pallo ea oona, maholimo a macha le lefatše le lecha moo ho loka ho ikahetseng teng.”—2 Petrose 3:11-13.

Etsisa Tumelo ea Noe Bakeng sa ho Pholoha

14. Ke lipotso life tse ka re thusang hore re itlhahlobisise?

¹⁴ Kajeno, re talimane le liphephetso tse tšoanang le tse neng li talimane le Noe le lelapa la hae ka ho ba ba batlang ho finyella pholoho le ba tla lula ba ntse ba e batla. Joaloka Noe, Lipaki tsa Jehova li ahlola lefatše ka tumelo ea tsona e tšehelitsoeng ke mesebetsi e metle. Empa e mong le e mong oa rōna a ka ’na a ipotsa: ‘E be ’na ka bonna ke tsoella joang? Haeba mahlomola a maholo a ne a ka tla hosasane, na Molimo o ne o tla nkahlola hore ke tšoaneloa ke ho pholoha? Joaloka Noe, ea ileng a ‘ipaka a se na molato har’a batho ba mehleng ea hae,’ na ke na le sebete sa ho ba ea fapaneng le lefatše? Kapa na ka linako tse ling ho thata ho bolela phapang pakeng tsa ka le motho oa lefatše ka lebaka la tsela eo ke itšoarang ka eona, ke buang ka eona kapa ke aparang ka eona?’ (Genese 6:9, NW) Jesu o ile a re ka barutuoa ba hae: “Hase karolo ea lefatše, feela joalokaha ke se karolo ea lefatše.”—Johanne 17:16, NW; bapisa 1 Johanne 4:4-6.

15. (a) Ho ea ka 1 Petrose 4:3, 4, re lokela ho talima monahano le boitšoaro tsa rōna tsa lefatše tsa nako e fetileng joang? (b) Re lokela ho etsa eng haeba re nyatsoa ke metsoalle ea rōna ea lefatše ea nakong e fetileng?

¹⁵ Petrose oa eletsa: “Li lekane linako tse fetileng tseo re li phetseng re ntse re etsa ho ratoang ke bahetene, ha re ne re itsamaela ka bootsoa, le ka litakatso, le ka botahoa, le ka meharo ea lijo le ea lino, le ka tšebeletso e manyala ea melimo ea bohata. Ke moo ba makalang ha le sa mathele hammoho le bona khaphatsehong eo ea bohlola, ’me ba le nyefola ke hona.” (1 Petrose 4:3, 4) Metsoalle ea hao ea nakong e fetileng ea lefatše e ka ’na ea u bua hampe hobane u tsamaea le Molimo ’me u se u sa hlole u matha le eona. Empa, joaloka Noe, u ka e ahlola ka tumelo ea hao le ka mesebetsi ea hao e metle e etsoang ka boinyenyefatso.—Mikea 6:8, NW.

16. Molimo o ile oa talima Noe joang, ’me ke lipotso life tse ka re thusang ho hlahloba mehopolo ea rōna le boitšoaro ba rōna?

¹⁶ Molimo o ile oa nka Noe e le monna ea lokileng. Mopatriareka eo ea tšepahalang o ile a “fumana mohau pel’a Jehova.” (Genese 6:8) Ha u hlahloba mehopolo ea hao le boitšoaro ba hao leseling la litekanyetso tsa Molimo, na u ikutloa hore o amohela seo u se etsang, le libaka tsohle tseo u eang ho tsona? Na ka linako tse ling u qaputsa hanyenyane feela boithabisong bo hlephileng bo atileng haholo hakana hona joale? Lentsoe la Molimo le re re lokela ho nahana ka lintho tse hloekileng, tse molemo, le tse hahang. (Ba-Filippi 4:8) Na u ithuta ka cheseho Lentsoe la Molimo e le hore u ‘koetlise matla a hao a temoho ho khetha se nepahetseng ho se fosahetseng’? (Ba-Heberu 5:14, NW) Na u hana metsoalle e mebe le ho nka e le habohlokoa ho ba le setsoalle le barapeli ’moho le uena ba Jehova libokeng tsa Bokreste le liketsahalong tse ling?—1 Ba-Korinthe 15:33; Ba-Heberu 10:24, 25; Jakobo 4:4.

17. Joaloka Lipaki tsa Jehova, re ka tšoana le Noe joang?

¹⁷ Ka mor’a ho tlaleha ka ho phethoa ha areka, Mangolo a re: “Eaba Noe o etsa kahohle kamoo Molimo o mo laetseng kateng, a fela a etsa joalo.” (Genese 6:22) Monna eo ea nang le bomolimo hape o ne a chesehela ho bolela e le paki ea Jehova. Joaloka Noe, u ka ba ’muelli ea tiileng oa se nepahetseng joaloka ’moleli oa ka mehla oa ho loka. Tiisetsa ho utloahatseng temoso ea bofelo ba lefatše lena le khopo, le hoja e le ba ’maloa feela ba mamelang. Sebetsa hammoho le balumeli ’moho le uena ho etsa hore mosebetsi oa ho etsa barutuoa o etsoe pele ho bofelo.—Mattheu 28:19, 20.

18. Jehova o lekanyetsa ba tla pholoha mahlomola a maholo motheong ofe?

¹⁸ O sebelisa litekanyetso tse tšoanang tse lokileng le tsa toka joalokaha o ile oa etsa mehleng ea Noe, hona joale Molimo o lekanyetsa hore na ke bafe ba tla pholoha le ba tla timela nakong ea mahlomola a maholo. Jesu o ile a tšoantša mosebetsi oa hona joale oa ho arola le ho arola ha molisa linku ho lipōli. (Mattheu 25:31-46) Batho ba etsang hore bophelo ba bona bo likolohe ho lakatseng le ho phehelleng lintho tsa boikhabi ha ba batle ha lefatše la khale le fela ’me ba ke ke ba pholoha. Empa ba qobang ho ameha litšileng tsa lefatše lena, ba bolokang tumelo e matla ho Molimo, le ba tsoelang pele ho bolela molaetsa oa ’Muso, ba utloahatsa temoso ea kahlolo e tlang ea Jehova, ba tla thabela mohau oa Molimo e le baphonyohi. Jesu o itse: “Mohlang oo, ho banna ba babeli ba tla beng ba le tšimong, e mong o tla nkoa, e mong a siuoe; ho basali ba babeli ba tla beng ba sila leloaleng, e mong o tla nkoa, e mong a siuoe.”—Mattheu 24:40, 41; 2 Ba-Thessalonika 1:6-9; Tšenolo 22:12-15.

Jaa Lefa la Mahlohonolo le Noe

19. Esaia le Mikea ba ile ba bolela esale pele ka pokello efe bakeng sa mehla ea qetello?

¹⁹ Boprofeteng bo tšoanang, baprofeta ba Molimo Esaia le Mikea ka bobeli ba ile ba hlalosa se neng se tla etsahala nakong ea mehla ea qetello. Ba bone esale pele seo re se bonang se phethahala kajeno—mokoloko oa batho ba lipelo li lokileng o e-tsoa lefatšeng la khale ’me o nyolohela thabeng ea tšoantšetso ea borapeli ba ’nete. Ba fetisetsa memo ho ba bang: “Tloong, re nyoloheleng thabeng ea Jehova, ka tlung ea Molimo oa Jakobo, o tle o re rute mekhoa ea oona, re tsamaee litseleng tsa oona.” (Esaia 2:2, 3; Mikea 4:1, 2) Na u tsamaea le letšoele lee le thabileng?

20. Ke mahlohonolo afe a tla thabeloa ke ba ahlolang lefatše ka tumelo ea bona?

²⁰ Esaia le Mikea le bona ba ile ba bolela mahlohonolo a tla thabeloa ke ba ahlolang lefatše ka tumelo ea bona. Khotso le toka tsa ’nete li tla rena har’a bona, ’me ha ba sa tla hlola ba ithuta ntoa. Ba tla ba le tšepo e tiileng ea lefa le tsoang ho Jehova ’me ba tla “lula e mong le e mong ka tlas’a feie ea hae le ka tlas’a morara oa hae.” Empa motho e mong le e mong o tlameha ho etsa qeto e tiileng, hobane Mikea o bontša hore litsela li ka ba peli, a re: “Lichaba kaofela li tsamaea se seng le se seng ka lebitso la molimo oa sona, empa rōna, re tla tsamaea ka lebitso la Jehova, Molimo oa rona, ka mehla le mehla.”—Mikea 4:3-5; Esaia 2:4.

21. U ka kopanela joang tlhohonolofatsong e khōlō ea bophelo bo sa feleng lefatšeng?

²¹ Mangolo a bontša ka ho hlakileng se hlokahalang ho pholoha mahlomola a maholo: tumelo e matla. Noe o ne a e-na le tumelo e joalo, empa na uena u na le eona? Haeba u na le eona, joaloka eena u tla “ja lefa la ho loka ho fumanoang ka tumelo.” (Ba-Heberu 11:7, TLP) Noe o ile a pholoha timetso e neng e laetsoe ke Molimo e ileng ea tlela moloko oa hae. Ha aa ka a phela feela lilemo tse 350 ka morao ho Moroallo empa o tla tsosoa ka tebello ea ho phela lefatšeng ka ho sa feleng. Ke tlhohonolofatso e kaakang! (Ba-Heberu 11:13-16) U ka kopanela tlhohonolofatsong eo le Noe, lelapa la hae, le ba bang ba limillione ba ratang ho loka. Joang? Ka ho mamella ho isa qetellong le ka ho ahlola lefatše ka tumelo ea hao.

Na u sa Hopola?

◻ Ke hobane’ng ha ho ithuta bophelo ba Noe e le habohlokoa bakeng sa Bakreste?

◻ Batho ba moloko ona ha ba lemohe eng, e isang timetsong ea bona?

◻ Joaloka Noe, re ka ahlola lefatše lee joang?