Na U Etsa Thato ea Molimo?

TŠEBELETSONG ea tsona ea ntlo le ntlo, Lipaki tsa Jehova tse peli li ile tsa kopana le moprista oa Kereke ea Episkopale. O ne a bonahala e le motho ea thabileng, ea litelu-telu, ea ka bang lilemo li 60, a apere sekipa se ngotsoeng lebitso la kereke ea hae. Hoo e batlang e le ka nako e le ’ngoe o ile a re: “Ekare litho tsa kereke ea rōna li ka be li cheseha joaloka lōna ho haseng Lentsoe, empa ke tla lokela ho le kōpa hore le se hlole le e-tla ha ka hape.”

E, ho na le batho ba bangata ba ratang mosebetsi oa Lipaki tsa Jehova le ho li babatsa ka cheseho le mafolo-folo a tsona. Leha ho le joalo, ho hang ha ba thahaselle seo Lipaki li se etsang, leha e le hore ba ka nahanisisa ka ho etsa mosebetsi oo ka bobona. Leha ho le joalo, boemo bona ba litaba bo bonahalang bo itoantša hase ntho e ncha. Bo ile ba hlokomeloa ke Jesu mehleng ea hae, ’me a hatisa ntlha eo ka matla ka papiso e hapang maikutlo.

“Le nahana’ng? Monna o ne a e-na le bana ba babeli. Ha a e-ea ho oa pele, a re, ‘Ngoan’a ka, tsamaea u il’o sebetsa tšimong ea ka ea merara kajeno.’ Enoa a arabela a re, ‘Ke tla ea, ntate,’ empa a se ke a ea. Ha a atamela oa bobeli, a bua se tšoanang. Enoa ha a arabela a re, ‘Nke ke.’ Ka mor’a moo a ikoahlaea ’me a ea. Ke ofe ho ba babeli baa ea entseng thato ea ntat’ae?”—Mattheu 21:28-31, NW.

Karabo e totobetse. Joaloka letšoele le neng le mametse Jesu, re ne re tla arabela ka ho re, “Ke oa bobeli.” Empa, ha e le hantle, ka ho sebelisa papiso eo, Jesu o ne a tlisa tlhokomelong ea rōna hore ho etsa seo ntate a se batlang ke hona habohlokoa. Le hoja mora oa bobeli a ile a re ha a batle ho ea, o ile a ea ’me a babatsoa ka lebaka leo. Ho etsa mosebetsi oa mofuta o lokileng ke habohlokoa ka ho tšoanang. Mora oa bobeli o ile a nka khato ea ho ea sebetsa serapeng sa ntata’e sa merara; haa ka a ea sebetsa serapeng seo e leng sa hae sa merara.

Sena sohle se bolela eng ho rōna? Molimo o hloka eng ho barapeli kajeno? Re ka ithuta eng bophelong ba Jesu se tla re thusa ho etsa thato ea Ntat’ae? Lipotso tsena ke tsa bohlokoa, ’me ho fumana ha rōna likarabo tse nepahetseng ho tla bolela boiketlo ba rōna ba ka ho sa feleng, hobane “ea etsang thato ea Molimo, o hlola ka ho sa feleng.”—1 Johanne 2:17; Ba-Efese 5:17.

“Thato ea Molimo” ke Eng?

Lereo “thato” le thathamisitsoe ka makhetlo a fetang 80 ho Comprehensive Concordance of the New World Translation of the Holy Scriptures. Ka makhetlo a ka bang 60 ho ana (kapa a ka etsang karolo ea 75 lekholong) ho buuoa ka thato ea Molimo. Lipolelo tse kang “will of God” (thato ea Molimo), “will of my Father” (thato ea Ntate), le “God’s will” (thato ea Molimo) li hlaha ka makhetlo a ka holimo ho 20. Ho sena re ka hlokomela hore thato ea bomolimo e lokela ho ba ea bohlokoa bo boholo ho rōna. Ho etsoa ha thato ea Molimo e lokela ho ba kameho e khōlō bophelong ba rōna.

Ka Sesotho lereo “thato” le bolela ‘takatso, taba-tabelo, boikemisetso, ntho e lakatsehang, haholo-holo khetho kapa boikemisetso ba motho ea nang le bolaoli kapa matla.’ Ka hona, Jehova, Molaoli ea Phahameng, o na le thato, takatso kapa boikemisetso. Ke efe? Mangolo a re bolella hore karolo e itseng ea “thato [ea Molimo] ke hore batho ba mefuta eohle ba lokela ho bolokeha le ho tla tsebong e nepahetseng ea ’nete.” (1 Timothea 2:4, NW) Jesu Kreste le Bakreste ba pele ba ile ba sebetsa ka sephefumolohi sohle ho tlisetsa ba bang tsebo ena e nepahetseng.—Mattheu 9:35; Liketso 5:42; Ba-Filippi 2:19, 22.

Ke mang ea etsang thato ea Molimo kajeno? Har’a batho ba ka bang likete tse peli tsa limilione ba ipolelang e le balateli ba Jesu Kreste, ke ba bakae ba joaloka mora e monyenyane papisong ea Jesu, ea ileng a tsoa ’me a etsa thato ea ntat’ae? Ho fumana karabo ha ho thata. Balateli ba ’nete ba mehato ea Jesu Kreste ba ne ba tla etsa mosebetsi oo a neng a itse ba tla o etsa: “Litaba tse molemo li lokela ho boleloa lichabeng tsohle pele.” (Mareka 13:10, NW) Lipaki tsa Jehova tse ka holimo ho limilione tse ’nè le halofo lefatšeng ka bophara, li bolela litaba tse molemo tsa ’Muso oa Molimo ka mafolo-folo le ho ruta ba bang, li supa ’Muso e le oona tšepo feela ea moloko oa motho bakeng sa khotso le tšireletseho. Na u kopanela ka botlalo ho etseng thato ea Molimo? Na u bolela litaba tse molemo tsa ’Muso joalokaha Jesu a entse?—Liketso 10:42; Ba-Heberu 10:7.

Ho Fumana Thabo ka ho Etsa Thato ea Molimo

Le hoja ho e-na le thabo ho ithuteng seo thato ea Ntate e leng sona, ho na le thabo e khōloanyane ho ruteng ba bang thato ea Molimo. Jesu o ne a fumana thabo ha a ruta batho ka Ntat’ae. Ho ne ho tšoana le lijo ho eena. (Johanne 4:34) Le rōna re tla latsoa thabo ea ’nete haeba re etsa joalokaha Jesu a ile a etsa, e leng, ho bolela le ho ruta lintho tseo a li rutileng, lintho tseo a li amohetseng ho Ntat’ae. (Mattheu 28:19, 20) Joalokaha Jesu a ile a tšepisa, “ekare ha le tseba taba tseo, le lehlohonolo ha le li etsa.”—Johanne 13:17.

Ho etsa mohlala: ’Mè e mong ea sa tsoa khutlela hape tšebeletsong ea nako e tletseng ea bopula-maliboho o ile a re: “Ho bona sefahleho sa seithuti sa Bibele se ela ha linnete tse ngata tsa Bibele li ama pelo ea sona ke ho thabisang haholo! Ke thabo e khōlō ho ’na ho bona se seng sa liithuti se ngola ka ho qaqileng mangolo ’ohle pele ho thuto le ho ngola lintlha tsa bohlokoa nakong ea thuto e le hore se tle se arabele lipotso leha e le life tsa tlhahlobo hamorao.” E mong oa liithuti tsa hae tsa Bibele o ne a ile a kopana le ’nete ka tsela e itseng ha a le lipakeng tsa lilemo tse 13 le tse 16. Erekaha o ne a se a nyetsoe ’me a amehile ka mathata a mang a botho, o ne a laba-labela ho fumana Lipaki. O ile a thaba hakaakang ha khaitseli oa pula-maliboho a mo fumana! Mosali eo e mocha o ile a thabela haholo ho tsosolosa thuto ea hae ea Bibele.

Ho Boloka Thabo ea ho Etsa Thato ea Molimo

Morena Davida oa Iseraele ea boholo-holo ke e mong ea ileng a batla ho etsa thato ea Molimo bophelong bohle ba hae. Ho sa tsotellehe mathata a mangata le likhatello tse ileng tsa mo tlela, o ile a bululeloa ho re: “Ho etsa ho ratoang ke uena, Molimo oa ka, ke sona seo ke se ratang, molao oa hao o ngoliloe pelong ea ka.” (Pesaleme ea 40:8) Ho etsa thato ea Jehova ho ne ho le ka hare ho sephefumolohi sa Davida, ka hare ho botho ba hae ka bobona. Leo e ne e le lekunutu la thabo ea hae e sa feleng ha a sebeletsa Jehova. Ho etsa thato ea Molimo e ne e se moroalo ho Davida. Ho e-na le hoo, e ne e le thabo, ntho e tsoang pelong ea hae. Bophelong bohle ba hae, o ile a loanela hore a etse se molemohali ho sebeletseng Molimo oa hae, Jehova, le hoja a ’nile a etsa sebe le ho fokola ka linako tse ling.

Ka linako tse ling, thabo ea rōna e ka ’na ea fokotseha. Re ka ’na ra khathala kapa ra tepella maikutlong. Mohlomong lintho tse etsahetseng nakong e fetileng lia re ngongorehisa, letsoalo la rōna le re tšetšetha ka lebaka la ketso e fosahetseng eo re e entseng khale haholo. Hangata re ka hlōla maikutlo ana ka thuto e batsi haholoanyane ea Lentsoe la Molimo. Re ka iketsetsa sepheo sa ho ngola molao oa Molimo ka ‘lipelong tsa rōna,’ joalokaha Davida a ile a etsa. Haeba re leka ho etsa thato ea Molimo ka sephefumolohi sohle, e leng, ka matla ’ohle a rōna, o tla re putsa ka ho loketseng hobane oa tšepahala.—Ba-Efese 6:6; Ba-Heberu 6:10-12; 1 Petrose 4:19.

Ka ho thahasellisang, ho Ba-Heberu 10:5-7, moapostola Pauluse o ile a qotsa mantsoe a Davida ho Pesaleme ea 40:6-8 ’me a a sebelisa ho Jesu Kreste. Ka ho etsa joalo, Pauluse o ile a bontša kamoo Jesu a neng a atamelane kateng le Ntat’ae. Lentsoe la Seheberu bakeng sa “thato” le jere maikutlo a ‘thabo, takatso, kamohelo, kapa nyakallo.’ Pesaleme ea 40:8 e ka ’na ea baleha tjena mabapi le Kreste: “Ho etsa se u nyakallisang, Molimo oa ka, kea ho thabela.”a Jesu o ne a batla ho etsa se nyakallisang Ntat’ae. Jesu o ile a etsa se fetang seo a neng a lebeletsoe ho se etsa. O ile a etsa se neng se le haufi-ufi le pelo ea Ntat’ae, ’me o ne a thabela ho se etsa.

Bophelo bohle ba Jesu bo ne bo likoloha holim’a ho ruta ba bang seo thato ea Molimo e leng sona le seo ba tlamehileng ho se etsa hore ba fumane tlhohonolofatso ea Molimo. E ne e le ’moleli oa nako e tletseng le tichere ’me o ile a fumana thabo e khōlō ka ho etsa mosebetsi oo. Ka hona ke ho utloahalang hore ha re etsa mosebetsi oa Jehova haholoanyane, re tla fumana thabo e khōloanyane. Na le uena u ka sebeletsa ka nako e tletseng mosebetsing oa boboleli e le hore thabo ea hao le eona e ka eketseha?

Thuso e eketsehileng ea ho boloka thabo ha re etsa thato ea Molimo ke ho lula re tsepamisitse tlhokomelo e tobileng bokamosong. Ke sona seo Jesu a ileng a se etsa. “Ka baka la thabo e neng e behiloe ka pel’a hae o ile a mamella thupa ea tlhokofatso, nyeliso e hlabisang lihlong.” Ho eena, e ne e le ho thabisang ho ipaka a tšepahala ho Molimo ho isa qetellong le ho fumana moputso oa borena letsohong la Ntata’e le letona.—Ba-Heberu 12:2, NW.

Inahanele ka thabo ea nako e tlang e tla tlela ba tsoelang pele ho etsa thato ea Molimo. Ba tla bona ho felisoa ha ba tsitlellang ho etsa thato ea bona ea boithati leha e utloisa bohloko ho ba lekang ka matla ho etsa thato ea Molimo. (2 Ba-Thessalonika 1:7, 8) Nahana ka thabo ea baratuoa ba tsositsoeng bafung ea ho fumana monyetla oa ho ithuta le ho etsa thato ea Molimo. Kapa nahanisisa ka morero oa Molimo oa ho etsa lefatše hore e be Paradeise hape. ’Me qetellong, inahanele ka tokoloho e tlang ho ba teng ka lebaka la ho timetsoa ho feletseng ha Satane, mohanyetsi oa thato ea Jehova.

E, ho etsa thato ea Molimo kajeno ho ka tlisa thabo e khōlō hona joale le thabo e sa feleng nakong e tlang. Ho sa tsotellehe karabo eo re e fumanang mosebetsing oa boboleli, a re etsiseng mohlala oa Jesu oa ho thabela ho etsa thato ea Ntat’ae.

[Mongolo o botlaaseng ba leqephe]