Na U Emela Bobusi ba Jehova?

“E-reng har’a lichaba: ‘Jehova ke morena.’”—PESALEME EA 96:10.

1, 2. (a) Ke ketsahalo efe ea bohlokoa e ileng ea etsahala hoo e ka bang ka October 29 C.E.? (b) Ketsahalo eo e ile ea bolela’ng ho Jesu?

HOO e ka bang ka October 29 C.E., ho ile ha etsahala ntho e ’ngoe ea bohlokoa, le eo ho seng mohla e kileng ea etsahala lefatšeng. Mongoli oa Kosepele Matheu oa tlaleha: “Ka mor’a hore Jesu a kolobetsoe kapele-pele a nyoloha a tsoa ka metsing; ’me, bonang! maholimo a buleha, ’me [Johanne Mokolobetsi] a bona moea oa Molimo o theoha joaloka leeba o tla holim’a [Jesu]. Bonang! Hape, ha e-ba le lentsoe le tsoang maholimong le reng: ‘Enoa ke Mora oa ka, ea ratoang, eo ke mo amohetseng.’” Ena e ne e le e ’ngoe ea liketsahalo tse seng kae tse ileng tsa tlalehoa ke bangoli ba Kosepele ka bone ba bona.—Matheu 3:16, 17; Mareka 1:9-11; Luka 3:21, 22; Johanne 1:32-34.

² Ho tšolleloa ha moea o halalelang holim’a Jesu ka tsela e bonahalang ho ile ha mo khetholla hore ke Motlotsuoa, e leng lentsoe le bolelang Mesia, kapa Kreste. (Johanne 1:33) Qetellong, “peō” e tšepisitsoeng e ne e hlahile! Ka pel’a Johanne Mokolobetsi ho ne ho eme motho eo Satane a neng a tla mo loma serethe le ea neng a tla khoba hlooho ea sera seo se seholo sa Jehova le sa bobusi ba Hae. (Genese 3:15) Ho tloha ka nako eo, Jesu o ne a tseba hantle hore o lokela ho ikitlaelletsa ho phethahatsa morero oa Jehova mabapi le bobusi ba Hae le ’Muso.

 3. Jesu o ile a etsa joang ho itokisetsa karolo eo a neng a tla e phetha ha a emela bobusi ba Jehova?

³ E le hore a itokisetse ho etsa mosebetsi oa hae o mocha, “Jesu, a tletse moea o halalelang, [o ile] a tloha Jordane, ’me moea oa mo isa lefeelleng.” (Luka 4:1; Mareka 1:12) Ha Jesu a le moo ka matsatsi a 40, o ile a ba le nako ea ho thuisa ka matla ka tseko ea bobusi e ileng ea hlahisoa ke Satane le ka khato eo a neng A lokela ho e nka e le hore a emele bobusi ba Jehova. Tseko eo e akarelletsa libōpuoa tsohle tse bohlale—leholimong le lefatšeng. Kahoo re lokela ho nahana ka botšepehi boo Jesu a ileng a bo bontša ’me re bone hore na ke sefe seo re lokelang ho se etsa ho bontša hore le rōna re batla ho emela bobusi ba Jehova.—Jobo 1:6-12; 2:2-6.

Tseko ea Bobusi ea Totobala

 4. Satane o ile a nka khato efe e ileng ea totobatsa tseko ea bobusi?

⁴ Ho hlakile hore Satane o ile a hlokomela ha lintho tse sa tsoa boleloa li ntse li etsahala. Kapele-pele, o ile a hlasela “peō” e ka sehloohong ea “mosali” oa Molimo. (Genese 3:15) Satane o ile a leka Jesu ka makhetlo a mararo, a mo khothalletsa hore a etse ntho e neng e bonahala eka e ka mo tsoela molemo ho e-na le hore a etse seo Ntate oa hae a neng a batla hore a se etse. Teko ea boraro ke eona eo ka ho khetheha e ileng ea totobatsa tseko ea bobusi. Ha Satane a bontša Jesu “mebuso eohle ea lefatše le khanya ea eona,” ka tello o ile a re ho Jesu: “Lintho tsena tsohle ke tla u fa tsona haeba u ka itihela fatše ’me ua nketsetsa ketso ea borapeli.” Kaha o ne a tseba hantle hore “mebuso eohle ea lefatše” e hlile e laoloa ke Diabolose, Jesu o ile a bontša hore na maikutlo a hae ke afe tsekong ea bobusi ha a ne a araba a re: “Tloha, Satane! Etsoe ho ngoliloe, ‘Ke Jehova Molimo oa hao eo u tla mo rapela, ’me ke eena feela eo u tla mo etsetsa tšebeletso e halalelang.’”—Matheu 4:8-10.

 5. Ke mosebetsi ofe o boima oo Jesu a neng a lokela ho o phetha?

⁵ Tsela eo Jesu a neng a phela ka eona e ile ea bontša ka ho hlaka hore sepheo sa hae se seholo e ne e le ho emela bobusi ba Jehova. E le hore a pake hore Molimo o ne a e-na le tokelo ea ho busa, Jesu o ne a tseba hantle hore o ne a lokela ho lula a tšepahala ho fihlela Satane a mo bolaea, e leng seo boprofeta bo neng bo boletse hore ke ho longoa ha serethe sa “peō” ea mosali. (Matheu 16:21; 17:12) Hape o ne a lokela ho pakela ’nete ea hore ’Muso oa Molimo ke boemeli boo Jehova a neng a tla bo fa matla a ho hlōla Satane oa lerabele bo be bo tlise khotso le taolo pōpong eohle. (Matheu 6:9, 10) Jesu o ile a etsa’ng hore a phethe mosebetsi oo o boima?

“’Muso oa Molimo o Atametse”

 6. Jesu o ile a bontša joang hore Molimo o ne a tla sebelisa ’Muso ho “qhaqha mesebetsi ea Diabolose”?

⁶ Qalong, “Jesu [o ile] a kena Galilea, a ntse a bolela litaba tse molemo tsa Molimo a re: ‘Nako e behiloeng e phethehile, ’me ’muso oa Molimo o atametse.’” (Mareka 1:14, 15) Ha e le hantle, o ile a re: “Ke tla bolela litaba tse molemo tsa ’muso oa Molimo le metseng e meng, hobane ke rometsoe sena.” (Luka 4:18-21, 43) Jesu o ile a pholletsa le naha, “a bolela ’me a phatlalatsa litaba tse molemo tsa ’muso oa Molimo.” (Luka 8:1) Jesu o ile a boela a etsa mesebetsi e mengata e matla—a fepa matšoele, a kokobetsa maemo a kotsi a leholimo, a phekola ba kulang le ho tsosa bafu. Ka mehlolo ena, Jesu o ile a paka hore Molimo a ka etsolla tšenyo eohle le mahlomola a bakiloeng ke borabele ba Edene ’me kahoo a ‘qhaqhe mesebetsi ea Diabolose.’—1 Johanne 3:8.

 7. Jesu o ile a laela balateli ba hae hore ba etse’ng, ’me ka lebaka la seo ho ile ha etsahala’ng?

⁷ E le hore litaba tse molemo tsa ’Muso li boleloe ka botlalo kahohle kamoo ho ka khonehang, Jesu o ile a bokella sehlopha sa balateli ba tšepahalang eaba o ba ruta ho etsa mosebetsi oo. O ile a qala ka ho fa baapostola ba hae ba 12 litaelo eaba ‘o ba romela ho bolela ’muso oa Molimo.’ (Luka 9:1, 2) Ka mor’a moo, o ile a roma ba bang ba 70 ho ea bolela molaetsa o reng: “’Muso oa Molimo o atametse ho lōna.” (Luka 10:1, 8, 9) Ha barutuoa bana ba khutla ’me ba tlalehela Jesu ka katleho eo ba bileng le eona mosebetsing oa ho bolela ka ’Muso, o ile a re: “Ke ile ka qala ho bona Satane a se a oele joaloka lehalima leholimong.”—Luka 10:17, 18.

 8. Tsela eo Jesu a neng a phela ka eona e ile ea bontša eng ka ho hlaka?

⁸ Jesu o ile a ikitlaetsa ka matla ’me o ile a sebelisa monyetla o mong le o mong ho paka ka ’Muso. O ne a sebetsa a sa khaotse bosiu le motšehare, a bile a itima lintho tse tloaelehileng tsa bophelo. O ile a re: “Liphokojoe li na le maphao le linonyana tsa leholimo li na le lihlaha, empa Mor’a motho ha a na moo a ka behang hlooho ea hae teng.” (Luka 9:58; Mareka 6:31; Johanne 4:31-34) Pelenyana ho lefu la hae, Jesu o ile a bua ka sebete ka pel’a Ponse Pilato a re: “Ke tletse sena lefatšeng, hore ke pakele ’nete.” (Johanne 18:37) Tsela eohle eo Jesu a neng a phela ka eona e ile ea bontša hore o ne a sa tlela feela ho ba mosuoe e moholo kapa moetsi oa mehlolo kapa esita le ho ba Mopholosi ea itetseng, empa o ne a tletse ho emela thato e phahameng ea Jehova le ho paka hore Molimo o na le matla a ho phetha thato eo ka ’Muso.—Johanne 14:6.

“Ho Phethehile!”

 9. Satane o ile a qetella a atlehile joang ho loma serethe sa “peō” ea mosali oa Molimo?

⁹ Sohle seo Jesu a ileng a se etsa mabapi le ’Muso se ile sa kukunela Sera, e leng Satane Diabolose. Khafetsa, Satane o ’nile a leka ho bolaea “peō” ea mosali oa Molimo a sebelisa karolo e lefatšeng ea “peō” ea hae—ea bopolotiki le ea bolumeli. Satane le mahlahana a hae ba ’nile ba hlasela Jesu ho tloha ha a ne a tsoaloa ho fihlela bofelong ba bophelo ba hae ba lefatšeng. Qetellong, nakong ea selemo ka 33 C.E., nako e ne e fihlile ea hore Mor’a motho a neheloe matsohong a Sera e le hore se mo lome serethe. (Matheu 20:18, 19; Luka 18:31-33) Litlaleho tsa Kosepele li bontša ka ho hlaka kamoo Satane a ileng a laola batho ho tloha ho Judase Iskariota ho isa ho baprista ba ka sehloohong, bangoli, Bafarisi le Baroma hore ba ahlole Jesu le hore ba mo bolaee habohloko thupeng ea tlhokofatso.—Liketso 2:22, 23.

10. Ke ntho efe ea bohlokoa ka ho fetisisa eo Jesu a ileng a e phetha ka ho shoela thupeng ea tlhokofatso?

¹⁰ Ho fihla eng kelellong ea hao ha u nahana ka Jesu a le thupeng ea tlhokofatso a e-shoa butle le ka tsela e otlang pelo? Mohlomong u hopola sehlabelo sa thekollo seo ka ho hloka boithati, Jesu a ileng a fana ka sona molemong oa batho. (Matheu 20:28; Johanne 15:13) Mohlomong u tsota lerato le leholo leo Jehova a le bontšitseng ka ho fana ka sehlabelo seo. (Johanne 3:16) Mohlomong u ikutloa joaloka molaoli oa lebotho oa Moroma ea ileng a susumelletseha hore a re: “Ka sebele enoa e ne e le Mor’a Molimo.” (Matheu 27:54) Ka sebele maikutlo ana kaofela a loketse. Ka lehlakoreng le leng, hopola hore mantsoe a ho qetela ao Jesu a ileng a a bua ha a ne a le thupeng ea tlhokofatso a ne a re: “Ho phethehile!” (Johanne 19:30) Ho ne ho phethehile eng? Le hoja Jesu a ile a finyella lintho tse ngata ka bophelo le lefu la hae, na ntho e ka sehloohong eo a neng a e tletse lefatšeng e ne e se ho lokisa tseko ea bobusi ba Jehova? Hape, na ho ne ho sa boleloa esale pele hore kaha e ne e le “peō,” o ne a tla lekoa habohloko matsohong a Satane e le hore ho tlosoe thohako eohle lebitsong la Jehova? (Esaia 53:3-7) Lintho tsena e ne e le boikarabelo bo boima, leha ho le joalo, Jesu o ile a li phetha ka ho feletseng. Ka sebele ho ne ho phethahetse!

11. Jesu o tla etsa’ng e le hore a phethahatse ka ho feletseng boprofeta bo boletsoeng Edene?

¹¹ Ka lebaka la botšepehi ba hae, Jesu o ile a tsosoa e le “moea o fanang ka bophelo,” eseng e le motho. (1 Bakorinthe 15:45; 1 Petrose 3:18) Jehova o ile a tšepisa Mora oa hae ea tlotlisitsoeng a re: “Lula ka letsohong la ka le letona ho fihlela ke beha lira tsa hao joaloka setuloana sa maoto a hao.” (Pesaleme ea 110:1) “Lira” tsena li akarelletsa senokoane se seholo, e leng Satane, le bohle bao e leng “peō” ea hae. Jesu Kreste e le Morena oa ’Muso oa Jehova oa Bomesia, o tla etella pele ho felisa marabele ’ohle, leholimong le lefatšeng. (Tšenolo 12:7-9; 19:11-16; 20:1-3, 10) Ka mor’a moo ho tla ba le phethahatso e feletseng ea boprofeta bo boletsoeng ho Genese 3:15 hammoho le thapelo eo Jesu a ileng a e ruta balateli ba hae, e reng: “’Muso oa hao o ke o tle. Thato ea hao e ke e etsahale lefatšeng, joalokaha e etsahala leholimong.”—Matheu 6:10; Bafilipi 2:8-11.

Mohlala oo re Lokelang ho o Latela

12, 13. (a) Kajeno batho ba etsa’ng ha ba utloa litaba tse molemo? (b) Re lokela ho ipotsa eng haeba re batla ho latela mehato ea Kreste?

¹² Kajeno, litaba tse molemo tsa ’Muso li boleloa linaheng tse ngata, joalokaha Jesu a ile a profeta hore ho ne ho tla ba joalo. (Matheu 24:14) Ka lebaka leo, batho ba limilione ba nehetse bophelo ba bona ho Molimo. Ba nyakaletse ka lebaka la litlhohonolofatso tse tla tlisoa ke ’Muso oo. Ba na le tšepo ea ho phela ka ho sa feleng ka khotso le tšireletseho lefatšeng la paradeise, ’me ba thabela ho bua le ba bang ka tšepo ea bona. (Pesaleme ea 37:11; 2 Petrose 3:13) Na u e mong oa baboleli baa ba ’Muso? Haeba ho joalo, rea u babatsa. Leha ho le joalo, ho na le ntho e ’ngoe hape eo e mong le e mong oa rōna a lokelang ho e ela hloko.

¹³ Moapostola Petrose o ile a ngola: “Kreste o ile a utloa bohloko bakeng sa lōna, a le siela mohlala hore le latele mehato ea hae haufi-ufi.” (1 Petrose 2:21) Hlokomela hore mona Petrose o buile ka ho utloa bohloko ha Jesu, eseng ka cheseho ea hae kapa bokhoni ba hae ba ho ruta. Kaha Petrose o ne a bone ha sena se etsahala, o ne a tseba hantle hore na Jesu o ne a ikemiselitse ho utloa bohloko hakae e le hore a ikokobeletse bobusi ba Jehova le ho paka hore Satane o hlile o leshano. Joale, re ka latela mehato ea Jesu ka litsela life? Re lokela ho ipotsa: ‘Ebe ke ikemiselitse ho utloa bohloko hakae e le hore ke emele bobusi ba Jehova ke be ke bo tlotle? Na tsela eo ke phelang ka eona le eo ke etsang tšebeletso ea ka ka eona e bontša hore ntho e ka sehloohong eo ke amehileng ka eona ke ho emela bobusi ba Jehova?’—Bakolose 3:17.

14, 15. (a) Jesu o ile a etsa’ng ha a ne a fuoa likeletso le litlhahiso tse fosahetseng, hona hobane’ng? (b) Ke tseko efe eo re lokelang ho e hopola kamehla? (Akarelletsa le litlhaloso tse lebokoseng le nang le sehlooho se reng “Ema le Jehova.”)

¹⁴ Letsatsi le leng le le leng, re tobana le liteko ebile re lokela ho etsa liqeto, tse khōlō le tse nyenyane. Re ka tseba joang hore na re lokela ho etsa’ng? Ka mohlala, re etsa joang ha re tobana le moleko oa ho etsa ntho e ka senyang boemo ba rōna ba Bokreste? Ha Petrose a ne a bolella Jesu hore a ikhauhele, Jesu o ile a etsa’ng? O ile a bua ka matla a re: “Suthela ka mor’a ka, Satane! . . . u nahana menahano ea batho, eseng ea Molimo.” (Matheu 16:21-23) Ha re fuoa menyetla ea ho ema hantle licheleteng kapa ea ho ntlafatsa mosebetsi o itseng o ka amang kamano ea rōna le Molimo, na re etsisa Jesu? Ha Jesu a ne a lemoha hore batho ba boneng mehlolo ea hae ba ne ba le “haufi le ho mo tšoara hore ba mo etse morena,” o ile a tloha ho bona ka potlako.—Johanne 6:15.

¹⁵ Ke hobane’ng ha Jesu a ile a nka bohato bo matla hakaale maemong aa le a mang? Ke hobane o ile a hlokomela hore ho ne ho e-na le ntho e ’ngoe ea bohlokoa ho feta ho sireletseha ha hae kapa seo eena a neng a nahana hore ke sa bohlokoa ho eena. O ne a batla ho etsa thato ea Ntate oa hae le ho emela bobusi ba Jehova ho sa tsotellehe se neng se ka mo hlahela. (Matheu 26:50-54) Kahoo, re tla ba kotsing ea ho sekisetsa kapa ea ho hlōleha ho etsa se nepahetseng, haeba re sa etsise Jesu ka hore kamehla re lule re hlaketsoe hore na tseko ea sebele ke efe. Hobane’ng? Hobane habonolo feela re ka inehella maqiting a Satane, eo e leng setsebi sa ho etsa hore ntho e fosahetseng e bonahale e hohela, joalokaha a ile a etsa ha a ne a leka Eva.—2 Bakorinthe 11:14; 1 Timothea 2:14.

16. Sepheo sa rōna se seholo e lokela ho ba sefe ha re thusa ba bang?

¹⁶ Ha re le tšebeletsong, re leka ka matla ho bua le batho ka lintho tseo ba amehileng ka tsona le ho ba bontša likarabo tse tsoang ka Bibeleng. Ona ke mokhoa o atlehang oa hore ba be le tjantjello ea ho ithuta Bibele. Ha e le hantle, sepheo sa rōna se seholo hase feela ho thusa batho hore ba tsebe seo Bibele e se buang kapa hore na ’Muso oa Molimo o tla tlisa litlhohonolofatso life. Re lokela ho ba thusa hore ba utloisise se hlileng se tsekoang. Na ba ikemiselitse ho ba Bakreste ba sebele ’me ba nke ‘thupa ea bona ea tlhokofatso’ le ho utloa bohloko ka lebaka la ’Muso oo? (Mareka 8:34) Na ba itokiselitse ho ba har’a batho ba emelang bobusi ba Jehova kahoo ba pake hore Satane o leshano le hore ke moetselletsi? (Liproverbia 27:11) Ke tlotla hore re emele bobusi ba Jehova re be re thuse le ba bang ho etsa joalo.—1 Timothea 4:16.

Ha ‘Molimo e E-ba Lintho Tsohle ho e Mong le e Mong’

17, 18. Ke nako efe e thabisang eo re ka e lebellang haeba re bontša hore re emela bobusi ba Jehova?

¹⁷ Haeba hona joale re ikitlaelletsa ho bontša hore re emela bobusi ba Jehova ka boitšoaro ba rōna le ka tšebeletso ea rōna, re ka lebella nako ea ha Jesu Kreste a tla “nehelana ka ’muso ho Molimo le Ntat’ae.” Seo se tla etsahala neng? Moapostola Pauluse oa hlalosa: “Ha a [se a] entse puso eohle le bolaoli bohle le matla lefeela. Kaha o tla busa e le morena ho fihlela Molimo a behile lira tsohle tlas’a maoto a hae. . . . Joale Mora le eena o tla ipeha tlas’a Ea ileng a beha lintho tsohle tlas’a hae, e le hore Molimo e ka ba lintho tsohle ho e mong le e mong.”—1 Bakorinthe 15:24, 25, 28.

¹⁸ E tla ba nako e thabisang hakaakang ha ‘Molimo e ba lintho tsohle ho e mong le e mong’! ’Muso o tla be o phethile mosebetsi oa oona. Bahanyetsi bohle ba bobusi ba Jehova ba tla be ba felisitsoe. Ho tla be ho boetse ho rena khotso le taolo bokahohleng bohle. Pōpo eohle e tla bina mantsoe a mopesaleme ha a ne a re: “Isang ho Jehova khanya ea lebitso la hae . . . E-reng har’a lichaba: ‘Jehova ke morena.’”—Pesaleme ea 96:8, 10.

Na U ka Araba?

• Jesu o ile a totobatsa tseko ea bobusi ba Molimo joang?

• Ke eng eo ka ho khetheha Jesu a ileng a e phethahatsa ka tšebeletso ea hae le ka lefu la hae?

• Re ka latela mohlala oa Jesu ka litsela life ha re bontša hore re emela bobusi ba Jehova?

[Lebokose/Setšoantšo se leqepheng la 29]

EMA LE JEHOVA

Joalokaha barab’abo rōna ba bangata ba Korea le ba libakeng tse ling ba tseba, ha Bakreste ba tobane le liteko tse matla, hoa thusa ho tseba hantle lebaka leo ka lona ba hlaheloang ke liteko tseo.

E mong oa Lipaki Tsa Jehova ea neng a koaletsoe chankaneng nakong ea puso ea Soviet o ile a re: “Se ileng sa re thusa hore re mamelle, ke ho utloisisa ka ho hlaka tseko e ileng ea hlahisoa serapeng sa Edene—e leng tseko ea hore na Molimo o na le tokelo ea ho busa. . . . Re ne re tseba hore re ne re e-na le monyetla oa ho emela bobusi ba Jehova . . . ’me sena se ile sa re matlafatsa sa ba sa re thusa hore re lule re tšepahala.”

E mong oa Lipaki Tsa Jehova o hlalosa hore na eena le Lipaki tse ling ba ile ba thusoa ke eng ha ba ne ba le kampong ea mosebetsi o boima. O re: “Jehova o ile a re tšehetsa. Ho sa tsotellehe maemo a boima, re ne re falimehile moeeng. Kamehla re ne re khothatsana ka ho hopotsana hore re ne re eme le Jehova tsekong ea bobusi ba bokahohleng.”

[Setšoantšo se leqepheng la 26]

Jesu o ile a emela bobusi ba Jehova joang ha a ne a lekoa ke Satane?

[Setšoantšo se leqepheng la 28]

Lefu la Jesu le ile la phethahatsa eng?