Ntho e Molemo ho Feta Litlolo

KA MOR’A ho bua ka “lithuso tse bonahalang ka ntle” tseo basali ba neng ba li sebelisetsa ho ntlafatsa botle, moapostola Petrose o ile a eletsa: “Ho e-na le hoo, botle ba lōna bo lokela ho akarelletsa botho ba lōna ba ka hare ba sebele, botle bo sa feleng ba moea o bonolo le o khutsitseng, e leng ba bohlokoahali mahlong a Molimo.”—1 Petrose 3:3, 4, Today’s English Version.

Hoa thahasellisa hore ebe ha moapostola enoa a ne a ngola ka mokhabo o joalo oa ka ntle, o ile a sebelisa sebōpeho sa lentsoe la Segerike koʹsmos, seo e boetseng e leng motso oa lentsoe la Senyesemane “cosmetic,” le bolelang “ho etsa botle [haholo-holo] ba lebala la sefahleho.” Na Petrose o ne a imetsa basali ba Bakreste ka ho ba thibela ho sebelisa makeup le lintho tse ling tse ntlafatsang motho? Ha ho letho ka Lentsoeng la Molimo le fanang ka maikutlo ao. Ho e-na le hoo, le lumella motho ho iketsetsa qeto tabeng ena, ka hona, ho ka lebelloa ho se tšoane ho itseng mabapi le seo motho a se khethang.

Leha ho le joalo, haeba makeup e sebelisoa ka ho tlōlisa, kapa e sebelisoa ka tekanyo e tšoenyang ba bang, seo se fana ka maikutlo afe? Na hase a ho ba tala, ho fetella, ho eiseha, ho etsa pontšo ea mponeng kapa boikhabi? Ka sebele, ho ka tlosa mosali seriti, mohlomong ha fana ka maikutlo a fosahetseng mabapi le boitšoaro ba hae.—Bapisa le Ezekiele 23:36-42.

Ha a hlokomela sena, mosali ea ‘ipolelang hore o fa Molimo tlhompho’ o tla leka ka matla, haeba a khetha ho sebelisa litlolo, hore sefahleho sa hae se bontše ho hlaphoheloa kelellong, bonolo, mosa le boinyenyefatso. Litšoaneleho tse joalo li tla eketsa bokhabane ba hae le botle. Ha e le hantle, ebang o khetha ho sebelisa makeup kapa che, o tla bontša seriti le botle bo ka hare. Sena se tla bontša hore oa tseba hore ho na le se molemo ho feta litlolo, joalokaha mantsoe a Petrose a qotsitsoeng ka holimo a bontša.—1 Timothea 2:9, 10.