E-ba le Pelo e Ratoang ke Jehova
“Molimo, bōpa ka ho ’na pelo e hloekileng, u kenye ka hare ho ’na moea o mocha, o tiileng.”—PESALEME EA 51:10.
1, 2. Ke hobane’ng ha re lokela ho thahasella lipelo tsa rōna?
O NE a le molelele ebile e le tjaka. Ha moprofeta Samuele a mo bona, o ile a mo khahla hoo a bileng a etsa qeto ea hore mora enoa oa letsibolo oa Jese ke eena eo Molimo a neng a mo khethile hore a hlahlame Saule boreneng. Empa Jehova o ile a re: “U se ke ua talima ponahalo [ea mora eo] le bophahamo ba seemo sa hae, kaha ke mo lahlile. . . . Motho o bona se bonahalang mahlong; empa ha e le Jehova, o bona seo pelo e leng sona.” Jehova o ile a khetha mora oa Jese oa ho fela, e leng Davida—“monna ea ratoang ke pelo ea hae.”—1 Samuele 13:14; 16:7.
2 Molimo a ka bona se ka pelong ea motho, joalokaha a ile a hlakisa hamorao: “’Na, Jehova, ke hlahloba pelo, ke phenya liphio, esita le ho fa e mong le e mong ho ea ka litsela tsa hae, ho ea ka litholoana tsa mesebetsi ea hae.” (Jeremia 17:10) E, “Jehova ke eena ea hlahlobang lipelo.” (Liproverbia 17:3) Leha ho le joalo, pelo ea motho, eo Jehova a e hlahlobang, ke eng? Hona re ka etsa eng hore re be le pelo e ratoang ke eena?
“Motho ea ka Sephiring oa Pelo”
3, 4. Lentsoe “pelo” le sebelisitsoe ka moelelo ofe haholo-holo ka Bibeleng? Etsa mehlala.
3 Lentsoe “pelo” le hlaha ka makhetlo a ka bang sekete ka Mangolong a Halalelang. Hangata le sebelisitsoe ka kutloisiso ea tšoantšetso. Ka mohlala, Jehova o ile a bolella moprofeta Moshe: “Bua le bara ba Iseraele, hore ba nkukele monehelo: Le tla nkukela monehelo ho motho e mong le e mong eo pelo ea hae e mo susumetsang.” Ba etsang menehelo ba ile “ba tla, e mong le e mong eo pelo ea hae e ileng ea mo susumetsa.” (Exoda 25:2; 35:21) Ka ho hlakileng, tšobotsi e ’ngoe ea pelo ea tšoantšetso ke tšusumetso—matla a ka hare a re susumetsang hore re nke khato. Hape lipelo tsa rōna tsa tšoantšetso li bonahatsa boikutlo ba rōna le maikutlo a rōna, litakatso tsa rōna le seo re se ratang. Pelo e ka tlala bohale kapa tšabo, ea tetebetsoa ke mesarelo kapa ea tlōla ke thabo. (Pesaleme ea 27:3; 39:3; Johanne 16:22; Baroma 9:2) E ka ikhohomosa kapa ea ikokobetsa, ea tlala lerato kapa lehloeo.—Liproverbia 16:5; Matheu 11:29; 1 Petrose 1:22.
4 Ka lebaka leo, hangata “pelo” e amahanngoa le tšusumetso le maikutlo, athe “kelello” eona ka ho khetheha e amahanngoa le monahano. Ena ke tsela eo mantsoe ana a lokelang ho utloisisoa ka eona ha a hlaha temaneng e le ’ngoe ka Mangolong. (Matheu 22:37; Bafilipi 4:7) Empa pelo le kelello lia tsamaisana. Ka mohlala, Moshe o ile a khothalletsa Baiseraele: “Le hopole lipelong tsa lōna [kapa, “le hopole likelellong tsa lōna,” NW, mongolo o botlaaseng ba leqephe] hore Jehova ke Molimo oa ’nete.” (Deuteronoma 4:39) Ho bangoli ba neng ba mo rerela mano, Jesu o ile a re: “Ke hobane’ng ha le nahana lintho tse khopo ka lipelong tsa lōna?” (Matheu 9:4) “Kutloisiso,” “tsebo” le ho “nahana” li ka boela tsa amahanngoa le pelo. (1 Marena 3:12; Liproverbia 15:14; Mareka 2:6) Ka lebaka leo, pelo ea tšoantšetso e ka boela ea ama monahano oa rōna—mehopolo ea rōna kapa kutloisiso ea rōna.
5. Pelo ea tšoantšetso e emela eng?
5 Ho latela buka e ’ngoe ea litšupiso, pelo ea tšoantšetso e emela “karolo eohle e hare, bokahare, kahoo e emela motho oa ka hare ea iponahatsang mesebetsing eohle ea hae e fapa-fapaneng, litakatsong tsa hae, linthong tseo a li ratang, maikutlong a hae, linthong tse mo susumetsang, mererong ea hae, mehopolong ea hae, temohong ea hae, menahanong ea hae, bohlaleng ba hae, tsebong ea hae, bokhoning ba hae, linthong tseo a li lumelang le mokhoeng oa hae oa ho nahana, khopolong ea hae le boikutlong ba hae.” E emela seo re hlileng re leng sona ka hare, “motho ea ka sephiring oa pelo.” (1 Petrose 3:4) Sena ke sona seo Jehova a se bonang le seo a se hlahlobang. Kahoo, Davida o ne a ka rapela: “Molimo, bōpa ka ho ’na pelo e hloekileng, u kenye ka hare ho ’na moea o mocha, o tiileng.” (Pesaleme ea 51:10) Ke joang re ka bang le pelo e hloekileng?
“Lebisang Lipelo Tsa Lōna” Lentsoeng la Molimo
6. Moshe o ile a fa Baiseraele khothatso efe ha ba ne ba hlomme liahelo Lithoteng tsa Moabe?
6 Ha Moshe a ne a eletsa bara ba Iseraele ba neng ba bokane Lithoteng tsa Moabe pele ba kena Naheng e Tšepisitsoeng, o ile a re: “Lebisang lipelo tsa lōna mantsoeng ’ohle ao ke le bolellang ’ona kajeno e le temoso, e le hore le ka laela bara ba lōna hore ba ele hloko hore ba phethe mantsoe ’ohle a molao ona.” (Deuteronoma 32:46) Ho ne ho hlokahala hore Baiseraele “ba ele hloko ka ho fetisisa.” (Knox) Ba ne ba ka ruta bana ba bona litaelo tsa Molimo ka ho pheta-pheta haeba feela bona ba ne ba tloaelane ka ho feletseng le tsona.—Deuteronoma 6:6-8.
7. ‘Ho lebisa lipelo tsa rōna’ Lentsoeng la Molimo ho akarelletsa eng?
7 Ntho e ka sehloohong e hlokahalang bakeng sa ho ba le pelo e hloekileng ke ho rua tsebo e nepahetseng ea thato ea Molimo le merero ea hae. Ho na le mohloli o le mong feela oa tsebo e joalo, ke Lentsoe la Molimo le bululetsoeng. (2 Timothea 3:16, 17) Leha ho le joalo, tsebo e bolokiloeng kelellong e ke ke ea re thusa e le eona feela hore re be le pelo e thabisang Jehova. E le hore tsebo e ame seo re hlileng re leng sona ka hare, re lokela ‘ho lebisa lipelo tsa rōna’ ho seo re ithutang sona, kapa ‘re se tebisetse pelong.’ (Deuteronoma 32:46, An American Translation) See se etsoa joang? Mopesaleme Davida oa hlalosa: “Ke hopotse matsatsi a khale; ke thuisitse ka mosebetsi oohle oa hao; ka ho rata ke ’nile ka nahanisisa ka mosebetsi oa matsoho a hao.”—Pesaleme ea 143:5.
8. Re ka nahanisisa ka lipotso life ha re ntse re ithuta?
8 Le rōna re lokela ho thuisa ka mosebetsi oa Jehova ka tsela e nang le kananelo. Ha re bala Bibele kapa lingoliloeng tse thehiloeng Bibeleng, ho hlokahala hore re nahanisise ka lipotso tse kang: ‘See se nthuta eng ka Jehova? Ke litšobotsi life tsa Jehova tseo ke li bonang moo? Tlaleho ee e nthuta eng ka seo Jehova a se ratang le seo a sa se rateng? Liphello tsa ho latela tsela eo Jehova a e ratang ke life ha li bapisoa le ho latela eo a e hloileng? Boitsebiso boo bo amana joang le seo ke seng ke ntse ke se tseba?’
9. Thuto ea botho le ho thuisa ke tsa bohlokoa hakae?
9 Lisaa ea lilemo li 32 o hlalosa kamoo a ileng a ananela bohlokoa ba ho ithuta le ho thuisa ho etsoang ka morero: “Ha ke qeta ho kolobetsoa ka 1994, ke ile ka ba mafolofolo haholo ’neteng ka lilemo tse ka bang peli. Ke ne ke e-ba teng libokeng tsohle tsa Bokreste, ke qeta lihora tse 30 ho ea ho tse 40 ka khoeli tšebeletsong ea tšimo, ’me ke tloaelane le Bakreste-’moho. Eaba ke qala ho suthela thōko. Ke ile ka tetebela hoo ke bileng ka tlōla molao oa Molimo. Empa ke ile ka hlaphoheloa ’me ka etsa qeto ea hore ke hloekise bophelo ba ka. Ke thabile hakaakang hore ebe Jehova o amohetse pako ea ka ’me o ile a nkamohela hape! Hangata ke ’nile ka nahanisisa: ‘Ke hobane’ng ha ke ile ka oa?’ Karabo e tlang khafetsa ke hore ke ile ka hlokomoloha ho ithuta le ho thuisa ho etsoang ka morero. Ho hang ’nete ea Bibele e ne e sa finyella pelo ea ka. Ho tloha hona joale ho ea pele, kamehla thuto ea botho le ho thuisa e tla ba karolo ea bohlokoa bophelong ba ka.” Ha tsebo ea rōna ka Jehova, Mora oa hae le Lentsoe la hae e ntse e hōla, ho bohlokoa hakaakang hore re iphe nako ea ho nahanisisa ho etsoang ka morero!
10. Ke hobane’ng ha ho potlakile hore re iphe nako ea thuto ea botho le ho thuisa?
10 Lefatšeng lena le maphathaphathe, ka sebele ke phephetso ho fumana nako ea ho ithuta le ho thuisa. Leha ho le joalo, kajeno Bakreste ba moeling oa Naha e babatsehang e Tšepisitsoeng—e leng lefatše le lecha la Molimo la ho loka. (2 Petrose 3:13) Liketsahalo tse makatsang, joaloka ho timetsoa ha “Babylona e Moholo” le ho hlaseloa ha batho ba Jehova ke “Gogo oa naha ea Magogo” li haufi. (Tšenolo 17:1, 2, 5, 15-17; Ezekiele 38:1-4, 14-16; 39:2) Se larileng ka pele se ka ’na sa leka lerato la rōna ho Jehova. Ho potlakile hore hona joale re reke nako e loketseng ’me re lebise lipelo tsa rōna Lentsoeng la Molimo!—Baefese 5:15, 16.
‘Lokisa Pelo ea Hao Hore e Bale Lentsoe la Molimo’
11. Lipelo tsa rōna li ka tšoantšoa le mobu joang?
11 Pelo ea tšoantšetso e ka tšoantšoa le mobu oo peō ea ’nete e ka jaloang ho oona. (Matheu 13:18-23) Hangata mobu oa sebele oa lengoa ho tiisa hore semela se tla hōla hantle. Ka ho tšoanang, pelo e lokela ho lokisoa e le hore ho be bonolo hore e amohele Lentsoe la Molimo. Moprista Esdrase “o ne a lokisitse pelo ea hae hore a bale molao oa Jehova le ho o phetha.” (Esdrase 7:10) Re ka lokisa lipelo tsa rōna joang?
12. Ke eng e tla thusa ho lokisa pelo ha re ithuta?
12 Thapelo e tlohang pelong ke eona e re thusang ho lokisa pelo ka tsela e molemo ka ho fetisisa ha re bala Lentsoe la Molimo. Liboka tsa Bokreste tsa barapeli ba ’nete li buloa le ho koaloa ka thapelo. Ho loketse hakaakang hore re qale nako ka ’ngoe ea thuto ea botho ea Bibele ka thapelo e tiileng ’me ho pholletsa le thuto re hopole hore re rapetse!
13. Re lokela ho etsa eng hore re be le pelo e ratoang ke Jehova?
13 Pelo ea tšoantšetso e tlameha ho lokisoa e le hore e tle e qhelele thōko maikutlo a nahannoeng esale pele. Baeta-pele ba bolumeli ba mehleng ea Jesu ba ne ba sa ikemisetsa ho etsa sena. (Matheu 13:15) Ka lehlakoreng le leng, ’mè oa Jesu, Maria, o ile a nahanisisa “ka pelong ea hae” linnete tseo a ileng a li utloa. (Luka 2:19, 51) O ile a fetoha morutuoa ea tšepahalang oa Jesu. Lydia oa Thyatira o ile a mamela Pauluse, “’me Jehova a bula pelo ea hae haholo hore a ele hloko.” Le eena o ile a fetoha molumeli. (Liketso 16:14, 15) E se eka le ka mohla re ke ke ra tseparela likhopolo tsa botho kapa pono e ratoang ea thuto ea bolumeli. Ho e-na le hoo, a re ikemisetseng hore “Molimo a ke a fumanoe a e-na le ’nete, le hoja motho e mong le e mong a fumanoa a le leshano.”—Baroma 3:4.
14. Re ka lokisa lipelo tsa rōna joang hore li mamele libokeng tsa Bokreste?
14 Ho lokisa pelo hore e mamele libokeng tsa Bokreste ho bohlokoa ka ho fetisisa. Ho ka ’na ha e-ba le lintho tse re sitisang ho ela hloko se buuoang. Mantsoe a buuoang a ka ba le tšusumetso e fokolang ho rōna haeba re tšoarehile ka lintho tse ileng tsa etsahala motšehare kapa re amehile ka se tla re hlahela hosane. Ho hlokahala hore re ikemisetse ka tieo ho mamela le ho ithuta e le hore re tle re rue molemo ho se buuoang. Re ka rua melemo e mekaakang haeba re ikemiselitse ho utloisisa mangolo a ntseng a qaqisoa le moelelo o ntseng o kenngoa ho ’ona!—Nehemia 8:5-8, 12.
15. Boikokobetso bo re thusa joang hore ho be bonolo hore re rutoe?
15 Feela joalokaha ho tšela menontša ho ka ntlafatsa mobu, le lipelo tsa rōna tsa tšoantšetso li ka matlafatsoa ke ha re hlaolela boikokobetso, ho lapela lintho tsa moea, tšepo, tšabo ea bomolimo le ho rata Molimo. Boikokobetso bo nolofatsa pelo, bo re thusa hore ho be bonolo hore re rutoe. Jehova o ile a re ho Morena Josiase oa Juda: “Ka lebaka la hore pelo ea hao e bile bonolo hoo u ileng ua ikokobetsa ka lebaka la Jehova ha u utloa seo ke se buileng . . . ’me ua qala ho lla ka pel’a ka, ’na, ke utloile.” (2 Marena 22:19) Pelo ea Josiase e ne e ikokobelitse e bile e amohela tataiso. Boikokobetso bo ile ba nolofalletsa barutuoa ba Jesu “ba sa rutehang le ba tloaelehileng” hore ba utloisise ’me ba sebelise linnete tsa moea tseo batho “ba bohlale le ba nang le kelello” ba ileng ba hlōleha ho li utloisisa. (Liketso 4:13; Luka 10:21) E se eka re ka ‘ikokobetsa ka pel’a Molimo oa rōna’ ha re ntse re leka ho ba le pelo e ratoang ke Jehova.—Esdrase 8:21.
16. Ke hobane’ng ha ho hlokahala boiteko bakeng sa ho hlaolela takatso ea lijo tsa moea?
16 Jesu o ile a re: “Ho thaba ba elang hloko tlhoko ea bona ea moea.” (Matheu 5:3) Le hoja re filoe matla a ho ameha ka lintho tsa moea, likhatello tsa lefatše lena le khopo kapa lintho tse kang botsoa li ka etsa hore re se ke ra ela tlhoko ea rōna hloko. (Matheu 4:4) Re lokela ho hlaolela takatso e molemo ea lijo tsa moea. Le haeba qalong re sa thabele ho bala Bibele le ho ba le thuto ea botho, ha re mamella re tla fumana hore tsebo ‘e tla ba e khahlisang moeeng oa rōna,’ hoo re labalabelang linako tsa ho ithuta.—Liproverbia 2:10, 11.
17. (a) Ke hobane’ng ha Jehova a tšoaneloa ke hore re mo tšepe ka ho feletseng? (b) Ke joang re ka hlaolelang ho tšepa Molimo?
17 Morena Solomone o ile a fana ka keletso e reng: “Tšepa Jehova ka pelo ea hao eohle ’me u se ke ua itšetleha ka kutloisiso ea hao.” (Liproverbia 3:5) Pelo e tšepang Jehova ea tseba hore ntho efe kapa efe eo A e batlang kapa eo a e laelang ka Lentsoe la hae e nepahetse ka linako tsohle. (Esaia 48:17) Ka sebele Jehova o tšoaneloa ke hore re mo tšepe ka ho feletseng. O khona ho phetha sohle seo a se rerileng. (Esaia 40:26, 29) Ha e le hantle, lebitso la hae ka ho toba le bolela “O Etsa Hore ho be,” e leng se matlafatsang kholiseho ea rōna matleng a hae a ho phetha seo a se tšepisitseng! “O lokile litseleng tsohle tsa hae oa tšepahala mesebetsing eohle ea hae.” (Pesaleme ea 145:17) Ka sebele, e le hore re hlaolele ho mo tšepa, ho hlokahala hore ‘re latsoe ’me re bone hore Jehova o molemo’ ka ho sebelisa seo re ithutang sona Bibeleng bophelong ba rōna le ka ho nahanisisa ka melemo e hlahisoang ke ho etsa sena.—Pesaleme ea 34:8.
18. Tšabo ea bomolimo e re thusa joang hore re amohele tataiso ea Molimo?
18 Ha Solomone a bua ka tšoaneleho e ’ngoe e etsang hore lipelo tsa rōna li amohele tataiso ea Molimo, o ile a re: “Tšaba Jehova ’me u furalle bobe.” (Liproverbia 3:7) Mabapi le sechaba sa boholo-holo sa Iseraele, Jehova o ile a re: “Hoja se ne se ka etsa hore lipelo tsena tsa sona li ntšabe ’me li boloke litaelo tsohle tsa ka kamehla, e le hore lintho li ka se tsamaela hantle le bara ba sona ho isa nakong e sa lekanyetsoang!” (Deuteronoma 5:29) E, ba tšabang Molimo baa mo utloa. Jehova o khona ho ‘bontša matla a hae molemong oa bao lipelo tsa bona li feletseng ho eena’ le ho fana ka kotlo ho ba sa mo utloeng. (2 Likronike 16:9) E se eka tšabo e nang le tlhompho ea hore re se ke ra halefisa Molimo e ka laola liketso tsohle tsa rōna, menahano le maikutlo.
‘Rata Jehova ka Pelo ea Hao Eohle’
19. Lerato le phetha karolo efe ho etseng hore lipelo tsa rōna li amohele tataiso ea Jehova?
19 Ho feta litšoaneleho tse ling tsohle, ruri lerato le etsa hore lipelo tsa rōna li amohele tataiso ea Jehova. Pelo e tletseng ho rata Molimo e etsa hore motho a labalabele ho ithuta se ratoang ke Molimo le se mo halefisang. (1 Johanne 5:3) Jesu o itse: “U rate Jehova Molimo oa hao ka pelo ea hao eohle le ka moea oa hao oohle le ka kelello ea hao eohle.” (Matheu 22:37) E se eka re ka tebisa lerato la rōna ho Molimo ka ho tloaela ho nahanisisa ka molemo oa hae, ka ho bua le eena kamehla joalokaha eka re bua le motsoalle ea haufi-ufi, le ka ho chesehela ho bua le ba bang ka eena.
20. Ke joang re ka bang le pelo e ratoang ke Jehova?
20 Khopotso: Ho ba le pelo e ratoang ke Jehova ho akarelletsa ho lumella Lentsoe la Molimo hore le susumetse seo re leng sona ka hare, e leng motho ea ka sephiring oa pelo. Re tlameha ho ba le thuto ea botho ea Mangolo e etsoang ka morero ’me re thuise ka tsela e tletseng kananelo. Tsela e molemo ea ho etsa sena ke ka ho ba le pelo e lokisitsoeng—pelo e se nang likhopolo tse nahannoeng esale pele, e tletseng litšoaneleho tse etsang hore ho be bonolo hore re rutoe! E, ka thuso ea Jehova, pelo e molemo e ka fumanoa. Leha ho le joalo, re ka nka mehato efe ho lebela lipelo tsa rōna?
[Mongolo o botlaaseng ba leqephe]
a Lebitso le fetotsoe.
U ka Araba Joang?
•Pelo ea tšoantšetso eo Jehova a e hlahlobang ke eng?
•Re ka ‘lebisa lipelo tsa rōna’ joang Lentsoeng la Molimo?
•Re lokela ho lokisa lipelo tsa rōna joang hore li bale Lentsoe la Molimo?
•Ka mor’a ho hlahloba boitsebiso bona, u susumelelitsoe hore u etse eng?
[Setšoantšo se leqepheng la 17]
Ka kananelo Davida o ile a thuisa ka lintho tsa moea. Uena?
[Litšoantšo tse leqepheng la 18]
Lokisa pelo ea hao pele u ithuta Lentsoe la Molimo