Khaolo ea Leshome le Metso e ’Meli
Se Boleloang ke Kolobetso ea Hao
1. Ke hobane’ng ha e mong le e mong ho rōna a lokela ho thahasella kolobetso ea metsing?
KA SELEMO sa 29 C.E., Jesu o ile a kolobetsoa, a qoelisoa ke Johanne Mokolobetsi Nōkeng ea Jordane. Jehova ka boeena o ne a shebeletse ’me a bontša kananelo. (Matheu 3:16, 17) Kahoo Jesu o ile a behela balateli bohle ba hae mohlala oo ba neng ba tla o latela. Lilemo tse tharo le halofo hamorao, Jesu o ile a laela barutuoa ba hae: “Ke filoe matla ’ohle leholimong le lefatšeng. Ka hona e-eang ’me le etse batho ba lichaba tsohle barutuoa, le ba kolobetse ka lebitso la Ntate le la Mora le la moea o halalelang.” (Matheu 28:18, 19) Na u kolobelitsoe tumellanong le seo Jesu a se laetseng moo? Haeba ha ho joalo, na u lokisetsa ho etsa joalo?
2. Mabapi le kolobetso, ke lipotso life tseo ho hlokahalang hore li arabeloe?
2 Hore na boemo ke bofe, kutloisiso e hlakileng ea kolobetso ke ea bohlokoa ho e mong le e mong ea batlang ho sebeletsa Jehova le ho phela lefatšeng la hae le lecha la ho loka. Lipotso tse lokelang ho arabeloa li akarelletsa tsena: Na ho kolobetsoa ha Bakreste kajeno ho bolela ntho e le ’ngoe le ha Jesu? Ho bolela eng ho kolobetsoa “ka lebitso la Ntate le la Mora le la moea o halalelang”? Ho akarelletsa eng ho phela tumellanong le se boleloang ke kolobetso ea metsing ea Bokreste?
Kolobetso e Entsoeng ke Johanne
3. Kolobetso ea Johanne e ne e lekanyelitsoe ho bo-mang?
3 Hoo e ka bang likhoeli tse tšeletseng pele Jesu a kolobetsoa, Johanne Mokolobetsi o ile a bolela lefeelleng la Judea, a re: “Bakang, kaha ’muso oa maholimo o atametse.” (Matheu 3:1, 2) Batho ba ile ba utloa seo Johanne a se bolelang ’me ba se ela hloko. Ba ile ba ipolela libe pontšeng, ba li bakela eaba ba tla ho Johanne ho ea kolobetsoa ke eena Nōkeng ea Jordane. Kolobetso eo e ne e le ea Bajuda.—Luka 1:13-16; Liketso 13:23, 24.
4. Ke hobane’ng ha ho ne ho hlokahala hore Bajuda ba lekholong la pele la lilemo ba bake ka potlako?
4 Bajuda bao ba ne ba hloka pako ka potlako. Ka selemo sa 1513 B.C.E., Thabeng ea Sinai, bo-ntat’a bona moholo ba ne ba ile ba kena selekaneng le Jehova Molimo e le sechaba, ba itlama ka tumellano ea molao. Empa ka lebaka la libe tsa bona tse tebileng, ha baa ka ba phelela boitlamo ba bona selekaneng seo, kahoo sa ba tsoa. Mehleng ea Jesu boemo ba bona bo ne bo sa jese litheohelang. “Letsatsi le leholo le le tšosang la Jehova” le boletsoeng esale pele ke Malakia le ne le le haufi. Ka 70 C.E., “letsatsi” leo le ile la fihla ha mabotho a Roma a timetsa Jerusalema, tempele ea eona le Bajuda ba fetang milione. Johanne Mokolobetsi, a chesehela borapeli ba ’nete, o ile a rongoa pele ho timetso eo, “hore a lokisetse Jehova sechaba se lokisitsoeng.” Ho ne ho hlokahala hore ba bakele libe tsa bona selekaneng sa Molao oa Moshe ’me ba lokele ho amohela Mora oa Molimo, Jesu, eo Jehova a neng a mo romela ho bona.—Malakia 4:4-6; Luka 1:17; Liketso 19:4.
5. (a) Ha Jesu a ne a il’o kolobetsoa, ke hobane’ng ha Johanne a ne a belaella seo? (b) Ho kolobetsoa ha Jesu ho ne ho tšoantšetsa eng?
5 E mong oa ba ileng ba tla ho Johanne ho tla kolobetsoa ke Jesu ka boeena. Hobane’ng? Ka ho tseba hore Jesu ha a na libe tseo a ka ipolelang tsona, Johanne o ile a re: “Ke ’na ea hlokang ho kolobetsoa ke uena, ’me uena u tla ho ’na?” Empa kolobetso ea Jesu e ne e tla tšoantšetsa ntho e fapaneng. Eaba Jesu oa arabela: “Tlohela ho be joalo, lekhetlong lena, etsoe ka tsela eo ho re loketse ho phetha sohle se lokileng.” (Matheu 3:13-15) Kaha Jesu o ne a se na sebe, kolobetso ea hae e ne e ke ke ea tšoantšetsa ho bakela libe; hape ho ne ho sa hlokahale hore a inehele ho Molimo, kaha e ne e le setho sa sechaba se seng se ntse se inehetse ho Jehova. Ho e-na le hoo, ho kolobetsoa ha hae a le lilemo li 30 e ne e le ho ikhethang ho eena, ’me ho ne ho tšoantšetsa ho itlhahisa ha hae ho Ntate oa hae oa leholimo ho etsa thato ea Hae ho ea pele.
6. Jesu o ne a nka ho etsa thato ea Molimo ka botebo hakae?
6 Thato ea Molimo ka Kreste Jesu e ne e akarelletsa le mosebetsi o mabapi le ’Muso. (Luka 8:1) E ne e boetse e akarelletsa le sehlabelo sa bophelo ba hae ba botho bo phethahetseng e le topollo hape e le motheo bakeng sa selekane se secha. (Matheu 20:28; 26:26-28; Baheberu 10:5-10) Jesu o ile a nka ka botebo se neng se tšoantšetsoa ke kolobetso ea hae ea metsing. Ha aa ka a itlohella ho khelosoa ke lithahasello tse ling. Ho isa qetellong ea bophelo ba hae lefatšeng, o ile a tšoarella ho etseng thato ea Molimo, a etsa hore ho bolela ka ’Muso oa Molimo e be mosebetsi oa hae o ka sehloohong.—Johanne 4:34.
Kolobetso ea Metsing ea Barutuoa ba Bakreste
7. Ho tloha ka Pentekonta ea 33 C.E., Bakreste ba ne ba boleletsoe hore ba etse eng mabapi le kolobetso?
7 Barutuoa ba pele ba Jesu ba ile ba kolobetsoa metsing ke Johanne ’me ba lebisoa ho Jesu e le litho tsa ka moso tsa ’Muso oa leholimo. (Johanne 3:25-30) Tlas’a tsamaiso ea Jesu barutuoa bana le bona ba ile ba kolobetsa ba bang, e leng kolobetso ea bohlokoa joaloka kolobetso ea Johanne. (Johanne 4:1, 2) Leha ho le joalo, ho tloha ka Pentekonta ea 33 C.E., ba ile ba qala ho phethahatsa thōmo ea ho kolobetsa “ka lebitso la Ntate le la Mora le la moea o halalelang.” (Matheu 28:19) U tla ho fumana ho le molemo haholo ho hlahloba hore na hoo ho bolela eng.
8. Ho bolela eng ho kolobetsoa ka “lebitso la Ntate”?
8 Ho bolela eng ho kolobetsoa “ka lebitso la Ntate”? Ho bolela ho amohela lebitso la hae, boemo ba hae, bolaoli ba hae, morero oa hae le melao ea hae. Nahana hore na sena se akarelletsa eng. (1) Mabapi le lebitso la hae, Pesaleme ea 83:18 e re: “Uena, eo lebitso la hao e leng Jehova, uena u le mong u Ea Phahameng ka ho Fetisisa holim’a lefatše lohle.” (2) Mabapi le boemo ba hae, 2 Marena 19:15 e re: “Jehova . . . , uena u le mong u Molimo oa ’nete.” (3) Ka bolaoli ba hae, Tšenolo 4:11 ea re bolella: “Jehova, Molimo oa rōna, ua tšoaneleha ho amohela khanya le tlhompho le matla, hobane u bōpile lintho tsohle, ’me ka lebaka la thato ea hao li ile tsa e-ba teng ’me tsa bōptjoa.” (4) Hape re tlameha ho lumela hore Jehova ke Mofani oa Bophelo, ea rerileng ho re pholosa sebeng le lefung: “Poloko ke ea Jehova.” (Pesaleme ea 3:8; 36:9) (5) Ho hlokahala hore re lumele hore Jehova ke eena Mofani oa Molao ea Phahameng ka ho Fetisisa: “Jehova ke Moahloli oa rōna, Jehova ke Mofani oa rōna oa taelo e hlomamisitsoeng, Jehova ke Morena oa rōna.” (Esaia 33:22) Kaha o na le lintho tseo kaofela, re khothalletsoa sena: “U rate Jehova Molimo oa hao ka pelo ea hao eohle le ka moea oa hao oohle le ka kelello ea hao eohle.”—Matheu 22:37.
9. Ho bolela eng ho kolobetsoa “ka lebitso . . . la Mora”?
9 Ho kolobetsoa “ka lebitso . . . la Mora” ho bolela’ng? Ho bolela ho hlokomela lebitso, boemo le bolaoli tsa Jesu Kreste. Lebitso la hae, Jesu, le bolela hore “Jehova ke Poloko.” O fumane boemo ba hae ka lebaka la hore ke eena feela Mora oa Molimo ea tsoetsoeng a ’notši, letsibolo la pōpo ea Molimo. (Matheu 16:16; Bakolose 1:15, 16) Ka Mora enoa, Johanne 3:16 ea re bolella: “Molimo o ratile lefatše [la batho ba ka rekolloang] haholo hoo a ileng a fana ka Mora oa hae ea tsoetsoeng a ’notši, e le hore e mong le e mong ea bontšang tumelo ho eena a se ke a timetsoa empa a be le bophelo bo sa feleng.” Kaha Jesu o shoele a tšepahala, Molimo o ile a mo tsosa bafung eaba o mo fa bolaoli bo bocha. Ho ea ka moapostola Pauluse, Molimo ‘o ile a phahamisetsa [Jesu] boemong bo phahameng’ bokahohleng, e le ea hlahlamang Jehova. Ke ka lebaka leo ‘lengole le leng le le leng le lokelang ho khumama ka lebitso la Jesu le leleme le leng le le leng le bolele pepenene hore le ela hloko hore Jesu Kreste ke Morena thorisong ea Molimo Ntate.’ (Bafilipi 2:9-11) Hona ho bolela ho mamela litaelo tsa Jesu, e leng tse tsoang ho Jehova ka boeena.—Johanne 15:10.
10. Ho bolela eng ho kolobetsoa “ka lebitso . . . la moea o halalelang”?
10 Ho bolela eng ho kolobetsoa “ka lebitso . . . la moea o halalelang”? Ho bolela ho lumela karolo le tšebetso e phethoang ke moea o halalelang. Hona moea o halalelang ke eng? Ke matla a sebetsang a Jehova, ao a phethahatsang merero ea hae ka ’ona. Jesu o ile a bolella balateli ba hae: “Ke tla kōpa Ntate ’me o tla le fa mothusi e mong hore a be le lōna ka ho sa feleng, moea oa ’nete.” (Johanne 14:16, 17) O ne o tla ba nolofalletsa ho etsa eng? Jesu o ile a boela a ba bolella: “Le tla amohela matla ha moea o halalelang o fihla holim’a lōna, ’me le tla ba lipaki tsa ka Jerusalema le Judea le Samaria kaofela le ho isa karolong e hōle-hōle ea lefatše.” (Liketso 1:8) Ka moea o halalelang, Jehova o ile a boela a bululela ho ngoloa ha Bibele: “Ha ho nako eo ka eona boprofeta bo ileng ba tlisoa ke thato ea motho, empa batho ba ile ba bua ho tsoa ho Molimo ha ba ntse ba khannoa ke moea o halalelang.” (2 Petrose 1:21) Kahoo re ela hloko se phethoang ke moea o halalelang ha re ithuta Bibele. Tsela e ’ngoe eo re elang moea o halalelang hloko ka eona ke ka ho kōpa Jehova hore a re thuse ho hlahisa “litholoana tsa moea,” e leng “lerato, thabo, khotso, tiisetso, mosa, molemo, tumelo, bonolo, boitšoaro.”—Bagalata 5:22, 23.
11. (a) Bohlokoa ba ’nete ba kolobetso ke bofe mehleng ea rōna? (b) Kolobetso e tšoana le ho shoa le ho tsoha joang?
11 Ba pele ba ileng ba kolobetsoa tumellanong le litaelo tsa Jesu ke Bajuda le basokolohi ba Bajuda, ho tloha ka 33 C.E. Nakoana ka mor’a moo, tokelo ea ho ba morutuoa oa Mokreste e ile ea fetisetsoa ho Basamaria. Joale, ka 36 C.E., pitso eo e ile ea atoloha hore e akarelletse le Balichaba ba sa bollang. Pele ba kolobetsoa, Basamaria le Balichaba ba ile ba tlameha ho inehela ka ho feletseng ho Jehova ho mo sebeletsa e le barutuoa ba Mora oa hae. Kolobetso ea metsing ea Bakreste e ntse e bolela seo ho tla fihlela kajeno. Ho qoelisoa ka ho feletseng metsing ke tšoantšetso e loketseng ea boinehelo bona ba botho, kaha kolobetso ke lepato la tšoantšetso. Ho ba ka tlas’a metsi ao u kolobetsoang ka ’ona ho emela ho shoa tseleng ea hao ea pele ea bophelo. Ho ntšoa metsing ho tšoantšetsa ho phelisoa ha hao hore u etse thato ea Molimo. ‘Kolobetso [ena] e le ’ngoe’ e sebetsa ho bohle ba fetohang Bakreste ba ’nete. Ha ba kolobetsoa ba fetoha Lipaki tsa Jehova tsa Bakreste, basebeletsi ba Molimo ba khethiloeng.—Baefese 4:5; 2 Bakorinthe 6:3, 4.
12. Kolobetso ea metsing ea Bokreste e tšoana le eng, hona joang?
12 Kolobetso e joalo ke ea bohlokoa haholo mahlong a Molimo. Ka mohlala, hoba moapostola Petrose a bolele ka ho haha ha Noe areka eo eena le lelapa la hae ba ileng ba bolokoa Moroallong ka eona, o ile a ngola: “Se lekanang le sena le sona joale sea le pholosa, e leng, kolobetso, (eseng ho tlosoa ha litšila tsa nama, empa kōpo e etsoang ho Molimo bakeng sa letsoalo le letle,) ka tsoho ea Jesu Kreste.” (1 Petrose 3:21) Areka e ne e le bopaki bo bonahalang ba hore Noe ka botšepehi o entse mosebetsi oo Molimo a mo abetseng oona. Ka mor’a hore mosebetsi oa ho haha areka o fele, “lefatše la nakong eo le ile la timela ha le koaheloa ke metsi.” (2 Petrose 3:6) Empa Noe le lelapa la hae, ‘meea e robeli, ba ile ba pholosoa ba sireletsehile metsing.’—1 Petrose 3:20.
13. Mokreste o pholosoa ho eng ka kolobetso ea metsing?
13 Kajeno, ba inehelang ho Jehova motheong oa tumelo ho Kreste ea tsositsoeng, baa kolobetsoa ho tšoantšetsa boinehelo boo. Ba tsoela pele ho etsa thato ea Molimo mehleng ea rōna ’me baa pholosoa tsamaisong ea lefatše la joale le khopo. (Bagalata 1:3, 4) Ha ba sa lebile timelong le tsamaisong ea hona joale e khopo ea lintho. Ba pholosoa timetsong ena ’me ba fuoa letsoalo le letle ke Molimo. Moapostola Johanne o tiisetsa bahlanka ba Molimo: “Lefatše lea feta ’me ho joalo le ka takatso ea lona, empa ea etsang thato ea Molimo o hlola ka ho sa feleng.”—1 Johanne 2:17.
Ho Phelela Boitlamo ba Rōna
14. Ke hobane’ng ha kolobetso ka boeona e se tiiso ea poloko?
14 E ka ba phoso ho fihlela qeto ea hore kolobetso ka boeona ke tiiso ea poloko. Ke ea bohlokoa hafeela motho a inehetse e le kannete ho Jehova ka Jesu Kreste ’me ka morao ho moo a etsa thato ea Molimo, a tšepahala ho isa qetellong. “Ea mameletseng ho isa bofelong ke eena ea tla pholoha.”—Matheu 24:13.
15. (a) Thato ea Molimo ke efe kajeno bakeng sa Bakreste ba kolobelitsoeng? (b) Ho ba morutuoa oa Mokreste e lokela ho ba habohlokoa hakae bophelong ba rōna?
15 Thato ea Molimo ho Jesu e ne e akarelletsa hore na o ne a sebelisa bophelo ba hae joang ha e sa le motho oa nama. O ne a tlameha ho bo tela lefung e le sehlabelo. Ho rōna, ’mele ea rōna e lokela ho hlahisoa ho Molimo, ’me re lokela ho phela bophelo ba boitelo ka ho etsa thato ea Molimo. (Baroma 12:1, 2) Ka sebele re tla be re sa etse thato ea Molimo haeba ka linako tse ling ka boomo re itšoara joaloka lefatše le re potolohileng kapa haeba re likolohisa bophelo ba rōna linthong tsa boithati, re sebeletsa Molimo ho itlosa molato feela. (1 Petrose 4:1-3; 1 Johanne 2:15, 16) Ha Mojuda e mong a botsa hore na o lokela ho etsa eng hore a fumane bophelo bo sa feleng, Jesu o ile a lumela hore ke habohlokoa ho phela bophelo ba boitšoaro bo hloekileng. Empa joale a supa ntho e ’ngoe ea bohlokoa le ho feta: tlhokahalo ea ho ba morutuoa oa Mokreste, molateli oa Jesu. Eo e lokela ho ba ntho e ka sehloohong bophelong. E ke ke ea latela telekiso ea lintho tse bonahalang.—Matheu 19:16-21.
16. (a) Bakreste bohle ba na le boikarabelo bofe mabapi le ’Muso? (b) Joalokaha ho bontšitsoe leqepheng la 116 le la 117, litsela tse ling tse molemo tseo re etsang mosebetsi oo oa ’Muso ka tsona ke life? (c) Ho kopanela ha rōna ka pelo eohle mosebetsing oa ho paka ho fana ka bopaki ba eng?
16 Ho lokela ho hatisoa hape hore thato ea Molimo bakeng sa Jesu e ne e akarelletsa tšebeletso ea bohlokoa mabapi le ’Muso oa Molimo. Jesu ka boeena o ne a tlotselitsoe ho ba Morena. Empa ha a ntse a le lefatšeng le eena o ile a paka ka cheseho ka ’Muso. Re na le mosebetsi o tšoanang oa ho paka oo re lokelang ho o etsa, ’me re na le mabaka a feletseng a ho tšoareha ho oona ka pelo eohle. Ka ho etsa joalo, re bontša kananelo ea rōna bakeng sa bobusi ba Jehova hammoho le lerato la rōna ho batho ba bang. (Matheu 22:36-40) Hape re bontša hore re kopane le barapeli ba habo rōna lefatšeng ka bophara, bao kaofela ha bona e leng baboleli ba ’Muso. Re le hammoho, bonngoeng lefatšeng lohle, re hatela pele ho ea fumana pakane ea bophelo bo sa feleng sebakeng sa lefatšeng sa ’Muso oo.
Tlhahlobo
• Ke ho tšoana hofe le ho se tšoane hofe ho teng pakeng tsa kolobetso ea Jesu le kolobetso ea metsing?
• Ho bolela eng ho kolobetsoa “ka lebitso la Ntate le la Mora le la moea o halalelang”?
• Ho akarelletsa eng ho phelela boitlamo ba kolobetso ea metsing ea Bokreste?
[Litšoantšo tse leqepheng la 116, 117]
Ho beng ka uena
Ho bao u sebetsang le bona
LITSELA TSE LING TSA HO PHATLALATSA ’MUSO
Ka ntlo le ntlo
Ho bao u kenang sekolo le bona
Literateng
Ka ho khutlela ho ba thahasellang
Lithutong tsa lehae tsa Bibele