“Halalelang Boitšoarong Bohle ba Lōna”

“Tumellanong le Mohalaleli ea le bitsitseng, le lōna ka bolōna le fele le be ba halalelang boitšoarong bohle ba lōna, hobane ho ngoliloe: ‘Le lokela ho halalela, hobane kea halalela.’”—1 PETROSE 1:15, 16.

 1. Ke hobane’ng ha Petrose a ile a khothalletsa Bakreste ho halalela?

KE HOBANE’NG ha moapostola Petrose a ile a fana ka keletso e ka holimo? Hobane o ile a bona tlhokahalo ea hore Mokreste ka mong a lebele menahano ea hae le liketso e le hore a etse hore li lule li le tumellanong le khalalelo ea Jehova. Kahoo, o ile a kenyelletsa mantsoe a ka holimo ka ho re: “Hlomellang likelello tsa lōna bakeng sa tšebetso, le lule le hlaphohetsoe likelellong ka ho feletseng . . . Joaloka bana ba mamelang, le khaotse ho ba ka sebōpeho sa litakatso tseo le neng le e-na le tsona pele ho hlokeng tsebo ha lōna.”—1 Petrose 1:13, 14.

 2. Ke hobane’ng ha litakatso tsa rōna li ne li le litšila pele re ithuta ’nete?

² Litakatso tsa rōna tsa pele li ne li le litšila. Hobane’ng? Hobane bongata ba rōna re ne re latela tsela ea lefatše ea ho etsa lintho pele re amohela ’nete ea Bokreste. Petrose o ne a tseba sena ha ka ho hlakileng a ne a ngola: “Nako e fetileng e lekane hore ebe le phethile thato ea lichaba ha le ne le tsoela pele liketsong tsa boitšoaro bo hlephileng, litakatsong tse feteletseng, ho fetelleng ka veine, meketeng e lerata, litlhōlisanong tsa ho noa, le borapeling ba litšoantšo bo sa lumelloang.” Ho hlakile hore Petrose ha aa ka a thathamisa liketso tse litšila tse khethollang lefatše la rōna la kajeno, kaha ka nako eo li ne li sa tsejoe.—1 Petrose 4:3, 4.

 3, 4. (a) Re ka loantša litakatso tse fosahetseng joang? (b) Na Bakreste e tlameha ho ba ba se nang maikutlo? Hlalosa.

³ Na u ile ua hlokomela hore litakatso tsee ke tse ipiletsang nameng, lithong tsa kutlo le maikutlong? Ha re li lumella hore li re laole, joale ho bonolo haholo hore menahano ea rōna le liketso li be litšila. Sena se bontša hore hoa hlokahala ho tlohella matla a ho nahana a laole liketso tsa rōna. Pauluse o ile a hlalosa sena ka tsela ena: “Ka lebaka leo ke le kōpa ka tieo ka qenehelo ea Molimo, barab’eso, hore le hlahise ’mele ea lōna e le sehlabelo se phelang, se halalelang, se amohelehang ho Molimo, e le tšebeletso e halalelang ka matla a lōna a ho nahana.”—Baroma 12:1, 2.

⁴ Ho hlahisa ho Molimo sehlabelo se halalelang, re tlameha ho tlohella matla a ho nahana a laole, e seng maikutlo. Ke ba bakae ba ileng ba ameha boitšoarong bo bobe hobane ba ile ba lumella maikutlo a bona ho laola boitšoaro ba bona! Seo ha se bolele hore maikutlo a rōna a lokela ho hatelloa; ha ho ne ho le joalo, re ne re ka bontša thabo joang tšebeletsong ea Jehova? Leha ho le joalo, haeba re batla ho hlahisa litholoana tsa moea ho e-na le mesebetsi ea nama, joale re tlameha ho fetolela likelello tsa rōna tseleng ea Kreste ea ho nahana.—Bagalata 5:22, 23; Bafilippi 2:5.

Bophelo bo Halalelang, Theko e Halalelang

 5. Ke hobane’ng ha Petrose a ne a amehile ka hore khalalelo ea hlokahala?

⁵ Ke hobane’ng ha Petrose a ne a amehile hakana ka hore khalalelo ea Bokreste ea hlokahala? Hobane o ne a hlokomela ka ho feletseng theko e halalelang e neng e lefiloe bakeng sa ho lopolla moloko oa batho o mamelang. O ile a ngola: “Lea tseba hore e ne e se ka lintho tse ka bolang, ka silevera kapa khauta, le ileng la lopolloa mokhoeng oa lōna oa boitšoaro o sa beheng litholoana o amohetsoeng ka neano ho tsoa ho baholo-holo ba lōna. Empa e ne e le ka mali a bohlokoa, a joaloka a konyana e se nang sekoli le e se nang letheba, ’ona a Kreste.” (1 Petrose 1:18, 19) E, Mohloli oa khalalelo, Jehova Molimo, o ne a rometse Mora oa hae ea tsoetsoeng a ’notši, “Mohalaleli,” lefatšeng ho lefa thekollo e neng e tla lumella batho ho ba le kamano e ntle le Molimo.—Johanne 3:16; 6:69; Exoda 28:36; Matheu 20:28.

 6. (a) Ke hobane’ng ha ho se bonolo hore re phehelle boitšoaro bo halalelang? (b) Re ka thusoa ke’ng ho boloka boitšoaro ba rōna bo halalela?

⁶ Leha ho le joalo, re tlameha ho hlokomela hore ha ho bonolo ho phela bophelo bo halalelang ha re ntse re le ka har’a lefatše la Satane le senyehileng. O cheha maraba bakeng sa Bakreste ba ’nete, ba lekang hore ba ’ne ba phele tsamaisong ea hae ea lintho. (Baefese 6:12; 1 Timothea 6:9, 10) Likhatello tsa mosebetsi oa boipheliso, tsa khanyetso ea lelapa, tsa ho songoa sekolong le khatello ea lithaka li hloka hore motho a be matla moeeng e le hore a ka lula a halalela. Seo se hatisa karolo ea bohlokoa ea thuto ea rōna ea botho le ho ba teng kamehla libokeng tsa Bokreste. Pauluse o ile a eletsa Timothea: “U ’ne u tšoare mohlala oa mantsoe a phelisang hantle ao u a utloileng ho ’na ka tumelo le lerato tse mabapi le Kreste Jesu.” (2 Timothea 1:13) Re utloa mantsoe ao a fanang ka bophelo Holong ea rōna ea ’Muso le thutong ea rōna ea botho ea Bibele. A ka re thusa hore re halalele boitšoarong ba rōna letsatsi le leng le le leng maemong a mangata a sa tšoaneng.

Boitšoaro bo Halalelang ka Lapeng

 7. Khalalelo e lokela ho ama bophelo ba rōna ba lelapa joang?

⁷ Ha Petrose a ne a qotsa Levitike 11:44, o ile a sebelisa lentsoe la Segerike haʹgi·os, le bolelang “e arohileng sebeng ’me ka lebaka leo e nehetsoe Molimo, e khethetsoeng tšebeletso.” (An Expository Dictionary of New Testament Words, ea W. E. Vine) See se lokela ho re ama joang bophelong ba rōna ba lelapa ba Bokreste? Ka sebele se tlameha ho bolela hore bophelo ba rōna ba lelapa bo lokela ho thehoa leratong, hobane “Molimo ke lerato.” (1 Johanne 4:8) Lerato le nang le boitelo ke oli e loetsang kamano pakeng tsa balekane le pakeng tsa batsoali le bana.—1 Bakorinthe 13:4-8; Baefese 5:28, 29, 33; 6:4; Bakolose 3:18, 21.

 8, 9. (a) Ka linako tse ling ho hlaha boemo bofe ka lelapeng la Bokreste? (b) Bibele e fana ka keletso efe e utloahalang tabeng ee?

⁸ Re ka ’na ra nahana hore ho bontša lerato le joalo ho ne ho tla itlela feela ka tlhaho lelapeng la Bokreste. Empa, re tlameha ho lumela hore hase kamehla lerato le renang ka tekanyo eo le lokelang ho rena ka eona malapeng a mang a Bokreste. Ho ka ’na ha bonahala eka re etsa seo Holong ea ’Muso, empa ho bonolo hakaakang hore khalalelo ea rōna e fokotsehe lapeng. Joale ka tšohanyetso re ka ’na ra lebala hore mosali e sa ntse e le morali’abo rōna oa Mokreste kapa hore monna e sa ntse e le eena mor’abo rōna (’me mohlomong ke mohlanka ea sebeletsang kapa moholo) eo ho neng ho bonahala eka oa hlomphuoa Holong ea ’Muso. Rea halefa, ’me ho ka tsoha likhang tse matla. Litekanyetso tse sa tšoaneng li ka ba tsa khukhunela bophelong ba rōna. Ha e sa le kamano ea monna le mosali e kang ea Kreste empa e se e le monna le mosali feela tjee ba loantšanang. Ba lebala hore ho lokela ho be le tikoloho e halalelang ka lapeng. Mohlomong ba qala ho bua joaloka batho ba lefatše. Ho bonolo hakaakang hore joale molomong ho tsoe polelo e litšila, e phoqang!—Liproverbia 12:18; bapisa le Liketso 15:37-39.

⁹ Leha ho le joalo, Pauluse oa eletsa: “Polelo e bolileng [ka Segerike, loʹgos sa·prosʹ, “puo e silafatsang,” ka lebaka leo e le litšila] a e se ke ea tsoa melomong ea lōna, empa ho tsoe polelo efe kapa efe e molemo bakeng sa ho haha kamoo tlhokahalo e ka bang kateng, e le hore e ka fana ka se molemo ho bautloi.” ’Me seo se bolela bautloi bohle ba ka lapeng, ho akarelletsa le bana.—Baefese 4:29; Jakobo 3:8-10.

10. Keletso e mabapi le khalalelo e sebetsa joang ho bana?

¹⁰ Joale tataiso ena e mabapi le khalalelo e sebetsa ka tsela e lekanang ho bana lelapeng la Bokreste. Ho bonolo hakaakang ho bona hore ba fihle lapeng ha ba e-tsoa sekolong ’me ba qale ho etsisa puo ea borabele le e sa hlompheng ea lithaka tsa bona tsa lefatše! Bana, le se ke la khahloa ke boitšoaro ba bashemane ba mekhoa e mebe ba ileng ba rohaka moprofeta oa Jehova le bao ho nang le ba tšoanang le bona kajeno ba lipuo li litšila le ba nyefolang. (2 Marena 2:23, 24) Puo ea lōna ha ea lokela ho silafatsoa ke puo ea seterateng e tala ea batho ba botsoa haholo kapa ba sa nahaneleng hoo ba ke keng ba sebelisa mantsoe a hlomphehang. Joaloka Bakreste, puo ea rōna e lokela ho halalela, e be e khahlisang, e hahang, e mosa le e “nōkiloeng ka letsoai.” E lokela ho re khetholla re le ba sa tšoaneng le batho ba bang.—Bakolose 3:8-10; 4:6.

Khalalelo le Litho Tsa Malapa a Rōna Tse sa Lumelang

11. Ke hobane’ng ha ho halalela ho sa bolele ho iketsa ea lokileng?

¹¹ Ha re leka ka matla hore re halalele, ha rea lokela ho iphahamisa le ho iketsa ba lokileng, haholo-holo ha re sebetsana le litho tsa lelapa tse sa lumelang. Boitšoaro ba rōna ba Bokreste bo mosa bo lokela hore bonyane bo ba thuse ho bona hore ha re tšoane le batho ba bang ka tsela e molemo, hore re tseba ho bontša lerato le qenehelo, feela joalokaha Mosamaria ea molemo oa setšoantšong sa Jesu a ile a etsa.—Luka 10:30-37.

12. Balekane ba Bakreste ba ka etsa hore ’nete e ipiletse haholoanyane joang ho balekane ba bona?

¹² Petrose o ile a hatisa bohlokoa ba maikutlo a nepahetseng mabapi le litho tsa malapa a rōna tse sa lumelang ha a ne a ngolla basali ba Bakreste: “Ka mokhoa o tšoanang, lōna basali, le ipehe tlas’a banna ba lōna, e le hore, haeba leha e le bafe ba sa mamele lentsoe, ba ka haptjoa ka ntle ho lentsoe ka boitšoaro ba basali ba bona, kahobane e bile lipaki tse boneng ka mahlo tsa boitšoaro ba lōna bo hloekileng hammoho le tlhompho e tebileng.” Mosali oa Mokreste (kapa monna tabeng ena) a ka etsa hore ’nete e ipiletse haholoanyane ho molekane ea sa lumelang haeba boitšoaro ba hae bo hloekile, a nahanela a bile a hlompha. Sena se bolela hore ho lokela hore ho be le ho tenyetseha kemisong ea puso ea Molimo e le hore molekane ea sa lumelang a se ke a khesoa kapa a hlokomolohuoa.a—1 Petrose 3:1, 2.

13. Baholo le bahlanka ba sebeletsang ka linako tse ling ba thusa banna ba sa lumelang joang ho ananela ’nete?

¹³ Baholo le bahlanka ba sebeletsang ka linako tse ling ba ka thusa ka ho ipha sebaka sa ho tseba monna ea sa lumelang litšebelisanong tsa botho. Ka tsela ena a ka ’na a bona hore Lipaki ke batho ba tšoanang le ba bang, ba hlomphehang ba nang le lithahasello tse ngata, ho akarelletsa litaba tse ling tseo e seng tsa Bibele. Boemong bo bong, moholo e mong o ile a thahasella boikhathollo ba monna ba ho tšoasa litlhapi. Ke phetho se ileng sa mo phutholla. Qetellong monna eo e ile ea e-ba mor’abo rōna ea kolobelitsoeng. Boemong bo bong, monna ea sa lumelang o ne a thahasella lithaha haholo. Baholo ha baa ka ba tela. E mong oa bona o ile a ithuta ka tsona e le hore nakong e tlang ha a kopana le monna enoa, a ka qalisa moqoqo ka nonyana ena eo monna enoa a e ratang! Ka lebaka leo, ho halalela ha ho bolele ho itšoara ka thata kapa ho se be le pono e pharaletseng.—1 Bakorinthe 9:20-23.

Re ka Halalela Joang ka Phuthehong?

14. (a) Mokhoa o mong oa Satane oa ho fokolisa phutheho ke ofe? (b) Re ka hanyetsa maraba a Satane joang?

¹⁴ Satane Diabolose ke moetselletsi, hobane lebitso la Segerike bakeng sa Diabolose, di·aʹbo·los, le bolela “moqosi” kapa “moetselletsi.” Ketselletso ke e ’ngoe ea litšoaneleho tse mo khethollang, ’me o leka ho e sebelisa ka phuthehong. Mokhoa oo a o ratang haholo ke oa ho seba. Na re itumella hore a re qhekelle ka boitšoaro boo bo litšila? Ho ka ba joalo joang? Ka ho qala ho seba, ka ho pheta taba eo kapa ka ho e mamela. Maele a bohlale a re: “Motho ea liteme o jala liphapang, mosebi o hlobohanya metsoalle.” (Liproverbia 16:28) Pheko ea ho seba le ho etselletsa ke efe? Re lokela ho tiisa hore kamehla puo ea rōna ea haha ebile e thehiloe leratong. Haeba re sheba bokhabane ho e-na le bobe boo re nahanang hore barab’abo rōna baa bo etsa, kamehla moqoqo oa rōna e tla ba o khahlisang le o nang le bomoea. Hopola hore ho tšoaea liphoso ho bonolo. ’Me motho ea sebang ba bang ho uena a ka ’na a u seba ho ba bang!—1 Timothea 5:13; Tite 2:3.

15. Ke litšoaneleho life tse tšoanang le tsa Kreste tse tla thusa bohle ka phuthehong ho lula ba halalela?

¹⁵ Ho boloka phutheho e halalela, ho hlokahala hore kaofela ha rōna re be le kelello ea Kreste, ’me rea tseba hore tšoaneleho ea hae e ka sehloohong ke lerato. Kahoo, Pauluse o ile a eletsa Bakolose hore ba be le qenehelo joaloka Kreste: “Ka lebaka leo, joaloka bakhethoa ba Molimo, ba halalelang le ba ratoang, le ikapese maikutlo a bonolo a qenehelo, mosa, ho ikokobetsa kelellong, bonolo, le tiisetso . . . , le tšoarelana ka bolokolohi . . . Ntle ho lintho tsena kaofela, le ikapese lerato, etsoe ke tlamo e phethahetseng ea kopano.” Eaba oa eketsa: “Hape, khotso ea Kreste a e laole ka lipelong tsa lōna.” Ruri ka moea ona oa ho tšoarela, re ka boloka bonngoe le khalalelo ea phutheho.—Bakolose 3:12-15.

Na Khalalelo ea Rōna ea Bonahala ho Baahisani?

16. Ke hobane’ng ha borapeli ba rōna bo halalelang e lokela ho ba borapeli bo thabisang?

¹⁶ Ho thoe’ng ka baahisani? Ba re talima joang? Na re bontša thabo e tlisoang ke ’nete kapa re etsa hore e bonahale e le moroalo? Haeba re halalela feela joalokaha Jehova a halalela, joale ho lokela ho bonahala lipuong tsa rōna le boitšoarong ba rōna. Ho lokela ho hlaka hore borapeli ba rōna bo halalelang ke borapeli bo thabisang. Hobane’ng? Hobane Jehova Molimo oa rōna ke Molimo ea thabileng, ea batlang hore barapeli ba hae ba thabe. Kahoo, mopesaleme o ne a ka re ka batho ba Jehova ba mehleng ea boholo-holo: “Ho [thabile, NW] sechaba seo Jehova e leng Molimo oa sona!” Na re bontša thabo eo? Na bana ba rōna le bona ba bontša khotsofalo bakeng sa ho ba har’a batho ba Jehova Holong ea ’Muso le likopanong?—Pesaleme ea 89:15, 16; 144:15b.

17. Re ka bontša khalalelo e leka-lekaneng joang ka tsela e sebetsang?

¹⁷ Re ka boela ra bontša ho leka-lekana khalalelong ea rōna ka ho ba le moea oa tšebelisano le mosa oa boahisani. Ka linako tse ling hoa hlokahala hore baahisani ba hule hammoho, mohlomong ha ba hloekisa tikoloho e ba potolohileng kapa joaloka linaheng tse ling, ha ba thusa ho ntlafatsa litsela tse nyenyane le tse khōlō. Tabeng ena, khalalelo ea rōna e ka totobala tseleng eo ka eona re hlokomelang lirapa le lijarete tsa rōna kapa thepa e ’ngoe. Haeba re siea litšila hohle kapa re e-na le jarete e bohlasoa kapa e mahleke, mohlomong esita le e nang le likoloi tsa khale tse soahlamaneng tse behiloeng pooaneng, na re ka re re hlompha baahisani ba rōna?—Tšenolo 11:18.

Khalalelo Mosebetsing le Sekolong

18. (a) Ke’ng seo e leng bothata bo boholo ho Bakreste kajeno? (b) Re ka ikhetha joang lefatšeng?

¹⁸ Moapostola Pauluse o ile a ngolla Bakreste motseng o litšila oa Korinthe: “Lengolong la ka ke ile ka le ngolla hore le khaotse ho itsoakanya hammoho le lihlola, ke sa bolele ka ho feletseng le lihlola tsa lefatše lena kapa batho ba meharo le bahanyapetsi kapa barapeli ba litšoantšo. Ho seng joalo, le ne le tla tlameha hore le hle le tsoe lefatšeng.” (1 Bakorinthe 5:9, 10) Bona ke bothata bo boholo ho Bakreste, bao letsatsi le letsatsi ba tlamehang ho kopana le batho ba itšoereng hampe kapa ba sa tsotelleng hore na boitšoaro ba bona bo botle kapa bo bobe. Ena ke teko e khōlō ea botšepehi, haholo-holo litsong tseo ho tsona ho hleka-hleka ka likamano tsa botona le botšehali, tšenyeho le ho hloka botšepehi li khothalletsoang kapa li lumelloang. Boemong bona re ke ke ra khona ho theola litekanyetso tsa rōna e le hore re hlahe re “tšoana le batho ba bang” ba re potolohileng. Ho e-na le hoo, boitšoaro ba rōna ba Bokreste bo mosa empa e le bo ikhethang bo lokela ho etsa hore re hlahelle ho batho ba nang le temoho, ho ba elang hloko tlhoko ea bona ea moea le ba batlang ntho e ’ngoe e molemo.—Matheu 5:3; 1 Petrose 3:16, 17.

19. (a) Lōna bana le na le liteko life sekolong? (b) Batsoali ba ka etsa’ng ho tšehetsa bana ba bona le boitšoaro ba bona bo halalelang?

¹⁹ Ka ho tšoanang, ho na le liteko tse ngata tseo bana ba rōna ba tobanang le tsona sekolong. Na lōna batsoali le etela sekolo seo bana ba lōna ba se kenang? Na lea tseba hore ke tikoloho ea mofuta ofe e renang moo? Na le na le kamano e ntle le matichere? Ke hobane’ng ha lipotso tsee e le tsa bohlokoa? Hobane lefatšeng libakeng tse ngata tsa litoropo, likolo li fetohile lilao tsa pefo, lithethefatsi le likamano tsa botona le botšehali. Bana ba lōna ba ka boloka botšepehi joang le boitšoaro ba bona bo halalelang haeba ba sa fumane tšehetso ea batsoali ba bona e feletseng e bontšang kutloelo-bohloko? Pauluse o ile a eletsa batsoali ka nepo: “Lōna bo-ntate, le se ke la ba ba khentšang bana ba lōna, e le hore ba se ke ba nyahama.” (Bakolose 3:21) Tsela e ’ngoe ea ho khentša bana ke ho hlōleha ho utloisisa mathata le liteko tsa bona tsa letsatsi le letsatsi. Ho lokisetsa liteko tsa sekolong ho qala tikolohong ea moea ea lelapa la Bokreste.—Deuteronoma 6:6-9; Liproverbia 22:6.

20. Ke hobane’ng ha ho hlokahala khalalelo ho rōna bohle?

²⁰ Ha re phetha, ke hobane’ng ha khalalelo e hlokahala bakeng sa rōna bohle? Hobane e sebeletsa e le tšireletso khahlanong le tlhaselo ea lefatše la Satane le monahano oa lona. Ke tlhohonolofatso hona joale ’me e tla ba eona nakong e tlang. E re thusa ho tiisa hore re tla ba le bophelo boo e tla ba ba sebele lefatšeng le lecha la ho loka. E re thusa hore re leka-lekane, re atamelehe, re be Bakreste ba buang ka bolokolohi—e seng ba chesehelang bolumeli ka ho feteletseng ba sa khaotse. Ka bokhutšoanyane, e etsa hore re tšoane le Kreste.—1 Timothea 6:19.

[Mongolo o botlaaseng ba leqephe]

Na U sa Hopola?

◻ Ke hobane’ng ha Petrose a ile a bona ho hlokahala ho eletsa Bakreste mabapi le khalalelo?

◻ Ke hobane’ng ha ho phela bophelo bo halalelang ho se bonolo?

◻ Re ka etsa eng kaofela ha rōna ho ntlafatsa khalalelo ka lapeng?

◻ E le hore phutheho e lule e halalela, re lokela ho qoba boitšoaro bofe bo litšila?

◻ Re ka lula re halalela joang mosebetsing le sekolong?

[Litšoantšo tse leqepheng la 16, 17]

Re le Lipaki tsa Jehova, re lokela ho thaba ha re sebeletsa Molimo le ha re etsa mesebetsi e meng