Khotso ea Molimo bakeng sa ba Rutoang ke Jehova
“Bana ba hao bohle ba tla rutoa ke Morena [Jehova]; khotso ea bana ba hao e tla ba kholo.”—ESAIA 54:13.
1, 2. Ho thabela khotso ho itšetlehile ka eng?
KHOTSO! E lakatseha hakaakang! Empa tlaleho ea batho ha ea ba le khotso ho hang. Ke hobane’ng ha ho le joalo?
2 Ho thabela khotso ho amana haufi-ufi le ho hlompha ba boholong. ’Me ke mang ea boholong ka holimo ho bohle bokahohleng? Ke ’Mōpi, Jehova Molimo. Kamano e amohelehang khotsong le eena ke ea bohlokoa ka lebaka lona leo. (Pesaleme ea 29:11; 119:165) Haeba kamano eo ea bohlokoahali e ka senngoa, ha ho bonolo ho ba le khotso ea ’nete le Molimo, motho e mong, kapa ka hare ho uena.—Esaia 57:21.
Lebaka Leo Lefatše le Se Nang Khotso ka Lona
3. Kamano ea Molimo le batho e ile ea senngoa joang?
3 Joalokaha re tsebisisa, mora oa Molimo oa moea o ile a fetohela Jehova nakoana hoba histori ea motho e qalehe. Bofetoheli ke ntoa. Mosenyi eo oa khotso, ea ileng a tsejoa e le Satane Diabolose, o ile a phehella Eva hore a se ke a lumella molao oa Molimo hore o eme tseleng ea hae ea hore a etse ho hong haeba a ikutloa hore ho ne ho tla ba molemong oa hae. Diabolose a sotha linnete ho etsa hore Eva a nahane hore o amohuoe ho hong ho molemo ka hore a ele Molimo hloko. E ne e le boipiletso bo isang boithating, boikutlong ba ’na-pele. Ka potlako monna oa hae a ikopanya le eena boitšoarong bo se nang molao, ’me ka lebaka leo, bana bohle ba bona ba tšoaelitsoe moea oo.—Genese 3:1-6, 23, 24; Ba-Roma 5:12.
4, 5. (a) Satane o atlehile hakae ho susumetsa monahano oa batho? (b) Hoo ho bile le phello efe boitekong ba motho ba ho finyella khotso?
4 Hase karolo e nyenyane feela ea batho e qhelang molao oa Molimo. Mangolo a re bolella hore Satane o ‘thetsa lefatše kaofela.’ (Tšenolo 12:9) Batho ba bang ke batlōli ba feteletseng ba molao, ba bontša ka ho feletseng hore ha ba hlomphe Molimo le batho ba bang; ba bang ba joalo ka tekanyo e tlaase. Empa Satane o atlehile haholo ho susumetseng monahano oa batho hoo moapostola Johanne a neng a ka re: “Lefatše lohle le rapaletse ka tlase ho e mobe.” (1 Johanne 5:19) E-bang batho ba bolela hore ba lumela hore Diabolose o teng kapa che, ba etsa thato ea hae. Baa mo utloa, ka hona ke ’musi oa bona. Ka baka leo, batho ba ikarotse ho Molimo, ke lira tsa oona. Tikolohong e joalo, na e ka ba ho makatsang hore boiteko ba batho ba ho finyella khotso bo hlōlehe?—Ba-Kolosse 1:21.
5 Leha ho le joalo, palo e ntseng e eketseha ea batho ba tsoang lichabeng tsohle e latsoa khotso ea Molimo, khotso e simolohang ho Molimo. Hoo ho etsahetse joang?
Khotso e Khotsofatsang eo Molimo o Fanang ka Eona
6. (a) Ke joang Bibele e buellang khotso? (b) Ke ka mang ho leng bonolo hore re thabele khotso e fanoang ke Molimo?
6 Ho Ba-Roma 15:33 (TLP) Jehova ka tšoanelo o hlalosoa e le “Molimo ea . . . fang khotso.” Ho tloha tšimolohong, haesale e le morero oa Molimo hore libōpuoa tsohle tsa oona li thabele khotso. Lentsoe la oona le bululetsoeng, Bibele, le bua ka khotso ka makhetlo a fetang 300. Le hlakisa hore Jesu Kreste ke “Morena oa khotso.” (Esaia 9:6, 7) Ke eena ea romiloeng ke Molimo ho senya mesebetsi ea mosenyi eo e moholo oa khotso, Satane Diabolose. (1 Johanne 3:8) ’Me ka “Morena oa Khotso” ho bonolo hore e mong le e mong ho rōna a thabele khotso e khotsofatsang eo Molimo o fanang ka eona.
7. (a) Khotso ena e fanoang ke Molimo e akarelletsa eng? (b) Ke hobane’ng ha e se khotso eo re ka e emelang ho fihlela ha tsamaiso ee ea khale e fela ’me re qetella re fihlile phethehong?
7 Ee ke khotso e tsotehang hakaakang! Ke khotso e fetang bosieo ba ntoa. Lentsoe la Seheberu sha·lohmʹ, le atisang ho fetoleloa e le “khotso,” le na le moelelo oa ho phela hantle ’meleng, nala le boiketlo. Khotso ea Molimo eo e leng letlotlo la Bakreste ba ’nete e ikhetha ka hore ha ea itšetleha ka tikoloho ea bona. Hona ha ho bolele hore tikoloho e bosula ha e ba ame. Empa ka ho bona ba ba le matla a ba nolofaletsang ho qoba ho kenya letsoho merusung ka ho iphetetsa ha e ba ama. (Ba-Roma 12:17, 18) Le hoja motho e ka ’na ea e-ba seqhoala kapa mofutsana, o sa ntsane a ka thabela ho phela hantle ’meleng le nala ka kutloisiso ea moea ’me a thabela khotso eo Molimo o fanang ka eona. Ka ho totobetseng, khotso eo ba joalo ba e latsoang e tla eketseha ha lefatše la boithati le felisitsoe ’me e tla teba ha batho bohle ba finyella phetheho. Empa khotso ea Molimo e teng hona joale ke boemo bo khutsitseng ba kelello le pelo, khutso e ka ho motho ho sa tsotellehe se etsahalang ka ntle. (Pesaleme ea 4:8) Mohloli oa eona ke kamano e amohelehang le Molimo. A letlotlo la bohlokoahali!
Bana ba Rutoang ke Jehova
8. Ke bo-mang ba pele ba ileng ba thabela khotso ee le Molimo ka Jesu Kreste?
8 Ke bo-mang ba nang le khotso e joalo ka lebaka la ho rutoa ke Jehova le ho ela hloko litaelo tsa hae? Ha e arabela, Bibele e qala ka ho lebisa tlhokomelo ea rōna ho ba etsang Iseraele oa moea. Ho buuoa ka bona ho Ba-Galata 6:16, moo re balang: “’Me ha e le bohle ba tlang ho ea ka molao oo [“molao oo oa boitšoaro,” NW], khotso le mohau li be ho bona, le ho Iseraele oa Molimo.” Bana ke ba 144 000 ba khethiloeng ke Molimo hore ba kopanele bophelong ba leholimo le Jesu Kreste.—Tšenolo 14:1.
9. “Molao oa boitšoaro” o neng o amana le ho thabela ha Iseraele oa moea khotso e ne e le ofe?
9 Morao koana lekholong la pele la lilemo, Baiseraele bao ba moea ba ne ba ithuta ’nete ea motheo, ‘molao oa boitšoaro,’ o neng o amana ka ho toba le ho thabela ha bona khotso. E ne e le habohlokoa hore ba utloisise molao ona oa boitšoaro. Ka lilemo tse fetang makholo a 15, Jehova o ne a ile a sebelisa Molao oa Moshe ho bea liriti tsa lintho tse molemo tse neng li e-tla. Empa kamorao ho lefu la sehlabelo la Jesu Kreste, litlhokahalo tsa Molao oa Moshe li ne li se li sa tlame. (Ba-Heberu 10:1; Ba-Roma 6:14) Hona ho ne ho ile ha totobala qetong ea tseko ea lebollo e neng e entsoe ke sehlopha se busang sa Bokreste se neng se le Jerusalema. (Liketso 15:5, 28, 29) Ho boetse ha hatisoa lengolong le bululetsoeng le eang ho Bagalata. Lintho tse molemo tseo Molao oa Moshe o neng o li tšoantšelitse li ne li sebelitse. Ka mamello Jehova o ne a hatisa likelellong le lipelong tsa balateli ba tlotsitsoeng ba Kreste bohlokoa ba mosa o sa tšoanelang oa hae o bontšitsoeng ka Kreste. Ka ho lumela tokisetsong ena, ka ho itšoara tumellanong le eona, ba ne ba ka thabela khotso ea mofuta oo ho seng mohla e neng e kile ea nolofalla batho ba baetsalibe.—Ba-Galata 3:24, 25; 6:16, 18.
10. (a) Iseraele ea moea e ne e thabela phethahatso ea tšepiso efe e tlalehiloeng ho Esaia 54:13? (b) Ho ba khalemela ha Jehova e bile lebaka la hore ba latsoe khotso joang?
10 Baiseraele bao ba moea ba ne ba latsoa phethahatso ea tšepiso e khōlō e tlalehiloeng ho Esaia 54:13. Mono Molimo ka booona o ne o itse ho mokhatlo o hlophisitsoeng oa oona o kang mosali oa libōpuoa tse tšepahalang tsa moea: “Bana ba hao bohle ba tla rutoa ke Morena [Jehova]; khotso ea bana ba hao e tla ba kholo.” Ha e le hantle, Ngoana e moholo oa mosali enoa ke Jesu Kreste, ea ileng a tsoaloa e le Messia ha a tlotsoa ka moea o halalelang ka 29 C.E. Empa “mosali” oa Jehova oa leholimo o na le bana ba bang—ba bang ba 144 000 ba fetohang karolo e tlaasana ea peō e profetiloeng ho Genese 3:15. Jehova o ne a tšepisitse hore e ne e tla ba Moruti e Moholo oa bana bana kaofela. O ba rutile ’nete e buang ka eena le merero ea hae. O ba boleletse hore na ba ka mo sebeletsa joang. Ka linako tse ling, o ile a tlameha ho ba khalemela. Hona e ’nile ea e-ba ho hlokahalang ha ba hlōleha ho hlokomela Lentsoe la hae. Ho ka ’na ha e-ba thata ho amohela khalemelo. Empa ka boikokobetso ba ’nile ba amohela hore baa e hloka ’me ba etsa liphetoho tse hlokahalang, ’me khalemelo eo e hlahisitse litholoana tse molemo—“litholoana tsa khotso, tsa ho lōka.”—Ba-Heberu 12:7, 11, TLP; Pesaleme ea 85:8.
“Bongata bo Boholo ba Batho” bo Rutoang Litsela tsa Molimo
11. (a) Ke bo-mang hape ba rutoang ke Jehova mehleng ea rōna? (b) Ba bontša joang hore ba tšoanela tlhaloso e fumanoang ho Esaia 2:2, 3, hona e le ka phello efe ho ba bang?
11 Mehleng ea rōna, Iseraele oa moea hase sona sehlopha feela se rutoang ke Jehova. Lilemong tse fetileng tse mashome a mahlano, tlhokomelo e boetse ea lebisoa ho ba bang hape. Esaia o ile a bululeloa hore a ngole ka bona khaolong ea 2, litemana 2 le 3: “Ho tla etsahala mehleng ea bofelo, hoba thaba ea ntlo ea Jehova e tla beoa hlorong ea lithaba, e okamele maralla, ’me lichaba kaofela li tla phallela teng.” E, ba amohetseng borapeli ba Molimo o le mong feela oa ’nete ba bo nea sebaka se phahameng ka ho fetisisa bophelong ba bona. Kahoo bo ema bo phahametse borapeli ba mofuta o mong le o mong boo ba neng ba kile ba kopanela le bona le boo lefatše le ba potolohileng le ntseng le kopanela le bona. Batho ba lichaba tsohle ba lemohile sena. Ba bone hore, ho sa tsotellehe lintho tse hlokoang ke ba boholong lefatšeng kapa ho ata ha mekhoa eo e seng ea Bokreste lefatšeng, ba rapelang Jehova ba phahamisitse kamano ea bona le eena ka holimo ho eng kapa eng. Bashebelli le bona ba bone hore na hona ho hlahisa litholoana tsa mofuta ofe bophelong ba barapeli ba joalo, ’me ba bangata ba rata ho kopanela borapeling ba ’nete. Ka hona batho ba fetang limillione tse tharo hona joale, ba re ho ba bang: “Tlong, re nyoloheleng thabeng ea Jehova, ka tlung ea Molimo oa Jakobo, o tle o re rute mekhoa ea oona, re tsamaee litseleng tsa oona.”—Bona le Zakaria 8:23.
12. Ba boleloang ho Esaia 2:2, 3 ba ruile molemo joang ka hore Molimo e be Moruti oa bona, ’me karolo e totobetseng ea thuto eo o ba fang eona ke efe?
12 Nahana feela hore na hoo ho bolela eng—ho ba le Molimo e le Moruti oa bona! Ba rutoang joalo ’me kannete ba ananela mohloli oa thuto eo ha baa tlakoa ke maikutlo a loantšanang ka linako tsohle. Ha ba iphumane ba qea-qea kapa ba tsielehile hore na se nepahetseng ke sefe. ’Nete e tsoang Lentsoeng la Molimo e hlakile ka ho fetisisa. ’Me Esaia 2:4 e bontša hore karolo e hlahelletseng ka ho fetisisa ea thuto eo ba neng ba tla e fumana ke efe? E ama kamoo ho ka thabeloang khotso lefatšeng le harasoaneng ke qhoebeshano. Kahoo, ho sa tsotellehe hore na ba bang ba ikhethela ho etsa joang, ba rutoang ke Jehova ba ikhathatsa ho tea marumo a bona mehoma le lisabole tsa bona lisekele. Ha ba sa ithuta ntoa.
13. “Bongata bo boholo ba batho” bo tsoile limelong life, empa ke eng se ba entseng seo ba leng sona?
13 Ke sona sehlopha sena se tšoantšelitsoeng ho Tšenolo 7:9, 10, 14 e le sa baphonyohi ba kenang lefatšeng le lecha la khotso la Molimo le tlang ho tla ka morao ho ‘mahlomola a maholo’ a tlang. “Bongata bo boholo” bona ba batho bo pholohang bo tsoa lihlopheng, merabeng, lichabeng le lipuong tsohle tsa lefatše. Ba bangata ho bona e ne e le litho tsa lihlopha tse neng li loantšana. Ba bang ba ne ba phehella feela ho phela ka tsela ea boithati; empa, hoo le hona ho ne ho kena-kenana le ho thabela khotso. Empa joale bana ba tsoang lichabeng tsohle ke batho ba ratang khotso le ba hōlisang khotso. ’Me ke eng e ba entseng hore ba be joalo? Ba rutiloe ke Jehova.—Esaia 11:9.
Khotso e Ikhethang
14. Khotso ea batho ba Jehova e theiloe ho eng, ’me ho joalo joang?
14 Khotso eo Jehova a hauhelang batho ba hae ka eona ke e ikhethang kannete. Hase ntho e hlahang ha tumellano e thekeselang e etsoa pakeng tsa lihlopha tse peli tse sa tšepaneng. Ha e ame ho sekisetsa. E theiloe ho lokeng. (Esaia 32:17) Empa hoo e ka ba ’nete joang ka khotso e amang batho ba sa phethahalang? Joaloka baetsalibe, ke ho loka hofe hoo motho leha e le ofe har’a rōna a ka bang le hona? Ha e le hantle, ka tumelo re ka thabela ho loka ho fumanehang ka molemo o phekolang libe oa sehlabelo sa Jesu.
15. Tšebeletsong ea Jesu ea lefatšeng, Jehova o ne a ruta bana ba hae ba kamoso eng eo e neng e le ea bohlokoa bakeng sa khotso?
15 Hona ho re thusa hore re ananele seo Jesu a se boletseng joalokaha se tlalehiloe ho Johanne 6:45-47. Mono o ne a bua le Bajode ba neng ba sa huleloa ho eena joaloka Messia, ’me kahoo ba mo korotlela. Empa ke mabapi le barutuoa ba hae a itseng: “Ho ngoliloe mangolong a baprofeta [ka ho toba, ho Esaia 54:13], ho thoe: Ba tla rutoa bohle ke Molimo. Ka baka leo, e mong le e mong ea utloileng Ntate, ea ithutileng ho eena, o tla ho ’na. Hase hore motho o kile a bona Ntate, ha e se ea tsoang ho Molimo; eena o bone Ntate. Ka ’nete-nete ke re ho lōna: Ea lumelang ho ’na o na le bophelo bo sa feleng.” Barutuoa bao ba ile ba amohela thuto eo Jehova a neng a ba fa eona. Ba ile ba huleloa ho Jesu. Ha ba bang ba hana lintho tseo a neng a li ruta ’me ba furalla Jesu, barutuoa ba hae ba sala le eena. Joalokaha Petrose a itse: “Re lumetse, ra ba ra tseba hobane ke uena Kreste, Mokhethoa oa Molimo.” (Johanne 6:69) Ka lebaka la tumelo ea bona ho Jesu Kreste, ho ne ho tla ba bonolo ho bona hore ba tle kamanong ea khotso le Jehova Molimo, kamano e tsamaeang le tiiso ea bophelo bo sa feleng.
16. (a) Ho tloha ka Pentekonta ea 33 C.E., balateli ba Jesu ba ile ba rua molemo joang tokisetsong e entsoeng ka Kreste? (b) Ka morao ho moo, ho ne ho hlokoa eng ho bona?
16 Ho tloha ka Pentekonta ea 33 C.E., melemo ea sehlabelo sa Kreste e ile ea qala ho sebelisoa ho balateli bao ba tšepahalang ba Jesu. Seo Pauluse a ileng a se ngola hamorao ho Ba-Roma 5:1 e bile ’nete ka bona: “Joale, ha re beiloe ba lokileng ka tumelo, re na le khotso ho Molimo, ka Jesu Kreste, Morena oa rōna.” Bana bohle ka tsoalo e ne e le litloholo tsa Adama. Joaloka baetsalibe, ba ne ba arohile ho Molimo. Ha ho mesebetsi e molemo eo e ka ’nang eaba ba e entse ka bo bona e neng e ka hlakola ho futsa ha bona sebe. Empa ka mosa oa hae o sa tšoanelang, Jehova o amohetse sehlabelo sa bophelo ba botho bo phethahetseng sa Jesu molemong oa bana ba Adama. Bakeng sa ba lumetseng tokisetsong ena, joale ho bile bonolo hore ba beoe ba lokile le hore ba nkoe e le bana ba Molimo ba hopoletsoeng ho ea phela leholimong. (Ba-Efese 1:5-7) Empa na ho ne ho hlokahala ho hong hape ka lehlakoreng la bona? E, ba ne ba lokela ho tsamaea litseleng tsa Jehova. Ba ne ba se ba sa lokela ho itloaetsa sebe. Empa ba hlokomela hore ho loka leha e le hofe hoo ba nang le hona ho teng ka lebaka la mosa o sa tšoanelang oa Molimo o bontšitsoeng ka Kreste. Joalokaha lengolo le re, ba ‘thabela khotso le Molimo ka Jesu Kreste.’
17, 18. (a) Na “linku tse ling” li thabela khotso e joalo le Molimo? (b) Ke lipotso life hape tse lokelang hore ho buisanoe ka tsona?
17 Ho thoe’ng ka bao Jesu a buileng ka bona e le “linku tse ling” tsa hae? (Johanne 10:16) Na ba thabela khotso e joalo le Molimo? E seng joaloka bana ba Molimo, empa Ba-Kolosse 1:19, 20 e ba akarelletsa ho baamoheli ba khotso ea Molimo. E re Molimo o bone ho molemo ka Kreste “ho busetsa lintho tsohle khotsong ea Molimo ka eena [Jesu], leha e le tse lefatšeng [ke hore, ba tla hauheloa ka bophelo bo sa feleng lefatšeng la paradeise], leha e le tse maholimong.” Bana ba nang le litebello tsa lefatšeng ba boleloa ba lokile ’me ba thabela khotso le Molimo le hona joale, e seng joaloka bana, empa joaloka ‘metsoalle ea Molimo,’ joalokaha ho bile joalo ka Abrahama. Boo ke boemo bo tlotlehang hakaakang!—Jakobo 2:23.
18 Na uena ka bouena u thabela khotso eo? Na u e latsoa ka botlalo joalokaha e ka thabeloa ke batho ba phelang mehleng ee ea bohlokoa ka ho fetisisa historing? Sehloohong se latelang, re tla buisana ka tse ling tsa lintho tse ka thusang hore hoo ho etsahale.
Lipotso tsa Tlhahlobo
◻ Ke hobane’ng ha lefatše le se na khotso?
◻ Khotso eo Molimo o fanang ka eona hona joale ke eng?
◻ Ke bo-mang ba ka thabelang khotso e joalo?
◻ Ho loka ke lebaka la bohlokoa joang khotsong ee?
[Setšoantšo se leqepheng la 14]
“E mong le e mong ea utloileng Ntate, ea ithutileng ho eena, o tla ho ’na”