Ho Nkoa le le ba Tšoanelang ho Tataisetsoa Lilibeng Tsa Metsi a Bophelo
“Konyana . . . e tla ba lisa, ’me e tla ba tataisetsa lilibeng tsa metsi a bophelo.”—TŠEN. 7:17.
1. Lentsoe la Molimo le re’ng ka Bakreste ba tlotsitsoeng, hona Jesu o ile a ba fa boikarabelo bofe?
LENTSOE la Molimo le re Bakreste ba tlotsitsoeng ba hlokomelang lithahasello tsa Kreste mona lefatšeng ke “lekhoba le tšepahalang le le masene.” Ha Kreste a ne a hlahloba “lekhoba” leo ka 1918, o ile a fumana hore batlotsuoa bao ba neng ba le lefatšeng ba ne ba tšepahalla ho fana ka ‘lijo tsa moea ka nako e tšoanetseng.’ Ke kahoo, Jesu, Mong’a bona, a ileng a khahloa ke hore hamorao a ba khethe hore ba “okamele lintho tsohle tsa hae.” (Bala Matheu 24:45-47.) Ka tsela ena, pele ba fumana lefa la bona la leholimo, batlotsuoa ba sebeletsa barapeli ba bang ba Jehova mona lefatšeng.
2. Hlalosa lintho tsa Jesu.
2 Mong’a lintho o na le matla holim’a lintho tsa hae kapa matlotlo a hae, hore a a sebelise kamoo a ratang kateng. Lintho tsa Jesu Kreste, e leng Morena eo Jehova a mo behileng teroneng li akarelletsa mesebetsi eohle e amanang le ’Muso mona lefatšeng. Li akarelletsa “bongata bo boholo” boo moapostola Johanne a bo boneng ponong. Johanne o hlalosa bongata boo bo boholo tjena: “Bonang! bongata bo boholo, boo ho seng motho ea neng a khona ho bo bala, bo tsoa lichabeng tsohle le melokong eohle le bathong bohle le malemeng ’ohle, bo eme ka pel’a terone le ka pel’a Konyana, bo apere liaparo tse telele tsa ka holimo tse tšoeu; ’me ho ne ho e-na le makala a palema matsohong a bona.”—Tšen. 7:9.
3, 4. Bongata bo boholo bo filoe tlotla efe e khōlō?
3 Litho tsa bongata boo bo boholo li har’a bao Jesu a itseng ke “linku tse ling” tsa hae. (Joh. 10:16) Tšepo ea bona ke ho phela ka ho sa feleng paradeiseng lefatšeng. Ba kholisehile hore Jesu o “tla ba tataisetsa lilibeng tsa metsi a bophelo” le hore ‘Molimo o tla hlakola meokho eohle mahlong a bona.’ Ka lebaka la seo, ba “hlatsoitse liaparo tsa bona tse telele tsa ka holimo ’me ba li soeufalitse maling a Konyana.” (Tšen. 7:14, 17) Ba bontša tumelo sehlabelong sa Jesu, ka lebaka leo mahlong a Molimo ba na le ‘liaparo tse telele tse tšoeu.’ Ho boleloa hore ke metsoalle ea Molimo e lokileng joaloka Abrahama.
4 Ho feta moo, kaha Molimo o nka bongata bo boholo ba linku tse ling bo ntseng bo eketseha bo lokile, bo na le tšepo ea ho pholoha ha tsamaiso ena ea lintho e timetsoa matšoenyehong a maholo. (Jak. 2:23-26) Bo ka atamela ho Jehova, ’me e le sehlopha, bo na le tšepo e babatsehang ea ho pholoha Armagedone. (Jak. 4:8; Tšen. 7:15) Ha boa ikemela empa bo ikemiselitse ho sebetsa tlas’a tataiso ea Morena oa leholimo le barab’abo ba tlotsitsoeng ba mona lefatšeng.
5. Bongata bo boholo bo tšehetsa barab’abo Kreste ba tlotsitsoeng joang?
5 Lefatše la Satane le ’nile la hanyetsa Bakreste ba tlotsitsoeng ka matla ’me le tla ’ne le tsoele pele ho ba hanyetsa. Leha ho le joalo, ba ka ba le tšepo ea hore metsoalle ea bona ea bongata bo boholo e tla ba tšehetsa. Le hoja Bakreste ba tlotsitsoeng ba se ba fokola ka palo, selemo le selemo bongata bo boholo bo eketseha ka ba likete tse makholo. Batlotsuoa ha ba khone hore ka seqo ba tsamaise liphutheho tsa Bakreste tse ka bang 100 000 lefatšeng ka bophara. Kahoo, tsela e ’ngoe eo linku tse ling li tšehetsang batlotsuoa ka eona ke hore banna ba tšoanelehang ba bongata bo boholo ba sebeletsa e le baholo liphuthehong. Ba thusa ho hlokomela Bakreste ba limilione bao hona joale ba behiloeng tlhokomelong ea “lekhoba le tšepahalang le le masene.”
6. Ho ile ha profetoa eng mabapi le tšehetso eo Bakreste ba tlotsitsoeng ba neng ba tla e fuoa ke metsoalle ea bona ea linku tse ling?
6 Moprofeta Esaia o ile a bolela esale pele hore Bakreste ba tlotsitsoeng ba ne ba tla tšehetsoa ka boithatelo ke metsoalle ea bona ea linku tse ling. O ile a ngola: “Sena ke seo Jehova a se boletseng: ‘Basebetsi ba sa lefuoeng ba Egepeta le bahoebi ba Ethiopia le Basabea, banna ba balelele, ba tla tla ho uena, ’me e tla ba ba hao. Ba tla tsamaea ka mor’a hao.’” (Esa. 45:14) Ka tsela ea tšoantšetso, kajeno Bakreste ba nang le tšepo ea ho phela lefatšeng ba tsamaea ka mor’a sehlopha sa lekhoba le tlotsitsoeng le Sehlopha sa lona se Busang, ba ikokobelletsa boeta-pele ba sona. Kaha ke “basebetsi ba sa lefuoeng,” linku tse ling li ikemiselitse hore ka lipelo tsa tsona tsohle li sebelise matla a tsona le matlotlo a tsona ho tšehetsa mosebetsi oa boboleli o etsoang lefatšeng lohle oo Kreste a o fileng balateli ba hae ba tlotsitsoeng ba lefatšeng.—Lik. 1:8; Tšen. 12:17.
7. Bongata bo boholo bo ntse bo koetlisetsoa eng?
7 Ha litho tsa bongata bo boholo li ntse li tšehetsa barab’abo tsona ba tlotsitsoeng, li ntse li koetlisetsoa ho ba motheo oa mokhatlo o mocha oa batho o tla ba teng ka mor’a Armagedone. Motheo oo e lokela ho ba o tiileng le o sa sisinyeheng, ’me litho tsa oona li lokela ho ikemisetsa ho latela litaelo tsa Mong’a tsona li be li li phethe. Mokreste e mong le e mong o fuoa monyetla oa hore a bontše hore a ka sebelisoa ke Morena, Kreste Jesu. Ka ho bontša tumelo le ka ho tšepahala hona joale, o bontša hore o tla mamela ha Morena a mo fa litaelo lefatšeng le lecha.
Bongata bo Boholo bo Pakahatsa Tumelo ea Bona
8, 9. Bongata bo boholo bo pakahatsa tumelo ea bona joang?
8 Linku tse ling tseo e leng metsoalle ea phutheho ea Bakreste ba tlotsitsoeng li pakahatsa tumelo ea tsona ka litsela tse sa tšoaneng. Ea pele, li tšehetsa batlotsuoa ho bolela litaba tse molemo tsa ’Muso oa Molimo. (Mat. 24:14; 28:19, 20) Ea bobeli, ka boikhethelo li ikokobelletsa tataiso eo li e fuoang ke Sehlopha se Busang.—Baheb. 13:17; bala Zakaria 8:23.
9 Ea boraro, litho tsa bongata bo boholo li tšehetsa barab’abo tsona ba tlotsitsoeng ka hore li phele tumellanong le melao-motheo ea Jehova e lokileng. Li ikitlaelletsa ho ba le “lerato, thabo, khotso, tiisetso, mosa, molemo, tumelo, bonolo, boitšoaro.” (Bagal. 5:22, 23) Kajeno, ho bonahatsa litšobotsi tsena ho e-na le ho bonahatsa “mesebetsi ea nama,” e ka ’na ea e-ba ntho eo batho ba sa e rateng. Leha ho le joalo, litho tsa bongata bo boholo li ikemiselitse ho qoba “bohlola, ho se hloeke, boitšoaro bo hlephileng, borapeli ba litšoantšo, tšebelisano le meea, bora, ho qabana, poulelo, ho tlakoloha ka bohale, ho rata likhang, likarohano, maquloana, mohono, ho inehella botahoa, mekete e lerata, le lintho tse joaloka tsena.”—Bagal. 5:19-21.
10. Litho tsa bongata bo boholo li ikemiselitse ho etsa’ng?
10 Kaha ha rea phethahala, ho ka ba thata ho bonahatsa tholoana ea moea, ho qoba mesebetsi ea nama le hore motho a se lumelle lefatše la Satane hore le mo hatelle. Leha ho le joalo, re ikemiselitse hore re se ke ra lumella ho nyahama ho bakoang ke bofokoli ba rōna, ho hlōleha ka nakoana kapa bofokoli ba ’mele ho fokolisa tumelo ea rōna kapa ho fokolisa lerato la rōna ho Jehova. Rea tseba hore Jehova o tla phethahatsa tšepiso ea hae ka hore a pholose bongata bo boholo nakong ea mahlomola a maholo.
11. Satane o ’nile a sebelisa mekhoa efe e le hore a fokolise tumelo ea Bakreste?
11 Leha ho le joalo, kamehla re lula re butse mahlo hobane rea tseba hore eo ehlileng e leng sera sa rōna ke Diabolose, ’me ha a tele habonolo. (Bala 1 Petrose 5:8.) O lekile ho sebelisa bakoenehi le batho ba bang ho re kholisa hore lithuto tseo re li lumelang ke bohata. Leha ho le joalo, hangata leqheka leo ha lea ka la atleha. Ka tsela e tšoanang, le hoja ka linako tse ling mahloriso a ’nile a etsa hore mosebetsi oa boboleli o tsamaee butle, hangata a ’nile a matlafatsa tumelo ea batho ba hlorisoang. Kahoo, Satane o ntse a eketsa ho sebelisa mokhoa oo a nahanang hore o tla hle o atlehe ho fokolisa tumelo ea rōna. O nka monyetla ha motho a nyahame. Bakreste ba lekholong la pele la lilemo ba ile ba lemosoa ka kotsi ena ha ba ne ba bolelloa: “Le nahane ka hloko ka [Kreste] ea mameletseng puo e joalo e hanyetsang ea baetsalibe khahlanong le lithahasello tsa bona.” Hobane’ng? “E le hore le se ke la khathala eaba le felloa ke matla meeeng ea lōna.”—Baheb. 12:3.
12. Keletso ea Bibele e matlafatsa batho ba nyahameng joang?
12 Na u se u kile ua ikutloa eka u ka khaotsa ho sebeletsa Jehova? Na ka linako tse ling u ikutloa eka ha u na thuso? Haeba ho joalo, u se ke ua lumella Satane hore a sebelise maikutlo a joalo ho u sitisa ho sebeletsa Jehova. Ho ithuta Bibele ka botebo, ho rapela ka tieo le ho ba teng kamehla libokeng esita le ho ba ’moho le batho ba nang le tumelo e tšoanang le ea hao ho tla u thusa hore u se ke ua ‘felloa ke matla moeeng oa hao.’ Jehova o tšepisitse hore o tla thusa batho ba mo sebeletsang hore ba boele ba fumane matla, ’me tšepiso eo e tla phethahala. (Bala Esaia 40:30, 31.) Ikakhele ka setotsoana mesebetsing ea Bokreste. Qoba litšitiso tse ka u senyetsang nako, u shebane le ho thusa batho ba bang. Ka tsela eo, u tla ba le matla a hore u mamelle ho sa tsotellehe ho nyahama ho ka ’nang ha e-ba teng.—Bagal. 6:1, 2.
Ho Lopolloa Matšoenyehong le ho Kena Lefatšeng le Lecha
13. Batho ba tla pholoha Armagedone ba tla ba le mosebetsi ofe?
13 Ka mor’a Armagedone, matšoele a batho ba sa lokang ba tsositsoeng bafung a tla hloka hore a rutoe litsela tsa Jehova. (Lik. 24:15) Ho tla hlokahala hore a ithute ka sehlabelo sa thekollo sa Jesu, ho feta moo, ho tla hlokahala hore a rutoe hore na a ka bontša tumelo sehlabelong seo joang e le hore a tle a fumane melemo ea sona. Ho tla hlokahala hore a lahle lithuto tsa bolumeli tsa bohata tseo a neng a li lumela pele a be a tlohele le tsela eo a neng a phela ka eona pele. A tla tlameha ho ithuta ho apara botho bo bocha boo Bakreste ba ’nete ba tsejoang ka bona. (Baef. 4:22-24; Bakol. 3:9, 10) Ba linku tse ling ba tlang ho pholoha Armagedone ba tla ba le mosebetsi o mongata haholo. E tla ba thabo e kaakang ho etsetsa Jehova mosebetsi oa mofuta oo, ho se ho se khatello le litšitiso tse bakoang ke lefatše lee la hona joale le khopo!
14, 15. Hlalosa hore na batho ba tlang ho pholoha matšoenyeho a maholo le ba lokileng ba tla beng ba tsositsoe ba tla bolellana lintho life.
14 Bahlanka ba Jehova ba tšepahalang ba shoeleng pele Jesu a sebeletsa mona lefatšeng le bona ba tla ba le lintho tse ngata tseo ba tla ithuta tsona ka nako eo. Ba tla ithuta hore na Mesia ea tšepisitsoeng eo esaleng ba labalabela ho mo tseba empa ba sa ka ba mo bona ke mang? Bophelong ba bona bo fetileng, ba ne ba se ba ile ba bontša hore ba ikemiselitse ho rutoa ke Jehova. U ka inahanela hore na e tla ba thabo le tlotla e kaakang ho ba thusa hore—ka mohlala, ba hlalosetse Daniele hore na boprofeta boo a neng a bo ngotse empa a sa bo utloisise bo ile ba phethahala joang!—Dan. 12:8, 9.
15 Ho hlakile hore le hoja ho e-na le lintho tse ngata tseo ba tsositsoeng bafung ba tla ithuta tsona ho rōna, le rōna re tla ba le lipotso tse ngata tseo re tla ba botsa tsona. Ba tla re hlalosetsa ka botlalo liketsahalo tse boletsoeng ka Bibeleng empa li otliloe mabala-nkoe feela. Nahana hore na e tla ba ntho e thabisang hakaakang ha motsoala oa Jesu Johanne Mokolobetsi a re bolella hore na Jesu e ne e le motho ea joang! Ho totobetse hore lintho tseo re tla ithuta tsona ho lipaki tseo tse tšepahalang li tla etsa hore re ananele Lentsoe la Molimo ho feta kamoo re le ananelang kateng kajeno. Bahlanka ba Jehova ba tšepahalang ba shoeleng—ho akarelletsa le ba bongata bo boholo ba shoang nakong ea bofelo—ba tla fumana “tsoho e molemo.” Ba ile ba qala ho sebeletsa Jehova lefatšeng le busoang ke Satane. E tla ba thabo e kaakang ho tsoela pele ba sebeletsa Jehova tlas’a maemo a matle lefatšeng le lecha!—Baheb. 11:35; 1 Joh. 5:19.
16. Ho latela boprofeta, lintho li tla tsamaea joang Letsatsing la Kahlolo?
16 Letsatsing la Kahlolo ho na le nako eo ka eona meqolo e tla buloa. E tla sebelisoa hammoho le Bibele ho ahlola bohle ba phelang ho bona hore na ba tšoaneloa ke ho fumana bophelo bo sa feleng kapa che. (Bala Tšenolo 20:12, 13.) Qetellong ea Letsatsi la Kahlolo, motho e mong le e mong o tla be a filoe nako e lekaneng ho bontša hore na o eme hokae tsekong ea bobusi ba bokahohleng. Na o tla tšehetsa tokisetso ea ’Muso ’me a lumelle Konyana hore e mo tataisetse “lilibeng tsa metsi a bophelo”? Kapa na o tla hana ho ikokobelletsa ’Muso oa Molimo? (Tšen. 7:17; Esa. 65:20) Ka nako eo, bohle ba lefatšeng ba tla be ba fumane monyetla oa ho iketsetsa qeto, ba sa sitisoe ke sebe seo ba se futsitseng kapa ho ba sebakeng seo ho sona ho renang bokhopo. Ha ho na motho ea tla ba le lipelaelo ka hore na kahlolo ea Jehova ea ho qetela e nepahetse kapa che. Ba khopo ke bona feela ba tla timelletsoa ruri.—Tšen. 20:14, 15.
17, 18. Bakreste ba tlotsitsoeng le linku tse ling ba lebeletse Letsatsi la Kahlolo ba e-na le tšepo efe e thabisang?
17 Kaha kajeno Bakreste ba tlotsitsoeng ba nkoa e le ba tšoanelang ho amohela ’Muso, ba na le tjantjello ea ho busa Letsatsing la Kahlolo. Ba tla fumana tlotla e khōlō hakaakang! Tšepo eo ka boeona e ba susumelletsa hore ba latele keletso eo Petrose a e fileng barab’abo bona ba lekholong la pele la lilemo e reng: “Le etse haholoanyane sohle se matleng a lōna ho itiisetsa ho bitsoa le ho khethoa ha lōna; etsoe haeba le tsoela pele ho etsa lintho tsena ho hang le ke ke la hlōleha le ka mohla. Ha e le hantle, ka tsela ena le tla ekeletsoa ka ho enneng ho kena ’musong o sa feleng oa Morena le Mopholosi oa rōna Jesu Kreste.”—2 Pet. 1:10, 11.
18 Linku tse ling li thaba le barab’abo tsona ba tlotsitsoeng. Li ikemiselitse ho ba tšehetsa. Kaha ke metsoalle ea Molimo kajeno, li susumelletseha ho etsa sohle se matleng a tsona ha li sebeletsa Molimo. Letsatsing la Kahlolo, li tla thabela ho tšehetsa litokisetso tsa Molimo ka lipelo tsohle tsa tsona ha Jesu a ntse a li tataisetsa lilibeng tsa metsi a bophelo. Joale—qetellong—li tla nkoa li tšoaneloa ke ho ba bahlanka ba Jehova ba lefatšeng ka ho sa feleng!—Bar. 8:20, 21; Tšen. 21:1-7.
Na U sa Hopola?
• Lintho tsa Jesu li akarelletsa eng?
• Ba bongata bo boholo ba tšehetsa barab’abo bona ba tlotsitsoeng joang?
• Ba bongata bo boholo ba thabela litokelo life ’me ba na le tšepo efe?
• U nka Letsatsi la Kahlolo joang?
[Setšoantšo se leqepheng la 25]
Ba bongata bo boholo ba hlatsoitse liaparo tsa bona tse telele ’me ba li soeufalitse maling a Konyana
[Setšoantšo se leqepheng la 27]
Ke sefe seo u lebeletseng ho ithuta sona ho ba tšepahalang ba tsositsoeng bafung?