Yéhézkiél

44 Abdi dibawa deui ka gerbang luar tempat suci nu nyanghareup ka wétan.+ Éta gerbang téh nutup.+ 2 Tuluy Yéhuwa nyarios ka abdi, ”Ieu gerbang bakal terus nutup, moal dibuka-buka deui. Moal aya jalma nu meunang asup ka dinya, sabab Yéhuwa Allah Israél geus asup ka dinya.+ Jadi éta kudu terus nutup. 3 Tapi, pamingpin mah bakal diuk di dinya sarta dahar roti hareupeun Yéhuwa,+ da manéhna pamingpin. Manéhna bakal asup ngaliwatan tepas gerbang, kaluarna ogé nya kudu ti dinya.+

4 Geus kitu, abdi dibawa ku éta jalma ka hareupeun bait, asupna ngaliwatan gerbang kalér. Bréh kamulyaan Yéhuwa minuhan bait Yéhuwa.+ Bruk abdi sujud kana taneuh.+ 5 Tuluy Yéhuwa nyarios ka abdi, ”Anak manusa, perhatikeun, tingali, jeung déngékeun bener-bener sagala nu ditepikeun ku Kuring ngeunaan aturan jeung hukum bait Yéhuwa. Perhatikeun bener-bener lawang asup ka bait jeung kabéh jalan kaluar ti tempat suci.+ 6 Béjakeun kieu ka urang Israél nu sok barontak, ’Ieu nu diucapkeun ku Yéhuwa, Gusti Nu Maha Agung, ”Éh urang Israél, kalakuan maranéh nu pikaijideun téh geus kacida lobana. 7 Maranéh mawa urang asing nu teu disunat jeung nu haténa jahat asup ka tempat suci Kuring, tuluy maranéhna nganajisan bait Kuring. Maranéh mémang ngabaktikeun roti, gajih, jeung getih, tapi perjangjian Kuring ku maranéh dilanggar. Maranéh kalah ka ngalampahkeun hal-hal nu pikaijideun. 8 Barang-barang Kuring nu suci ku maranéh teu diurus.+ Maranéh gé nitah batur ngajalankeun tugas maranéh di tempat suci Kuring.”’

9 ”’Ieu nu diucapkeun ku Yéhuwa, Gusti Nu Maha Agung, ”Urang asing nu matuh di Israél, nu teu disunat jeung nu haténa jahat, teu meunang asup ka tempat suci Kuring.”’

10 ”’Waktu urang Israél ninggalkeun Kuring+ tuluy nyembah ka berhala-berhalana nu pikageuleuheun,* aya urang Léwi nu ngajauh ti Kuring. Maranéhna kudu nanggung balukar tina kasalahanana. 11 Geus kitu, maranéhna bakal ngalalayanan di tempat suci Kuring pikeun ngawaskeun gerbang-gerbang bait+ jeung ngalalayanan di bait. Maranéhna gé bakal meuncit kurban beuleuman jeung kurban séjénna keur jalma-jalma. Maranéhna bakal nangtung hareupeun jalma-jalma pikeun ngalalayanan jalma-jalma. 12 Tapi ku sabab geus ngaladénan jalma-jalma, mantuan jalma-jalma nyembah ka berhala-berhala nu pikageuleuheun sarta ngalantarankeun urang Israél nyieun dosa,+ Kuring ngangkat panangan pikeun sumpah yén urang Léwi bakal nanggung balukar tina kasalahanana,’ ucap Yéhuwa, Gusti Nu Maha Agung. 13 ’Maranéhna teu meunang ngalalayanan sabagé imam hareupeun Kuring sarta teu meunang antel kana barang-barang Kuring nu suci jeung nu kacida sucina. Maranéhna kudu nanggung kaéra lantaran lalampahanana nu pikaijideun. 14 Tapi, maranéhna meunang kénéh digawé di bait, nyaéta ngajalankeun tugas-tugas jeung sakabéh hal nu kudu dipigawé di dinya.’+

15 ”’Para imam Léwi turunan Zadok,+ nu ngajalankeun tugas di tempat suci Kuring waktu urang Israél ninggalkeun Kuring,+ bakal ngalalayanan hareupeun Kuring. Maranéhna bakal nangtung hareupeun Kuring pikeun ngabaktikeun gajih+ jeung getih,’+ ucap Yéhuwa, Gusti Nu Maha Agung. 16 ’Maranéhna nu bakal asup ka tempat suci Kuring téh. Maranéhna bakal ngalalayanan dina mézbah Kuring+ sarta bakal ngajalankeun tugas-tugas nu diparéntahkeun ku Kuring.+

17 ”’Waktu maranéhna asup ka gerbang-gerbang buruan jero, maranéhna kudu maké baju linén.+ Maranéhna teu meunang maké kaén wol waktu ngalalayanan di gerbang-gerbang buruan jero atawa tempat-tempat di jerona. 18 Maranéhna kudu maké sorban tina linén sarta calana pondok tina linén,+ teu meunang maké naon waé nu matak késangan. 19 Saacan maranéhna indit ka buruan luar, nyaéta tempatna jalma réa, maranéhna kudu ngalaanan baju nu dipaké keur tugas,+ tuluy diteundeun di rohangan-rohangan tempat dahar nu suci.+ Geus kitu maranéhna bakal maké baju séjén, ngarah jalma-jalma teu milu suci gara-gara éta baju. 20 Maranéhna teu meunang ngagundulan sirah,+ teu meunang manjangkeun buuk. Buuk téh kudu digunting sing rapih. 21 Para imam teu meunang nginum cianggur waktu rék asup ka buruan jero.+ 22 Maranéhna teu meunang kawin jeung randa atawa awéwé nu diserahkeun.+ Tapi, maranéhna meunang kawin jeung parawan turunan Israél atawa randana imam.’+

23 ”’Maranéhna kudu méré nyaho umat Kuring bédana nu suci jeung nu henteu, sarta ngajarkeun bédana nu najis jeung nu henteu.+ 24 Maranéhna kudu jadi hakim waktu aya kasus hukum.+ Mutus perkarana kudu luyu jeung putusan hukum Kuring.+ Maranéhna kudu ngajalankeun hukum jeung aturan Kuring ngeunaan sakabéh perayaan+ sarta kudu ngajaga sabat Kuring tetep suci. 25 Maranéhna teu meunang deukeut-deukeut jeung mayit, sabab maranéhna bakal jadi najis. Tapi, maranéhna meunang jadi najis lamun mayitna téh mayit indung bapana, anakna nu lalaki atawa awéwé, dulurna nu lalaki, atawa dulurna nu awéwé nu can kawin.+ 26 Sanggeus éta imam disucikeun, manéhna kudu ngadagoan tujuh poé deui, kakara manéhna bisa ngajalankeun tugasna. 27 Dina poé manéhna asup ka buruan jero pikeun ngalalayanan di tempat suci, manéhna kudu ngabaktikeun kurban pangampura dosa keur dirina sorangan,’+ ucap Yéhuwa, Gusti Nu Maha Agung.

28 ”’Ieu nu bakal jadi warisan maranéhna: Kuring warisan maranéhna téh.+ Para imam teu meunang dibéré tanah warisan, sabab warisan maranéhna téh Kuring. 29 Maranéhna bakal ngadahar kurban kadaharan,+ kurban pangampura dosa, jeung kurban kasalahan.+ Sakabéh hal nu dibaktikeun di Israél bakal jadi milik maranéhna.+ 30 Hasil panén nu mimiti jeung nu pangalusna sarta sagala rupa sumbangan ti maranéh bakal jadi milik para imam.+ Tipung kasar nu mimiti dihasilkeun ku maranéh gé kudu dibikeun ka para imam.+ Ku kituna, rumah tangga maranéh bakal diberkahan.+ 31 Para imam teu meunang ngadahar manuk atawa sato naon waé nu geus paéh atawa nu disasaak ku sato galak.’+