Yosua
13 Ayeuna Yosua geus kolot pisan. Jadi Yéhuwa ngomong ka manéhna, ”Manéh téh geus kolot pisan, tapi loba kénéh tanah nu kudu direbut.* 2 Ieu tanah sésana téh: sakabéh daérah urang Filistin jeung daérah urang Gésyur 3 (ti cagak Walungan Nil* di wétaneun* Mesir nepi ka wates Ékron di beulah kalér, nu saacanna dianggap daérahna urang Kanaan) kaasup daérahna lima pangawasa urang Filistin, nyaéta urang Gaza, urang Asdod, urang Askélon, urang Gat, jeung urang Ékron; daérahna urang Awim 4 di beulah kidul; sakabéh tanah urang Kanaan; Méara, daérahna urang Sidon, nepi ka Afék, nu aya di wates daérahna urang Amori; 5 tanah urang Gébal jeung sakabéh Lébanon ka arah wétan, ti Baal-gad di suku Gunung Hérmon nepi ka Lébo-hamat;* 6 sakabéh daérahna urang Sidon, nyaéta penduduk daérah pagunungan ti Lébanon nepi ka Misréfot-maim. Kuring rék ngusir maranéhna ti hareupeun urang Israél. Manéh mah kari ngabagi-bagikeun daérah éta jadi warisan jang urang Israél, sakumaha paréntah Kuring ka manéh. 7 Ayeuna, manéh kudu ngabagi-bagikeun tanah éta jadi warisan keur salapan kaom jeung satengah kaom Manasyé.”
8 Ari kaom Rubén, kaom Gad, jeung satengahna deui ti kaom Manasyé geus narima tanah warisan ti Musa di wétaneun Walungan Yordan, sakumaha nu dibikeun ku Musa hamba Yéhuwa. 9 Tanahna téh dimimitian ti Aroér di sisi Lebak Arnon, ogé kota nu aya di tengah lebak éta, jeung sakabéh dataran luhur Médéba nepi ka Dibon; 10 sakabéh kotana Sihon, raja urang Amori nu ngawasa di Hésbon, nepi ka wates daérah urang Ammon; 11 Giléad, daérah urang Gésyur jeung urang Maakat, sakabéh Gunung Hérmon, jeung sakabéh Basyan nepi ka Saléka; 12 sakabéh daérah karajaan Og di Basyan, nu ngawasa di Astarot jeung Édréi. (Manéhna téh salah sahiji urang Réfaim nu nyésa.) Musa ngéléhkeun jeung ngusir pendudukna. 13 Tapi, urang Israél henteu ngusir urang Gésyur jeung urang Maakat. Maranéhna tetep cicing bareng jeung urang Israél nepi ka ayeuna.
14 Ngan kaom Léwi nu teu narima warisan ti Musa. Warisan maranéhna téh korban nu dibeuleum keur Yéhuwa Allah Israél, sakumaha jangji Anjeunna ka maranéhna.
15 Tuluy Musa mikeun tanah warisan ka kulawarga-kulawarga ti kaom Rubén. 16 Daérahna téh dimimitian ti Aroér di sisi Lebak Arnon, ogé kota nu aya di tengah lebak éta, jeung sakabéh dataran luhur Médéba; 17 Hésbon jeung sakabéh kotana nu aya di dataran luhur, Dibon, Bamot-baal, Bét-baal-méon, 18 Yahaz, Kédémot, Méfaat, 19 Kiriataim, Sibma, Zérét-syahar di gunung deukeut lebak, 20 Bét-péor, daérah di lamping* Pisga, Bét-yésyimot, 21 sakabéh kota di dataran luhur, jeung sakabéh daérah karajaan Sihon, raja urang Amori nu ngawasa di Hésbon. Musa ngéléhkeun manéhna sarta para pamingpin urang Midian, nyaéta Éwi, Rékém, Zur, Hur, jeung Réba. Maranéhna cicing di nagri éta jeung tunduk ka Sihon. 22 Biléam anak Béor, tukang ngaramal téa, kaasup di antara jalma-jalma nu dipaéhan ku pedang urang Israél. 23 Wates daérah kaom Rubén téh nyaéta Walungan Yordan. Éta tanah warisan nu ditarima ku kulawarga-kulawarga ti kaom Rubén, kaasup kota-kota jeung désa-désana.
24 Tuluy Musa mikeun tanah warisan ka kulawarga-kulawarga ti kaom Gad. 25 Daérah maranéhna téh kaasup Yazér, sakabéh kota di Giléad, jeung satengah ti tanah urang Ammon nepi ka Aroér di hareupeun Raba; 26 ti Hésbon nepi ka Ramat-mizpé jeung Bétonim, sarta ti Mahanaim nepi ka wates Débir; 27 sarta daérah lebak, nyaéta Bét-haram, Bét-nimra, Sukot, jeung Zafon. Éta téh sésa daérah karajaan Raja Sihon ti Hésbon, nu watesna téh nyaéta Walungan Yordan beulah wétan nepi ka Situ Khinérét* bagian kidul. 28 Éta tanah warisan nu ditarima ku kulawarga-kulawarga ti kaom Gad, kaasup kota-kota jeung désa-désana.
29 Saterusna, Musa mikeun tanah warisan ka kulawarga-kulawarga ti satengah kaom Manasyé. 30 Daérah maranéhna téh dimimitian ti Mahanaim kaasup sakabéh Basyan, nyaéta sakabéh daérah karajaan Raja Og ti Basyan, sarta sakabéh kampung pakémahan Yair di Basyan. Di daérah maranéhna téh aya 60 kota. 31 Ari satengahna Giléad sarta Astarot jeung Édréi, nyaéta dua kota di daérah karajaan Og di Basyan, dibikeun ka turunan Makhir anak Manasyé, nyaéta ka kulawarga-kulawarga ti satengah turunan Makhir.
32 Éta tanah warisan nu dibikeun ku Musa ka maranéhna di Gurun Keusik Moab di wétaneun Walungan Yordan, di peuntaseun Yérikho.
33 Ari kaom Léwi mah teu dibéré warisan ku Musa. Warisan maranéhna téh nyaéta kahormatan pikeun ngalalayanan Yéhuwa Allah Israél,* sakumaha jangji Anjeunna ka maranéhna.