SOMO LA 4
Yesu Kristo Hu Nani?
1. U Yesu akinga hali?
Ni mihayo ki iyo akita u Yesu bantogwe na kung’wegela wangu?—MATAYO 11:29; MARKO 10:13-16.
Kingi na munhu ungi ose ose, Yesu wikalaga ng’wigulu alisumva wa ng’nholo aho wali atalikubyalwa aha ha si. (Yohana 8:23) Wali shisumva wa kwandya o ng’wa Mulungu, nang’hwe akambilija kubumba shisumva shingi shose. Alitanwa ng’wana “waabyalwa umo wike” wa ng’wa Mulungu, kunguno ung’wene iyene huyo akasumva simbila na Yehova. (Yohana 1:14) Yesu hangi alitanwa “Mhayo” inguno yaho wali nomeji wa ng’wa Mulungu.—Somaga Sumo 8:22, 23, 30; Bakolose 1:15, 16.
2. Ni buli Yesu akiza mu si?
U Mulungu akantuma ng’wana wakwe mu si kunzila ya kusamya bupanga wakwe kwinga kwigulu na kubutula munda ya bubyaji ya ng’wibembu Nyahudi uyo akitanwa Maria. Kulwa iyo u Yesu walatina ise wa kimunhu. (Luka 1:30-35) Yesu akiza mu si (1) kulanga ng’hana ya Mulungu, (2) kutolekeja bugemeng’heji wa kutwambilija kwita shitwa shang’wa Mulungu nulu tukabiza na makoye, na (3) kufunya bupanga wakwe bushikanu bubize “kikomolelo.”—Somaga Matayo 20:28.
3. Ni buli tulitogwa kikomolelo (inong’ho)?
Ikikomolelo kinu isho shikafunyagwa kulwa kulipa kukomola munhu uyo alicholwa kubulagwa. (Kufuma 21:29, 30) Mulungu wali atahayile abanhu banamhale na kucha. Tulimana kinehe u mhayo gwenuyo? Mulungu akang’wila munhu wa kwandya, Adamu, giki, ulu wita isho i Biblia ilikinata “bubi” ni wacha. U Adamu niatitile bubi, ni atachile. (Wandijo 2:16, 17; 5:5) Gitimo i Biblia yilihaya, kucha, “kukingila” mu si mu nzila ya ng’wa Adamu. Hichene Adamu ubabitija ababyalwa bakwe bose bubi kihamo na nsango gwa bubi—kucha. Tulitogwa shikomolelo nguno tukomolwe kwinga msango gwa kucha ugo gukingila kwinga kuli Adamu.—Somaga Barumi 5:12; 6:23.
Ni nani uyo waduja kulipa shikomolelo kutukomola kwinga ng’wicha? Ulu twacha, tukalipaga nsango gwa bubi wise duhu. U munhu uyo atinshikanu atiho kuduja kulipa bubi wa bangi.—Somaga Zaburi 49:7-9.
4. Ni buli Yesu akacha?
U Yesu wali nshikanu kukila bise. Hichene atachile, kulwanguno ya shibi shakwe, kulwanguno walatali kwita shibi shose shose. Hanuma yaho, u Yesu akacha kunguno ya shibi sha bangi. U Mulungu akantuma ng’hwana wakwe ache kunguno, olekeje butogwa butale kubanhu. Yesu hangi akolekeja butogwa bo kuny’hehela baba wakwe na kufunya bupanga wakwe ku nguno ya ububi wise.—Somaga Yohana 3:16; Barumi 5:18, 19.
Tazama video Kwa Nini Yesu Alikufa?
5. U Yesu alitaki i haha?
Aho Yesu wali mu si, akabapija basatu, akabajukula abachile, akabambilija banhu abo bali mu buluhi, ahakwita giko ubiza olekejaga umo alabitila abanhu balyehu kwi kanza ilo liliza. (Matayo 15:30, 31; Yohana 5:28) Aho Yesu wamala kucha, Mulungu akanjucha ubi sumva wa ng’holo. (1 Petro 3:18) Huna, u Yesu ulinda kwipande lya nkono gwa bulyo gwa ng’wa Mulungu mpaga aho akinhwa busugi wa kutema abize Ntemi hi gulya ya si yose. (Bahebrania 10:12, 13) I haha u Yesu ali Ntemi wa ng’wigulu, na bahemba bakwe balilomela ng’hulu ja wiza mu si yose.—Somaga Danieli 7:13, 14; Matayo 24:14.
I kanza lili hihi, Yesu ikutumila ubusugi wa Butemi wakwe kubumala gete ubuluhi bose na babo baliwenheleja. Bose abo balinzunya Yesu na kuny’hehela balayegela bupanga mu si ya Paradiso.—Somaga Zaburi 37:9-11.