Neno la Mungu Li Hai

Ni Nani Wanaopaswa Kula na Kunywa?

TAREHE YA APRILI 15, baada ya jua kushuka, kutakuwako maelfu ya mikutano ulimwenguni kote kama huu unaouona hapa juu. Huu ni mwadhimisho wa ukumbusho wa kifo cha Yesu Kristo. Uangalie mkate na divai ambayo itapitishwa. Ni nani wanaopaswa kula na kunywa mifano hiyo?

Maneno ambayo Yesu aliambia mitume wake 11 waaminifu wakati alipokianzisha chakula hiki cha ukumbusho yanatusaidia kujibu ulizo hilo. Alipopitishia mitume wake kikombe cha divai, yeye alisema: “Kikombe hiki ni agano jipya katika damu yangu, [itakayomwagika] kwa ajili yenu.” (Luka 22:20) Kwa hiyo wakati kilipotokea kifo cha dhabihu cha Yesu Kristo, “agano jipya” lilianza kutendeshwa kazi. Agano “kuukuu,” au “la kwanza,” ambalo mahali palo palichukuliwa na hilo jipya lilikuwa nini?​—Waebrania 8:13.

Hilo lilikuwa agano la Torati. Lilifanywa pamoja na taifa la Israeli muda mfupi baada ya wao kukimbia kutoka utumwani huko Misri. Musa ndiye aliyekuwa mpatanishi wa agano hilo lililofanywa kati ya Yehova Mungu na Waisraeli (sawasawa na vile Yesu alivyo “mpatanishi wa agano jipya”). Dhabihu za wanyama zilizotolewa huko kwenye mlima Sinai ndizo zilizolifanya agano la Torati lianze kufanya kazi. (Waebrania 9:15-20, NW) Lakini inastahili kuangaliwa kwamba kulikuwako kundi kubwa sana la watu wasio Waisraeli waliokimbia Misri pamoja na Waisraeli. Na ingawa wao walizifurahia faida zilizotokana na agano hilo, hawakutiwa ndani ya agano lenyewe.​—Kutoka 12:38, 43-45, 48, 49.

Kuna hali inayofanana na hiyo katika agano jipya. Waisraeli wanaotajwa kuwa “Israeli wa Mungu” ndio peke yao wanaoingizwa ndani ya agano hilo pamoja na Yehova Mungu. (Wagalatia 6:16) Yesu aliitaja hesabu hiyo ndogo ya Wakristo kuwa “kundi dogo,” (Luka 12:32) Lakini, kuna “mkutano mkubwa” wa Wakristo wengine, waliotajwa na Yesu kuwa “kondoo wengine” zake. (Ufunuo 7:9, 10, 14; Yohana 10:16) Ingawa hao wanafurahia faida zinazotokana na agano jipya, hawatiwi ndani ya agano hilo.

Mtume Yohana alionyesha tofauti iliyo kati ya vikundi viwili hivyo vinavyopata faida za dhabihu ya Yesu wakati alipoeleza hivi juu ya Kristo: ‘Naye ndiye kipatanisho [kinachofunika dhambi] zetu [dhambi za “kundi dogo”]; wala si dhambi zetu tu, bali na dhambi za ulimwengu wote.’​—1 Yohana 2:2.

Basi, kwenye mwadhimisho wa ukumbusho wa kifo cha Kristo, wale walio “Israeli wa Mungu” ndio peke yao wanaopaswa kula na kunywa mifano ya mkate na divai. Kundi hilo la Waisraeli wa kiroho litakuwa watu 144,000, ambao watatawala pamoja na Kristo katika Ufalme wake wa kimbingu. (Ufunuo 14:1) Kwa upande mwingine, kundi kubwa sana la mataifa yote la “kondoo wengine” wanaofuatana nao, ambao hawali wala kunywa, litafurahia uzima wa milele juu ya dunia-Paradiso, lipokee faida za utawala wa Ufalme.

[Picha katika kurasa za 20, 21]

“KONDOO WENGINE” NA “KUNDI DOGO”